Mata 24

Yesu a slaf membeɗ ta Way ta kwakwas

(Mar 13.1-4; Luk 21.5-7)

1Yesu ka dakata a vəda dapa Way ta kwakwas, dapa masa a daɓa, ndah masasəraka jene tata ac ka ŋgucafa vaw ka ta ŋguzdan meteh te melem ta Way ta kwakwas. 2Ara nesey, Yesu ka kəs ma, gege: «Akwa wala jene hay fakwan na biba? Eve metehwe ana, ya gwaɗakwar, way nesey sə, kwa kekeŋ e te zek da yaŋ kekeŋ aabay. Ac ta mbəɗa avəda fakwanay.» 3Ara masa Yesu aŋga manjaha fa ŋguɗa ta Awliviyey hay, ndah masasəraka jene ac ka ŋgucafa vaw babəla teceŋ, ka ta nəkafa, gege: «Gwaɗandaw, jeŋ ana e te ŋgə ewey? Me te ŋguzdek pas te medek takaa va mendəv ta vavara sə, jene mey?»

Mezler ta marga hay ta vavara

(Mar 13.5-13; Luk 21.8-19)

4Yesu ke vehecen, gege: «Mepə leŋgesl, a lada kwa ndana da zlakdakwar bay, 5afa ndana hay gaa ec te dekey eve mezeley aɗaw, ec te gweɗ, gege: “Yey sə, ye Kəristi”. Ara nesey, ec te zlekdec ndana hay gaa. 6Akwar ta cəna labara ta vəram hay mezef ana va labara ta vəram hay masa dereŋ ava akwar. Map leŋgesl! A kwar te kekesl bay. A lada jeŋ ana ŋga da ŋgata ɗagay, amaa ŋgesey ana sə, mendəv ta vavara bay heley, 7afa tərsam ŋgeɗey a ta ŋgə vəram ava tərsam leŋgeɗey, bay ta wunam ŋgeɗey a ta ŋgə vəram ava bay ta wunam leŋgeɗey. May e te ŋgə dapa slam hay mekele mekele va vavara a ta ɓəla vaw. 8Jeŋ ana hay fakwanay nesey, ec te ŋgə ara mezler te mehec hay te mesəfey. 9Dapa ŋgesey, ac ta paɗakwar pa ha ta ndana hay, ac ta ŋgadakwar hahar, ac ta kəɗakwar avəda cukw cukw. Tərsam hay fakwanay ac ta walakwar fe ndey bay mafay taaɗaw. 10Dapa pas ana hay ŋgesey, ndana hay gaa ac ta gərda makəsparav. Ac ta vana malamaŋ tec hay avəda amta amta ke te kəɗey, ac ta wala ndey fa vaw tec bay. 11Ndah mapana yaŋ tec ka ndah mehwedek ma gaa ec te dekey, ec te zlekdec ndana hay mabay. 12Meŋgə suwe e te zlezləney fəma fəma, mawal vaw a ta taslata dapa ndana hay gaa. 13Amaa nda masa ka sasala vaw kasl pe memeɗey ana sə, a ta mbəlata. 14Labara mambəla ana da yaŋ Wunam ta bay sə, a ta ŋguzdata dapa vavara fakwanay, afa ndah masa aca sən Zlav bay aca ra ŋgat matə yaw da yaŋ ana. Ara nesey, mendəv ta vavara e te dekey.»

