Rukasi 17

Oiko teitete mãe kõ rewarà

(Mateusi 18.6-7,21-22; Maku 9.42)

1Ajaire e'i Jesu wemimo'ekwerà kõ pè:

– Jane kõ mõ oiko teitetetà koivo kõ javyoka ipi. A'evo ekoi teãmã kupa. Manyvo nijareko'ãi ta'evo e'ã kupa. Ajamã'ẽ oiko teitete ai mãe kõ ojimoãkwa'ã Janejare'e rovake iko ipi. Mokoi sõ! Nowa miti'ãi kãramõ ijupe kõ ipi. 2Nikatui oiko teitete ai mã'ẽ weko ai rupive wã'ãoka koivo kõ pè. Ajawyi kee a'e eayvukasia rõmõ. Ava mõ sõ ja'yry mõ omojaiwe eraa weko ai rupi remẽ, ojimomorijau 'atà tè Janejare'e po pè. Ikatu sa'u kuwa na'evoive remẽ ojimomarama amãtejẽ ovote omãnõ remẽ. Ikatu sa'u kuwa a'evo mã'ẽ takuru mitirõwã mã'ẽ wãpasĩ amãtejẽ okuruka rè ero'a pãranã pupe eraa, ja'yry kõ nomojaiweive a'e remeve, e'i. Mokoi! Peneko rè peja'a awi. 3Pemãrãmoa'u ikõ peiko nẽ. Ãmõ 'ary pè ekoty rewarà kõ mõ nivoi ekoi sõ tite remẽ, a'e kõ emogeta. Kee ere ikõ ijupe kõ nẽ: “Moko ere sõ. Eity neiko teitete maekwerà. Ivo ikõ eiko ky'y nẽ!” ere ijupe kõ imosĩoka. Maevo ojimome'utà Janejare'e pè waiwererà reitypypyipaoka ijupe kupa ky'y. Ãmẽ nereja'a'ãi ijaiwererà kõ rè ky'y. “Awyjepa” eretà ijupe kõ ky'y.#Mat. 18.15 4Ma'e remẽ ava mõ nivoi nerereko paire, kee e'ità ene: “Manyvore põ nivoi oroereko. Ajimosĩoka aekwerà rè aiko”, e'ità neupe ãmẽ. “Awyjepa” ere ijupe ãmẽ. Ma'e remẽ a'evo paire nivoi nerereko mijẽ remẽ, aekwery vo e'i tarà mijã neupe. Aepo e'i neupe remẽ upi upi, “awyjepa” ere ijupe eiko, e'i Jesu.

Janejare'e rè janerako'ia rewarà

5Ajaire kee e'i Jesu remimonooka rã kõ ijupe:

– Jõvijã, oremokasi age'e ywesõ “aje” toro'e neayvukasia pè. Neayvukasia rè tè torerako'i oroiko ãmẽ, e'i ijupe kupa.

6Ãmẽ e'i Jesu:

– Eayvukasia rè jẽsi penako'i. “Aje” pejẽ jẽsi ekasia pè. Ãmẽ erererovija a'ugà pekupa remẽ, kee pejẽ kuwa eayvu rupi. Yvyra mõ pè kee pejẽ kuwa: “Ejijo'o awi ekwa pãranã pupe ejitã”, pejẽ kuwa. A'evo kuwa ãmẽ, aepo pejẽ eayvu rupi remẽ, e'i Jesu ijupe kõ.

Temĩgwai kõ rekoa rewarà

7E'i jẽ Jesu:

– Ãmõ, temĩgwai rekoa rewarà rè tè poromosã'ãgatà. Ma'e, oiko neremĩgwai neremitã rè oja'a mã'ẽ mõ. Ma'e remẽ nerima kõ rè oja'a mã'ẽ mõ. A'e ãmõ 'ary pè karumẽ opoi oposikoa wyi ojivy uu remẽ, kee eretà sipõ ijupe? “Ejo eapy epyri ejimiwa age'e”, eretà sipõ ijupe ivãe mẽ? Ãnĩ, nere'ãi. 8Ãmõ rupi tè eretà ijupe. Kee eretà ijupe: “Ekwa eremi'õ rã rè tereposiko, ije ypy rã'ĩ tajimi'u. Ajaire tè ene nejimi'utà”, eretà ijupe ãmẽ. Neremĩgwai tè rewarà mõ aepo eretà ijupe, e'i ijupe kõ.

