Rukasi 16

Tõvijã ma'e kõ rè ja'aarà rè tè Jesu poromosã'ãga remẽwarà

1E'i jẽ Jesu ayvu mosã'ãga ekojẽ wemimo'ekwerà kõ pè:

– Oiko kwaima'e imoma'e ywete mã'ẽ mõ. A'e wemĩgwai mõ omoẽoka oma'e kõ rè ja'aarà rõmõ toiko. Imoma'e ma'e tome'ẽ epy rõmõ ijupe ipi. Ajawyi a'e tè ajaire moma'e repykwerà opyy imoaty ijupe ipi. [A'e pe'ĩrõwã moma'e ma'e ome'ẽ rã'ĩ ãmõ kõ pè epy rõmõ: “Kãramõ emoepy ije”, e'i ime'ẽ ipi. Okusiwa kareta rè noepyme'ẽive moma'e maekwerà kõ rewarà, toja'a ajaire ee ipi. Ajamã'ẽ nivoi a'e omoaty epykwerà oõvijã pè ipi.] Ãmẽ ãmõ 'ary pè kee jaa ojenu tõvijã pè: “Nivoi omoepy neupe neremĩgwai. Imona tè sikaepo nekarakuri rè”, jaa ojenu eewarà mõ tõvijã pè.

2– Ãmẽ tõvijã wenu aepo jaa remẽ, ookwai imuu. Kee e'i ijupe: “Manyvore põ aepo ojenu nerewarà? Nikatui moko ere remẽ. Age'e ekusiwapa kareta rè noepyme'ẽive maekwerà kõ, ajaire tereme'ẽ kareta ije. Ãwijã mẽ awyjepa neposiko eupe ãmẽ ky'y. Nepoità neposikoa wyi ky'y”, e'i tõvijã. “Hoõ” e'i ãmẽ moma'e rè ja'aarà oõvijã pè. 3Ãmẽ kee e'i oupe: “Emoisyrytà itãwĩ eposikoa wyi”, e'i oupe. “Manyvo kuwa põkõ aiko ãmẽ? Koo rè naposiko kuwa'ãi. Ãmõ, koivo kõ pè, ‘Moma'e emuu ije’, na'e'ãi teve, asĩ jẽ aepo javo rewarà mõ”, e'i oupe. “Manyvo kuwa põkõ areko ãmẽ?” e'i ojipy'amogeta upa. 4Ãmẽ, “Age'e si akuwa ky'y, manyvo aikotà noepyme'ẽive maekwerà kõ tepota katu, tepãtavõ kãramõ”, e'i oupe.

5– Ajawyi noepyme'ẽive mãe kõ ookwai imuu okoty. Kee e'i ãmõ pè: “Mapejõ põkõ karakuri nereepyme'ẽive erõvijã pè?” e'i. 6Ãmẽ kee e'i noepyme'ẽive mã'ẽ: “100 rõmõ tesõ moma'eyva kawerà rena kõ mõ naepyme'ẽive mãe kõ”, e'i. Ãmẽ emĩgwai e'i: “Hoõ, oropãtavõtà tiwaype e'ã neupe ky'y. Epy nereme'ẽive mã'ẽ, amowyjytà neupe age'e ky'y. Ipẽ kõrijõ tè neme'ẽtà erõvijã pè ky'y. Ajawyi 50 rõmõ kõrijõ tè ekusiwa nekareta rè, kãramõ tereme'ẽ”, e'i moma'e rè ja'aarà. “Hoõ, ikatuay”, e'i noepyme'ẽive mã'ẽ. 7Ajaire ãmõ pè e'i mijẽ: “Ene pa'e. Mapejõ kuwa põkõ neme'ẽ erõvijã pè?” e'i. A'e kee e'i: “Ãmẽ ije 100 moma'e ku'ikwerà ryru kõ mõ aepyme'ẽtà ijupe”, e'i. Ãmẽ kee e'i moma'e rè ja'aarà ijupe: “Neupe ve amowyjytà epykwerà. Ipẽ kõrijõ tè neme'ẽtà ky'y. Ajawyi epyy age'e nekareta. 80 ekusiwa tereme'ẽ ajaire erõvijã pè”, e'i. Ãmẽ “hoõ” e'i noepyme'ẽive mã'ẽ. Ory aepo renu. 8Ajaate a'evoa ojikuwapa tõvijã pè ky'y. E'i ãmẽ tõvijã: “Kõi sõ nẽ. Otekokuwavay sipõ emoma'e rè ja'aarà?” e'i tõvijã oupe. “Oja'a ywete amãtejẽ sipõ manyvotà kãramõ ekoi!” e'i tõvijã. Nivoi epe emĩgwai remẽ, tõvijã omoe'e jẽ otekokuwa rewarà mõ.

