LOUKAS 22
22
Ka jingsylla pyrshah ïa U Jisu
(Mat. 26:1-5; Mrk. 14:1-2; Ïoan. 11:45-53)
1 #
Eks. 12:1-27
Ka por ka la jan na ka bynta ka Jingkhawai Niam U Kpu Bakhlem Thiat, ïa kaba la khot ka Niam Ka Jinglait. 2Ki rangbah lyngdoh bad ki nonghikai ka Hukum ki la sheptieng ïa u paidbah, bad kumta ki la pyrshang ban wad lad ban pynïap ïa U Jisu ha kaba jar jar.
U Judas u mynjur ban shetkylla ïa U Jisu
(Mat. 26:14-16; Mrk. 14:10-11)
3Nangta u Soitan u la rung hapoh u Judas, ïa uba la khot u Iskariot, uba long uwei na ki khat-ar ngut ki synran. 4Kumta u Judas u la leit noh bad u la ïakren bad ki rangbah lyngdoh bad ki rangbah pynïaidkam jong ki nongap phira ka Templ shaphang kumno u lah ban shetkylla ïa U Jisu ha ki. 5Ki la sngewbha bad ki la tyrwa ban siew pisa ïa u. 6U Judas u la mynjur ïa kata bad u la sdang ban khmih ïa ka kabu kaba biang ban aiti ïa U Jisu ha ki khlem ka jingtip jong u paidbah shaphang kata.
U Jisu u pynkhreh ban bam ïa ka jingbam ka Niam Ka Jinglait
(Mat. 26:17-25; Mrk. 14:12-21; Ïoan. 13:21-30)
7Ka sngi ka la poi ha ka por ka Jingkhawai Niam U Kpu Bakhlem Thiat ha kaba ïa ki khunlangbrot na ka bynta ka jingbam ka Niam Ka Jinglait la dei ban pynïap. 8U Jisu u la phah ïa u Petros bad ïa u Ïoannis lem bad kine ki jingbthah: “Khie leit bad pynkhreh ïa ka jingbam ka Niam Ka Jinglait na ka bynta jong ngi ban ïabam.”
9“Hangno ba me kwah ïa ngi ban pynkhreh ïa ka?” ki la kylli ïa u.
10U la jubab, “Katba phi dang leit shapoh ka nongbah, u briew uba kit shi khra ka um un ïashem ïa phi. Bud ïa u shapoh ka ïing ba u rung, bad ong ha u trai jong ka ïing: 11‘U Nonghikai u ong ha me, “Hangno ka kamra#22:11 ka kamra: Khmih ïa ka jingbatai ha ka Luk 2:7. ha kaba ma nga bad ki synran jong nga ngin ïabam ïa ka jingbam ka Niam Ka Jinglait?” ’ 12Un pyn-i ha phi ïa ka kamra kaba haneng, kaba heh, kaba la pynbit pynbiang, ha kaba phin pynkhreh ïa kaei kaei baroh.”
13Ki la leit bad ki la shem ïa kaei kaei baroh kumba U Jisu u la lah ïathuh ha ki, bad ki la pynkhreh ïa ka jingbam ka Niam Ka Jinglait.
Ka Jingkhawai U Trai
(Mat. 26:26-30; Mrk. 14:22-26; 1 Kor. 11:23-25)
14Haba ka kynta ka la poi, U Jisu u la shong ha la ka jaka ha ka miej lem bad ki apostol. 15U la ong ha ki, “Nga la kwah shikatdei eh ban ïabam bad phi ïa kane ka jingbam ka Niam Ka Jinglait ha shuwa ba ngan shahshitom! 16Naba nga ong ha phi, ngan ym bam shuh na ka tad ynda la ai ïa ka jingmut bashisha jong ka ha ka Hima U Blei.”
