LOUKAS 19

U Jisu bad u Sakhaïos

1U Jisu u la nang leit sha Jerikho bad u dang ïaid lyngba jong ka. 2La don hangta u nonglum khajna uba ha khlieh duh uba kyrteng, u Sakhaïos, uba riewspah. 3U la pyrshang ban ïohi ïa U Jisu ba u long uba kumno, hynrei u long u briew uba rit bad um lah ban ïohi ïa U Jisu namar ki paidbah. 4Kumta u la mareh ha shuwa jong ki paidbah bad u la kiew ïa u dieng Sykomore#19:4 Sykomore: Une u dieng u pynmih ïa ki soh kiba syriem ïa u soh Dumbur. U dei u jait dieng uba heh bad uba eh haba nujor bad u dieng Dumbur uba shroiñ. ban ïohi ïa U Jisu, uba dei ban ïaid lyngba kata ka lynti. 5Haba U Jisu u la poi ha kata ka jaka, u la khmied shajrong bad u la ong ha u Sakhaïos, “Hiar kloi, ko Sakhaïos, namar nga dei ban sah ha ka ïing jong me ha kane ka sngi.”

6U Sakhaïos u la hiar pynstet bad u la pdiang sngewbha ïa u da ka jingkmen kaba khraw. 7Baroh ki briew kiba la ïohi ïa kata ki la sdang ban khñium, “Une u briew u la leit kum uba shah khot sngewbha sha ka ïing jong u nongpop!”

8U Sakhaïos u la ïeng joit bad u la ong ha U Trai, “To shahshkor, kynrad! ngan ai shiteng na ki jingdon jingem jong nga ha kiba duk, bad lada nga la shukor ïano ïano, ngan siew pat ïa u sa saw shah.”

9U Jisu u la ong ha u, “Mynta ka jingpynim ka la wan ha kane ka ïing, naba une u briew, ruh, u dei uba hiarpateng jong u Abraham. 10#Mat. 18:11U Khun U Briew u la wan ban wad bad ban pynim ïa kiba la jah noh.”

Ka pharshi ki sbai ksiar

(Mat. 25:14-30)

11Katba ki briew ki dang shahshkor ïa kane, U Jisu u la bteng bad u la ïathuh ïa ka pharshi ha ki. U la jan poi artat ha Jerusalem, bad ki la tharai ba ka Hima U Blei ka la jan paw. 12Kumta u la ong, “La don shisien uwei u briew uba heh kyrdan uba dang leit sha ka ri kaba jngai bah ban shah thung syiem, hadien kata, u la thmu ban wan phai pat sha ïing. 13Ha shuwa ba un mih, u la khot ïa ki shiphew ngut ki shakri jong u bad u la ai ha ki kawei kawei ka sbai ksiar bad u la ong ïa ki, ‘Khmih aïu phi lah ban kamai da kane katba nga dang leit jingleit.’ 14Mynta, ki para ri jong u ki la isih ïa u, bad kumta ki la phah ïa ki nonglamktien hadien jong u ban ong, ‘Ngim kwah ïa une u briew ban long u syiem jong ngi.’

15“Ïa uta u briew la thung syiem bad u la wan phai pat. Mar kumta hi, u la hukum ïa ki shakri ban wan mih ha khmat jong u, khnang ban shem haduh katno ki la kamai. 16Uba nyngkong u la wan bad u la ong, ‘Ko kynrad, nga la kamai shiphew tylli ki sbai ksiar da kawei kaba me la ai ha nga.’ 17‘Me la lehbha,’ u la ong; ‘me long u shakri uba bha! Namar ba me long uba lah ban shaniah ha kiei kiei kiba rit, ngan buh ïa me ban khmih ïa ki shiphew tylli ki nongbah.’ 18U shakri uba ar u la wan bad u la ong, ‘Ko kynrad, nga la kamai san tylli ki sbai ksiar na kawei kaba me la ai ha nga.’ 19Ïa une u la ong, ‘Men long u nongkhmih ïa ki san tylli ki nongbah.’

20“Uwei pat u shakri u la wan bad u la ong, ‘Ko kynrad, kane ka long ka sbai ksiar jong me; nga la buhrieh ïa ka hapoh ka jaiñ rumal. 21Nga la sheptieng ïa me namar ba me long u briew uba eh. Me shim ïa kaei ka bym dei ka jong me bad ot ïa kaei kaba mem shym bet.’ 22U la ong ha u, ‘Me u shakri bym long! Ngan pyndonkam ïa ki ktien jong me ban pynrem ïa me! Me tip ba nga long u briew uba eh, uba shim ïa kaei ka bym dei ka jong nga bad uba ot ïa kaei kaba ngam shym bet. 23Kumta, te, balei mem buh ïa ka pisa jong nga ha ka jaka kynshew pisa? Nangta te ngan jin da la ïohpdiang pat ïa ka lem bad ka sut haba nga la wan phai.’

