Yowannisi 12

Maariyami Shittoon Yesuusichi Baatooch Ukkoo

(Maatiyoosi 26:6-13; Maariqoosi 14:3-9)

1Yesuusi, Beshee Baaroon shiritte qemooch geddiichii, qitoochee bi tiijjiti Alazaari beeti Bitaaniya hammiye. 2Aroochaanoo Yesuusin iibbiyoyich gifiroon qanniiheete; Maarittiyoo boonoshich giddiihan; Alazaariyoo biinna tookkii kotetinaꞌo daggoochee ikkoone. 3Maariyami qachi neetira bede oogeti aaxxe naaridoosi shittoon deebaa Yesuusichi baatooch ukkiyan; bi qelli eexona bi baatoon hidiyan. Ebi shittee cinno kechi ikkottehe.

4Tunebaani Yesuusichi dabbeenaꞌo daggoochee ikkoo, biin beshiiree immemmi Asqorootechi Yihudi, 5“Hini shittoon keejje balle diinaaroona kemaa, girechinaꞌoyich amoyich icheyaache?” iye. 6Ishin bi gettito, gaayo bi tunetoyichalli, girechinaꞌoyich ariqqeꞌi toonoone; gijje yeshe kolloon kalleꞌi kollee daggooch kicee beetoochee bi qellich bi deqqii beetoyichiye.

7Yesuusiyoo “Qaye! Hini shittoon ta duukkeyemmi aaboyich qanniiꞌa quyetine. 8Girechinaꞌo bulli aaboon ittoshina tookkiiniye boonoshi beeto; tunebaani ta bulli aaboon ittoshina tookki beetaachemmo taane” iye.#Yibba. 15:11

Alazaarin Wuxoyich Gabeeti Gaboo

9Ayihudeenaꞌo daggoochee meeti asheenaꞌo Yesuusi Bitaaniya bi beemon ariiꞌi waaheete; boonoshi waato, qitoochee bi tiijjiti Alazaarinoo beeggalli Yesuusi ikkeeton baach toonoone. 10Ebich qeeshee ukkireenaꞌo Alazaarin wotta wuxiya echeeheete. 11Ebiyoo Ayihudeenaꞌo daggoochee meetinaꞌo bi naboona boonoshin qajjiichii boonoshi mulloon Yesuusi toommooch boonoshi tooꞌitoyichiye.

Yesuusi Oogoona Yerusaalem Gimo

(Maatiyoosi 21:1-11; Maariqoosi 11:1-11; Luqaasi 19:28-40)

12 Dechara Beshee Baaroon baaroyich waati meeti asheenaꞌo “Yesuusi Yerusaalem woyemmone” getaa waayeꞌi, 13yeebbee waamon dappii yechii Yesuusin giijjiya kechiꞌi,

“Hosaana!#12:13 Hosaana geto, “Noon wodiibe” getone; ebin getona asheenaꞌo Yeerin galletee beetinaꞌone.

Doonochi shigoona waabeeti

Israꞌeelee taatoo diireebe!”#Shod. 118:25-26 iibee cookeeheete.

14-15“Tsiyooni asheenaꞌote, shattaahote!

Ebiyoche, ittoshi taatoo kuree bushoon yebberee woyemmone”#Zaka. 9:9

getaa bi kooreetoommon Yesuusi kuree bushoon daneꞌi yebbehe.

16Yesuusichi dabbeenaꞌo arooba ebin shalligaaneenaꞌone; tunebaani kooreeti bi mooyonaa biich boonoshi tuniitonon boonoshi shalligito Yesuusi oogoona shimaayooch bi kechitoyee gubbiye.

17Yesuusi Alazaarin bi duukketi oppoochee ceeggiꞌi qitoochee bi tiijjiyooba, biinna tookkii beeti asheenaꞌo tuneti mooyon miixee beeheete. 18Ebich hini malletoon bi tuniyoon waayeti dofee asheenaꞌo wotta biin giijjiya kechiyeete. 19Ebichi naboona Fariseenaꞌo boonoshinaa boonoshina “Andoo ikke mooyonona tuniyoon hakkaachone. Ebin beegote! Ashoo bulli bi waan wottetone” iyeete.

Yesuusina Tookkii Danoyich Ikkikke Giriikeenaꞌo Qaawoo

20Ebi baarooba Yeerich goyinneya Yerusaalem hammiti asheenaꞌo daggooch ikkikke Giriikeenaꞌo beeheete. 21Boonoshiyoo Galiilee showooch beeti Beetisayidechi Filipphoos waan giddeꞌi, “No doonocho, Yesuusin beegga qaawaabeeto noone” iyeete. 22Ebina Filipphoosi hammiꞌi Indiriyaasich gettiye; aroochee gutteꞌi hammii Yesuusich gettiyeete.

23Yesuusiyoo ishichiꞌi boonoshich wochiye: “Ashi Bushoo oogoon bi danemmi saato shaggitone. 24Iberoon ittoshich gettoye: Ikke teepphee aafe showooch hollaꞌa bi qitaan gaata, bi ikkeeti echemmine; tunetaa bi qitigaata, wodde aafoon aafemmine. 25Bi kasheen shunniibeeto muccemmone; hini alemooch beebee bi kasheen shunaano, bulli yemeenee kashoon danemmone. 26Taach maddoon qaawiibeeto, taan dabbibe; ta beetooch hini are ta maddecho wotta beeyemmone; taach maddee beetoyich Nihoo Yeeri oogoon immemmone” iye.

