LOUKAS 23
23
Ïa U Jisu la ïalam ha khmat u Pilat
(Mat. 27:1-2,11-14; Mrk. 15:1-5; Ïoan. 18:28-38)
1Ka kynhun baroh kawei ka la ïeng joit bad ka la ïalam ïa U Jisu ha khmat u Pilat, ha kaba ki la sdang ban mudui ïa u: 2“Ngi la kem ïa une u briew uba ïalam bakla ïa ki briew jong ngi, da kaba ong ïa ki ban ym siew khajna sha u Patsha bad u kam ba ma u hi u long U Messaïah, u syiem.”
3U Pilat u la kylli ïa u, “Hato me long u syiem ki Jiw?”
“Me ong kumta,” la jubab U Jisu.
4Nangta u Pilat u la ong ha ki rangbah lyngdoh bad ha ki paidbah, “Ngam shem kano kano ka daw ban pynrem ïa une u briew.”
5Hynrei ki la ïa-ban kham jur shuh shuh, “Da ka jinghikai jong u, u la sdang ka jingpynkhihwin hapdeng ki briew ha baroh kylleng ka Judia. U la sdang ha Galilaïa bad mynta u la poi hangne.”
Ïa U Jisu la phah sha u Herod
6Haba u Pilat u la ïohsngew ïa kane, u la kylli, “Hato une u briew u dei u nong Galilaïa?” 7Haba u la tip ba U Jisu u la dei na ka thain ba la synshar da u Herod, u la phah ïa u sha u Herod, uba la don ruh ha Jerusalem ha kata ka por. 8U Herod u la sngewbha shikatdei eh haba u la ïohi ïa U Jisu, namar u la lah ïohsngew shaphang jong u bad u la da kwah eh ban ïohi ïa u la slem bah. U la kyrmen ban ïohi ïa U Jisu ba u leh katto katne ki kambah. 9Kumta u Herod u la kylli ïa U Jisu shibun ki jingkylli, hynrei U Jisu um shym jubab ei ei. 10Ki rangbah lyngdoh bad ki nonghikai ka Hukum ki la jam sha khmat bad ki la pynlong ki jingmudui kiba khlaiñ pyrshah ïa U Jisu. 11U Herod bad ki shipai jong u ki la krenbeiñ ïa U Jisu bad kim ñiewburom ïa u; nangta ki la buh ka jaiñkup ba-itynnat halor jong u bad u la phah pat ïa u sha u Pilat. 12Ha kata hi ka sngi, u Herod bad u Pilat ki la ïalong paralok; ha shuwa jong kane, ki la ïalong ki nongshun.
Ïa U Jisu la rai pynïap
(Mat. 27:15-26; Mrk. 15:6-15; Ïoan. 18:39—19:16)
13U Pilat u la khot lang ïa ki rangbah lyngdoh, ïa ki nongïalam, bad ïa u paidbah, bad u la ong ha ki, 14“Phi la wallam ïa une u briew ha nga bad phi la ong ba u ïalam bakla ïa u paidbah. Mynta, nga la jurip bha ïa u hangne ha ka jingdon ryngkat jong phi, bad ngam shym shem ïa u ba u shah rem ha kano kano ka kam runar kaba phi mudui ïa u. 15Lymne ba u Herod u shem ïa u, uba la rem, naba u la phah biang ïa u sha ngi. Kam shym don kano kano kaba une u briew u la leh kaba u dei ban ïap. 16Kumta ngan phah sympat ïa u bad pyllait noh ïa u.” 17Ha man ka Jingkhawai Niam Ka Jinglait u Pilat u la dei ban pyllaitluid ïa uwei na ki koidi na ka bynta jong ki.
18Ki paidbah baroh ki la pyrta, “Pynïap ïa u! Pyllait ïa u Barabbas ha ngi!” 19(Ïa u Barabbas la buh ha ka byndi na ka bynta ka jingkhihwin kaba lah jia ha ka nongbah, bad namar ka jingpynïap briew.)