E'i jẽ Jesu:

– Ãmẽ ajaa maekwerà rè kee a'e pejẽ. Nivoi mãe kõ ywesõ ipojawa tesõ moma'e kõ porua rè iko, Janejare'e koty rewarà kõ wyi, e'i. 9Ajawyi kee a'e pejẽ. Tapetekokuwa amãtejẽ. Ikewarà teãmã karakuri. Pemoma'e kõ ve ikewarà teãmã. Ajawyi pemoma'e kõ pè ãmõ kõ tapepãtavõ pejuve jẽ remẽ, pejimorypa kõ rõmõ toiko kupa. Janejare'e teve tapemojikuwaoka ijupe kõ. Ãmẽ tè kãramõ pekãjã remẽ, ojeeve pevãetà awyje rõmõ Janejare'e rena pè, e'i.

10E'i jẽ Jesu:

– Ava mõ moma'e sisikwerà ivo katu opyy ereko remẽ, ajaire moma'e e'ekwerà opyytà remẽ, ivo katu werekotà ãmẽ. Ãmõ, ãwĩvo ve ava mõ moma'e sisikwerà nivoi wereko remẽ, ajaire moma'e e'ekwerà nivoi wereko tary ve ipi. 11Ikewarà epy wete mã'ẽ napeporu katui remẽ, Janejare'e remime'ẽ ve napeporu kuwa'ãi, ãwisõ a'e ywesõ epy wete mã'ẽ vo 'ejẽ remẽ, e'i Jesu. 12Ãmõ kõ moma'e kõ rè napemãrãte katui ereko remẽ, ava jẽ rõwã moma'e e'ekweray kõ ome'ẽtà peupe ãmẽ? e'i.

13E'i jẽ Jesu:

– Pe'ĩte jamojõvijã jane'arà kytywarà rõmõ ipi. Mõrijõ jamojõvijã remẽ, nivo'ãi ãmẽ janeupe. Ãmõ janerõvijã ywesõ jaautà ãmõ janerõvijã wyi ãmẽ. Pe'ĩte jarovija katutà ijayvu ãmẽ. A'e ayvu rupi tè jaikotà ãmẽ ky'y. Ãmõ ayvu nijarovija'ãi ãmẽ. Ãwĩvo ve pemoma'e rè ywesõ peja'a Janejare'e wyi remẽ, Janejare'e napemoe'e'ãi ãmẽ. Ajawyi pe'ĩte tapemoe'e penõvijã rõmõ. Janejare'e tè a'e, e'i Jesu poromo'e.#Mat. 6.24

“Pariseu kõ ovote ojimoripe”, e'i Jesu mã'ẽ

14Ãmẽ Pariseu kõ Jesu ayvu oojai kupa. “Tamoaty ekojẽ karakuri moeta” e'i e'i tesõ oupe kupa rewarà mõ oojai aepo renu kupa. 15Ajawyi kee e'i Jesu ijupe kõ:

– Jane kõ, “Mira katu tè ãwĩ”, e'i tite pene omãjã kupa. Ikuwa rè rõwã aepo e'i pejẽ kupa. Ajamã'ẽ Janejare'e okuwa katu pepy'a pewarà kõ. Manyvo napereko'ãi imoripe ipi. Mokoi pejẽ. Mape remẽ “tekoe'eay” e'i tite jane kõ pemoe'ea rõmõ. Ajamã'ẽ Janejare'e pè nikatui peiko. Mirà pè tè nojikuwai jopy'a pewarà ipi. Janejare'e pè ãmẽ ojikuwa katu janereko ipi.

