MATEO 2
2
Inti llujshin llajtamanta yachaj runacuna huahuata ricunaman shamushcami
1Herodes mandacui punllacunapi Judeapi caj Belenpi Jesús huacharijpica, yachaj runacunami inti llujshinmanta Jerusalenman chayamushpaca, 2–Judiocunata mandangapaj huacharishca huahuaca ¿maipitaj canga? Pai huacharishcata ricuchij lucerotami inti llujshin ladopi ricurcanchij. Chaimi paita adorangapaj shamurcanchij– nishpa tapurcacuna.
3Chaita uyashpaca jatun mandaj Herodespish, Jerusalenpi tucui causajcunapish achcatami mancharircacuna. 4Chaimi Herodesca curacunata mandajcunata, mandashcacunata quillcajcunatapish tucuicunata tandachishpa, maipitaj Cristoca huacharina carca nishpa tapurca. 5Paicunaca:
–Judeapi caj Belenpimi huacharinga ninmi.
Profeta quillcashcapica:
6“Judapi caj Belenlla, canca jatun nishcami cangui.
Judapi mandajcunapurapica, manataj uchillaca canguichu.
Canmantami shuj pushaj llujshinga.
Ñucapaj caj israelcunataca, paimi michinga” ninmi– nircacunami.
7Chaimi Herodesca, yachaj runacunata pacalla cayashpa, ima punllamanta lucerota ricushcata callarishpa allitaj tapushpaca, 8Belenman richij:
–Chaiman chayashpaca huahua maipi cashcata alli callarishpa tapunguichij. Japishpaca huillaj shamunguichij, ñucapish adoragringapaj– nircami.
9Jatun mandaj chashna nishcata uyashpaca, paicunaca rircallacunami. Inti llujshinpi ricurishca lucerollatajmi paicunata ñaupashca rishpa chaipi chayashpaca, chai luceroca maipimi huahua carca chai jahuapi shayarirca. 10Chai lucerota ricushpaca, jatuntami cushicurcacuna. 11Huasiman yaicushpaca, huahuataca paipaj mama Mariahuan cajta ricushpami, cungurishpa adorarcacuna. Paicuna cungapaj apamushcacunata pascashpami achca valij curitapish, inciensotapish, mirratapish curcacuna. 12Paicuna dormicujpi muscuipi ricurishpami:
–Herodespajmanca ama tigranguichij– nishpa Taita Dios huillachishcamanta, paicunaca paicunapaj llajtamanca shujtaj ñanta tigrarcacuna.
Egiptoman pacatucushpa rishcami
13Yachaj runacuna rishca q'uipami, Jatun Diospaj shuj ángel muscuipi Joseman ricurishpaca: “Jatari, huahuata paipaj mamandij pushashpa Egiptopi miticugri. Ñuca canman cutin huillangacama chaipi saquiringuichij. Herodesca huahuata huañuchingapaj mashcangami” nirca.
14José rijcharishpaca, chai tutallataj huahuata, paipaj mamandij pushashpami Egiptoman rirca. 15Herodes huañungacamami chaipi carca. “Egiptomantami ñuca Churitaca cayarcani” nishpa, profetaman Jatun Dios huillachishca pajtachunmi chashna tucurca.
Huahuacunata huañuchishcami
16Herodesca yachaj runacuna paita chanzata rurashcata yachashpaca yallitaj p'iñarishpami Belenpipish, chai muyundij llajtacunapipish, manaraj ishqui huatata charij tucui c'ari huahuacunata huañuchichun mandarca. Yachaj runacunata tapushca punllamanta yupashpami chashna rurarca. 17Chaica, profeta Jeremías cashna nishca shinallatajmi pajtarca. Paica:
18“Ramá pueblopica caparishcami uyaringa.
Jatunta llaquirishpa jigyashpa huacashcami uyaringa.
Raquelmi paipaj huahuacunamanta huacacun.
Ama huacaichu nijpipish, paipaj huahuacuna huañushcamantami mana upallashpa huacacun nishcami canga” nircami.
Egiptomanta tigrashcami
19Herodes huañushca q'uipami, Jatun Diospaj shuj ángel Egiptopi, Joseman muscuipi ricurishpaca: 20“Jatari, huahuata paipaj mamandij pushashpa Israelman tigrai. Huahuata huañuchishun nicujcunaca ñamari huañun” nirca. 21Shina nijpi José jatarishpaca, huahuata paipaj mamandij pushashpami Israelman tigrarca. 22Judeapica Arquelaomi, paipaj yaya Herodespaj randi mandacun nijta uyashpami, chaiman tigranataca mancharca. Muscuipi Taita Dios huillashcamantami, Joseca Galileaman rishpa, 23Nazaret pueblopi causarca. Quishpichijca Nazareno nishcami canga nishpa profetacuna huillashca pajtachunmi chashna pajtarca.
Actualmente seleccionado:
MATEO 2: QCHI04
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Quichua Chimborazo Bible Revision 2010 © United Bible Societies, 2010.
