LUK 12

Künkux-mongkwombu#12.0: künkux-mongkwombu: Mong to tüle thüt, tun ma tüle ngaikya khünak. bama Khün angkya Kax

(Mat 10.26-27)

1 # Mat 16.6; Mrk 8.15. Khünaknu ojat-ojat asoxkya zuma, hwom tata ding to chae nak. Jisu-e owangma chix wangshembu ang thüi: Hünzom farisibu twonkhax, thüikoxle künkux-mongkwombu hanpakma khünlilax; 2#Mrk 4.22; Luk 8.17.Ikoxchutix otok to chilaitsuak angkya lima chemchu akhuple münthomüi; üntoxle awan ang chitsuak kya lima chemchu pyenle münthomüi; 3Idaile hünzome zangnak to chempang akaxdaopuix, ija zangngai-tsatse le atatüi; üntoxle nuithongdua to ka hakle kop laxle hünzome chempang wündaopuix, ija homkho tokhange akhongüi.

Owa Thua Za-üihex

(Mat 10.28-31)

4“Ku zuikhuibu, kue hünzom ang thüipu, owae tsangtsa lang ang tsuakpuix, ikoxle ija to akaile chemchu mok ang chitho, ibu thua taxza. 5Ikoxlechu hünzom owa thua za angkya hex kue hünzom hama apuafang: Zang thua zalax, owama tsangtsa lang füimachu chasa omalum to awüt tsuak angkya zong tüipuix. Anaolechu kue hünzom ang thüipu, Chix thua zalax!

6“Otsak osa ngunhuak anyi ang münhang zai hia? Ikoxle Zange hwom tuitachu alak athakle müntüi. 7Nang khang angkya khopa ngaxchu akiakle thomle. Idaile taxza; otsak osa obi-obi füi ngaxchu hünzom wüi thanu changpu.

Khrista Pongle Kopkya hia Pongle Chikopkya

(Mat 10.32-33; 12.32; 10.19-20)

8“Üntoxle kue hünzom ang thüipu: Owae khünaknu thüntho ma chix ku füito azuikya mix changpule ngaiüi hex, Khünak Hosaechu kaxtaimixbu thüntho ma chix hanpakma ile moküi. 9Ikoxle owae ku noknu thüntho ma chilaxle awütüi hex, Khünak Hosaechu Zang kaxtaimixbu pomthoma chix to ile hwonüi.

10 # Mat 12.32; Mrk 3.29. “Üntoxle Khünak Hosa zong to male akaxkya mix ang thailak koxüi; ikoxchu Otsao Chasa zong to omale owae thüilaxpuix chix ang thailak müntüi.

11 # Mat 10.19,20; Mrk 13.11; Luk 21.14,15. “Üntoxle ongai hwome hünzom Sinagokbu hia apün-adakyabu, ilaxlechu gowarnorbu thüntho to apüiüi hex, hünzome makho alüile chemle seüi chichangba chemle lanüi le khotaxsam; 12Chemthüikoxle ipongkhae wüi hünzome chemle akaxüi hex Otsao Chasae hünzom hama apuale faüi.”

Tuita Ongat Hakpasün Kaxpan

13Üntoxle othom kha angkya mixhuak tuitae chix ang thüi: “Nwotmix, atüi hama apae dantoxkya tingtok ku füi ahan angkya akaxkox.”

14Jisu-e chix kax to lan: “Mixsün! Hüntüi hünkhi bama kaxfün le fa angkya hia tingtok ahanle fa angkya ku owa changkya?” 15Üntoxle chixe noknu füi thuithuile akaxle le: “Apalax, hünzom malualua to nüfux thoto khünlax; chemthüikoxle, khünak tuita tüta tukux ahak-alualechu ngolax, chix tsün a ma ma tüikya tuinae zingle thomkya münchang.”

16Ilaxle chixe hwom füi kaxpan ija makhange akax: “Tsax huanuma müikya haxtok füikya haxpu tuita tüikya. 17Üntoxle chixe ma mongto ajang laxle thüi: ‘Kue chem moküi? chemthüikoxle ku ang tsax thom angkya onui jaojao chitüikha! 18Kue pung achenle zingüi, ilaxle ikhama kue tsax hia ku tuina pangnu athünüi. 19Ilaxle kue alüile ku füi akaxüi: Shomüi mix! Zangpua obi-obi nang aban angkya jao chitüi le saxkox! Lingkox! Üntoxle mongmüi le ngokox! Pangnu li wüi okhongui le tüile!’ 20Ikoxle Zange chix ang thüi: ‘Nang a ongat, ajaja wüi nange tsün danle tox angkya changle, üntoxle tuina nange achwonle thomkya ibu a owa kuxka ang achangüi?’”