Bi Qitemmon Shiichiꞌi Yesuusi Geto

27“And ta kashe xuuxetine; ama getote? ‘Ta Nihoocho, hanaach ta toommooch woyemmi xuuxoochee taan wodiibe’ getote? Tunetaa hini hanaachi xuuxoon beegoyichiye ta waato. 28Ta Nihoocho, ne shigoon oogiibe!” iye.

Arooba shimaayoochee “Oogiito taane; andoo oogiyemmo taane” immi qaaro waayeehe. 29Arooch neexeebeeti meeti asheenaꞌo hini qaaroon waayeꞌi, “Xeeyoone gigeebeeto” iyeete. Bareenaꞌoo “Maraakoone biich yibbaateto” iyeete.

30Yesuusi ishichiye: “Ebi qaaro waayeeto, ittoshi naboyichalli ta naboyich toonoone. 31And hini alemee toommooch nalloo kindiya bedditone; and hini alemoon hajjiibeeti taatoo maach yookkeyemmone. 32Tawoo showoochee ta tiijjeehooba, asho bullin ta waan yeepphemmo taane” iye. 33Ishin bi gettito, aabichiree bi qitemmo gaata bekkiyoyichiye. 34Ebich dofee asheenaꞌo “No, Kiristoosi bulli yemeenoon beeyemmo bi tunoon Sheeree Macaafoochee waayeto noone.#Daan. 7:14 Newochi ‘Ashi Bushoo showoochee tiijjeyemmone’ iyaꞌa aabichaꞌa gettenne? Ishi Ashi Bushochi konine?” iꞌi echeheete.

35Yesuusiyoo “Batt giisheche aabee wottoon bekko ittoshina tookki beeyemmone. Manderoona shaꞌeebeeto amooch bi hammiibeeto gaata ariyaanoone; ebich ittoshich bi mandereyaachemmoyich, bekke beetaa shaꞌebote. 36Bekkoochi bushiishoo ittoshi tunemmoyich, bekke bi beetaa, ittoshi mulloon hini bekkoochi toommooch tooꞌiibote” iye. Yesuusi ishin bi gettitoyee gubb kechii hammiꞌi bi qelloon aachiye.

Ayihudeenaꞌochi Daggoochee Meetinaꞌo Yesuus Waan Wottee Qayo

37Tunebaani ebi shaahe malletoon boonoshi aafoochaa bi bekkiiteenolla, bi toommooch mulloon tooꞌiyaaneenaꞌone. 38Ebich keemechi Isiyaasi

“Doonocho, no miixeton koni iberiite?

Doonochi giidochi konich bekkete?”#Isi. 53:1

iꞌi bi gettiti qaaro ceenniye.

39-40Isiyaasi wotta

“Yeeri ishichitone: ‘Ta waan boonoshi wottetaa boonoshin ta wodiyaachemmoyich,

boonoshi aafoona boonoshi ciinaachemmoyich,

boonoshi mulloona boonoshi shalligaachemmoyich,

boonoshi aafoon daayiito taane;

boonoshi mulloonoo muumiitoo taane’ itone”#Isi. 6:10 iye.

Ebich bi toommooch mulloon tooꞌiyemmon mawiitinaꞌone. 41Isiyaasi ishichiꞌi bi gettito, Yesuusichi oogee yiiroon shiichiꞌi bi beeggitoyichiye; wotta Yesuusichon gettiye.

42Arooba Ayihudee ukkireenaꞌo daggoocheenolla meetinaꞌo boonoshi mulloon Yesuusi toommooch tooꞌiiheete; tunebaani Fariseenaꞌo Ayihudeenaꞌo kiceebeeti kexoochee boonoshi yoohaachemmoyich, xalla kichii getaaneenaꞌone. 43Ebiyoo Yeeri boonoshin oogiyoyee beshoon asho boonoshin oogiyemmoyich boonoshi qaawitoyichiye.

Ciireexi Aabooba Kindemmi Nalleechon Yesuusi Geto

44Ebichi hillooch Yesuusi bi qaaroon oogichiꞌi ishichiye: “Bi mulloon ta toommooch tooꞌiibeeto, taan wocheto toommooch tooꞌiitalli, ta ikkeeto toommooch toonoone. 45Taanoo beeggiibeeto, taan wocheton beeggii beetone. 46Bi mulloon ta toommooch tooꞌiibeeto bulli, manderooch bi beetaachemmoyich, bekko tunaꞌa hini alemooch waato taane.

47“Alemoon wodiyoyichalli, bi toommooch nalloyich waataano taane. Ebich koniyoona ta qaaroon waayeꞌi ebi bi waayeti qaaroon quyo bi qayigaata, bi toommooch nallemmo ta toono taane. 48Taanoo qajje iꞌi ta qaaroon iberiyaano toommooch nallemmo beetone; ciireexi aabooba hini ta getteti qaaro bi toommooch nallemmone. 49Ta qellee hakkoona getaano taane; tunebaani amoon ta gettemmo gaata, aabichiree ta gettemmo gaatoo taach gettito taan deejjiti Nihoo Yeerine. 50Aroo ‘Hamiree gete’ iꞌi taach bi gettiti qaaro, bulli yemeenee kasho bi tunoon ariibeeto taane. Illa ta gettaa beeton Nihoo Yeeri taach gettitoommon ebiyoommon gettoye” iye.

Actualmente seleccionado:

Yowannisi 12: KBRC

Destacar

Copiar