Yowannisi 15

Ibere Woyinee Qombee Indo Yesuusi Tuno

1“Ibere woyinee qombee indoo taane; gochiꞌi bechitoo ta Nihoone. 2Ta toommooch beechii aafeyaani ato bullin kuxi wokkiyemmone; aafoon aafeebeeto bullinoo woddiiree bi aafemmoyich qephemmone. 3Ittoshich ta getteti qaaroona and xalleto ittoshine. 4Taanna tookki ikkottebote; tawoo ittoshina tookki ikkottemmo taane. Woyinee ato bi indo aalloon bi qelloona aafoon aafo hakkoo bi qayoommon, ebiyoommon taanna tookkii ikkotto ittoshi qayigaata, aafoon aafo hakkaachemmo ittoshine.

5“Woyinee qombee indoo taane; ittoshiyoo ato ittoshine. Ta aalloon amoonolla halloon hakkaachemmo ittoshine. Ebich taanna beemmo, tawoo biinna beemmo, aroo wodde aafoon aafemmone. 6Koniyoona taanna beetaano bi tunegaata, kuxxii maaxooch dufaa shuuqqiibeeti ateenaꞌoommon tunemmone; boonoshinoo kiciree qaaqqooch duppemminaꞌone; michishoo gettemminaꞌone. 7Taanna ittoshi beegaata, ta getteti qaaroo ittoshi mullooch bi beegaatoo, ittoshi shunnimmo bullin qollebote; ittoshich ichemmone. 8Wodde aafoon ittoshi aafegaata, ta dabboonoo ittoshi tunegaata, ebina ta Nihoo oogemmone.

9“Nihoo Yeeri taan shunoommon ta wotta ittoshin shunneto taane; ta shunoona beebote. 10Ta Nihoo ‘Tuniibe’ iꞌi bi gettiton ta ceechoommon, bi shunoonoo ta beemoommon, ‘Tuniibote’ iyaꞌa ta getteton ittoshi ceechigaata, ta shunoona beeyemmo ittoshine. 11Ta emiraabeeti emiroona ittoshi emiremmoyich, ittoshi emiroo bi ceennemmoyich, ebi bullin ittoshich getteto taane. 12Ittoshin ta shunnetoommon, ittoshinaa ittoshina shunebote. Tuniibote ta ii beeto ebine. 13Asho bi shunechinaꞌochi keroyich bi kashoon beshii bi imigaata, ebiyee beshe shuno konichona aalloone. 14‘Tuniibote’ iyaꞌa ittoshich ta getteto bullin ittoshi tuniigaata, ta shunecho ittoshine. 15Guuno bi doono tuniiya gabiton ariyaanoone; ebich ebiyee damba ittoshin guuno getaache. Tunetaa ittoshin ‘Ta shunechinaꞌo’ ito taane; ta Nihoo waanee ta waayeto bullinoo ittoshich getteto taane. 16Ta ittoshin kaaccehoani ittoshi taan kaacaano ittoshine. Nihoo Yeeri ta shigoona ittoshi qolleto bullin ittoshich bi immemmoyich, hamiree beeyemmi aafoon ittoshi aafemmoyich ittoshin ukkiriito taane. 17Illa ittoshinaa ittoshina shunebote. Tuniibote iyaꞌa ittoshich ta gettaabeeto ebine” iye.

Kiristoosichi Dabbeenaꞌon Alemo Shixo

18“Alemo ittoshin bi shixigaata ittoshiyee aaf taan bi shixon ariibote. 19Hini alemeexo ittoshi tuneto gaata, biicho tuneton shunneshone; tunebaani alemee daggoochee ittoshin kaacceto taane; ebich bi magecho toono ittoshine; ebichi naboonane alemo ittoshin bi shixxiibeeto. 20‘Guuno bi doonoyee beshaanoone’#Yowa. 13:16 iyaꞌa ittoshich ta getteton batteyaahote. Taan boonoshi duꞌiigaata, ittoshin wotta duꞌiyemminaꞌone. Ta getteti qaaroon boonoshi ceechigaata, ittoshi gettemmi qaaroon wotta ceechemminaꞌone. 21Taan wochee deejjiton boonoshi ariyoo qajjitoyich, ebi bullin ta naboona ittoshi toommooch shuunemminaꞌone. 22Ta waaꞌa boonoshich getaan gaata, boonoshich axaaxoo tuneyaacheshone; tunetaa and boonoshi shuuneti axaaxee naboyich boonoshi wochemmi noonoo aalloone. 23Taan shixxiibeeto, ta Nihoon wotta shixxii beetone. 24Asho koniyoona shuuneyaani shuunoon boonoshi daggooch ta shuuneyaan gaata, boonoshich axaaxoo tuneyaacheshone; tunebaani and hini ta shuuneto bullin beeggitinaꞌone; taanoo ta Nihoonoo shixxitinaꞌone. 25Ebi tuneto, boonoshi Sheeree Macaafoochaa ‘Naboo aalloon taan shixxiyeete’#Shod. 35:19; 69:4 getaa kooreeto bi ceennemmoyichiye.

26“Nihoo Yeer waanee ittoshich ta deejjemmi Kupphiyecho, iberoon bekkiibeeti Ayaano, Nihoo Yeer waanee kechiꞌi bi waahooba, aroo taachon miixemmone. 27Ittoshiyoo wotta shiichiꞌi taanna tookkii ittoshi beetoyich, taachon miixemmo ittoshine” iye.

Actualmente seleccionado:

Yowannisi 15: KBRC

Destacar

Copiar