21Jisu-e ile akaxle ashuk: “Zang miksho ma a, chix ma chemchu chitüi, ikoxlechu ma hanpakma thanu juapa huanuma athünle thomkyabu hanpakma ija ningle changpu.”

Zang to Onglax

(Mat 6.25-34)

22Ifüima Jisu-e wangshembu füi akax: “Idaile kue hünzom ang thüipu, hünzome süt ang chemsax üihex, chichangba tsangtsa ma chem awunüihex le taxaban. 23Chemthüikoxle süt füi a tsün wüi akhokya changle, ilaxle nyiza füi tsangtsa wüi akhokya changle. 24Okhabu to hulax, hwome tsaxchu chiküi üntoxle zütlechu chiathün; hwom ang athün angkya nui chichangba pungchu chitüi; Zange hwom tuxle thompu. Osabu füi hünzom wüi thanu changpu. 25Ibu khoma abankyae tsün ikuxsa ngaxchu alwot tsuak angkya#12.25: tsün ikuxsa ngaxchu alwot tsuak angkya; chichangba ojang alwot ang. mix owawa hünzom khama tütüicha? 26Hünzome iningkya ikuxküsa ngaxchu mok ang chitho, mamabu khoma hexle chem khosam ngopu? 27#1 Wa 10.4-7; 2 Pp 9.3-6.Fao maipua büle puapuix hule anolax; hwome chem mwotchu chimok chichangba lax ang nyizachu chitak. Ikoxle kue hünzom ang thüipu, Wanghompa Solomon e ngaxchu chix tuina tüihukya makhange ija maipua tuita ningle aza-apua ang chitho. 28Ikoxle, O, hidaole wüi ongkyabu! Oja fao hingzang anyix ngo laxle ngainyix wüi wün to zokdao angkya hex, ija ang ngaxchu Zange itukux awunle jangfa thüiba, chixe ito lyemle hünzom ang awunle münfa pia?

29“Üntoxle hünzome chemsax chemlingüi, le sütling bama taxaban mi. 30(Chemthüikoxle Zang chitsingkya chaxwannu khünak noke ibu pangnu lomle). Hünzom Hopae hünzom ang ibu laxli changle le awanle. 31Itülüi hünzome chix Wangting lomlax, izuma ibu pangnu chixe hünzom ang athütle koxüi.

Zangkang-Ting to Aluakya

(Mat 6.19-21)

32“Taxza, hixkya othom! Chemthüi-koxle hünzom ang Wangting kox angkya Hopa mong tsule. 33Hünzome ma ma atüitüi abakle hang laxle ngun ma zasabu ang laxkox. Hünzom hanpakma chibui angkya nyitsong lomlax, ilaxle chiashuk angkya, ahuxle chipao angkya üntoxle syake chisi angkya Zangkangting to oshuk chitüikya hünzom tuina athünlax. 34Chemthüikoxle ojong khato hünzom tuina tuipuix, ikha to hünzom mongchu ngoüi.

Mik-hingle Ngokya Dabu

35 # Mat 25.1-13. “Tüta ningkya wüi hüikoxlax achwonle ngolax, nang lyem atsop daokya füi akhyep-adi le mok ang achwonle ngolax; 36#Mrk 13.34-36.Aju-asomkya khato kya hwom hopunu chatüi to, chixe hongkya füi tomle chix ang ka daple kox ang achwonle ngokya dabu ningle. 37Opunu nguikya thoma zole achwonle nuikya dabu otukuxkya mongmüi! Kue hünzom ang thüipu, chixe nyi akhaküi, hwom athungüi, ilaxle chixe humele hwom ang asütüi. 38Chix wünmongtsange hia ifüi süshyenle nguikoxchu, chix thoma achwonle nuikya dabu, hwom mong otukux müiüihex! 39#Mat 24.43,44.Ikoxle ija awan koplax, hopunue huxmix itue nguiüi le awankoxle chixe nyele ngose, ilaxle chixe ma hom dap ang chikoxse. 40Hünzomchu achwonle ngolax, chemthüikoxle hünzome texjao chile le ngoponge Khünak Hosa nguiüi.”

Mongong Tüikya hia Chitüikya Da

(Mat 24.45-51)

41Pitar-e atüi: “Jowanpa, ija kaxpan kwom hanpak tata hia nok hanpakma wünpuix?”

