Yowannisi 13

Bi Dabbeenaꞌochi Baatoon Yesuusi Mayo

1 Beshee Baaroyee aaf, Yesuusi hini alemoochee Nihoo Yeer waan bi hammemmi aabo shagon ariihe. Hini alemooch beeti bi dabbeenaꞌon shunniye; ciirooch beddaahaanoo boonoshin shunniye.

2Yesuusinaa bi dabbeenaꞌona gifiroon maa beeheete; daabiloosiyoo shiichiꞌi Asqorootechi Simoonichi bushoo Yihudi Yesuusin beshiiree bi immemmoyich gonde shalligoon bi mullooch giijjitone. 3Yesuusi Nihoo Yeeri bi kishooch bulli mooyon bi imon, Yeer waanee bi womonoo, Yeer waanoo wotteree hammemmo bi tunoon arii beetone. 4Ebich madee toommoochee tiyii, toommeexi bi tahoon shoottiꞌi kotiichii, hidee qoreddoon tiijjii eddehe. 5Aree hillooch aachi kite qiicoona aacon uubbiꞌi bi dabbeenaꞌochi baatoon mayonaa bi eddeti qoreddoona hidii shokkiyoonooch giyiye.

6Aroochee Simoon Pheexiroos waan giddehe; biyoo “Ta Doonocho, ne ta baatoon machaniye ne ii beeto?” iye.

7Yesuusiyoo wochiꞌi, “Ta tuniyaa beeton and ariyaano neene; tunetaa gubb ariyemmo neene” iye.

8Pheexiroosiyoo “Ta baatoon cir mayaachine” iye.

Yesuusiyoo “Ne baatoon ta mayo qayigaata, taanna tookkii ikkittino neech aalloone” iꞌi wochiye.

9Simoon Pheexiroosiyoo “Ta Doonocho, ishigaata, ta kishoonaa ta qelloonon daakkiree mayalli ta baatoo baach machaaye” iye.

10Yesuusi “Bi qeddoon macheto, bi ashittino bulli xalloo bi tunetoyich, bi baatoon machoyee damba biich baroo qaawiyaache. Ittoshi xalloo ittoshine; tunebaani ittoshi bulli toonoone” iye. 11Biin beshiiree immemmo aabi gaata bi arii beetoyich, “Ittoshi bulli xalloo toono ittoshine” iye.

12Boonoshi baatoon machii bi ciichitoyee gubb, bi tahoon taheꞌi hammii bi xaaꞌooch kotehe. Boonoshichoo ishichiye: “And ittoshich ta tuniiton shalligitote? 13Ittoshi taan ‘Dojjechone, Doonone’ ii beetote; eeha taane. Ebich ittoshi gettito iberoone. 14Illa ta ittoshi Doononaa Dojjechona tunaachaa ittoshi baatoon ta machetoyee, ittoshinaa ittoshina ittoshi baatoon macheya beddiyote. 15Ebi ittoshich ta tuniitoommon ebiyoommon wotta ittoshinaa ittoshina ittoshi tuniyemmoyich bekkiito taane. 16Iberoon ittoshich gettoye: Guuno bi doonoyee beshaanoone; wocheetoo biin wochetoyee beshaanoone. 17And ebin ariiꞌi ittoshi tuniigaata, diireeto ittoshine.

18“Ittoshi bullichon toonoone ta gettaabeeto; ta kaacceti asheenaꞌon ariibeeto taane. Tunebaani Yaafe Macaafoochaa ‘Taanna tookkii geecheꞌi maabeeto taan kocha tiyiye’#Shod. 41:9 iibeeti qaaro ceeno qaawiihe.

19“Ebi tunehooba aroo ta tunoon ariiree ittoshi iberiyemmoyich hanaach mooyo waataan beetaa ittoshich getteto taane. 20Iberoon ittoshich gettoye: Ta wocheto koninolla shunniibeeto taan shunnii beetone; taanoo shunniibeeto taan wocheton shunnii beetone” iye.

