Mata 23

Magal yaŋ ta Farisa hay

(Mar 12.38-40; Luk 20.45-47; 11.39-52)

1Ara nesey, Yesu ke gweɗec kad miya hay va ndah masasəraka jene tata, gege: 2Ndah mesesərekecen ma hay majawa kad ndana hay va Farisa hay sə, ac mapa te mesesərekecen ma majawa ta Muyiz kad ndana hay. 3Menehecen yaŋ va meŋgə jə masa ac ta gwaɗakwar fakwanay. Amaa akwar ta cəp mezlər tec hay bay, afa ece gweɗey, ece ŋgə jeŋ ana aabay. 4Aca cam jene hay mandalndal ana, ece pecen fa harbazla ta ndana hay, amaa eceŋ ava yaŋ teceŋ ana, aca wal maɓəla kwa ava wut ta ha tec bay. 5Ece ŋgə mezlər tec hay fakwanay sə, afa ndana hay ece re ɗeleceŋ. Ara nesey, aca vində ma hay majawa, aca dakaɗ pe jene, aca jawaɗ fa dəŋgaɗ, daha aabay fa ha. Aca saka ma ta rəkwat teceŋ ka fəna ta ndah dərziya#Mzv 13.1-16; Mjm 6.4-9; 11.13-21.. 6Dapa macunam hay va dapa Way ta macə mbahw te Zuwef hay sə, aca wal manjah sə, fa slam ta manjah fəma ta ndana hay. 7Aca wal ndana hay ece re gweɗefec ava manah yaŋ meendey ta ndana hay. Asaya, aca wal ndana hay ec de zelec Ndah masasəraka ndana hay. 8«Amaa akwar sə, akwar ta kəsiya masa ndana hay aca ra zalakwar “Ndah masasəraka ndana hay” sə, bay, afa nda masasəraka nda takwar sə, pal amta. Asaya, akwar fakwanay, akwar malamaŋ hay. 9Akwar ta zal ndana dapa vavara nesey “Papa” bay, afa papaŋ takwar sə, pal amta masa aŋga da baymaləvaŋ. 10Akwar ta kəsiya masa ndana hay ac da zalakwar “Ndah mapada ma ta ndana hay” bay, afa nda mapada ma takwar sə, Kəristi pal amta. 11Nda mazlakava deveŋ akwar sə, da njah ka nda maŋga mezlər takwar. 12Nda mapana yaŋ tata ka nda mazlakava, ac ta vahda ka nda mekusetke ana. Nda mapana yaŋ tata ka nda mekusetke ana, ac ta baŋgaɗaɗ ka nda mazlakava. 13Wabaw kad akwar, akwar ndah mesesərekecen ma majawa kad ndana hay va Farisa hay masa neneŋ dapa ma ecew! Akwar, ndah maɓəzla ma ta way ta Wunam ta bay da baymaləvaŋ hay fəma ta ndana hay, afa akwar ava yaŋ takwar ana, akwar ta ŋgat mesehw pa aabay va masa akwa recen ma ta ndah masa aca wal medə pa. [14Wabaw kad akwar, akwar ndah mesesərekecen ma majawa kad ndana hay va Farisa hay masa neneŋ dapa ma ecew! Akwa pəreslecen jə ta ŋgwa macəhwandə hay avəda, akwa cə mbahw sə, say manjah gaa. Mafay ana, Zlav a ta təɗakwar ma yaŋ ka fəna ta ndah dərziya.] 15Wabaw kad akwar, akwar ndah mesesərekecen ma majawa kad ndana hay va Farisa hay masa neneŋ dapa ma ecew! Akwa ŋgway dapa vavara hay fəla fəla va da yaŋ yam hay mafayakfayak ana, afa akwar da ŋgat nda amta masa e de tər ka nda makəsa cəv ta makəsparav takwar. Daha akwar ka ŋgata avəda cay sə, akwar ta təraɗ ka wut ta ləhwaɓ ta kwakwaw masa e te ndəv aabay, mafəna takwar dəɓa ecew. 16Wabaw kad akwar, akwar ndah mapada ma ta ndana hay, mahazlaw hay. Akwar masa akwa gweɗey: “Daha nda masa e mbeɗ ava Way ta kwakwas sə, membeɗ tata ana ŋgesey, e ŋgə jene eleh aabay, amaa daha nda masa e mbeɗ ava gənaɓ dapa Way ta kwakwas ana sə, a lada a da ŋgana jə masa aŋga te mbeɗ ava aŋga sə, avəda”. 17Akwar ndah marəzla, mahazlaw hay! Deveŋ jene hay ecew nesey, jə masa aŋga eve mehehəm mabay sə, wula, gənaɓ geyey, Way ta Kwakwas ta Zlav mapana gənaɓ ana ŋgesey? 18Akwa gweɗ saya, gege: “Daha nda masa e mbeɗ ava taabəla ta mavə jene hay kad Zlavay, membeɗ tata ana ŋgesey, e ŋgə jene eleh aabay. Amaa daha nda masa e mbeɗ ava jə masa mava kad Zlavay mapa da yaŋ slam te mefek jeŋ ana sə, a lada a ŋgana jə masa aŋga te mbeɗ ava aŋga sə, avəda”. 19Akwar mahazlaw hay! Deveŋ jeŋ ana hay ŋgesey, jə masa aŋga eve mehehəm mabay sə, wula, jə masa mava kad Zlav geyey, slam te meŋgeŋgez təbekw kad Zlav mapana jə masa mava kad Zlavay ana ŋga geyey? 20Ara nesey, nda masa e mbeɗ ava taabəla ta mavə jene hay kad Zlavay sə, e ŋgə ŋgesey, e mbeɗ ava slam ana va jene maɗara da yaŋ ana fakwanay. 