16– Ãmõ, kee a'e pejẽ. Karamoe remẽ itõkõ Janejare'e omojikuwaoka wayvukwerà tãmõ Moisesi pè tokusiwa, upi tijaiko. Wayvu mojenuarà kõ pè teve omojikuwaoka. A'e a'e kõ ikasiay ajaate kwee'ĩ remẽ Juwão uu remẽ. Juwão ovãema rire ije tè poromo'e ajupa ky'y. Ajawyi age'e remẽ jane kõ mõa'ãrõwã opota Janejare'e omoẽoka o'arà kyty ky'y, e'i. 17Ajamã'ẽ nitee'ãi Moisesi remikusiwarerà, ivo tekoua rewarà. Ajaate a'evotà ipi. Yva opatà. Ãmõ, yvy opa tary ve. Janejare'e ayvukwerà Moisesi pè omojenu ikusiwaoka maekwerà ãmẽ noje'o'ãi, mãerã tè, e'i Jesu.#Mat. 5.18

Werekwarà wyi opoi mã'ẽ rewarà

(Mateusi 5.31-32; 19.1-12; Maku 10.1-12)

18E'i jẽ Jesu:

– Kwaima'e mõ sõ werekwarà wyi opoi teywete sõ remẽ. Ajaire wereko ipetà ãmõ wãivĩ. A'evo mã'ẽ pè Janejare'e, “Ojimomy'a mã'ẽ tè ãwĩ”, e'i kõrijõtà ãmẽ, omojaiwe tesõ werekwarà ity rewarà mõ. Aepo e'i teve kwaima'e mõ pè, wãivĩ temimomoikwerà wereko remẽ, e'i Jesu.#1Kor. 7.10-11

Taywerà kõ rè tè Jesu poromosã'ãga remẽwarà

19Ajaire Jesu ayvu omosã'ãga janerekoa rè tè poromo'ea rõmõ mijẽ. Kee e'i Jesu:

– Oiko kwaima'e mõ mijã. Imoma'e ywete mã'ẽ tè a'e. A'e tyru kõ epy wete mã'ẽ tè opypy ipi. Ja'umã'ẽ e'ekwerà tè o'u ipi. Janejare'e rè noja'ai ajamã'ẽ ipi. 20Ãmẽ jakatu oiko teve nimoma'ei miti mã'ẽ mõ. A'e iperepa tesõ ojimomorijau upa. A'e pè Rasaru eu. Imoma'e ywete mã'ẽ retã ypy pè opyta ipi. 21Ãmẽ Rasaru oporara tesõ way upa. Ajawyi imoma'e ywete mã'ẽ ojimi'u remẽ, emi'õ ku'ikwerà okui ipo pe wyi mã'ẽ tè a'e ojuwei ipi, ava noja'a'ãi ee rewarà mõ. Ãmẽ jawarà teima kõ tesõ Rasaru perekwerà omero mero ipi.

22– Ajaire Rasaru okãjãma ky'y. Ãmẽ Janejare'e remĩgwai yvapewarà kõ weraa okãjã mã'ẽ tãmõ Aparão pyri. Ameve ãmõ okãjã teve, a'e imoma'e ywete mã'ẽ. Eãgwerà etãrãgwerà kõ weraa ijaty ajaire kupa. 23Jimomorijau wasua rena kyty aywerà oo. A'e pe wyi omã'ẽ imono. Wãime sõ tãmõ Aparão raywerà rè omã'ẽ. Ãmõ, ipyri Rasaru raywerà rè omã'ẽ. [Nojimomorijaui 'eteay kupa upa.] 24Ãmẽ tè tite kee e'i epe imoma'e ywete mã'ẽ raywerà wapukai imono: “Tãmõ Aparão! Eporijauesa rejupa, ãwisõ ajimomorijau ajupa aã ike, tata pè. Ajawyi Rasaru emuu ekoty. Tojipomosõ yy rõwã pupe eru erãpekõ moãkã, a'e ene”, e'i epe wapukai rõmõ.

