LOUKAS 21

Ka jingai jong ka riewkynthei

(Mrk. 12:41-44)

1U Jisu u la phai sawdong bad u la ïohi ïa ki briew bariewspah ba ki thep ïa ki jingai sngewbha jong ki ha ka jingkynshew ka Templ, 2bad u la ïohi ruh ïa ka riewkynthei kaba duk haduh katta katta ba ka thep ar tylli ki sbai tama. 3U la ong, “Nga ong ha phi ba kane ka riewkynthei kaba duk ka la thep kham bun shah ban ïa kiwei. 4Naba kiwei ki la ai ïa ki jingai sngewbha jong ki na kaei kaba ki don, ban ym ktah ïa ka spah jong ki; hynrei ma ka, ha ka jingduk jong ka, ka la ai ïa baroh kaba ka donkam ïa lade.”

U Jisu u kren shaphang ka jingpynjot ïa ka Templ

(Mat. 24:1-2; Mrk. 13:1-2)

5Katto katne ngut na ki synran ki dang ïakren shaphang ka Templ, ba katno ka long kaba itynnat lem bad ki maw bajlih jong ka bad ki jingai ïa kiba la ai sha U Blei. 6U Jisu u la ong, “Kane baroh kaba phi ïohi — ka por kan poi ha kaba yn ym iehnoh hangne ïa uwei ruh u maw ha ka jaka ba u don; ïa uwei uwei baroh yn bret sha tbian.”

Ki jingjynjar bad ki jingshah pynshitom beiñ

(Mat. 24:3-14; Mrk. 13:3-13)

7“Ko Nonghikai,” ki la kylli, “lano kane kan jia? Bad kaei ka ban jia khnang ban pyn-i ba ka por ka la poi ïa ka ba kan jia?”

8U Jisu u la ong, “Sumar; wat shah shukor. Kiba bun ki rangbah, kiba kam ba ki kren na ka bynta jong nga, kin wan bad ong, ‘Nga long ma u!’ bad, ‘Ka por ka la poi!’ Hynrei wat bud ïa ki. 9Wat sheptieng haba phi ïohsngew ïa ki thma bad ki jingïakhih pyrshah bor synshar; kiba kum kine ki dei ban jia nyngkong, hynrei kim mut ba kaba kut ka la jan.”

10U la ïai bteng ban ong, “Ki ri kin ïaleh kawei ïa kawei pat; ki hima kin tur ïaleh kawei ïa kawei pat. 11Yn don ki jingkhynñiuh jumai kiba shyrkhei, ki 'nemsniew, bad ki khlam ha kylleng kylleng; kin don kiei kiei kiba phylla bad kiba pyntriem kiba wan na sahit bneng. 12Pynban, ha shuwa ba kine kiei kiei baroh kin jia, ïa phi yn kem bad pynshitom beiñ; yn aiti ïa phi ban shah tian bishar ha ki synagog bad ban shah thep ha ka byndi; yn wallam ïa phi ha khmat ki syiem bad ki nongsynshar na ka bynta jong nga. 13Kane kan long ka kabu ïa phi ban ïathuh ïa ka Khubor Babha. 14#Luk. 12:11,12Buh jingmut lypa ban ym khuslai shaphang kumno phin ïasaid da ïa lade, 15namar ngan ai ha phi ki kyntien bad ka jingstad kiba ym don na ki nongshun jong phi kiba lah ban kyntait lane ïa-pyrshah ïa kaei kaba phi ong. 16Yn aiti ïa phi da ki kmie ki kpa jong phi, da ki hynmen ki para shynrang jong phi, da ki ba-ha-ïing jong phi, bad da ki paralok jong phi; bad ïa katto katne na phi yn pynïap. 17Uwei uwei baroh un shun ïa phi namar jong nga. 18Hynrei wat iwei ruh i shñiuh na ki khlieh jong phi in ym jah noh. 19To ïeng skhem, bad phin ri pynim ïa lade hi.