24“Nangta u la ong ha kito kiba ïa-ïeng hangta, ‘To shim noh ïa ka sbai ksiar na u bad ai ïa ka ha u shakri uba don shiphew tylli ki sbai.’ 25Hynrei ki la ong ha u, ‘Ko kynrad, u la don lypa shiphew tylli ki sbai ksiar!’ 26#Mat. 13:12; Mrk. 4:25; Luk. 8:18‘Nga ong ha phi,’ u la jubab, ‘ba ha uno uno u briew uba don ei ei, yn ai kham bun shuh shuh; hynrei ha u briew u bym don ei ei, wat ïa kaba rit kaba u don yn shim noh na u. 27#Mat. 25:14-30Mynta, ïa kito ki nongshun jong nga ki bym kwah ïa nga ban long u syiem jong ki, to wallam ïa ki hangne bad pynïap ïa ki ha khmat jong nga!’ ”

Ka jingrung badonburom sha Jerusalem

(Mat. 21:1-11; Mrk. 11:1-11; Ïoan. 12:12-19)

28U Jisu u la kren ïa kane bad nangta u la nang leit sha Jerusalem ha shuwa jong ki. 29Haba u la poi hajan Bethphage bad Bethania ha u lum ki Olib, u la phah ar ngut ki synran sha shuwa lem bad kine ki jingbthah: 30“Khie leit sha ka shnong hangta kaba ha khmat jong phi; haba phi rung shapoh, phin shem ïa u khun kada uba la teh ha uba ym pat ju don bashong halor jong u. To loit bad wallam ïa u shane. 31Lada uno uno u kylli ïa phi balei ba phi loit ïa u, ong ha u ba u Kynrad u donkam ïa u.”

32Ki la nang leit ha la ka lynti bad ki la shem ïa kaei kaei baroh thik kumba U Jisu u la lah ïathuh ïa ki. 33Katba ki dang loit ïa u khun kada, u trai jong u, u la ong ha ki, “Balei phi ïalaw ïa u?”

34“U Kynrad u donkam ïa u,” ki la jubab, bad ki la ïalam ïa u khun kada sha U Jisu. 35Nangta ki la tap ïa ki jaiñkup jong ki halor u khun kada bad ki la ïarap ïa U Jisu ban kiew halor jong u. 36Katba u dang shong, ki briew ki la phriang ïa la ki jaiñkup ha ka lynti bah.

37Haba u la poi hajan ka Jerusalem, ha ka jaka ha kaba ka lynti kaba hiar sha u lum ki Olib, ki paid synran jong u kiba bun bah ki la sdang ban ainguh ïa U Blei bad ïaroh ïa u ha ki sur bajam na ka bynta kiei kiei kiba khraw baroh kiba ki la lah ïohi: 38#Salm. 118:26“U Blei u kyrkhu ïa u syiem uba wan ha ka kyrteng jong U Trai! Ka jingsuk ha ki bneng bad ka burom ïa U Blei!”

39Nangta katto katne ngut na ki Pharisi napdeng u paidbah ki la kren ïa U Jisu. “Ko Nonghikai,” ki la ong, “hukum ïa ki synran jong me ban sngap jar!”

40U Jisu u la jubab, “Nga ong ha phi ba lada ki sngap jar, ki maw hi kin sa sdang ban pyrta.”

U Jisu u ïam na ka bynta ka Jerusalem

41U la poi kham jan sha ka nongbah, bad haba u la ïohi ïa ka, u la ïam na ka bynta jong ka, u da ong, 42“Lada phan jin da la tip mynta ïa kaei kaba donkam na ka bynta ka jingsuk! Hynrei mynta pham lah ban ïohi ïa ka! 43Ka por kan poi haba ki nongshun jong pha kin ker sawdong ïa pha da ki jingker, ki jingkhanglad ïa pha, bad ki nang tur jan sha pha na ki liang baroh. 44Kin pynjot thiaw ïa pha bad ïa ki briew kiba hapoh ki kynroh jong pha; yn ym pynsah wat uwei ruh u maw ha ka jaka ba u don, namar ba pham shym ithuh ïa ka por mynba U Blei u la wan ban pynim ïa pha!”

U Jisu u leit sha ka Templ

(Mat. 21:12-17; Mrk. 11:15-19; Ïoan. 2:13-22)

45Nangta U Jisu u la leit shapoh ka Templ bad u la sdang ban beh noh ïa ki nongkhaïi da kaba ong ha ki, 46#Isa. 56:7; Jer. 7:11“La thoh ha ki Jingthoh Bakhuid ba U Blei u la ong, ‘Ïa ka Templ jong nga yn khot ka ïing ka jingduwai.’ Hynrei phi la pynkylla ïa ka sha ka jakarieh na ka bynta ki nongtuh!” 47#Luk. 21:37Man ka sngi, U Jisu u la hikai ha ka Templ. Ki rangbah lyngdoh, ki nonghikai ka Hukum, bad ki nongïalam jong ki paidbah ki la kwah ban pynïap ïa u, 48hynrei kim shym shem ka lad ban leh ïa kata, namar baroh ki briew ki la ïai shahshkor ïa u, kim kwah ban duh noh wat kawei ka kyntien.

Actualmente seleccionado:

LOUKAS 19: KHACLBSI

Destacar

Copiar