MATEU 9
9
1Hakwijila cheŋi muwatu, hakuzambukila kwishinadi, hakushika mumukala windi yomweni. 2Kutala hiyakumuletela muntu wakata kalepa, nakami hakadidi. Yesu chanamoniyi kukuhwelela kwawu, hakumwila owu wakata kalepa nindi, Eyi mwanami, tiyaku kuwaha; anakwanakeni nyiloŋa yeyi. 3Ansoneki amu hiyakwila munyichima yawu nawu, Iwu muntu wudi nakutuka Nzambi. 4Yesu hakwiluka yitoŋojoka yawu, hakuyila nindi, Muloŋanyi mudi nakutoŋojokela yatama munyichima yenu? 5Chaswayi kumwila muntu nami, Anakwanakeni nyiloŋa yeyi, tahindi chaswayi kumwila nami, Hindukaku, endaku? 6Ilaŋa nalondi mwiluki nenu Mwana kamuntu wukweti wanta wakwanakena antu nyiloŋa hanu hamaseki. Hakumwila owu wakata kalepa nindi, Hindukaku, nonaku kadidi keyi wuyi kwitala deyi. 7Hakuhinduka, hakuya kwitala dindi. 8Mazaza awantu chanamonuwu ochu, hiyakutiya woma, hiyakumulemesha Nzambi wenkeli antu wantowu.
9Chadiŋi nakupandakanayi Yesu nakufuma kwenoku, hakumona muntu ijina dindi Matewu, nashakami kwakutambwila nyombu; hakumwila nindi, Nlondi. Hakunyamuka, hakumulonda.
10Chashakaminiyi mwitala nakudya, kutala ansonkeshi nawakwanshidi amavulu hiyakwinza nakushakama chimu naYesu niatumbanji twindi. 11Chanachimonuwu aFwarisi, hiyakuyila atumbanji twindi nawu, Nkuluŋaŋa yenu wadiilaŋadi nawansonkeshi nawakwanshidi? 12Chanachitiyiyi, hakwila nindi, Akola hiyakeŋakeŋaŋa chimbukuku, chiŋa akata. 13Yenu mwakashinshiki mazu elawu nawu, Nakeŋi luwi, bayi chimuna chakuketulaku; muloŋa hinenzi nakutambika aloŋaku, nenzi nakutambika akwanshidi.
14Henohu atumbanji twaYowanu hiyakwinza kudi yena nawu, Etu nawatumbanji twawaFwarisi twasweja kujiŋojoka nakuleka kudya, hakwila atumbanji tweyi hiyajiŋaŋaku. Chafumaŋa hanka? 15Yesu hakuyila nindi, Adi nansumbuli akuneŋa ŋahi hachiduwu nansumbuli? Mafuku akenza akafumishawu nsumbuli kudi wena, dihu hakajiŋojokawu nakuleka kudya. 16Hikudi muntu wukusha chitabu chehina dadiha kuchikovwelu chachikuluku; mukunkulwayi ochu chadiŋi chakujikamu nachu chikutabula chi kovwelu, chiloku chikusweja kutoha. 17Hikudi muntu wukulona vinyu yayiha munjeki jayitembi yayikuluku; neyi wukwila ochu, njeki jayitembi jikubuzika, vinyu yikumwaŋala, ninjeki jayitembi jikukisika; vinyu yayiha ayiloŋaŋa munjeki jajiha, dichi yejima yikwikala yayiwenyi.
18Chahoshelaŋayi nawu yumiyi, kutala hikukwinza nyuli wumu, hakudifukula kudi yena nindi, Mwanami wamumbanda nafwi dehi katatakichi; hela chochu, inzaku wumunaŋiki chikasa cheyi, wukuhanda. 19Yesu hakunyamuka, hakumulondela niatumbanji twindi hamu. 20Kutala mumbanda wapwekelaŋa mashi nyaka ikumi nayiyedi, hakwinza kunyima yindi, hakukunka kumukundulu wehina dindi; 21muloŋa welili mumuchima windi nindi, Hela nukukunka kwakwihina dindi hohu, nukukola. 22Ilaŋa Yesu hakushetumuka, hakumumona; hakumwila nindi, Eyi mwanami, tiyakukuwaha; kukuhwelela kweyi kunakukoleshi dehi. Kufuma hampinji oyu owu mumbanda akola nikukola. 23Chanenziyi Yesu mwitala danowu nyuli, hakumona akwakwimba yisanji, niizaza dawantu adi nakuleta ipumba.
24Hakuyila nindi, Fumenumu; mwana hanafuku, wudi namutulu. Hiyakumuseha chakumudiwula. 25Izaza chidinediki, yena hakwijila mu, hakumukwata kuchikasa, owu mwana wamumbanda hakunyamuka. 26Mpuhu yachumochu yitiyakana ni mwituŋa dejima.
27Chadiŋi nakuhitayi Yesu nakufuma kwenoku, amayala amputamesu ayedi hiyakumulonda nakubilela nawu, Eyi Mwana kaDavidi, tutiyili luwi. 28Chanepiliyi mwitala, owu amputamesu hiyakwinza kudi yena; Yesu hakuyila nindi, Enu munetiyi nenu ami natweshi kwila chumichi, tahindi? Hiyakumwila nawu, Eŋa Mwanta. 29Dichi hakuyikunka kumesu awu nindi, Mwashika kukuhwelela kwenu dimu mwakuyililawu. 30Nimesu awu atona nikutona. Yesu hakuyihosha chakola nankashi nindi, Bayi achiluka kudi muntuku. 31Ilaŋa wena hiyakuya nakutiyakesha mpuhu yindi mwituŋa odu dejima.
32Hayilaŋawu, kutala hiyakumuletela kamama wazakukaŋa demoni. 33Owu demoni chanafumiyi, kamama hakuhosha; mazaza awantu hiyakuhayama nawu, muIsarela kanda amonaŋahu dehi chuma chidi neyi ichuku. 34Ilaŋa Fwarisi nawu, Wudi nakufumisha ademoni naŋovu jamwanta wawademoni. 35Yesu hakutambatamba munyikala yejima, niyamaneni niyanyanya, nakuyileja mumashikolawu, nakushimuna nsaŋu yawanta yayiwahi, nakuuka nyisoŋu yejima niyikatu yejima. 36Ilaŋa chanamoniyi mazaza awantu, hakuyitiyila wushona, muloŋa akabakeni, apalaŋeni neyi nyikoku yakadi kabiŋa. 37Henohu hakuyila atumbanji twindi nindi, Chalala mbutu jajivulu jinahi dehi, ilaŋa akwakukalakala anakehi. 38Dichi lombenu kudi Mwanta wakumuna atemeshi akwakukalakala kukumuna kwindi.
Actualmente seleccionado:
MATEU 9: MW62
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
The Bible in Lunda: Ndembu (Lunda of Kalunda) © B. F. B. S. 1962.
