Mata 22

Macunam ta madəmay

(Luk 14.15-24)

1Yesu ke gweɗec ava ma hay maɗəva saya, gege: 2«Wunam ta bay da baymaləvaŋ hay sə, aŋga ara bay ɓa ta ŋgan macunam ta madəm ta wudiya. 3Ke zlerdec madərlam tata hay ke te zelekec ndah masa ac mazala kad pa macunam ana. Amaa ndah ana aca gwam ke də bay. 4Ava dəɓa ana, ke zlərdec madərlam tata hay mekele, ec de gweɗec ndah mazala, gege: “Ya ka ləmada jə ta mandə hay təlam na cay, mar ta zla hay va gənaw hay marəfa sə, ye ke zlehec avəda cay. Jene hay fakwanay maləmada cay, medekey kad pa macunam”. 5Amaa eceŋ sə, kwa ac ke pə leŋgesl fa ma ana aabay. Ndah leŋgeɗey, ec ke dec e ley, ndah leŋgeɗey ec ke dec pa maŋgaɓa fəlew teceŋ. 6Ndah dərziya, ac ka təhaza madərlam ana hay avəda, ec ke ŋgedec hahar, ec ke kəɗec avəda ka macəhwandaw. 7Bay sə, ka zəmana fa rav, ka zlar kafaraŋ tata hay ka ta kəɗ ndah makəɗa nda ana hay ŋgesey va ka ta ndal wunam teceŋ. 8Ava dəɓa ana, ka gwaɗa madərlam tata hay dərziya, gege: “Ɗaf hay ta macunam fakwan mata cay, amaa ndah mazala, ac ka husa ka ndah mazala hay sə, aabay. 9Ara nesey, madaɗay pe mewezləŋger te cəv hay, mezelekec kwa waawa masa akwar ta ŋgatiya fakwanay kad pa macunam ana”. 10Madərlam tata hay sə, ec ke dey pe mewezləŋger te cəv hay, ec ke zelekec ndah mambəla ana va ndah mambəla ana aabay fakwanay. Way ta mandə ɗaf ta macunam ta madəmay ana ka nəhata kaf ava ndah mazala. 11Mesehw ta bay kad way ka ta ndandazl ndah mazala sə, e te pə ndey baa fa ndana ɓa aŋga ava rəkwat ta macunam ana fa vaw aabay. 12Ka gwaɗa, gege: “Guula aɗaw, ka ava rəkwat ta macunam fa vaw takaa aabay sə, ke sehwek kad way ana fana meemey?” Nda sə, manjaha teete. 13Ara nesey, bay ke gweɗec ndah mavəna ɗaf kad ndana hay, gege: “Majawan sek va ha tata hay, makazlaɗ pa ləvaŋ a vəda pa slam masa makuɗa va mapaɗ zleŋ dapa”. 14Eve metehwe ana, ndana hay gaa ac mazala, amaa mapala sə, ndana hay gaa aabay.»

Budaw te mepel kad Sizar

(Mar 12.13-17; Luk 20.20-26)

15Ara nesey, Farisa hay ec ke dey, ac ka cə mamənak, afa aca ra cakiya jaka pa ma hay. 16Ac ka zlar ndah masasəraka jene tec hay dərziya va gəva ta ndah ta bay Herawt dərziya ka ta nəkafa Yesu, gege: «Nda masasəraka nda, anda səniya kaa sə, ke gweɗ eve metehwe ana, ke sesərekec cəv ta Zlavay kad ndana hay sə, tehwe ana kwa eve melel fa ndana hay aabay, kwa ava mapal ndana hay meepel aabay. 17Ara masa ka wulakiya, gwaɗandaw, cəv mava ta mapal budaw kad Sizar geyey, aabay geyey?» 18Amaa Yesu ka səna wewer tec masa e teh bay sə, avəda, gege: «Akwar ndah masa neneŋ dapa ma ecew, akwa ŋgeyiyey eve dəɓel ara nesey sə, mafay te mey? 19Maŋguzdawa yam ta səlay masa mapal budaw ava aŋga.» Ac ka ŋguzdana yam ta səlay ana amta. 20Ara nesey, Yesu ana, ke nəkefec, gege: «Fa səlay ana nesey sə, meezeŋ va mezel ta wa?» 21Ac ka vahan, gege: «Ta Sizar.» Ara nesey, gege: «Jə ta Sizar sə, mavan kad Sizar ana, jə ta Zlavay, mavan kad Zlavay ana may.» 22Masa aca cəna ma ana ara nesey sə, ec ke rəzlec mabay, ac ka gərda, ac ka data.

