LOUKAS 20

Ka jingkylli shaphang ka iktiar jong U Jisu

(Mat. 21:23-27; Mrk. 11:27-33)

1Ha kawei ka sngi mynba U Jisu u don ha ka Templ, u da hikai ïa ki briew bad ïalap ïa ka Khubor Babha; ki rangbah lyngdoh bad ki nonghikai ka Hukum, lem bad ki tymmen ki san, ki la wan bad ong ha u, 2“To ïathuh ïa ngi, me donhok aïu ban leh ïa kine kiei kiei baroh? Mano ba ai ha me ïa kane ka hok?”

3U Jisu u la jubab ïa ki, “Mynta shah ïa nga ban kylli kawei ka jingkylli ïa phi. 4Ïathuh ïa nga, hato ka hok jong u Ïoannis ban pynbaptis ka wan na U Blei ne na u briew?”

5Ki la ïasdang ban ïasaidnia para ma ki, “Kaei ba ngin ong? Lada ngi ong, ‘Na U Blei,’ un ong ha ngi, ‘Balei, te, ba phim shym la ngeit ïa u Ïoannis?’ 6Hynrei lada ngi ong ‘Na u briew,’ kine ki paidbah hangne kin lynthem maw ïa ngi, namar ki la sngewskhem ba u Ïoannis u la long u nongïathuhlypa.” 7Kumta ki la jubab, “Ngim tip nangno ka la wan.”

8Bad U Jisu u la ong ha ki, “Lymne nga ruh ngan ïathuh ha phi, te, da kaei ka hok ba nga leh ïa kine kiei kiei baroh.”

Ka pharshi ki nongshimwai ha ka bri sohwaiñ

(Mat. 21:33-46; Mrk. 12:1-12)

9 # Isa. 5:1 Nangta U Jisu u la ïathuh ha ki paidbah ïa kane ka pharshi: “La don shisien uwei u briew uba don ka bri sohwaiñ, u la aiwai ha ki nongshimwai, bad nangta u la mihnoh na ïing ban jah kham slem. 10Haba ka por ka poi ban lum ïa ki sohwaiñ, u la phah ïa u mraw sha ki nongshimwai ban ïohpdiang na ki ïa la ka bynta na ka jingkheit soh. Hynrei, ki nongshimwai ki shoh ïa uta u mraw bad ki la phah noh thylli ïa u. 11Kumta u la phah sa uwei pat u mraw; hynrei, ki nongshimwai ki shoh ïa une ruh, ki da leh pynjahburom ïa u, bad ki la phah noh thylli ïa u. 12Nangta u la phah ïa u mraw uba lai; ki nongshimwai ki la pynmynsaw ïa u ruh, bad ki la bret ïa u shabar. 13Te u trai jong ka bri sohwaiñ u la ong, ‘Kaei ngan leh? ngan phah ïa u khun ba-ieit thep mynsiem jong nga; da kaba thikna kin burom ïa u!’ 14Hynrei, haba ki nongshimwai ki la ïohi ïa u, ki la kren para ma ki, ‘Une u dei u khun jong u trai. To ngin ïa-pynïap ïa u, bad ka jingdon jingem jong u kan long ka jong ngi!’ 15Kumta ki la bret ïa u shabar jong ka bri sohwaiñ bad ki la pynïap ïa u.

“Kaei, te, ba u trai jong ka bri sohwaiñ un leh ïa ki nongshimwai?” U Jisu u la kylli. 16“Un wan bad pynïap ïa kito ki rangbah, bad un ai ïa ka bri sohwaiñ ha kiwei pat ki nongshimwai.”

Haba ki paidbah ki la ïohsngew ïa kane, ki la ong, “Ym kumta keiñ!”

17 # Salm. 118:22 U Jisu u la khmih sha ki bad u la kylli, “Aïu, te, kane ka Jingthoh Bakhuid ka kit jingmut?

“ ‘U maw ïa uba ki nongtei ki la kyntait kum u bymmyntoi

u la kylla long uba donkam tam na baroh.’

18Uno uno uba hap halor uta u maw un shah ot lyngkhot lyngkhai; bad lada uta u maw u hap halor jongno jongno, un pynlwet phum ïa uta.”

Ka jingkylli shaphang kaba siew khajna

(Mat. 22:15-22; Mrk. 12:13-17)

19Ki nonghikai ka Hukum bad ki rangbah lyngdoh ki la pyrshang ban kem ïa U Jisu hangta hi, namar ki la tip ba u la ïathuh ïa kane ka pharshi pyrshah ïa ki; hynrei ki la ïasheptieng ïa ki paidbah. 20Kumta ki la khmih ïa ka kabu. Ki la pynbam pisa ïa ki katto katne ngut ki rangbah ban leh mynleh kum kiba shida, bad ki la phah ïa ki ban riam ïa U Jisu da ki jingkylli, khnang ba kin lah ban aiti ïa u ha ki bor synshar bad sha ka bor jong u lyngskor ka Hima Rom. 21Kine ki nongsyntiat ki la ong ha U Jisu, “Ko nonghikai, ngi tip ba kaei kaba me ong ka long kaba dei. Ngi tip ba mem khmih ïa ka kyrdan u briew, hynrei me hikai ïa ka jingshisha shaphang ka mon jong U Blei na ka bynta u briew. 22To ïathuh ïa ngi, hato ka long pyrshah ïa ka Aiñ jong ngi ba ngi dei ban siew khajna sha u Patsha ka Hima Rom, ne kumno?”