9-10E'i jẽ Jesu:

– Ãmõ, ka'e pejẽ. Nemoe'e kuwa põ neremĩgwai neremimotarà rupi katu oposiko remẽ ipi? Ãnĩ. Ta'evo teene ekoi. “Erõvijã emoe'e kuwasi mijã”, ne'i. Ãwĩvo ve pejẽ Janejare'e pè, emimota rupi peiko remẽ. Ma'e, ijayvukwerà rupi katu peiko paire, kee pejẽ kuwa: “Temĩgwai e'eay rõwã ije aiko. Emã'ẽ, ijayvu rupigà tè aposiko aiko ipi. Ajawyi temĩgwai mitigà tè ije”, pejẽ kuwa peupewarà mõ Janejare'e rovake mijã, e'i Jesu.

Jesu omokatu ipisĩsĩma mãe kõ remẽwarà

11Ajaire Jerusarẽ taa kyty Jesu oo iko remẽ, Samaria yvy rupi okwa iko, Karireja reve ojipopy mã'ẽ rupi. 12Ajaire tena miti rupi Jesu okwa remẽ, itekorãnay mãe kõ uu õvaisĩ. A'e kõ janepoatyry pè kupa, 10 rõmõ. Ipisĩsĩma kupa mãe kõ tè a'e kõ. Ãmẽ kuipe'e ekoi remeve,#17.12 Ipisĩsĩma mãe kõ pè “iky'a mã'ẽ” e'i kupa ipi. Ajawyi totuu e'ã jane kõ pyri'ĩje'ẽ kupa ipi. Waiteve toiko kupa ipi. Ajawyi kuipe'e wyi tè oporegeta Jesu pè kupa. 13wayvo wapukai Jesu pè kupa. Kee e'i ijupe kupa:

– Oreporijauesa jẽ rejupa, jõvijã! e'i e'i kupa.

14A'e kõ rè Jesu omã'ẽ remẽ, kee e'i ijupe kõ ãmẽ:

– Hoõ. Pekwa Janejare'e pè oporegeta mãe kõ pè pejimomewa awi, e'i. A'e kõ tè, “Aje, pekatupa”, e'ità pene omãjã ãmẽ kupa.#17.14 Ikatupa mãe kõ pè kee e'i kupa: “I'ete pejivy ãmõ kõ põ'õ mè ky'y”, e'i kupa. Janejare'e e'i ikusiwaoka tãmõ Moisesi pè karamoe remẽ maekwerà rupi katu a'evo ekoi kupa ipi. Tek. 14.1-32

Ãmẽ “hoõ” e'i oo ãmẽ kupa ky'y. Ãmẽ oo iko kupa remeve ikatupa kupa, pee rupive. Ipisukyrĩ mijẽ kupa ky'y. 15Ãmẽ a'evoa rè omã'ẽ kupa remẽ, oryvay ãmẽ kupa. Ãmẽ a'e mõ py'awarà mõ ojivy rã'ĩ Jesu kyty uu. Pe'ĩte. Janejare'e omoe'e tesõ uu. 16Ovãe Jesu pyri remẽ, ojimoenãpa'ã yvy pè Jesu rovake. Kee e'i ijupe:

– I'ete, emokatu rejupa. Nekatuay neiko, e'i Jesu pè upa.

Juteu rõwã mã'ẽ a'e ajamã'ẽ. Samaria yvy wãnà mõ tè a'e.

17Kee e'i Jesu ãmẽ:

– Ene rõmõ'ĩte nejivy nejo aepo javo ije? e'i. Janepoatyry pè rõwã sipõkõ poromokatu mijã? e'i. Maty põ ãmõ kõ ajawyi? 18Juteu rõwã teipe ene. Ajamã'ẽ ene kõrijõ tè nejivy nejo Janejare'e moe'e nemokatuawerà rewarà mõ, e'i.

19Ãmẽ kee e'i Jesu ijupe, ojivy uu mã'ẽ pè:

– I'ete. Nerako'i Janejare'e rè rewarà mõ nemokatupa ky'y. Epõ'ã ejivy eo ajawyi, e'i.

Keetà Janerõvijã ywete uu tarà mijẽ remẽwarà

(Mateusi 24.23-28,36-44)

20Ajaire ãmõ 'ary pè Pariseu kõ oporanu Jesu pè. Kee e'i ijupe kupa:

– Manyvo remẽ põ Janejare'e ojisaokatà Jõvijã wasu rõmõ janepytery pè ojikuwa? e'i.

