Yowannisi 14
14
Nihoo Yeer Waan Bechiibeeti Gommo Yesuusi Baach Tuno
1Yesuusi daakkiꞌi bi dabbeenaꞌoyich ishichiye: “Ayini xuuxeyaahote; ittoshi mulloon Yeeri toommooch tooꞌiibote; wotta ta toommoochoo tooꞌiibote. 2Ta Nihoo kexooch wodde beeyi xaaꞌoo beetone. Ebi toonee gaata, ittoshich gettesho taane. Ta hammaabeeto ittoshich xaaꞌoon qanniyoyichiye. 3Hammaꞌa xaaꞌoon ittoshich ta qanniitoyee gubb, ta beetooch ittoshi tunemmoyich wotteree waa ta waan ittoshin daammemmo taane. 4Ta hammaabeeti xaaꞌooch shakkiyemmi gommon ariibeeto ittoshine” iye.
5Aroochee Toomaasi “Ta Doonocho, ne hammaabeeti xaaꞌoon ariyaano noone; aabichiree gommon ariyehone?” iye.
6Yesuusi wochiꞌi, “Gommonaa iberoona, kashoonoo taane; ta waanaa tuno bi qayigaata Nihoo Yeer waan womon hakkemmo koniyoona aalloone. 7Taan ittoshi ariito gaata, wotta ta Nihoon ariyesho ittoshine. Hanaachina tiijjiꞌi biin ariito ittoshine; biinoo beeggito ittoshine” iye.
8Filipphoosi “Ta Doonocho, Nihoo Yeerin nooch bekkiibe; aroo nooch beddiye” iye.
9Yesuusi biich ishichiye: “Haano Filipphooso, meeti aaboon neenna tookkaa koteto taane; hanaach beddaahaa taan ariyaachine? Taan beeggito Nihoo Yeerin beeggitone. Aabichaꞌa, ‘Nihoo Yeerin nooch bekkiibe’ inne? 10Tawoo Nihoo Yeerina ta beemon, Nihoo Yeeriyoo taanna bi beemon iberiyaachine? Ittoshich ta gettaabeeti qaaroon ta gettaabeeto, ta waanee toonoone; tunebaani ebi bi shuunoon shuuneebeeto, taanna beeti Nihoo Yeerine. 11Tawoo Nihoo Yeerina ta beemon, Nihoo Yeeriyoo taanna bi beemon iberiibote. Ebi tuno qayigaata, ta shuuneti shuunee naboona iberiibote. 12Iberoon ittoshich gettoye: Bi mulloon ta toommooch tooꞌiimmo ta shuunaabeeti shuunoon aroo wotta shuunemmone; ta, Nihoo Yeer waan hammaa ta beetoyich ebiyee beshe shuunoonolla shuunemmone. 13Bi Bushoo tawoo, Nihoo Yeerichi oogee yiiroon asheenaꞌoyich ta bekkiyemmoyich, ta shigoona ittoshi qolleebeeto bullin tuniyemmo taane. 14Amoonolla ta shigoona ittoshi qollegaata, tuniyemmo taane” iye.
Yaafe Ayaaneechon Yesuusi Gibenikkoo
15“Taan shunniibeeto ittoshi tunegaata, ‘Tuniibote’ iyaꞌa ta getteton ceechemmo ittoshine. 16Tawoo Nihoo Yeerin qollemmo taane; bulli yemeenoon ittoshina tookki bi beeyemmoyich, bare Kupphiyechon ittoshich deejjemmone. 17Biyoo iberoon bekkiibeeti Ayaanoone; alemo biin beegaanoonaa ariyaanoona bi tunetoyich, bi mullooch qeejjiꞌi biich hajjeyoon hakkaache; tunebaani ittoshi waan beeyemmone; ittoshi mulloochoo qeyemmone; ebich biin ariibeeto ittoshine. 18Nihaalli bushiishoommon ittoshin dufaachemmo taane; ittoshi waan woyemmo taane. 19Ta hammemmo katinnitone; ebiyee gubb, alemo guttinnoon taan beegaachemmone; tunetaa ittoshi taan beeggemmo ittoshine. Kashecho ta tunetoyich, ittoshiyoo kashecho tunemmo ittoshine. 20Ta, ta Nihoona ta beemoommon, ittoshiyoo taanna ittoshi beemon, tawoo ittoshina ta beemon arooba ariyemmo ittoshine. 21‘Tuniibe’ iyaꞌa ta getteton deꞌa iꞌi tuniibeeto, taan shunniibeeto aroone; taan shunnii beeton ta Nihoo shunnemmone; tawoo shunnemmo taane; biichoo bekkemmo taane” iye.
22Arooba Asqorootechi Yihudiyee bare Yihudi tiyiꞌi, “Ta Doonocho, alemoyich bekkeyaanoon nooch ne bekkemmo aabichireeshiye?” iye.
23Yesuusi wochiꞌi biich ishichiye: “Taan shunniibeeto koniyoona bi beegaata, ta getteton ceechemmone; ta Nihoo biin shunnemmone; bi waanoo woyemmo noone; bi waanoo beeyemmo noone. 24Taan shunaano ta qaaroon ceechaachemmone. Hini ittoshi waayeebeeti qaaro taan wocheti Nihoo Yeerichoani, taacho toonoone.
25“Ittoshina tookkaa beebee, ittoshich ishin getteto taane. 26Tunebaani Nihoo Yeeri ta shigoona bi deejjemmi Yaafe Ayaano tuneti Kupphiyecho, aroo bulli mooyon ittoshich dojjemmone; ittoshich ta getteto bullin ittoshich shalligichemmone. 27Diggoon ittoshich wojjaabeeto taane; ta diggoon ittoshich immaabeeto taane. Hini ittoshich ta immaabeeti diggoo alemo immii beetoommo toonoone. Ittoshi mullo keqqaaye, shatishoo gettaaye.
28“ ‘Ta hammemmo taane; ittoshi waanoo wotteree woyemmo taane’ iyaꞌa ittoshich ta getteton waayeto ittoshine. Iberoon taan ittoshi shunigaata, Nihoo Yeer waan ta hamona emiresho ittoshine. Ebiyoo Nihoo Yeeri tayee besho bi tunetoyichiye. 29Ebi mooyo bi tunehooba taan ittoshi iberiyemmoyich, waataan bi beetaa, and ittoshich getteto taane. 30Hini alemoon hajjiibeeti taatoo waabeeto bi tunetoyich, ebiyee gubb, ittoshina tookki woddii yibbaateyaachemmo taane. Tunetaa aroo taan hajjoon hakkaachemmone. 31Tunebaani Nihoo Yeerin ta shunon alemo ariyemmoyich, Nihoo Yeeri ‘Tuniibe’ bi ito bullin shuunaabeeto taane.
“And tibote; hiniichee hambone” iye.
Actualmente seleccionado:
Yowannisi 14: KBRC
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
SIM International, 2020.