42Jowanpa-e lan: “Jangchangba mongongkya hia hwontüi jezaikya da opupu hex? Hwom khama süt-mwot to hume angkya üntoxle hozui dabu ang otu nguikya ma sütling to humele kox angkya, ibu mwot hanpakma mongao chitüi le hopunue mwot owa ang koxpuix, mongongkya hia hwontüi jezaikya da a chix changpu. 43Opunu nguikya thoma chixe ile mokle jangnui thüiba mong otukux müiüi hex! 44Kue otsingtsing ma thüipu, hopunue ija da ang chix tuina pangnu to akhi atak angkya mwot koxüi. 45Ikoxle ija dae ma mongto: Ku hopunu chwonle chingui ang khato le texkoxlax. Idaile chixe hozui dabu, shekobu towüi changlax lükabu towüi changlax fit-müi tamchu sax-ling, ilaxle toktoknga le süt; 46Nyixta chixe chitex chisungkya nyix kha ilaxle sukhachina pongkhae ija da hopunu nguiüi, ilaxle chixe chix sikangünüi. Opunue chix texle akhixüi#12.46: texle akhixüi; chichangba chix a tswonle awütüi. ilaxle chix kax ma chilaxkyabu zothup ma hak ang koxüi.

47“Da owae hopupa mongtex awan ngale atha-anyemle chichang üntoxle chix mongtex ma chimok laxpuix, chixe chak huanuma kopüi. 48Ikoxle da owae hopupa mongtex chiawan ilaxle chak kopkya lima mok, chix to hidaole fitüi. Üntoxle opang ang huanuma koxle thompuix, hwom ma süchongle juüi. Chemthüikoxle owa chak to huanuma koxle thompuix, chixe hwom ma onüi juüi.

Jisu A Ahak-ahan angkya Otong

(Mat 10.34-36)

49“Ku a chaxwannu wün khato zok ang nguipu, üntoxle ija thutle alyet daokya hex thüikoxle otukux müisedai? 50#Mrk 10.38.Kue tuita baptikya lax angkya tüile, üntoxle ija mokle ma akaiba ku sikngün huanu changpu. 51Hünzome ku chaxwannu to tumüi apüi ang nguipuix le texpia? Münchang, tumüi münchang, ikoxle ahak-ahan angkya apüi ang nguipu. 52Chemthüikoxle athax makhange homkha tuita ma kako aga jangtüiba, kako azome anyi zong to tüiüi üntoxle kako anyie azom zong to tüi le ahanüi:

53 # Mka 7.6. “Hopabu sasün hwom zongto tüiüi, hosabu hopa hwom zongto tüiüi;

honu hwom sacha hwom zongto tüiüi, nomcha hwom honye hwom zongto tüiüi;

honye hwom honomcha hwom zongto tüiüi, nomcha hwom honyenu hwom zongto tüiüi.”

Otu Owan Awan angkya

(Mat 16.2-3)

54Üntoxle chixe khünaknu othom füichu akax: “Ongai hünzome hannop chito zangfwom tuita laile ngünüi hex, ija ma wüi hünzome thüile, ‘Zangwatüi changa’ üntoxle ija ningle changtüi. 55Ongai hünzome shuathongchi zangwine jepkya awanüi hex, hünzome thüitüi, ‘Zanghan huanuma hanüi changa’, üntoxle ile changtüi. 56Hünzom künkux-mongkwombu!#12.56: künkux-mongkwombu: Mong to tüle thüt, tun ma tüle ngaikya khünakbu. Hünzome zangding hia chaxwan to hulaxle zangwin zanghan bama akax ang a tsuak; jangchangba anyix ngainyix kya tu-hi-wan bama büthüikoxle chitsing tsuakpu?

Zanpa füi Kaxzut Zangwün

(Mat 5.25-26)

57“Nange sukya mwot mok ang nang lualua to mong ma zün ang büthüikoxle chithopu? 58Owawae nang füi atsak laxle wanlom ma nang jangkopba ilaxle khwa to jangpaoba, hünkhi ba angkya zangwün khwa to nguiüi thoto wüi wünle ashuk ang azonglax; ile chichang thüikoxle chixe nang khwa to paoüi ilaxle khwa ma kaxfün mixe nang süpahi chak to danüi, ilaxle nang kun to shoüi. 59Kue nang ang thüipu, nange tsang fata chitoxle komkaile mathom-thomba nang ikha to ngo angkya changüi.”

Actualmente seleccionado:

LUK 12: WANCBSI

Destacar

Copiar