LUK 11

Jisu-e Zangjop bama Apuakya

(Mat 6.9-13; 7.7-11)

1Nyixta Jisu-e jongta khama zangjople ngokya changkya. Chixe zangjop ashuk kya zuma chix wangshem khama tuitae thüi: “Jowanpa, Juhan-e chix wangshembu hama apuakya ningle kwom hamachu zangjop angkya apua hüi.”

2Jisu-e hwom ang thüi: “Ongai hünzome zangjopüi hex, ile zexlax:

‘Apa:

Nang otsao mün wüi naxachuak;

Nang Wangting naxhüi.

3Nyixfo to kwom ang süt laxhüi.#11.3: Nyixfo to kwom ang süt; chichangba ngainyixkya süt.

4Kwom zong to achaxkyabu pangnu ang,

Kwome thailak koxkya ningle,

Kwom ochaxchu wüi thailak laxhüi.

Tsak kya thwontsing to kwom taxalyet.’”

5Üntoxle Jisu-e chix wangshembu ang thüi: “Thütba hünzomkha angkya owawa wünmongtsange zuikhui hom to pao, üntoxle ‘zuikhui, ku ang an khao azom shongkox ngohüi, 6ku zuikhui tuita wünham mix ku hato athax ile nguile tüile, ikoxle chixe sax ang kox ang ku ma chemchu müntüi’, le thüi angkya lai. 7Thütba ija ma chixe hom-mong tokhange lanle thüi: ‘Ku ting taxatui ngo. Athax ka hakdaoa, ilaxle kusa hwom ku füi tomle lya ma jipngole. 8Ku zo ang müntsuak ilaxle nang angchu chemchu münfatsuak.’ Ifüima chem? Kue hünzom ang thüipu, chixe hozuikhui changle le zolaxle koxse chitsu, ikoxlechu chixe chatwüi chatle zakmax thünba le akax ngokoxle, chix zolaxle chix ma jukya chixe chix ang koxüi.

9“Üntoxle kue hünzom ang thüipu: Julax, ija hünzom ang koxüi; Lomlax, hünzome ataküi; Hongkox, ka hünzom ang daple koxüi. 10Chemthüikoxle ajujue kopüi; owae lompuix chixe ataküi; hongkya mix ang ka daple koxüi. 11Hünzom khama hopabu owawae hosae nyax jukoxle, chix ang pu tuita kox angcha? 12Chichangba chixe oti tuita jukoxle, chix ang twonsi tuita koxüi hi? 13Itukux hünzom chimüikox ngaxchu, hünzome masumasabu ang amüimüi kox ang awanle; hünzom Zangkangting Hopae chix ma jukyabu ang Otsao Chasa chifale büle tüiüi?”

Jisu hia Belzebul Nyi

(Mat 12.22-30; Mrk 3.20-27)

14Jisu-e kaxux angkya haxshix chasa jwonle apao ngokya; ilaxle haxshix laile paokya zuma, ija khünak akax ang süt, ikhoma khünaknu abüt; 15#Mat 9.34; 10.25.ikoxlechu hwomkha angkya züizüi e thüi: “Chix ang ibu haxshix chasabu jwonle apao angkya tsakzong fakya a haxshix khama akhokya Belzebul changpu.”

16 # Mat 12.38; 16.1; Mrk 8.11. Mamabue Jisu tsün ilaxle chixe Zang zong kop laxle ngokya aho ang ohünotün mwot mokhu le thüi. 17Ikoxlechu Jisu-e hwom mongjang awanlaxle, chixe hwom ang thüi: “Chaxwan oja ma hwom-hwom lüile ahak-ahanle achax-azankya tüiüi hex, otsün münloüi; üntoxle kako tuita ma hwom khakha ma wüi ahak-ahanle jangtüiba hwom shukshuk to shuüi. 18Üntoxle bao Wangtingchu hwom-hwom lüile achax-azan jangngoba, ija otsün lole büle ngomanüi? Kue haxshix chasabu jwonkya Belzebul zong makhange tsuakpule hünzome büthüikya to akax ang tsuak? 19Üntoxle kue Belzebul tsakzong füi haxshix jwonle apao tsuak kya jangchangba, hünzom füikyabue chem makhange ibu jwon ang tho? Idaile hwom a hünzom kaxfün angkyabu ang achangüi. 20Ikoxle ile chichang homle kue Zang tsakzong füi haxshix jwon ang tsuakpu, imakhange Zang Wangting hünzom hato nguile ngoüna le ahole.

