MATEU 11
11
1Chelili Yesu nakumishi dehi kulejaleja atumbanji twindi ikumi nayedi, hakufuma kwenoku hakuya nakuleja antu, nikushimuna munyikala yawu.
2Dichi Yowanu chanatiyiyi omu mukaleya nyidimu yaKristu, hakutemeshaku atumbanji twindi, 3nakumwila nindi, Eyi yeyi elaŋawu nawu wakenza, tahindi tutalili wacheŋi? 4Yesu hakuyakula nindi, Yenu mumuleji Yowanu yuma yimunatiyi niniyi yimunamoni. 5Amputamesu hiyakutona, akwakubalakata hiyakwenda, akwambumba hiyakutooka, ajika matu hiyakutiya, afu hiyakuyisaŋula, atuzweŋi hiyakuyishimwina nsaŋu yayiwahi. 6Muntu wukubula kumona mudami chuma chakumudimbwisha, nakooleki.
7Chadiŋi nakuyawu, Yesu hakutachika kutenena mazaza awantu nsaŋu yaYowanu, nindi, Mwayili mwisaŋa nakutaladi? Iteti datepokaŋa nampepela, tahindi? 8Indi mwayili nakumonadi? Muntu navwali yayiwahi, tahindi? Avwalaŋa yayiwahi ekalaŋa mumatala awanyanta. 9Indi mwayililidi? Nakumona kaprofwetu, tahindi? Mwamweni, nukuyileja nami yena wabadika nankashi mukaprofwetu. 10Diyi yeniwu asonekeluwu nawu, Talenu, hinukutemeshaŋahu dehi ntemesha yami kuwukuya, akakuloŋeshelaŋahu dehi njila yeyi. 11Nukuyileja chalala nami, hadi antu anavwaliki kudi ambanda, hikunamwekani nabadiki Yowanu Mpapatishuku; hela chochu, nakehi muwanta wamwiwulu namubadiki yena. 12Kufumisha kumafuku aYowanu Mpapatishu nakushi ka kumafuku anu akatataka, wanta wamwiwulu adi nakuwukwata naŋovu nankashi, awukwataŋa naŋovu kudi akwaŋovu. 13Muloŋa atuprofwetu ejima ninshimbi aprofweteli kushika nikudi Yowanu. 14Dichi neyi munakeŋi kwitejamu, yena diyi Elija mwatiyaloŋa nawu wukwinza. 15Yowu wukweti matu akutiya, atiyi.
16Chisakichi nukuchifwikija nachumanyi? Chinafwani neyi atwansi anashakami kuwulandilu, 17enda atambika akwawu nawu, Tunayimbili mapeleli, enu kuhaŋana nehi; tunatumpi, enukudishonanehi. 18Yowanu wenjili nákubula kudya hela kunwa, nawu, Wukweti demoni. 19Mwana kamuntu nenzi nakudya nakunwa, nawu, Talenu muntu wafwa hakudya, wasweja kunwa walwa, ibwambu dawansonkeshi nawakwanshidi! Maana alumbulukaŋa nanyidimu yawu.
20Henohu hakutachika kuhoshola nyikala yelililiyi nyidimu yindi yaŋovu yayivulu, nanochu chabuliluwu kubalumuka munyichima. 21Nindi, O yihuŋu yiwakamoneyi Korasi! Oyihuŋu yiwakamoneyi Beteseda! Muloŋa nyidimu yaŋovu yeliluwu mudenu, neyi ayililili muTira naZidoni, mutenowu abalumukili munyichima nakuvwala masaka nikudisukwila mawuti. 22Ilaŋa enu nukuyileja nami, hefuku dakusompesha yihuŋu yaTira naZidoni yakakuminamu, yenwenu yakabadika. 23Nineyi Kaperinawu, akakutúumbakesha chakushika nikwiwulu, tahindi? Wakakunkumuka mukaluŋa; muloŋa nyidimu yaŋovu yelililuwu mudeyi, neyi ayililili muSodoma mutenowu wudi kwoku nilelu. 24Ilaŋa enu nukuyileja nami, hetaŋwa dakusompesha yihuŋu yaSodoma yakakuminamu, yeyeyi yakabadika.
25Hamafuku owu Yesu hakwila nindi, Eyi Tata, Mwanta wewulu niiseki, nakusakilili chiwajindili yumiyi kudi akwamaana nikudi ashinshika, hiwukuyimwekesha kudi anyikeki. 26Mwamweni Tata, dichi chiwamweni kuwaha. 27Ananyinki yuma yejima kudi Tata yami. Kwosi muntu wamwiluka Mwanaku, chiŋa yowu Tata; kwosi nawa wamwiluka Tataku chiŋa yowu Mwana, nianakeŋiyi Mwana kuyimwekeshela.
28Inzenu kudami enu ejima mudi nakukabakana, mwasenda yalema, ami nukuyinookesha. 29Ditwikenu mpanda yami, mudizili kudami muloŋa ami nawunda, nadizoza mumuchima, ninenu mukumona kuno-oka munyichima yenu. 30Muloŋa mpanda yami yaswayi, nichisenda chami chapepela.
Actualmente seleccionado:
MATEU 11: MW62
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
The Bible in Lunda: Ndembu (Lunda of Kalunda) © B. F. B. S. 1962.
