MATEU 8
8
1Chanakunkumukiyi hampidi oyu, mazaza awantu hiyakumulondela.
2Mukwambumba hakwinza nakudifukula kudi yena nindi, Mwanta, neyi wuneteji, wukutwesha kuntookesha. 3Yesu hakwolola chikasa chindi, hakumukunka nindi, Neteji, tookaku. Hohenohu musoŋu windi wambumba wutooka nikutooka. 4Yesu hakumwila nindi, Babalaku, bayi wulejamu muntuku; ilaŋa yaloŋa kweyi wakadimwekeshi kudi kapristu, wakahani mushiŋa wayilejeluwu kudi Mosi, kulonda chakayilili antu wunsahu.
5Chanepiliyi muKaperinawu, kudi yena hikukwinza senturinu, 6hakumulembelela nindi, Mwanta, ŋamba yami nakami kwaami, wakata musoŋu wakalepa, wudi nakukaba nankashi. 7Yesu hakumwila nindi, Nukwinza nakamúuki. 8Senturinu hakumwakula nindi, Mwanta, ami hinatela eyi kwijila mwitala damuku, kumina dakuhosha kwezu hohu, ŋamba yami wukukola. 9Muloŋa ninami nawa ni kweti anyanta jami, ni kweti mashidika aŋovwahilaŋa, nelaŋa iwu nami, Yaŋa, hakuya; mukwawu nami, Inzaŋa, hakwinza; nduŋu yami hinukumwila nami, Ilaku ichi, hakuchila. 10Yesu chanachitiyiyi hakuhayama, hakuyila adiŋi nakumulonda nindi, Nukuyileja chalala nami kanda nimonaŋahu dehi kukuhwelela kwatoha chochichuku, hela muIsarela mwamweni. 11Nukuyileja nami amavulu amba kafuma kumusela nikumujika, akashakama naAbarahama naIsaka niYakoba muwanta wamwiwulu; 12hakwila anyana kawanta aweni akayumbila kumwidima wahanzi, kwakekala kutumpa nikudisumona kumaji. 13Yesu hakumwila owu senturinu nindi, Yaŋa kweyi; muwunakuhweleli dimu mwakukwililawu. Owu ŋamba wakoleli mpinji yoyenoyu.
14Chanepiliyi Yesu mwitala daPetulu, wamweni mawenu yaPetulu nakami, wakata mashika. 15Hakumukunka kuchikasa chindi, mashika amufuma nikumufuma, hakuhinduka nakumukalakela. 16Chikuneli melela, hiyakumuletela amavulu adiŋi nakuzakuka ademoni, hakufumisha ademoni nezu, hakuuka adiŋi akata ejima; 17kulonda mwahosheliyi kaprofwetu Isaya mwakalumbuluki, mweliliyi nindi, Yomweni watambwili kuzeyazeya kwetu, wasendeli nyisoŋu yetu.
18Nochu Yesu chanamoniyi mazaza awantu amavulu hiyakumuwuŋila, hakwila nindi, Tuyenu mwishinadi. 19Hikukwinza nsoneki wumu, hakumwila nindi, Eyi Nkuluŋaŋa, nukukulonda kwejima kuwukuya. 20Yesu hakumwila nindi, Anyumbu akweti menawu, niatujila ahaluzwizu akweti yisakala yawu, hakwila Mwana kamuntu hakweti nihakusachila namutu winauku. 21Kambanji mukwawu hakumwila nindi, Mwanta, leki nisambili kuya nakajiiki tata yami. 22Ilaŋa Yesu hakumwila nindi, Nlondami; yileki afu ajiiki afu jawu awenawu.
23Chanepiliyi muwatu atumbanji twindi hiyakumulonda. 24Hikukwinza mpepela yeneni nankashi hameji, yakwila watu hiwukujimina mumankanda; ilaŋa yena kwindi wadiŋi namutulu. 25Wena hiyakwinza kudiyena, hiyakumuhindwisha nawu, Mwanta twamwini, tunafwi! 26Yena hakuyila nindi, Enu mukweti kukuhwelela kwanti, munatiyi woma wanka? Hakuhinduka, hakuhoshola mpepela nimeji, kuwunda nizo-o nankashi. 27Antu owu hiyakuhayama nawu, Yeniwu muntu wekala ŋahi, chamwovwahilaŋawu kudi mpepela nimeji?
28Chanashikiyi mwishinadi mwituŋa dawaGadareni, antu ayedi hiyakumubulakana, azakukaŋa ademoni, adi nakufuma kumajamu, asweja kuzuwa nankashi, kuzuwa kwakukaŋesha antu kuhita njiloyu. 29Kutiya wena hiyakubilela nawu, Tukwiladi naneyi, eyi Mwana kaNzambi? Eyi wunenzi kunu nakutukabisha hachidi mwaka kanda wushiki, tahindi? 30Dichi hahalehi nawena hadiŋi izanvu dawaŋulu amavulu enda adya. 31Owu ademoni hiyakumulembelela nawu, Neyi wukutufumishamu, tutemeshi mwizanvu dawaŋulu. 32Hakuyila nindi, Yenu. Hiyakufumamu, hiyakwijila mudi aŋulu; izanvu dejima danduka nikwanduka, hidikuya mwakunkumuka nankashi nimwijiya chu-u, afwa nimumeji. 33Owu ayidiishilaŋa hiyakutemuka, hiyakuya kumukala, hiyakuleja antu yuma yejima, niyamwenuwu owu adiŋi azakuka ademoni. 34Kutala antu amumukala wejima hiyakwinza nawu amubulakani Yesu; chanamuwanuwu, hiyakumulembelela nawu afumi mwituŋa dawu.
Actualmente seleccionado:
MATEU 8: MW62
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
The Bible in Lunda: Ndembu (Lunda of Kalunda) © B. F. B. S. 1962.