Ãmẽ aepo wenu remẽ, kee e'i Jesu:

– Ovo rupi teve Janejare'e ojimojõvijã jane kõ pè ojikuwa remẽ. Ojimome'u me'ua rupi rõwã ojikuwa janepytery pè. 21Ãmẽ ava jẽ rõwã kee e'ità imojikuwa: “Wãi, a'e mokope tui, wãime tui”, ne'i'ãi. Nojimome'u'ãi rupi ojikuwa tarà mẽ. Pepy'a kõ pupe tè Janejare'e ojimojõvijã iko ipi, e'i Jesu ijupe kõ.

22Ajaire wemimo'ekwerà kõ pè kee e'i Jesu oporegeta:

– Kãramõ waypea tekoua 'arà mõ okwatà, e'i. Ãmẽ kee pejẽ ipetà eupewarà mõ: “Age'eve kuwasi yva pe wyi uu. Aã ike kuwasi orepytery pè ovãe mijã”, pejẽ ipetà. “Tojikuwa a'e oreupe age'e”, pejẽ ipetà. Napemã'ẽ'ãive ere ajamã'ẽ, e'i. 23Ãmẽ kee e'i titetà ãmõ kõ: “Wãi a'e mokope tui. Wãime tui”, e'i e'i titetà kupa ãmẽ. Ãmẽ aepo jaa peenu remẽ, “Ja'e esa”, pejẽ tite ne. Mokoi! Jimoripea tè aepo e'ità kupa. 24Kee a'e pejẽ. Ãwitõ tõpã vera vera okwa yva rupi remẽ, pirujẽ jane kõ omã'ẽ ee ipi. Ãwĩvo tary ve evãe tarà mẽ, yva pe wyi ajimojane mã'ẽ rõmõ ajo mijẽ remẽ, e'i. 25Ajamã'ẽ age'eve rõwã a'evotà. Kãramõ tè. Age'e emomorijautà rã'ĩ kupa. Neresata'ãi erereko kupa.

26– Ja'ave rõwã ekoità kupa, ajo mijẽ remẽ. Ãwitõ tãmõ Noe akatuarà kõ ja'ave rõwã ekoi yy poru renone.#Jinõ. 6.5-8; 7.6-24; 19.24-28; Mat. 10.15; 11.24 27A'e kõ itõkõ jimiwa règà oja'a iko ipi. Ãmõ, oka'ua règà itõkõ oja'a iko kupa. Ãmõ, jirekoa règà oja'a iko kupa. Janejare'e rè noja'ai 'ete ãmẽ kupa. A'evo 'evo tè ekoi kupa. Ajaate tãmõ Noe oikepa nawiu pupe remẽ, yy poru ojiãparõ upa ky'y. Ãmẽ tè tite oja'a ipe Janejare'e ayvu rè kupa ky'y. Manyvoa rã mõ rõwã. Opa ãmẽ kupa ky'y. A'evo tary ve ajimojane mã'ẽ rõmõ ajo mijẽ remẽ. Ãmẽ tè tite oja'a ipetà ere kupa ky'y, e'i Jesu.

28– Tãmõ Ero akatuarà kõ ve itõkõ a'evo ekoi, Sotoma taa wãnerà kõ ve itõkõ.#17.28 Karamoe remẽ Janejare'e omoma jimo'yjẽ Sotoma wãnà kõ tata wasu pè, ijaiwererà kõ rewarà mõ. Fogo de enxofre okui. A'e kõ ve itõkõ ja'ave rõwã ekoi ipi. Ojimi'u iko kupa. Ãmõ, oka'ua règà oja'a iko kupa. Ãmõ, moma'e kõ pyya règà oja'a kupa. Ãmõ, moma'e kõ me'ẽa règà. Ãmõ, ojimitãa règà. Ãmõ, wetã mõ'ãa règà oja'a iko kupa. Wãi wãisõ ekoi kupa. 29Janejare'e ayvu rè noja'ai 'ete ajamã'ẽ iko kupa. Ajaate tãmõ Ero ojisyry Sotoma taa pe wyi paire, Janejare'e omoma jimo'yjẽ a'e wãnà kõ tata wasu pè ky'y. Yva pe wyi tẽ tesõ tata eny puku mã'ẽ okui upa imoma kõ rõmõ.#Jinõ. 18.20–19.25 30A'evo ywetetà ajimojane mã'ẽ rõmõ ajo mijẽ e'ãve. Py'awarà mõ a'e 'arà okwatà, e'i.