Biin Beshii Immemmi Uroochon Yesuusi Shiichiꞌi Geto

(Maatiyoosi 26:20-25; Maariqoosi 14:17-21; Luqaasi 22:21-23)

21Yesuusi ishin bi gettitoyee gubb, bi kashe xuuxehan. “Iberoon ittoshich gettoye: Ittoshi daggoochee ikkoo taan beshiiree immemmone” iꞌi xalla gettiye.

22Bi dabbeenaꞌo “Koniniye bi gettiibeeto?” iꞌi boonoshi gaboon guttiiꞌi boonoshinaa boonoshina ciineeheete. 23Bi dabbeenaꞌo daggoochee Yesuusi shunniibeeti ikkoo Yesuusichi gaꞌooch koteꞌi beehe. 24Ebich Simoon Pheexiroosi are uroon qillifeꞌi, “ ‘Koniniye ne gettaabeeto?’ getiree Yesuusin echebe” iye.

25Ebich aroo Yesuus waan katinniꞌi, “Ta Doonocho, arochi konine?” iꞌi echehe.

26Yesuusi wochiꞌi, “And dukkeree ta qapphiyemmo aroone” iye. Aroochee dukkeꞌi Asqorootechi Simoonichi bushoo Yihudich qapphiihe. 27Yihudi bi qapphetoyee gubb bekkech Sheexaanoo bi mullooch giyiye.

Arooba Yihudin Yesuusi “Shuuneya ne gabiton kaateree shuunebe” iye. 28Tunebaani kotetinaꞌo daggoochee koniyoona amoyich ebin bi gettito gaata ariito aalloone. 29Yihudi koolla yesho bi tunetoyich, ikkikkeenaꞌo Yesuusi “Baaroyich qaawiimmon kemebe” woyee “Girechinaꞌoyich ikke mooyon imbe” ito boonoshich shaahiye. 30Yihudi dukkoon bi qapphetoyee gubb bekkech kexoochee kechiye; areegaata showoo xumoone.

Yesuusi Gettiti Andire Mooyo

31Yihudi kechitoyee gubb Yesuusi ishichiye: “And Ashi Bushoo oogoon danetone; Yeeriyoo biinna oogetone. 32Yeeri biinna bi ooge gaata, Yeeri bi qelloona biin oogiyemmone; andoo bekkech oogee yiiroon biich immemmone.

33“Ta bushiisheenaꞌote, batt giisheche saatoon ittoshina tookkaa beeto taane. Taan qaawemmo ittoshine; Ayihudee ukkireenaꞌoyich ‘Ta hammaa beetooch womon hakkaachote’ ta itoommon, andoo ittoshich wotta gettoye.#Yowa. 7:34

34“ ‘Ittoshinaa ittoshina shunebote’ iyaꞌa ittoshich andire mooyon gettoye; ta ittoshin ta shunnetoommon, ittoshi wotta ittoshinaa ittoshina shunebote. 35Ittoshinaa ittoshina shunegaata, ebina ta dabboo ittoshi tunoon asheenaꞌo bulli ariyemminaꞌone” iye.

Pheexiroosi Biin Nookkemmo Tunoon Yesuusi Geto

(Maatiyoosi 26:31-35; Maariqoosi 14:27-31; Luqaasi 22:31-34)

36Simoon Pheexiroosi “Ta Doonocho, amoochiye ne hammemmo?” iꞌi echehe.

Yesuusi wochiꞌi, “Ta hammaa beetooch and taan dabboon hakkaachine; tunebaani gubb taan dabbemmo neene” iye.

37Pheexiroosiyoo “Ta Doonocho, and neen dabboon amoyich hakkaachote? Neecha getiree qitoyich qannito taane” iye.

38Yesuusiyoo wochiꞌi ishichiye: “Iberoon taacha getiree qitenne? Iberoon neech gettoye: Keejje wottoon taan nookkeyaan ne beetaa, hanaach baakkoo kuuhaachemmone” iye.

Actualmente seleccionado:

Yowannisi 13: KBRC

Destacar

Copiar