21“Otue mixtsak naomüi tuitae changpax hia thuajan füi chix hom nyele thomüihex, chix bwotba to chem münthüitsuak. 22Ikoxle otue chix füi sütsak kya mix hüilaxle chix to lütüihex, changpax ojabu kop laxle chix chachongle ngokya hex, ibu ija khünake chix angkya pale pao, ilaxle chixe pa-lole kopkyabu ahanle laxle.

23 # Mrk 9.40. “Owa ku füi chitüipuix chix ku zong to zan changle, üntoxle afox atom ang ku to chifongkya mixe a fale chiakle.

Haxshix Chasa Chatkya

(Mat 12.43-45)

24“Otue haxshix chasa khünak tuita angkya laile paopuix, chix nazak nui lomle shonu-lingnak faole aham, ilaxle onui müikya chiatakkya zuma chixe akax: ‘Ku hom to chatle chatüi!’ 25Üntoxle chix nguikya thoma ija hom tswon-ngwonle atsao athale bang. 26Chix tamchatle pao, üntoxle chix füi süshixkya mama chasabu anüt kop laxle ngui, ilaxle ikhama hwom ngo. Ifüima ija khünak amipongkya füi sütsexle ozya ma.”

Otsingtsing Mohiman

27Jisu-e ile akax füima, othomkha angkya mixcha tuitae akaxle thüi: “Nang pux laxle atu-alit le atsünkya mixcha a mohiman akhokya mixcha changle!”

28Ikoxle Jisu-e lan: “Itülüi Zang Kax apalax. Ija kax ma laxkyabu sisi tamtai mohimankyabu changle!”

Ohünotün Mwot Jukya

(Mat 12.38-42)

29 # Mat 16.4; Mrk 8.12. Chix akhople khünaknu hüikya zuma, chixe akaxle le: “Anyix ngainyixkya khünakbu otukuxkya ochax mixbu hex! Hwome ohünotün mwot lomle, ikoxle Juna ohünotün mwot boma hwom ang mama chemchu münfaüi. 30#Jon 3.4.Ninewi nok hanpakma Juna büle münwan achongkya hex, ija ningle anyix ngainyixkya khünakbu hanpakma Khünak Hosachu münwan chongkya changüi. 31#1 Wa 10.1-10; 2 Pp 9.1-12.Kaxfünkya nyix Sheba wangchanu ajong laxle athaxpongkya khünakbu ajaoüi, chemthüikoxle she a hwom chaxwan ochu tokya Solomon hwon-je to apa ang ngui; ikoxle hulax, Solomon füi ngaxchu süchongkya ikhama tüile. 32#Jon 3.5.Kaxfünkya nyix Ninewi nok ajong laxle athaxpongkya tsünthom ajaoüi; chemthüikoxle Juna-e hwon anokya khoma hwom mong alex; ikoxle hulax, Juna füi ngaxchu süchongkya ikhama tüile!

Tsangtsa Zangngai

(Mat 5.15; 6.22-23)

33 # Mat 5.15; Mrk 4.21; Luk 8.16. “Wünzua atsop laxle khünake owaechu khomle hia khonge akhuple münthom;#11.33: Züizüi laizabu ma chichangba khonge akhuple münthom, le thüikya müntüi. itülüi hommong to dongkya zuma khünake zangngai naxngün ang chixe ija wüntik dan angkya nui ma danüi. 34Nang mik nang tsangtsa zongto wüntik tuita ningle changle. Otue nang mik müile ngoüi hex, nang tsangtsa zangngaie awangle tüile; ikoxle otue nang mik chimüiüi hex, nang tsangtsa abakle zangnak khato ngoüi. 35Ijadaile nangma tüikya a zangngai changlaxma hex hia zangnak hex awanle koplax. 36Ikoxle nang tsangtsa pangnukha zangnak chemchu chitüi le zangngai e awangle jangngoba, wüntike nyan koxle nang ang zangngai koxkya ningle, nang tsangtsa zangngai e awangle ngoüi.”