31E'i jẽ Jesu:

– Ipojy aità tè a'e 'arà okwa tarà mẽ. Ajawyi kee a'e, a'evo remẽ a'evotà kupa mãe kõ pewarà mõ. Kãramõ a'e 'ary pè ava mõ ikujau pè tetã ape 'aryvo tui remẽ, “Taike rã'ĩ eretã wyry pè emoma'e kõ pijarà mõ”, te'i ywe'e tite e'ã ikõ nẽ. Toitypypyipa tepe'yte oma'e kõ ojãna oo. “Teene” te'i kõrijõ tè ity oo. Ivo jẽ ava mõ kuipe sõ ekoi remẽ, tojivy e'ã rã'ĩ ikõ oma'e kõ pijarà mõ oo nẽ. “Teene” te'i rã'ĩ ojãna oo. Aekwerà kyty toja'a ywe'e tite e'ã.#Mat. 24.17-18; Mak. 13.15-16 32Peja'a tãmõ Ero rerekwarà rè pejimotekokuwa rõmõ.#17.32 Kõi wape kyty rè ojirova tite omãjã remẽ itõkõ, ojimoãtã ojimosautu rõmõ karamoe remẽ. Jinõ. 19.26 33Py'awarà mõ okwatà jimomorijaua 'arà ijupe kõ. Ãmẽ ava mõ ojireko katu ipe mãnõa wyi remẽ, kãramõ okãjã jẽtà ajamã'ẽ, e'i. Ajamã'ẽ eayvu rupi nereity'ãi 'ete mã'ẽ omãnõ remẽ, i'ãg nomãnõ'ãi. Janejare'e omoigo puku karuarutà opyri, e'i Jesu.#Mat. 10.39; 16.25; Mak. 8.35; Ruk. 9.24; Juw. 12.25

34E'i jẽ Jesu:

– Kee tevetà a'evo remẽ. Ma'e remẽ pya mõkõi ojipoi o'au oke mijã. Ãmẽ a'e kõ mõ pe'ĩgà Janejare'e weraaokatà okoty. Ãmõ ãmẽ noeraa'ãi. “Maty põkõ a'e oo?” e'i titetà opyta mã'ẽ. 35Ma'e remẽ mõrijõ wãivĩ, moma'e rã'ãigwerà omoku'i ku'i kupa upa remẽ a'evoa okwatà. Ãmẽ a'e kõ mõ pe'ĩgà Janejare'e weraaokatà okoty. Ãmõ ãmẽ noeraa'ãi. Ajaire: “Maty põkõ a'e oo?” e'i titetà ãmẽ ky'y. 36Ma'e remẽ mõrijõ kwaima'e kõ oposiko koo rè iko remẽ a'evoa okwatà. Ãmẽ a'e kõ mõ pe'ĩgà Janejare'e weraaokatà okoty. Ãmõ ãmẽ noeraa'ãi. “Maty põkõ epãtavõarà ekoi?” e'i titetà ãmẽ ajaire. A'evotà ajivy ajo tarà mijẽ mã'ẽ renone. Tapemãrãmoa'u katu ikõ peiko ipi nẽ, e'i Jesu ijupe kõ.#17.36 Kareta karamoe remẽwarà kõ pè jamã'ẽ remẽ, ãmõgwerà kõ pè vs. 36 uve. Ãmõgwerà kõ pè nuvei.

37Ãmẽ aepo wenu kupa remẽ, kee e'i Jesu pè kupa:

– Mã mẽ põ a'evoa okwatà, jõvijã? e'i e'i ijupe kupa.

E'i ãmẽ Jesu ijupe kõ:

– Uruvu rè tè poromosã'ãgatà tapekuwa sa'u ajawyi. Moma'e reãgwerà 'aryvo katu uruvu kõ ojimoaty ipi. Ajawyi pemã'ẽ ee remẽ, “Moma'e põ omãnõ?” pejẽ ipi. Ãwĩvo ve iteetejẽ evãea rã mojikuwapa rã kõ rè pemã'ẽ remẽ, “Ke'ĩ Jesu ovãetà”, tapejẽ, e'i wemimo'ekwerà kõ pè.

Actualmente seleccionado:

Rukasi 17: oymNT

Destacar

Copiar