17Nangta U Jisu u la shim ïa ka khuri, u la ainguh ha U Blei, bad u la ong, “Shim ïa kane bad sam ïa ka hapdeng jong phi. 18Nga ong ha phi ba naduh mynta ngan ym dih ïa kane ka waiñ tad ynda ka Hima U Blei ka wan.”
19Nangta u la shim shi lyngkhot u kpu, bad U la ainguh ha U Blei, U la kdiah ïa u, bad U la ai ïa u ha ki, da kaba ong, “Une u long ka met jong nga, ïa kaba la ai na ka bynta jong phi. To leh ïa kane ban kynmaw ïa nga.” 20#Jer. 31:31-34Ha kajuh ka rukom, u la ai ha ki ïa ka khuri hadien ka jingbam miet, da kaba ong, “Kane ka khuri ka long ka jutang bathymmai jong U Blei ïa kaba la pynskhem da ka snam jong nga, ïa kaba la pynmih noh na ka bynta jong phi.
21 #
Salm. 41:9
“Hynrei, ha khmih! Uta uba shetkylla ïa nga u don hangne ha ka miej lem bad nga! 22U Khun U Briew un ïap kumba U Blei u la thmu, hynrei a katno kan long kaba shyrkhei ïa uta u briew uba shetkylla ïa u!”
23Nangta ki la sdang ban kylli para ma ki uno napdeng jong ki uba lah ban long u ban sa leh ïa kane.
Ka jingïasaid nia shaphang ka jinglong bakhraw
24 #
Mat. 18:1; Mrk. 9:34; Luk. 9:46 Ka jingïasaid nia ka la jia hapdeng ki synran ba ïa uno na ki yn ñiew ba u long uba khraw tam. 25U Jisu u la ong ha ki, “Ki syiem jong kiba mane blei thala ki don ka bor halor ki briew jong ki, bad ki nongsynshar ki kam ïa ka nam ba ki dei ‘Ki paralok jong u Paidbah.’ 26#Mat. 23:11; Mrk. 9:35#Mat. 20:25-27; Mrk. 10:42-44Hynrei kane kam dei ka rukom ka ban long bad phi; pynban, uta uba khraw tam hapdeng jong phi u dei ban long kum uba rit tam, bad u nongïalam jong phi u dei ban long kum u shakri. 27#Ïoan. 13:12-15Uei uba kham khraw, uta uba shong ban bam ne uta uba shakri ïa u? Uta keiñ uba shong. Hynrei nga long hapdeng jong phi kum uta uba shakri.
28“Phi la ïadon bad nga ha baroh ki jingshah tynjuh jong nga; 29bad kumba U Kpa jong nga u la ai ha nga ka bor ban synshar, kumta ngan ai ha phi ïa kajuh ka bor. 30#Mat. 19:28Phin bam bad dih ha ka miej jong nga ha ka Hima jong nga, bad phin shong halor ki khet ban synshar halor ki khat-ar jait ki Israel.
U Jisu u ïathuh lypa ïa ka jinglen jong u Petros
(Mat. 26:31-35; Mrk. 14:27-31; Ïoan. 13:36-38)
31“Ko Simon, Simon! Sngap! U Soitan u la ïoh jingbit ban tynjuh ïa phi baroh, ban pynïakhlad ïa kaba bha na kaba sniew, kumba u nongrep u pynïakhlad ïa u kew na u stait. 32Hynrei nga la duwai na ka bynta jong me, ko Simon, ba ka jingngeit jong me kan ym duh noh. Bad haba me la wan phai pat sha nga, me dei ban pynkhlaiñ ïa ki hynmen ki para jong me.”
33U Petros u la jubab, “Ko Kynrad, nga kloi ban leit sha ka ïingbyndi bad me bad ban ïap lem bad me!”
34“Nga ong ha me, ko Petros,” U Jisu u la ong, “u syiar un ym kyn-ih ha kane ka miet tad ynda me la ong lai sien ba mem ithuh ïa nga.”