23Hynrei U Jisu u la ïohi lut ïa ka buit jong ki bad u la ong ha ki, 24“To pyn-i hangne ïa ka sbai rupa. Ka durkhmat bad ka kyrteng jongno long kine kiba don ha ka?”

“Jong u Patsha,” ki la jubab.

25Kumta U Jisu u la ong, “Da kumta, te, siew sha u Patsha ïa kaei kaba dei ka jong u Patsha, bad siew sha U Blei ïa kaei kaba dei ka jong U Blei.”

26Hangta ha khmat jong ki paidbah, kim shym la lah ban kem daw ïa u ha kano kano, kumta ki la sngap jar, ki da lyngngoh ha ka jingjubab jong u.

Ka jingkylli shaphang ka jingmihpat na ka jingïap

(Mat. 22:23-33; Mrk. 12:18-27)

27 # Ki Kam. 23:8 Nangta katto katne ngut ki Saddusi, kiba ong ba ki briew kin ym mihpat na ka jingïap, ki la wan ha U Jisu bad ki la ong, 28#Deut. 25:5“Ko Nonghikai, u Moses u la thoh ïa kane ka hukum na ka bynta jong ngi: ‘Lada u briew u ïap bad u iehnoh ïa la ka tnga hynrei khlem don khun, u para jong uta u briew u dei ban shongkurim ïa kata ka riewkynthei khnang ba ki lah ban ïoh ki khun ïa kiba yn ñiew ba ki long ki khun jong uta u briew uba la ïap.’ 29Shisien la don hynñiew ngut shi para ki shynrang; uba nyngkong duh u la shongkurim bad u la ïap khlem don khun. 30Nangta uba ar u la shongkurim ïa kata ka briew, bad nangta sa uba lai. 31Kajuh ka la jia ha baroh hynñiew ngut — ki la ïap khlem don khun. 32Khatduh na ki baroh, kata ka briew ka la ïap. 33Mynta, ha ka sngi ba kiba ïap ki mihpat, kan long ka tnga jongno? Baroh hynñiew ngut ki la shongkurim ïa ka.”

34U Jisu u la jubab ïa ki, “Ki shynrang bad ki kynthei jong kane ka juk ki ïashongkurim, 35hynrei ki shynrang bad ki kynthei kiba bit ban mihpat na ka jingïap bad ban im ha ki pateng ban wan kin ym shongkurim shuh. 36Kin long kum ki angel bad kim lah ban ïap. Ki long ki khun jong U Blei, naba ki la mihpat na kaba ïap. 37#Eks. 3:6Bad u Moses u pynshisha da kaba shai ba ïa kiba ïap la pynmihpat. Ha ka bynta shaphang ka 'lawlynnong kaba ing u kren shaphang U Trai kum ‘U Blei jong u Abraham, U Blei jong u Isaak, bad U Blei jong u Jakob.’ 38U long U Blei jong kiba im, ym jong kiba ïap, namar ha u baroh ki im.”

39Katto katne ngut na ki nonghikai ka Hukum ki la ong, “Ka jubab kaba dei, ko Nonghikai!” 40Naba kim nud shuh ban kylli ïa u kano kano ka jingkylli.

Ka jingkylli shaphang U Messaïah

(Mat. 22:41-46; Mrk. 12:35-37)

41U Jisu u la kylli ïa ki, “Kumno lah ban ong ba U Messaïah un dei uba hiarpateng na u Dabid? 42#Salm. 110:1Naba u Dabid hi u ong ha ka kitab Ki Salm,

“ ‘U Trai u la ong ha u Trai jong nga:

to shong hangne ha ka liang kamon jong nga

43tad ynda nga buh ïa ki nongshun jong me kum ka jingïuhkjat hapoh ki kjat jong me.’

44U Dabid u la khot ïa u ‘U Trai’; kumno, te, U Messaïah u lah ban long uba hiarpateng na u Dabid?”

U Jisu u maham pyrshah ïa ki Nonghikai ka Hukum

(Mat. 23:1-36; Mrk. 12:38-40)

45Katba baroh ki paidbah ki dang shahshkor ïa u, U Jisu u la ong ha ki synran jong u, 46“To sumar bha pyrshah ïa ki nonghikai ka Hukum, kiba sngewtynnat ban ïaid kylleng ha ki jaiñkup bajynsur bad kiba ieit ban ïoh jingkhublei da kaba burom ha ki jaka ïew; kiba jied ïa ki jaka ba la pynkyrpang ha ki synagog bad ïa ki jaka bakynsai tam ha ki jingkhawai; 47kiba shim kabu ïa ki riewkynthei bad kiba knieh noh ïa ki ïing jong ki, bad nangta kiba pyn-i paidbah da kaba duwai jlan! Ka jingpynshitom ïa ki kan long kaba kham shyrkhei!”

Actualmente seleccionado:

LOUKAS 20: KHACLBSI

Destacar

Copiar