MATEO 3
3
Bautizaj Juan huillashcami
(Mr 1.1-8; Lc 3.1-9, 15-17; Jn 1.19-28)
1Chai punllacunallatajmi, Bautizaj Juanca Judeapi caj shitashca pambapi huillashpa ricurishpaca, 2“mana alli ruracushcata saquishpa cutirichij. Jahua pachamanta mandanamari ña c'uchuyamushca” nishpa huillarca. 3Profeta Isaías huillashpaca, Juanmantami cashna nishca:
“Shitashca pambapi caparijca:
“¡Jatun Diospaj ñanta allichichij.
Cancunapaj ñancunatapish allichichij!” ningami” nishcami.
4Juanca, camello millma churanata churarishca, carahuan chumbillirishcami carca. Pai micunaca langostacuna, sacha chuspipaj mishquimi carca. 5Juanpajmanca Jerusalenmanta, tucui Judeamanta, Jordán yacu c'uchulla tucui llajtacunamantapishmi shamurcacuna. 6Paicunapaj juchacunata huillajpimi, Juanca Jordán yacupi bautizarca.
7Achca fariseocunapish, saduceocunapish bautizachun nishpa shamujta Juan ricushpaca, cashnami nirca: “¡Culebrapaj huahua huahuacuna! Taita Dios p'iñarishpa llaquichina punllamanta quishpirisha nichunca ¿pitaj huillarca? 8Millaita ruracushcata saquishpa cutirishcata ricuchingapajca, allita rurashca p'ucushca granota ricuchichij. 9Cancunapaj ucu yuyaillapi: “Ñucanchijca Abrahamtami yayata charinchij nishpa” ama nirichijchu. Cashnami nini: Taita Diosca, cai rumicunatapish, Abrahampaj huahua huahuacuna cachun rurai tucunmi. 10Ashtahuancarin hachatamari ña yuracuna sapipi churashca. Mana p'ucuj yuracunataca tucuitami p'itishpa ninapi shitanga. 11Mana allita ruracushcata saquishpa cutirijpi, yacupi bautizajllami ñucaca cani. Chaica chashnatajmi. Ashtahuanpish ñucapaj q'uipa shamujmi Espiritupi, ninapi bautizanga. Paica ñucata yalli tucuita rurai tucujmi. Chaimantami paipaj pargatellatapish mana pascaipaj cani. 12Granota chuyanapaj palaca ñami paipaj maquipi. Paipaj trigotaca huaquichinapimi churanga. Ujshataca manataj huañuj ninapimi rupachinga” nircami.
Jesusta bautizashcami
(Mr 1.9-11; Lc 3.21-22)
13Jesusca Galileamantami, Jordanpi Juan cajpi pai bautizachun nishpa shamurca. 14Chaipimi Juanca mana bautizasha nishpa:
–Ñucamari can bautizashca cana cani. ¿Maitataj canca ñucataca bautizai ninguiyari?– nijpi, 15Jesusca:
–Shina cajpipish cunanca chaitaca saquishpa bautizaillari. Chashna rurashpami, Taita Dios mandashcataca tucuita pajtachishun– nijpimi Juanca bautizarca. 16Jesusca ña paita bautizajpi yacumanta llujshishcahuanmi, jahua pacha pascarijpi Taita Diospaj Espirituca paloma shina shamushpa paipaj jahuapi tiyarijta ricurca. 17Jahua pachamantaca: “Caimi ñuca c'uyashca Churi. Paipimi cushicuni” nishpa rimashcami uyarirca.
Actualmente seleccionado:
MATEO 3: QCHI04
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Quichua Chimborazo Bible Revision 2010 © United Bible Societies, 2010.