20U Pilat u la kwah ban pyllait noh ïa U Jisu, kumta u la kyrpad biang ïa u paidbah. 21Hynrei ki la pyrta biang, “Sahnarphna ïa u! Sahnarphna ïa u!”
22U Pilat u la ong ha ki ha ka sien kaba lai, “Hynrei kaei ka kam runar kaba u la leh? Ngam lah ban shem ïa kano kano kaba u la leh kaba u dei ban ïap! Ngan phah sympat ïa u bad pyllait noh ïa u.”
23Hynrei ki la ïai pyrta da ka sur kaba jam eh ba ïa U Jisu dei ban sahnarphna, bad khatduh ka jingpyrta jong ki ka la jop. 24Kumta u Pilat u la shim ka rai halor U Jisu ïa kaba ki la pan. 25U la pyllait noh ïa u briew uba ki la kwah, uta uba la shah set byndi na ka bynta ka jingkhihwin bad ka jingpynïap briew, bad u la aiti ïa U Jisu ha ki ban leh kumba ki la kwah.
Ïa U Jisu la sahnarphna
(Mat. 27:32-44; Mrk. 15:21-32; Ïoan. 19:17-27)
26Ki shipai ki la ïalam noh ïa U Jisu, bad katba ki dang leit, ki la ïashem ïa u briew uba ka Kyrini uba kyrteng u Simon uba la wan rung sha ka nongbah. Ki la kem ïa u, ki buh ïa ka diengphna halor jong u, bad ki la pynlong ïa u ban bah ïa ka hadien U Jisu.
27U paidbah babun u la bud ïa u; hapdeng jong ki, la don katto katne ngut ki kynthei kiba la ïam bad ïam sngewsih na ka bynta jong u. 28U Jisu u la phai sha ki bad u la ong, “Ko kynthei Jerusalem! Wat ïam na ka bynta jong nga, hynrei na ka bynta ïa lade bad ki khun jong phi. 29Naba ki sngi ki wan ha kaba ki briew kin ong, ‘Katno kiba donbok long ki kynthei ki bym ju don khun, ki bym ju kha khunlung, ki bym ju bsa ïa ki!’ 30#Hos. 10:8; Jpw. 6:16Kata kan long ka por ha kaba ki briew kin ong ha ki lumbah, ‘To hap halor jong ngi!’ bad ha ki lumrit, ‘To buhrieh ïa ngi!’ 31Naba lada ïa kiba kum kine kiei kiei la leh haba u dieng u dang jyrngam, kaei ka ban jia haba u la tyrkhong?”
32Ïa kiwei pat ki ar ngut ki rangbah, baroh ar ngut ki dei kiba leh kam runar, la ïalam ruh shabar ba yn pynïap ryngkat bad U Jisu. 33Haba ki la poi ha ka jaka ba la khot “Ka Maloi Khlieh,” ki la sahnarphna ïa U Jisu hangta, bad ïa ki ar ngut ki nongleh kam runar, uwei sha kamon jong u bad uwei pat sha kadiang jong u. 34#Salm. 22:18U Jisu u la ong, “Ko Pa, to map ïa ki! Kim tip ïa kaei kaba ki leh.”
Ki la pynbynta ïa ki jaiñ jong u hapdeng jong ki hi da kaba kynting sbai. 35#Salm. 22:7Ki paidbah ki la ïeng hangta da kaba khmih katba ki nongïalam jong ki Jiw ki krenbeiñ ïa u: “U la pynim ïa kiwei; ai un pynim ïa lade lada u dei U Messaïah ïa uba U Blei u la jied!”
36 #
Salm. 69:21
Ki shipai ruh ki la krenbeiñ ïa u: Ki la wan sha u bad ki la tyrwa ha u ïa ka waiñ bym bha, bad ki la ong, 37“To pynim ïa lade lada me long u syiem ki Jiw!”