Marga mazlakava

(Mar 13.14-23; Luk 21.20-24)

15Yesu ke gweɗec saya, gege: «Pas masa akwar ta wala: “Jə masa a ndara nda magədasa jene”, dapa slam mavəna ara masa nda mehwedek ma Deniyel te gweɗey sə, a lada nda majaŋga ma ana da cəna mambəla ana. 16Dapa ŋgesey ana, ndah masa ac ta njah dapa vavara te Zudey aca ra hwaɓa kad pa wudam hay. 17Nda masa a ta sasak vaw da yaŋ way tata sə, e te bəreŋgə ke te kəs jene da hwaɗ ta way bay. 18Nda masa e te də kad ley sə, e te veh kad wunam ka ta kəs rəkwat tata bay. 19Wabaw kad ŋgwazah ava hwaɗ va ŋgwazah masa ac ava wudeh masa aca sə wa dapa manah hay ana ŋgesey. 20Macə mbahw kad Zlavay, afa mahway takwar ana e de ŋgə dapa kiya te memeɗ bay, kwa dapa pas ta masasak vaw te Zuwef hay bay, 21afa dapa pas ana ŋgesey, marga mazlakava ana e te ŋgey. Marga ana nesey, ke ŋgə dəga mezler ta vavara kasl pəsana nesey sə, aabay heley, e te ŋgə ava dəɓa ana ara nesey sə, ɓasabay. 22Daha Zlav ka vahafa pas ana hay ŋga aabay sə, kwa nda amta e te zek eve ndey aabay. Amaa Zlav a ta vahafa pas ana hay ŋgesey sə, mafay ta ndah masa aŋga te peleceŋ. 23Ara nesey, daha ndana a gwaɗakwar: “Kəristi sə, aŋga kana”, daha aabay “aŋga katay” sə, akwar ta kəsiya bay. 24Eve metehwe ana ya gwaɗakwar, ndah mapana yaŋ tec ke Kəristi va ndah mapana yaŋ tec ka ndah mehwedek ma, ec te təhekey. Ac te ŋgə cah hay mazlakava va jə marəzla nda hay ka ta zlak ndana hay. Daha e ŋgefeceŋ sə, kwa ndah masa Zlav ke peleɗec ha, ec te zlekdeceŋ. 25Mawala, ya ka gwaɗakwaɗ ma ana ha dəga təlam nesey.»

Mevehek ta Wut ta Nda

(Mar 13.24-31; Luk 17.23-24; 21.25-31)

26Daha aca gwaɗakwar, gege: «Aŋga kana fana dapa yaŋ ta səɓak sə, akwar ta də bay. Daha aabay Aŋga maraɓa fana sə, akwar ta kəsiya bay.» 27Ara masa mewecəkeɗ ta yam te ŋgek dapa dar e weɗ kasl a ma ta wudam, ara aŋga ana e te ŋgə eve medek ta Wut ta nda. 28Dapa slam masa jene maməca ɓa sə, mandasltabay hay aca kwas vaw faŋga. 29Faŋga faŋga ava dəɓa ta marga dapa pas ana hay ŋgesey, pas a ta tərata ləvaŋ, kiya e te weɗ ɓasabay, menjewzle hay ec te kwiyekec da baymaləvaŋ kad fa vara, gədaŋ hay mazlakava da baymaləvaŋ ac ta ɓəla vaw. 30Ara nesey, jə me te ŋguzdek medek ta Wut ta nda sə, e te təhek da baymaləvaŋ. Ara nesey tərsam hay dapa vavara fakwanay ac ta kəɗ rav. Ac ta wala Wut ta nda e te dek da yaŋ zlav ta yam da wudam manəha ava gədaŋ mazlakava va membeɗey. 31Dərem mazlakava ana e te fətey, ara nesey, Zlav e te zlerdec maskəla tata hay kad dərgazlav hay faɗanay ke te kwesekec ndah masa aŋga te peleɗec ha ka ndah tata. 32Macəna ma da yaŋ mesesərek ta ma maɗəva ava maftay. Daha masa akwa wala maftay maɗa, e zerɗek deslesle sə, ŋgesey akwa səniya kiya te medə kad ley hwak cay. 33Ara aŋga ana akwar may, daha akwa wala jeŋ ana hay fakwanay ece ŋgə ara nesey sə, ŋgesey masəna, Wut ta nda aŋga hukw te mevehek cay, aŋga fəma ta way takwar hay. 34Eve metehwe ana ya gwaɗakwar, jeŋ ana hay fakwanay nesey ec te ŋgec ɗagay, wagaa ndana hay ta pəsana, ac ta məcay. 35Slam da baymaləvaŋ va vavara sə, ec te ndəveceŋ, amaa ma aɗaw hay ec te ndəv aabay.