Ka pla pisa, ka pla, bad ka waitlam
35 #
Mat. 10:9,10; Mrk. 6:8,9; Luk. 9:3; 10:4 Nangta U Jisu u la kylli ïa ki synran jong u, “Haba nga la phah noh ïa phi ha kato ka por khlem ka pla pisa, ka pla, lane ki juti, hato phi ïaduna ei ei?”
“Ym duna wat kawei ruh,” ki la jubab.
36“Hynrei mynta,” U Jisu u la ong, “uno uno uba don ka pla pisa lane ka pla u dei ban rah ïa ka; bad uno uno u bym don ka waitlam u dei ban die noh ïa ka jaiñkup jong u bad thied kawei. 37#Isa. 53:12Naba nga ong ha phi ba ka Jingthoh Bakhuid kaba ong, ‘U la ïoh bynta ïa ka kupar jong kiba leh kam runar,’ ka dei ban urlong shisha shaphang jong nga, namar kaei kaba la thoh shaphang jong nga ka wan jia shisha.”
38Ki synran ki la ong, “Ha khmih! Kine hangne ar tylli ki waitlam, ko Kynrad!”
“Kata ka la biang!” u la jubab.
U Jisu u duwai halor u lum ki Olib
(Mat. 26:36-46; Mrk. 14:32-42)
39U Jisu u la mihnoh na ka nongbah bad u la leit, kumba u la ju leh, sha u lum ki Olib; bad ki synran ki la leit lem bad u. 40Haba u la poi ha kata ka jaka, u la ong ha ki, “Duwai ba phin ym hap ha ka jingpynshoi.”
41Nangta u la leit noh na ki kumba shi pda maw bad u la dem khohsiew bad u la duwai. 42“Ko Pa,” u la ong, “lada me mon, shim noh na nga ïa kane ka khuri ka jingshah shitom. Ym ïa ka mon jong nga, pynban, ïa ka mon jong me yn pyndep.” 43U angel na bneng u la paw ha u bad u la pynshaitbor ïa u. 44Ha ka jinglyng-a kaba khraw u la duwai kham jur shuh shuh; ka syep jong u ka la long kum ki jingjaw ka snam kaba hap ha madan.
45Haba u la ïeng joit na ka jingduwai jong u, u la leit pat sha ki synran bad u la shem ïa ki ba ki ïohthiah, kiba la shoh lwait da ka jingsngewsih jong ki. 46U la ong ha ki, “Balei phi thiah? Khie joit bad duwai ba phin ym hap ha ka jingpynshoi.”
Ka jingkem ïa U Jisu
(Mat. 26:47-56; Mrk. 14:43-50; Ïoan. 18:3-11)
47U Jisu u dang kren mynba ka kynhun ki briew ka la wan poi, ïa kaba la ïalam da u Judas, uwei na ki khat-ar ngut ki synran. U la wan sha U Jisu ban doh ïa u. 48Hynrei U Jisu u la ong, “Ko Judas, hato dei da ka jingdoh ba me la shetkylla ïa U Khun U Briew?”
49Haba ki synran kiba ïadon bad U Jisu ki la ïohi ïa kaei ka ban jia, ki la kylli, “Hato ngin pyndonkam ïa ki waitlam jong ngi, ko Kynrad?” 50Bad uwei na ki u la shoh ïa u mraw jong u Rangbah Lyngdoh bad u la ot noh ïa ka shkor kamon jong u.
51Hynrei U Jisu u la ong, “Keiñ noh kane!” U la ktah ïa ka shkor jong uta u briew bad u la pynkhiah ïa u.