38Shalor jong u la thoh ïa kine ki kyntien: “Une u long U Syiem ki Jiw.”
39Uwei na ki nongleh kam runar uba la sdien hangta u la krenbeiñ ïa u: “Hato mem long U Messaïah? To pynim ïa lade bad ïa ngi!”
40Uta uwei pat, pynban, u la kynhied ïa uta, da kaba ong “Hato mem tieng ïa U Blei? Me la ïoh kajuh ka jingpynrem kumba u la ïoh. 41Ïa ngi, pynban, ka long kaba dei hok, namar ba ngi ïoh ïa kaei kaba ngi dei ban ïoh na ka bynta kaei kaba ngi la leh; hynrei, um shym la leh kano kano ka bym dei.” 42Bad u la ong ha U Jisu, “To kynmaw ïa nga, ko Jisu, haba me wan kum u Syiem!”
43U Jisu u la ong ha u, “Nga kular ïa me ba ha kane ka sngi men don ha ka Paradais bad nga.”
Ka jingïap U Jisu
(Mat. 27:45-56; Mrk. 15:33-41; Ïoan. 19:28-30)
44 #
Eks. 26:31-33
Ka la long kumba khat-ar baje haba ka sngi ka la sangeh ban tyngshaiñ bad ka jingdum ka la tap ïa ka ri baroh kawei haduh lai baje; 45bad ïa ka pyrda ba la wah hapoh ka Templ la pynkad arliang. 46#Salm. 31:5U Jisu u la pyrta ha ka sur bajam, “Ko Pa! Ha ki kti jong me nga aiti ïa la ka mynsiem!” U la ong ïa kane bad u la ïap.
47U rangbah shipai u la ïohi ïa kaei kaba la jia, bad u la ïaroh ïa U Blei, da kaba ong, “Da shisha u la long u briew uba bha!”
48Haba ki paidbah kiba la ïalumlang hangta ban khmih ïa kata baroh, ki la ïohi kaei kaba la jia, baroh ki la ïaleit phai sha ïing, ki da tied ïa la ki shadem ha ka jingsngewsih. 49#Luk. 8:2,3Baroh kito kiba la ithuh ïa U Jisu, kynthup ki kynthei kiba la bud ïa u na Galilaïa, ki la ïeng na pajih ban jngoh.
Kaba tep ïa U Jisu
(Mat. 27:57-61; Mrk. 15:42-47; Ïoan. 19:38-42)
50-51La don u briew uba kyrteng u Joseph na Arimathaïa, ka shnong kaba ha Judia. U la long u briew uba bha bad uba donburom, uba la apkhmih ïa ka jingwan jong ka Hima U Blei. Wat la u long u dkhot jong ka Dorbar, um shym la mynjur bad ka jingrai bad jingleh jong ki. 52U la leit sha u Pilat bad pan ïa ka met jong U Jisu. 53Nangta u la pynhiar ïa ka met U Jisu, u la sop ïa ka hapoh ka jaiñ linen, bad u la buh ïa ka hapoh ka jingtep ïa kaba la khlong na u mawsiang tylli bad ïa kaba ym pat ju pyndonkam. 54Ka la long ka sngi Thohdieng, bad ka sngi Sabbaton ka la jan sdang.
55Ki kynthei kiba la bud ïa U Jisu na Galilaïa ki la leit bad u Joseph bad ki la ïohi ïa ka jingtep bad kumno ba la buh ïa ka met ka jong U Jisu hapoh jong ka. 56#Eks. 20:10; Deut. 5:14Nangta ki la leit phai pat sha ïing bad ki la pynkhreh ïa ki musla bad ki jingiwbih na ka bynta ka met.
Ha ka sngi Sabbaton ki la shongthait, kumba ka Hukum ka dawa.
Actualmente seleccionado:
LOUKAS 23: KHACLBSI
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Khasi CL Bible
Copyright © Bible Society of India, 2016.
Used by permission. All rights reserved worldwide.