Ndana masən pas ana aabay, manjah eve ndey

(Mar 13.32, 35; Luk 17.26-27, 34-35; 12.39-40)

36«Amaa pas ana va ler ana sə, ndana masəniya aabay, kwa Maskəla hay da baymaləvaŋ, kwa Wudiya, kwa ndana masən pas ana aabay, masəna pas ana sə, say Zlav Papaŋ, pal amta. 37Jene hay masa ec ke ŋgey dapa pas te Nuwe sə, ac te ŋgə ara aŋga ana dapa pas te mevehek ta Wut ta Nda, 38afa ara masa jeŋ ana hay ac ke ŋgey wagaa yam mazana vavara e te ŋgey, dapa pas ana hay ŋgesey, ndana hay aca ndə jene, aca sə jene, aca kəs ŋgwaza hay, aca və dehw tec hay kad way ta mawal kasl pa pas masa Nuwe te sehw pa kaslkaslah, 39kwa ndana masəna jə masa e te ŋgetefeceŋ sə, aabay kasl pa pas masa yam mazana vavara te ŋgey, ke həlec avəda fakwanay. Pas te mevehek ta Wut ta nda sə, e te ŋgə ara aŋga ana. 40Pəsaŋga ana ŋgesey, daha ndah ecew ec de ley, nda amta a ta kəsata, nda leŋgeɗ a ta gərata. 41Daha ŋgwazah ecew ac ta hayə daw fe ləgeŋ amta sə, ŋgwaz amta a ta kəsata, ŋgwaz leŋgeɗ a ta gərata. 42Ara nesey, manjah eve ndey, afa akwa san pas ana wula masa Bay takwar Mazlakava e te vehek sə, bay. 43Akwa səniya, daha bay ta way a san ler masa makar e te dek kad way tata ta vaɗ sə, a ta njah eve ndey, a ta pəlan ma ta makar ana da zləlan way tata aabay. 44Mafay ana, akwar may, maləmada vaw mambəla ana, afa Wut ta nda e te vehek sə, fe ler ana masa akwar ka wulakaw aabay ŋgesey.»

Nda maŋgana mezlər eve cəvey ana

(Luk 12.42-46)

45Nda maŋgana mezlər eve cəvey ana va masa aŋga eve leŋgesl sə, wa? Nda ana sə, aŋga nda masa bay ta way tata ka paɗ ka nda mapana ndey fa ndah maŋga mezlər da hwaɗ ta way tata ke te vec jə ta manday daha pas ana ka husakata. 46Mapəsma ɓa kad nda maŋga mezlər masa bay ta way tata e te vehekey, a ta ŋgatafa aŋga dapa meŋgə mezlərey ana. 47Eve metehwe ana ya gwaɗakwar, bay ta way ana, a ta paɗ a yaŋ zleley tata hay fakwanay. 48Amaa daha nda maŋga mezlərey ana aŋga eve suwe, a wulakiya dapa rav tata, gege: «Bay ta way aɗaw ana, e te vek zef aabay», 49ara nesey, a zlar meŋgedec marga kad ndah maŋga mezlər hay ara aŋga, a ndə jene, a sə wuzam ava ndah makwa ana hay. 50Bay ta way ta nda maŋga mezlərey ana ŋgesey, e te vehek sə, dapa pas masa nda maŋga mezlərey ana ka wulakaw aabay va fe ler masa a səniya bay. 51A ta mbasana, a ta ŋgada marga masa e teh teh bay, a ta vana meyev tata ara ta ndah masa neneŋ dapa ma ecew. Dapa faŋga sə, makuɗa hay va mapaɗ zleŋ hay.

Actualmente seleccionado:

Mata 24: CUVnt

Destacar

Copiar