Mepərek ta ndana hay dapa maməcay

(Mar 12.18-27; Luk 20.27-38)

23Pəsaŋga ana ŋgesey, Saaduki hay ac ka ŋgucafa vaw Yesu. Eceŋ sə, ac ndah megweɗ: «Ndana ka məcata cay sə, e pərek dapa maməc ɓasabay.» Ac ka nəkafa ara nesey: 24«Nda masasəraka nda, Muyiz ke gweɗ, gege: “Daha ndana ka məcata ka ŋgat wut aabay, malamaŋ a kəs ŋgwa macəhwandaw ana, afa a da hayana wudeh kad malamaŋ”. 25Yaw, ndana hay ɓa tasəla da varandaw, ac malamaŋ hay. Malamaŋ tec mazlakava masa aŋga ava ŋgwaz, ka məcata, kwa ka ŋgat wat ava ŋgwaza aabay. Ara nesey, ka gəran ŋgwaz ana kad malamaŋ. 26Ara aŋga ana, e ŋgə ava malamaŋ meecew ana, mamahkar ana kasl fa malamaŋ tec matasəla ana. 27Ava dəɓa teceŋ, ŋgwaz ana ka məcata may. 28Ara nesey, dapa mepərekek ta ndah maməca sə, deveŋ eceŋ tasəla nesey, ŋgwaz ana a ta njah ka ŋgwaz ta walawa? Afa ac fakwanay, ac ka kəsaw ka ŋgwaz!» 29Yesu ke vehecen, gege: «Akwa ŋgə sə, akwa wal mezlekey, afa akwa sən Ɗelewer mavəna bay, kwa gədaŋ mazlakava ta Zlavay. 30Eve metehwe ana, pas te mepərekek ta ndana hay dapa maməcay sə, mawulah va ŋgwazah ac ta kəs vaw ɓasabay, ac ta njah ara maskəla hay da baymaləvaŋ. 31Da yaŋ mepərekek ta ndana hay dapa maməcay sə, akwar ka jaŋgə ma masa Zlav ta gwaɗakwar sə, aabay geyey? Ke gweɗ, gege: 32“Yey, ya Zlav ta Abəraham, ya Zlav ta Izak, ya Zlav ta Zakwab.”» Aŋga Zlav ta ndah maməca bay, amaa ta ndah masa ac eve ndey. 33Miya hay macəna ma ana nesey sə, ec ke rəzlec da yaŋ mesesərek tata ana.

Ma ta ma majawa mazlakava

(Mar 12.28-34; Luk 10.25-28)

34Masa Farisa hay aca cəna Yesu ke vəresec ma yaŋ Saaduki hay sə, ac ka cama vaw. 35Nda amta deveŋ eceŋ ɓa, aŋga nda mesesərekecen ma majawa kad ndana hay, ka nəkafa Yesu ka ta ŋgiya, gege: 36«Nda masasəraka nda, ma mazlakava deveŋ ma ta ma majawa dapa ma majawa sə, wula?» 37Yesu ka gwaɗa, gege: «“A lada ka wal Bay Mazlakava Zlav takaa ava rav takaa fakwanay, eve mesfeney takaa fakwanay, ava mawulak yaŋ takaa fakwanay”. 38Nesey, ma ta ma majawa masa aŋga macaaca ana, aŋga mazlakava mafəna ana. 39Wala, ma ta ma majawa meecew ana masa aŋga eve mehehəm mabay may: “Wal maslavda takaa ara yaŋ takaa”. 40Ma hay majawa ta Muyiz va mesesərek ta ndah mehwedek ma hay fakwanay sə, ac mazlaca da yaŋ ma hay ta ma majawa ecew nesey.»

Wudeh te Deevet va Bay Mazlakava tata

(Mar 12.35-37; Luk 20.41-44)

41Ara masa Farisa hay ac ka cam vaw sə, Yesu ke nəkefec ma, gege: 42«Mawulak yaŋ takwar da yaŋ Kəristi gwagumaw? Aŋga sə, tərsam ta wa?» Ac ka vahan, gege: «Aŋga tərsam te Deevet.» 43Yesu gege: «Naa daha Deevet ana ava gədaŋ te Mesfen Mavəna a zala, Bay Mazlakava sə, a ŋgana gwagumaw? Afa Deevet ana ke gweɗ, gege:

44“Bay Zlavay ka gwaɗa Bay aɗaw Mazlakava,

dek njah da ha ta zam aɗaw,

kasl pa pas masa ye te peɗec maslagəra takaa hay a hwaɗ ta ha takaa.”

45Yaw, daha Deevet a zal Kəristi Bay Mazlakava sə, naa a da njah ka tərsam tata sə, a ŋgana gwagumaw?» 46Kwa nda amta dapa taɓa teceŋ ka zlafa mavahan ma ana aabay. Dəga ta pəsaŋga ana ŋgesey, kwa ndana mawulaka yaŋ ta manəkafa ma aabay.

Actualmente seleccionado:

Mata 22: CUVnt

Destacar

Copiar