MATEU 10
10
1Hakutambika atumbanji twindi ikumi nayedi, hakuyinka wanta wakufumisha ademoni azonda, niwakuuka nyisoŋu yejima niyikatu yejima. 2Tiyenu majina anowu apostolu ikumi nayedi: watachi Shimona, atumbiluwu nawu Petulu, namana kwindi Anderi; mwana kaZebedewu Yakoba, namana kwindi Yowanu; 3Fwilipu naBatolomewu; Tomasi nansonkeshi Matewu; mwana kaAlafwewu Yakoba, naTadewu; 4mukwaKenani Shimona, naYudasi Isakaroti, diyi wamufukejeli nawa.
5Yesu hakutemesha wenawa ikumi nayedi, hakuyileja nindi, Bayi muya munjila jawaJentili, hela kwijila mumukala wawaSamariyaku; 6chiŋa kuya kudi anyikoku amutaŋa waIsarela ajimbala. 7Chimukuya, muyaloŋa nakushimuna nenu, Wanta wamwiwulu wudi kwakwihi. 8Kayukenu akata, kasaŋulenu afu, katookeshenu akwambumba, kafumishenu ademoni. Kutambula, munatambuli chamukunkulu; kuhana, kahanenu nawa chamukunkulu. 9Bayi mudikeŋela hela wuru, hela siliva, hela wuneŋu muyikwama yenuku; 10hela ipakumuna dakuya nachu munjila yenu, hela tuhuma tuyedi, hela nkwabilu, hela mbwechi nehi, muloŋa mukwakukalakala watela yakudya yindi. 11Nimunyikala yejima yimwakeŋa ila, hela yeneni, hela yanyanya, mwakakeŋakeŋamu yowu wudumu watela, kwoku kumwakashakama nichimwakafumaku. 12Chimwakeŋa ila mwitala mwakemwisha akwetalodu. 13Neyi akwetalodu atela, kuwunda kwenu kwakekalumu; ilaŋa neyi hiyatelaku, kuwunda kwenu kwakayifuntili cheŋi. 14Yowu wakabula kuyitambula hela kutiyilila mazu enu, chimwakafuma mwitalodu, hela mumukalowu, wakadikumuna lunkuŋu ludi kunyendu yenu. 15Nukuyileja chalala nami, hefuku dakusompesha ihuŋu detuŋa daSodoma naGomora dakakuminamu, damukalowu dakabadika.
16Tiyenu, hinukuyitemesha neyi anyikoku mukachi kawatuŋiwidi, dichi ikalenu nama ana neyi atupela, kuwunda wundenu neyi atutela. 17Hakwila antu yibabelenu, muloŋa akayihana kuyota, akayivupola mumashikolawu; 18mwamweni, akayitwala ni kumesu awanguvulu, ni kumesu awanyanta, kukoola nsaŋu yamami, kulonda chakayilili wunsahu niwena niaJentili. 19Ilaŋa chakayihanawu kudi antu, bayi mwakaakama nenu tukuhoshadi? hela nenu tukuhosha mazwinyuku? Muloŋa akayinka mazu akuhosha yoyena mpinji oyu. 20Muloŋa hiyenu mwakahoshaku, Spiritu yaTata yenu diyi wakahosha mudenu. 21Muntu wakahana mana kwindi kudi akwawu akamujahi, nitata yawantu wakahana mwanindi; nianyana akanyamukila anvwali jawu nakuyijahisha. 22Ninenu akayihela kudi antu ejima kukoola ijina damami; ilaŋa muntu wakakakela nikunsa diyi wakahanda. 23Chakayikabishawu mumukala wumu mwakatemukila mumukala wukwawu; muloŋa nukuyileja chalala nami, chakenzayi Mwana kamuntu, yena wakawana kanda muhiti munyikala yawaIsarela yejima.
24Kambanji habadikaŋa nkuluŋaŋa yinduku, hela nduŋu habadikaŋa nkaka yinduku. 25Kambanji wukukumina dakwesekana nankuluŋaŋa yindi, ninduŋu wukwesekana nankaka yindi. Neyimwanta wetala anamuteni nawu Belezebuli; indi akwetala dindi hiyakubadika kuyitena chochochuku?
26Dichi bayi muyitiyaloŋa womaku; muloŋa hikwekala chuma chabutaŋawu chikubula kujikukaku, hela chajindaŋawu chikubula kutiyakanaku. 27Chuma chinukuyilejela mumwidima, chihoshelenu hamwaana; chuma chimukutiyila mwitu, chibidikilenu hamawulu amatala. 28Dichi bayi mutiyaloŋa woma ajahaŋa mujimbaku, hiyanatweshi kujaha muntu wamukachuku; ilaŋa tiyenu woma yena natweshi kukisaŋana nimuntu wamukachi nimujimba mukaluŋa kachinana. 29Tujila twanyanya tuyedi hiyatulandishaŋa nakadaluku? Hosi kakajila kamu kaholokelaŋa heseki chakadi Tata yenuku; 30Ilaŋa ninsuki jakunyitu yenu jajeni ajichinda dehi jejima. 31Dichi bayi mutiyaloŋa womaku; enu mwalema chakubadika tujila twatuvulu. 32Dichi yowu wakaŋiteja kumesu awantu, ninami nawa nakamwiteja kumesu aTata yami wudi mwiwulu. 33Ilaŋa yowu wakadikalami kumesu awantu, ninami nawa nakadikalayi kumesu aTata yami wudi mwiwulu.
34Bayi mutoŋojoka nenu nenzi nakuleta kumwena hanu hesekuku, hinenzi nakuleta kumwenaku, chiŋa mpoku yakabali. 35Muloŋa nenzi nakwambula iyala natata yindi, mwana wamumbanda namama yindi, nimuku windi wamumbanda namuku windi wamumbanda. 36Akwankunyi namuntu akekala wowu amwitala dindi yomweni. 37Muntu wakeŋa a tata yindi hela mama yindi chakubadika chankeŋayi ami, hananteli amuku; niwakeŋa a mwanindi weyala, hela mwanindi wamumbanda chakubadika chankeŋayi ami, hananteli amuku. 38Muntu wukubula kunona kulusu yindi nakunlondami, hananteli amuku. 39Muntu wukumona wumi windi wakawujimbesha; niwukujimbeshela wumi windi hansaŋu yamami wakawumona.
40Muntu wukuyitambulenu nantambulami, muntu wukuntambulami natambuli niyena wantemesheli. 41Muntu wukutambula kaprofwetu hansaŋu yejina dakaprofwetu, wakatambula wufwetu wakaprofwetu; wukutambula muntu waloŋa hansaŋu yejina damuntu waloŋa, wakatambula wufwetu wamuntu waloŋa. 42Yowu wukwinka iwu wanyanya wumu lupasa lwameji atuuta hansaŋu yejina dakambanji, nukuyileja chalala nami, hakabula wufwetu winduku.
Actualmente seleccionado:
MATEU 10: MW62
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
The Bible in Lunda: Ndembu (Lunda of Kalunda) © B. F. B. S. 1962.