52Nangta U Jisu u la ong ha ki rangbah lyngdoh bad ha ki rangbah pynïaidkam jong ki nongap phira ka Templ bad ha ki tymmen ki san kiba la wan hangta ban kem ïa u, “Hato phi la dei ban ïawan bad ki waitlam bad ki dieng tangon, la kumba nga dei u riewsniew? 53#Luk. 19:47; 21:37Nga la don bad phi ha ka Templ man ka sngi, bad phim shym la pyrshang ban kem ïa nga. Hynrei kane ka dei ka kynta jong phi ban leh, haba ka bor jong ka jingdum ka synshar.”
U Petros u len ïa U Jisu
(Mat. 26:57-58,69-75; Mrk. 14:53-54,66-72; Ïoan. 18:12-18,25-27)
54Ki la kem ïa U Jisu bad ki la ïalam noh ïa u sha ka ïing u Rangbah Lyngdoh; bad u Petros u la bud na pajih. 55La pynmeh ïa ka ding hapdeng jong ka phyllaw, bad u Petros u la ïasoh lem bad kito kiba ïashong sawdong jong ka. 56Haba kawei na ki shakri kynthei ka la ïohi ïa u ba u shong hangta harud ding, ka la khmih shlip sha u bad ka la ong, “Une u briew ruh u la don bad U Jisu!”
57Hynrei u Petros u la len ïa kata, “Ko kynthei, ngam ju ithuh ïa u!”
58Hadien katto katne por uwei u briew u la ïohi ïa u Petros bad u la ong, “Me ruh, me long uwei na ki!”
Hynrei u Petros u la jubab, “Ko rangbah, ngam dei!”
59Bad kumba shi kynta hadien, sa uwei pat u briew u la ban jur, “Ym don kano kano ka jingartatien ba une u briew u la don lem bad U Jisu, naba ma u hi ruh u long u nong Galilaïa!”
60Hynrei u Petros u la jubab, “Ko rangbah, ngam sngewthuh shaphang kaei phi ïakren!”
Kumta hi, katba u dang kren, u syiar u la kyn-ih. 61U Trai u la phai sawdong bad u la khmih shlip ha u Petros, bad u Petros u la kynmaw ba U Trai u la lah ong ha u, “Ha shuwa ba u syiar un kyn-ih ha kane ka miet, men ong lai sien ba mem ithuh ïa nga.” 62U Petros u la mihnoh bad u la ïam sngewsih eh.
Ïa U Jisu la krenbeiñ bad la shoh
(Mat. 26:67-68; Mrk. 14:65)
63Ki rangbah kiba la ap phira ïa U Jisu ki la krenbeiñ ïa u bad ki la shoh ïa u. 64Ki la teh matlah ïa u bad ki la kylli ïa u, “Mano ba tied ïa me? To antad!” 65Bad ki la ong shibun kiwei pat ki jingkrenbeiñ ïa u.
Ïa U Jisu la ïalam ha khmat ka dorbar
(Mat. 26:59-66; Mrk. 14:55-64; Ïoan. 18:19-24)
66Haba ka la long mynsngi, ki tymmen ki san, ki rangbah lyngdoh, bad ki nonghikai ka Hukum ki la ïashem lang, bad ïa U Jisu la wallam ha khmat ka dorbar. 67“Ïathuh ïa ngi,” ki la ong, “hato me dei U Messaïah?”
U la jubab, “Lada nga ïathuh ha phi, phin ym ngeit ïa nga; 68bad lada nga kylli ïa phi ka jingkylli, phin ym jubab. 69Hynrei naduh mynta U Khun U Briew un shong ha ka liang kamon jong U Blei Badonbor Baroh.” 70Baroh ki la ong, “Hato ma me, te, me long U Khun U Blei?”
U la jubab ïa ki, “Phi ong ba nga long.”
71Bad ki la ong, “Ngim da donkam ïa kino kino ki sakhi! Ma ngi hi ngi la ïohsngew ïa kaei kaba u la ong!”
Actualmente seleccionado:
LOUKAS 22: KHACLBSI
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Khasi CL Bible
Copyright © Bible Society of India, 2016.
Used by permission. All rights reserved worldwide.
