LUK 13

Nang Ochax tokya Chatlax chichangba Ziüi

1Galili nokbue Zang shwomle tö koxle ngoponge Pilat-e hwom langkya bama Jisu hama wünle fakyabu ikhama khünak züita tüikya changkya. 2Jisu-e hwom ang thüi: “Galili khünak ibue ile mikmax angkya atak kya khoma, Galili nok pangnu füi hwom wüi ochax olyem mokkyabu changpule hünzome texpia? 3Kue hünzom ang thüipu: Münchang! mong chialex jangthüiba, hünzomchu pangnu wüi hwom lailaile max angkya ataküi. 4Chichangba Silom ma long katuk nguakkyae thuple mixhuak sünbün achyet langkoxle, Jerusalem ma ngokyabu pangnu füi hwom wüi süchongle achaxkyabu le hünzome thütpia? 5Kue hünzom ang thüipu: Münchang! Ikoxle mong chialex jangthüiba hünzom chuwüi ilailaile maxüi.”

Chiziakkya Fupsa Pün Kaxpan

6Ifüima chixe ija kaxpan akax: “Mixhuak tuitae hwom haxtok ma fupsa pün küi, üntoxle ija pün ma oziak lomle chix ngui, ikoxle tuita ngaxchu chibang. 7Üntoxle chixe ija haxtok mozangkya mix ang thüi: ‘Hulax, Ija fupsa pün hato oziak lomle ku zanglao azom nguiüna, ikoxle oziak tuita ngaxchu chibang hom. Ija dakdao; hax ama lanle chemto thomngoüi.’ 8Ikoxle ija mozangkya mixe chix kax to lanle thüi: ‘Jowanpa! Ija zangpua atalanle naxngokox. Kue otong akhople tholaxle haxzao thokle wanhuhax. 9Ilaxle ija püne ngaizang oziak jangdün müihupu, ikoxle chiziak jangthüiba nange dakle awüt ang tsuak.’”

Jisu-e Faile Kakkya Mixcha tuita Nazak Nyix Amüi

10Nyixta nazakle nuikya nyix changkya, Jisu-e Sinagok tuita ma hwon-ano le ngokya. 11Haxshix chasae zangbün achyet akakle thomkya mixcha tuita ikhama tüikya; she tangthole ajong ang chimüile akunle thom. 12Otue Jisu-e she ngün, chixe she ang thüi: “Mixcha, nang akakle thomkya athaxpi dandaoa!” 13Chixe chix chake she to twon, ija füi tomle she tangthole ajong ilaxle Zang mün achuak.

14 # Lai 20.9,10; Tsk 5.13,14. Ile Jisu-e nazak nyix kak amüikya khoma, Sinagok ma akhokya mixsüne mongtsik laxle khünakbu füi akax: “Kem ang mwot mok angkya nyix azok panle thompu; ijadaile kak amüi angchu iponge hüihüi, nazak nyixkha wüio le taxchang!.”

15Ikoxle Jowanpa-e chix kax to lan: “Hünzom künkux-mongkwombu! Hünzom pangnusasae wüi nazak nyix ma maihu hia gathobu kunkha tokya danle ti aling ang münpaozai hia? 16Ija mixchachu Abraham sixli changkya, ikoxle athax ikhama, haxshix chasae zangbün achyet bibi khale thomkya nazak nyix she dale amüi angkya olom münchang leo?” 17Chix kaxlan ibue chix zong to tüile ngokyabu pangnu zak akop, ikoxle khünaknu pangnu wüi ija ohünotün mwot hanpakma pwonla tungle mongmüi.

Suili Tsang bama Kaxpan

(Mat 13.31-32; Mrk 4.30-32)

18Jisu-e atüi: “Zang Wangting a chemningle tüi? Üntoxle kue ija chemfüi apyenüi? 19Ija a ile changle: Khünak tuitae suili tsang laxlaxle kale chix haxtok ma sai. Ija pün tsongle pünnu ang achang, ilaxle osabue okangbu to ozop zing.”

Twonkhax bama Kaxpan

(Mat 13.33)

20Anaolechu Jisu-e atüi: “Zang Wangting kue chemfüi apyenüi? 21Ija a, mixnu tuitae tik azom sax to ma-u ma-u le awutkya hidaoküsa twonkhax ningle changpu.”

Hitkya Fülom

(Mat 7.13-14,21-23)

22Jerusalem to nguiüi lom to Jisu-e tinglong hia tingkhuabu to khünaknu hama hwon-anole aham. 23Mixhuak tuitae chix ma atüi: “Nwotmix, khosün atak kya khünakbu muale wüi changüi hia?”

24Chixe hwom ang thüi: “Hitkya fülom makhange le ang zongbakle azonglax; chemthüikoxle imakhange le ang noknusa wüi azonghuüi ikoxlechu noke münthoüi. 25Hom hopupa zoüi ilaxle ka haküi; ifüima homthoma ajong laxle kahak to hongle, ‘Kwom ang ka daple koxhüi, O, Opunu’ le nyak kya zuma chixe hünzom kax to lanüi: ‘Hünzom ojong tokya hüipuix kue münawan!’ 26Ijama hünzome thüiüi, ‘Kwom a nangfüi tomle sax-lingle ngokyabu changle! Kwom tingkhua to nange hwon anopu!’ 27#Mts 6.8.Ikoxle chatlechu chixe thüiüi, ‘Hünzom ojong tokya nguipuix kue münawan. Hünzom chichang-chizangkyabu, Ku ha angkya paoün!’ 28#Mat 22.13; 25.30.#Mat 8.11,12. Zangkangting to Abraham, Isak, Jakop üntoxle ajebu ngünlaxle hünzome wa azyaküi, chemthüikoxle hünzom a dong ang chifa. 29Üntoxle handün hia hannopchi tokya, shuakux hia shuathong tokya, khünaknu nguilaxle Zang Wangting fongsüt ma haküi. 30#Mat 19.30; 20.16; Mrk 10.31.Üntoxle hulax, athax ofüi ang ngokyabu owang ang achangüi üntoxle owang ang ngokyabu ofüi ang achangüi.”

Jisu-e Jerusalem to Mongkünkya

(Mat 23.37-39)

31Ipongkhae wüi farisibu züita lai laxle Jisu ang thüi: “Nang tütakoxchu ikha angkya laile mama khato pao angkya wüi changpu; chemthüikoxle Herod-e nang langsele lomle.”

32Jisu-e hwom kax to lan: “Pao üntoxle hünzome ija hijan ang thüikox: ‘Anyix hia ngainyix kya bama kue haxshixbu jwonle apaole kak-lakbu amüiüi, ilaxle nyix azom lekya to ku mwot ashuküi. 33Tütakoxlechu anyix hia ngainyix üntoxle ifüinyix le ku kulom ma aham angkya jao changle; chemthüikoxle ajepa tuita Jerusalem boma mama khato lang angkya olom münchang.’

34“Jerusalem! Jerusalem! Nange ajebu lang, nang hato Zange ahüikya kaxho mixbu longe thuple lang! Onue osabu to akhuple womkya ningle, kue nang khünaknu nok to tamle ku chake künse le texhupu; ikoxlechu hünzome ku ang ile kün ang chifa! 35#Mts 118.26.Ija khoma hünzome Zangshwom hom awütle toxüi. Kue hünzom ang thüipu, ‘Jowanpa mün ma hüikya mix to Zange mohimankox’ le hünzome mathüi tanto, hünzome ku münngünüi.”

Actualmente seleccionado:

LUK 13: WANCBSI

Destacar

Copiar