Jisu-e Farisi hia Sadukibu Ajao

(Mat 23.1-36; Mrk 12.38-40)

37Athax chixe akax tsuak füima, farisi khünak tuitae chix füi tomle fongsax ang se, ikhoma chix hom-mongto donglaxle chix füi fongsax ang thung. 38Süt saxüi thoma chixe chak atsuxle chikopkya ngünlaxle farisi mixsün abüt. 39Ikhoma Jowanpa-e chix ang thüi: Hünzom farisibue khopkhua wansa otok fwotle, ikoxle hünzom mongkha to chichang-chizangkya hia ochax tutex e awangle ngole. 40Hünzom ongat khünakbu, omong hex otok hex Zange zingkya tomtom münchang hia? 41Ikoxle hünzom khopkhua wansa ma tüikya chitüi chinang zasabu ang laxkox, ile jangchangba otsao-olang chemchu chitüi le nang hanpakma pangnu wüi tsaokya ang achangüi.

42 # Liw 27.30. Hünzom farisibu, hünzom maxsax! Chemthüikoxle hünzome suingan hia büza üntoxle mama suilai oli pangnu akiakle Zang mün ma bün ma thomta koxpu, ikoxle otya ma kaxfünkya hia Zang mongkün hünzome awütle toxpu. Ibu mokkya hünzome mamabuchu wüi awütle chitoxle mok angkya oli changle.

43“Hünzom farisibu, hünzom maxsax! Chemthüikoxle hünzome Sinagok ma atsuakya ngwotnui lomle, üntoxle thalex nui to mixe chazale hünzom to shwomkya lom. 44Hünzom maxsax! Chemthüikoxle hünzom a oding ma khünak ahamle ngokya, otam chitüikya zuktingbu ningle changle.”

45Üntoxle Wanlom nwotmix mixsün tuitae chix ang thüi: “Nwotmix, nange ija kax akaxkya e kwom angchu zak akople.”

46Üntoxle chixe thüi: “Hünzom Wanlom tsingpabuchu maxsax! Chemthüikoxle hün ang chitho tangkya hün hünzome khünaknu ang ahünle, ikoxle mahuake a hwom to asunle hün to chak-khi zatae chithu. 47Hünzom maxsax! Chemthüikoxle hünzome hünpu hünpa hwome langdaokya ajebu zukting ipongmüile zingle. 48Hünpu hünpa hwome mokkya hünzome awanpu, ilaxle hünzom mongzomchu müile le hünzome mwot makhange ahole; chemthüikoxle hwome ibu lang üntoxle hünzome a hwom zuktingbu zing. 49Idaile Zang hwon-je e thüile: ‘Kue hwom hato ajebu üntoxle kaxho mixbu ahüiüi, ibu züita hwome langüi, ilaxle mamabu to zothupüi!’ 50Chaxwannu zingpong tokhange wüi ajebu pangnu langkya khoma athaxpongkya khünaknu sikangün angkya changle. 51#Pon 4.8; 2 Pp 24.20,21.Abel langkya makhange zomtong hia otsao nui nyi bama, Zakaria langkya kople, ija tsünthom ma tsangüi. Changpu, kue hünzom ang thüipu, ibu khoma ija tsünthom sikangünüi!

52“Hünzom Wanlom tsingpabu maxsax! Chemthüikoxle hünzome Zang je-hwon hom kapatja kople thom; hünzom chuwüi chinop ilaxle nop ang hüikyabuchu wüi hünzome abaxle thom!”

53Otue Jisu-e ikha danle tox, Wanlom nwotmixbu hia farisibue chiwün kaxwünle chix ajao ang süt üntoxle küjo-küjekyabu kax chix ma atüi. 54Ile chix aman angkya hanpakma oli tuita ma ngax thüichu chix thaikya atak angchale hwom azong.

Actualmente seleccionado:

LUK 11: WANCBSI

Destacar

Copiar