U Jisu u kren shaphang ka jingpynjot ïa ka Jerusalem

(Mat. 24:15-21; Mrk. 13:14-19)

20“Haba phi ïohi ba la kerkut ïa ka Jerusalem da ki kynhun shipai, te phin tip ba shen yn sa pynjot noh ïa ka. 21Nangta kito kiba ha Judia ki dei ban phet noh sha ki lum; kito kiba don ha ka nongbah ki dei ban mihnoh, bad kito kiba don shabar ha ki rudnong kim dei ban leit shapoh ka nongbah. 22#Hos. 9:7Naba kito kin long ‘Ki Sngi ka Jingpynshitom,’ ban pynlong ïa baroh kaba ki Jingthoh Bakhuid ki ong ban urlong shisha. 23A katno kaba shyrkhei kan long ha kito ki sngi ïa ki kynthei kiba armet bad ïa ki kmie kiba don khunlung! Ka jingjynjar mynsiem bashyrkhei kan wan halor kane ka ri, bad ka jingpynshitom jong U Blei kan hap ha kane ka jaitbynriew. 24Katto katne ngut kin shah pynïap da ka waitlam, bad kiwei pat kin shah rah kum ki koidi sha ki ri baroh; bad ki bymngeit blei kin ïuh ïa ka Jerusalem tad ynda ka por jong ki ka la kut.

Ka jingwan U Khun U Briew

(Mat. 24:29-31; Mrk. 13:24-27)

25 # Isa. 13:10; Ese. 32:7; Joel. 2:31; Jpw. 6:12,13 “Kin don kiei kiei kiba phylla ki ban jia ha ka sngi, ha u bnai, bad ha ki khlur. Ha ka pyrthei, ki ri baroh kin don ha ka jingnoh mynsiem, ki tieng ïa ka jingkyrhuh jong ka duriaw bad ïa ka jingkhih phaloh ki jingat phyllung. 26Ki briew kin ïapler na ka jingsheptieng katba ki dang ap ïa kaei kaba wan halor ka pyrthei baroh kawei, naba ïa ki bor ha ka haw haw yn beh noh na ki lynti jong ki. 27#Dan. 7:13; Jpw. 1:7Nangta U Khun U Briew un paw, u da wan ha ki lyoh lem bad ka bor bad ka burom bakhraw. 28Haba kine kiei kiei baroh ki sdang ban jia, ïeng joit bad pynïeng ïa la ki khlieh, namar ka jingpynim jong phi ka la jan.”

Ka jinghikai na u diengsoh Dumbur

(Mat. 24:32-35; Mrk. 13:28-31)

29Nangta U Jisu u la ïathuh ha ki ïa kane ka pharshi: “Pyrkhat ïa u diengsoh Dumbur bad ïa kiwei pat ki jait dieng. 30Haba phi ïohi ba ki sla jong ki, ki la sdang ban mih, phi tip ba ka lyiur ka la jan. 31Ha kajuh ka rukom, haba phi ïohi ïa kine kiei kiei baroh ba ki jia, phin tip ba ka Hima U Blei ka la jan wan.

32“Kynmaw ba kine kiei kiei baroh kin jia ha shuwa ba ki briew kiba im mynta kin ïap baroh. 33Ka bneng bad ka pyrthei kin leit noh, hynrei ki ktien jong nga kin ym leit noh satia.

Ka jingdonkam ban husiar

34“Sumar bha! Wat pynlut por shaba palat ha ka jingkhawai bad ka jingïadih bad ha ki jingkhuslai jong kane ka jingim, ïoh ba kata Ka Sngi kan kem kynsan ïa phi kum ka jingriam. 35Naba kan wan halor ki briew baroh ha kylleng jong ka pyrthei. 36Da husiar bad duwai borabor ba phin don ka jingkhlaiñ ban leit ha ka jingshngain lyngba kito kiei kiei ki ban sa jia bad ban ïeng ha khmat jong U Khun U Briew.”

37 # Luk. 19:47 U Jisu u la pynlut ïa kita ki sngi da kaba hikai ha ka Templ, bad haba ka janmiet ka la poi, u ju mihnoh shabar bad pynlut ïa ka miet ha u lum ki Olib. 38Dang step phyrngab man ka step baroh ki briew ki la leit sha ka Templ ban sngap ïa u.

Actualmente seleccionado:

LOUKAS 21: KHACLBSI

Destacar

Copiar