21Nda masa e mbeɗ ava Way ta kwakwas, e ŋgə ŋgesey, e mbeɗ ava Way ta kwakwas ana va Zlav masa aŋga dapa way ana. 22Nda masa e mbeɗ ava slam da baymaləvaŋ, e ŋgə ŋgesey, e mbeɗ ava slam ta manjah ta bay ta Zlavay va Zlav masa aŋga manjaha da yaŋ ana. 23Wabaw kad akwar, akwar ndah mesesərekecen ma majawa kad ndana hay va Farisa hay masa neneŋ dapa ma ecew! Akwa və zaka ta lak hay mezel mentey, fenuwey va kumey, amaa sesəker jene masa aŋga eve mehehəm mabay te meŋgey dapa ma majawa sə, akwa paɗ ara jene taambəla. Ara megweɗey, meŋgə jene ara aŋga ana, meŋgə metekwen fa nda, meŋgə mezlər eve cəvey ana. Jeŋ ana hay nesey sə, te meŋgey, bəna te meger bay. 24Akwar ndah mapada ma, mahazlaw hay, akwa jajar jə ta masə takwar ta makəsa medefeseŋ avəda dapa, amaa akwa səɗekek sə, zlagumay! 25Wabaw kad akwar, akwar ndah mesesərekecen ma majawa kad ndana hay va Farisa hay masa neneŋ dapa ma ecew! Akwar masa akwa penec dəɓa ta kwap va perentey takwar hay, anjəkar jaka hwaɗiya ana sə, ac manəha weh ava jene hay masa akwa kərekeceŋ va ava jene hay masa akwa pəreslekec vara ndana hay fa gədaŋ. 26Ka Farisa mahazlaw! Pan macaaca ana sə, hwaɗ ta kwap ana ɗagay, afa dəɓiya ana da panata may. 27Wabaw kad akwar, akwar ndah mesesərekecen ma majawa kad ndana hay va Farisa hay masa neneŋ dapa ma ecew! Akwar sə, ara jav hay makwara mesle ana, jaka a vəda sə, ece tehey fe ndey, amaa jaka hwaɗiya ana sə, ac manəha ava slaslar ta ndah maməca hay va jene hay masa aca ndara nda mekele mekele. 28Akwar sə, ara aŋga ana may. Fa yam te ndey ta ndana hay sə, akwa təra yaŋ takwar ka ndah maŋga mezlər ara aŋga ana. Anjəkar jaka hwaɗiya ana sə, akwar manəha eve neneŋ dapa ma ecew va suwe. 29Wabaw kad akwar, akwar ndah mesesərekecen ma majawa kad ndana hay va Farisa hay masa neneŋ dapa ma ecew! Akwar malama jav hay ta ndah mehwedek ma va mawzlal jav hay ta ndah maŋga mezlər ara aŋga ana. 30Asaya, akwa gweɗey: “Daha efes andə ka njah ava papaŋ ta papaŋ taciya hay zleezle sə, andə ta cam vaw eve eceŋ ta macah bembez ta ndah mehwedek ma hay sə, aabay”. 31Ara nesey, akwa tə yaw fa yaŋ takwar ana, akwar sə, akwar wudeh ta ndah makəɗa ndah mehwedek ma hay. 32Yaw e tehey, madaɗay fəma fəma! Ma ta ndəvda mezlər hay masa papaŋ ta papaŋ takwar hay ka zlara cay! 33Akwar zezekw hay, tərsam ta bay ta wudam hay! Naa akwar de mbəl fa kwakwaw masa e te ndəv aabay sə, meemey? 34Mafay ana, ya ta zləraɗ kad varakwar ndah mehwedek ma hay, ndah masa ac eve leŋgesl te meven jene hay va ndah mesesərekecen ma majawa kad ndana hay. Akwar te kəɗec va mederec ndah dərziya fa hap mazləlawa, ndah mekele, akwar te kəlepec ava laway dapa way ta macə mbahw takwar hay, dərziya hay, akwar te teterec fa wunam fa wunam, 35afa bembez ta ndah maŋga mezlər ara aŋga ana masa ac ke kəɗec avəda dapa vavara dəga fe Ebel nda maŋga mezlər ara aŋga ana kasl fa Zakaray wut ta Barasi, masa akwar ta kəɗiya dapa walaŋ ta Way ta kwakwas va slam te meŋgeŋgez təbekw kad Zlavay sə, da hufakwar yaŋ. 36Eve metehwe ana ya gwaɗakwar, bembez ta ndah ana ŋgesey, e te hufec yaŋ ndah ta pəsna nesey.»

Yesu a kuɗa mafay te Zeruzelem

(Luk 13.34-35)

37«Zeruzelem, Zeruzelem, kaa mabazla ndah mehwedek ma hay va makala maslaŋ hay masa Zlav ta zlərakaa, dəɓa gaa hay, ya ka wal meɓəcec wudiyak hay ara mamaŋ siyakw ta ɓac wudiya hay pa pərkwasla tata, amaa akwar ka walaw aabay. 38Yaw e tehey, Way ta Kwakwas takwar a ta gərata, a ta mbəɗata, 39afa ya gwaɗakwar, e zler təlam nesey, akwar te weleyey ɓasabay kasl pa pas masa akwar te gweɗ: “Mapəs ma de ŋgey da yaŋ nda masa e dek eve mezel ta Bay Mazlakava.”»

Actualmente seleccionado:

Mata 23: CUVnt

Destacar

Copiar