25– Ajamã'ẽ kee e'i tãmõ Aparão raywerà ijupe: “Aenu neporegeta mã'ẽ, epary”, e'i. “Eja'a esa nerekoawerà rè. Owaray neiko mijã. Rasaru ãmẽ ojimomorijau teãmã iko mijã. Age'e sõsi ãmẽ a'e aã ike tui. Ojimory opiryvypy katu rõmõ iko ky'y. Waiteve ene ãmẽ, nejimomorijau tè neiko ky'y. 26Apota sõ imono nekoty remẽ, manyvo nareko'ãi kuwa imono nekoty ãmẽ. Oiko ipõ'õgwerà pè 'arusu mã'ẽ. Manyvo nijarekoi ãmõ ovae rè jajipota jaa. Awyje janemowaite janepijarà. Ajawyi ava mõ sõ, ‘Taa moko kyty’, e'i aã ike remẽ, oo tarepe ãmẽ. 'Arusu wasa tarepe. Aja rewarà mõ ava jẽ rõwã manyvo noereko'ãi ijasa. Ãwĩvo teve moko kyty wyi ava mõ uu tarepe kyvo kyty”, e'i tãmõ Aparão raywerà imoma'e ywete maekwerà raywerà pè.

27– Ãmẽ e'i jẽ imoma'e ywete maekwerà raywerà: “Eretãrã kõ rè jẽsi eja'a awi. Rasaru emonooka neayvu mojenuarà rõmõ papa rena kyty. Eretãrãgwerà kõ gyty jẽsi emonooka awi ãmẽ ky'y. 28Uve jẽ emõmirĩ kõ a'e pè. Janepokwery pè kupa. A'e kõ pè jẽsi tomojenu enone'a kõ, kãramõ totuu e'ã kupa, aã ike jimomorijaua rena kyty ne”, e'i epe. 29Aepo renu mẽ kee e'i tãmõ Aparão raywerà ijupe: “Ãnĩ. Namonooka'ãi. Uve tè Janejare'e ayvukwerà Moisesi remikusiwarerà. Ãmõ, Janejare'e ayvu mojenuarà kõ remikusiwarerà. A'e kõ ayvu toerovija neretãrãgwerà kõ awi”, e'i tãmõ Aparão raywerà ijupe. 30Ãmẽ e'i jẽ imoma'e ywete maekwerà raywerà: “Ãnĩ si, tãmõ. A'e ayvukwerà kõ noerovijai kupa. Omãnõ maekwerà mõ opoera ojikuwa ijupe kõ remẽ tè katu werovijatà kupa ky'y. Emono jẽsi ajawyi Rasaru. Ãmẽ sõsi ojimosĩokatà weko aiwerà reitypypyipaoka Janejare'e pè kupa ky'y. Emonooka jẽsi awi”, e'i epe. 31E'i ãmẽ tãmõ Aparão raywerà ijupe: “Niĩ. Rasaru opoera sõ oo remẽ, noerovija'ãi kupa. Emã'ẽ! Tãmõ Moisesi remikusiwarerà noerovijai kupa! Janejare'e ayvu mojenuarà kõ remikusiwarerà ve noerovijai kupa! Ajawyi omãnõ maekwerà mõ ve ywete opoera sõ remẽ, omome'u kuwa ipetà apijarà pè. Noerovija'ãi kupa ajamã'ẽ. Noity'ãi waiwererà kupa”, e'i, e'i Jesu.

[Kee jaa tè aepo e'i mã'ẽ: “Kãramõ apoera remẽ, nererovija'ãi pekupa!” jaa tè aepo e'i Jesu.]

Actualmente seleccionado:

Rukasi 16: oymNT

Destacar

Copiar