रोमि 6
6
पाप लगड गोजुः पे अवुर मसीह रे जीवत पे दोहोनू
1दो अबू ची मेनते बू कहनियाँ, भगवान अवुरिय किरपा वबू लगड पापे महल रेबू दोहोनू? 2अहाँः एन्नेरोआ, अबू पाप लगड दोबू गोजियाना, दो मड़ंग हँडाः जीवन फेर हेनेन्डे ची लगड बू बितो वेआ? 3अपे मेने पे पपाड़ी तना किदो? अबू ईसु मसीह थरे बू बिसवास केते बतिस्मा बू तिला तोलोग, अबू ईसु मसीह सुदा बू मिलो यना मतलोब अबू बतिस्मा बू तिला केते “अले होले गोजियाना” मेनते बू कहनिया। 4हेनाते अबू बतिस्मा तिला तोलोग, मसीहा सुदा बू हर एड़वा केना, अवुर हेंय राः मिरतू रे भाग बू तिला केडा, अवुर अबू बतिस्मा, नवाँः जीवन जियोः लगड बू तिला केडा। नआँ दो न घयतेआ कि जेयसे मसीहा महिमा रे दोहोनय भगवान अपा राः सक्ति तेय जियो यना, हेन घयते अबू हो नवाँ जीवन ते जियोः लगड बतिस्मा बू तिला केडा।#कुलु 2:12
5कहेकि अबू बतिस्मा तिला केते ईसु मसीह सुदा बू गोज एड़वा केन, रेदो अबू नआँ रेहो बू एड़वाआ कि जेयसे भगवान ईसु मसीह जियो तेडा, हेन घयते अबू होय जियो बुआ। 6कहेकि अबू पपाड़िआ कि ईसु मसीह कुरूस रेय गोजेन हेना, अबू राः मरिआ जीवन गोजियान घयगिआ। अबू थरे दोहो एना पाप राः इक्छा नास लगड न घयते होया एना। अवुर अबू मड़ंग हडाँः जीवन तबू पाप राः बंधनू रे अलो दोहोनू। 7कहेकि जे होड़ गोजियानयू, हेंय पाप राः बंधनू वरिय छडो केनते धरमिय ठहरो केना। 8हेनाते अबू मसीहा सुदा बू गोजियान रेदो, अबू राः बिसवास ए हवे कि हेंय सुदा जियोत होबू जियोआ। 9कहेकि अबू पपाड़िआ कि भगवान मसीहा गोजेन वरिय जियो रिमकेडिया, फेर हेंय एरोय गोजेना, अवुर हेंय थरे अब मिरतू राः कनर अधिकार कोवाआ। 10कहेकि गोजियान हेंय होड़कू राः पाप मेटियो लगड मिनियें एसिय गोजेना; लेकिन अब हेंय जीवत गिआयू, अवुर भगवान लगड जीवातिय दोहोना। 11नेन घयते अपे हो अपन आप पाप लगड दोले गोजियाना मेनते, लेकिन भगवान लगड मसीह ईसु रे जीवत गिआले मेनते पे अड़ींगू। 12हेनाते अपे नासुआ देंह पाप राः कब्जा रे अलोपे एनेम गोडवा, अवुर देंह राः ललसा राः कब्जा रे अलोपे दोहोनू। 13अवुर अपे राः अंग अधर्म राः हथियार बनो केते पाप लगड अलोपे जिमायू, बल्कि अपन आप गोजकेन वरिंञ जियो रिमकेना मेनते पसींद केते, भगवान थरे पे जिमाऊ, अवुर अपे राः अंग धरम राः हथियार बनोः लगड भगवान पे जिमा वा। 14हेंडे पाप अपे थरे एरो राज तेडा, कहेकि अपे धरम नियम राः अधीन रे कोवा पेआ, अपे भगवान राः किरपा राः अधीन रेपेआ।
धरम राः अधीन
15दो फेर ची बू बनोआ, अले धरम नियम राः अधीन रे कोवा लेआ, लेकिन भगवान राः किरपा राः अधीन रेलेआ मेनते कहनी केतेबू पापेआ किदो? अहाँः एन्नेरोआ! 16अपे दोपे पना पड़िआ, हरवाहकू अपन अपन गिरहत राः टहल कू अँजोमा, हेन घयते अपे जे होड़ राः टेबोः अँजोम लगड अपन आप हेंय राः अधीन रेपे जिमाँः रेदो, अपे हेंय रेनकू हरवाहकू हवे, नेन घयते अपे पापे लगड पाप राः टेबोःपे अँजोम रेदो, भगवान वरी हमेसा लगड दूरुःआ पे, अवुर भगवान राः टेबोः अँजोम लगड, हेंय रेनकू हरवाहकू घयते अपन आप पे जिमा रेदो, धरमी कुपे बनोआँ। 17पहिल अपे पाप तेडा ते पाप रेनकू हरवाह कुपे दोहो एना, लेकिन अब अपे हरग दिल ते लाय वडपेआ हेना टेबोःपे मनो यडा, कहेकि भगवान अनेज राः टेबोः मनो लगड नवाँः मानिय ओवड पेआ, हेनाते इंञ भगवान धन्यावादिंञ ओवय तना। 18अब अपे पाप राः अधीन वरिय छडो केडपेआ, अवुर अपे धरम काम रेनकू हरवाह कुपे बनो यना। 19इंञ अपे राः देंह कमजोर गिआ ते होड़ राः उदाहरड़ देय तेंञ कहनी यडा, कहेकि अपे समझोः लगड मुस्किल गिआ, जेयसे अपे अपन अंग बुरा काम लगड असुध अवुर बुरा काम राः हरवाह घयतेपे जिमा तेडा, हेन घयते अब अपे राः अंग पवितरुः लगड धरम काम राः हरवाह घयतेपे जिमायू।
20अपे पाप रेनिय हरवाह कुपे दोहो एना, हेना तोलोग धरम काम हनवरी आजादी तेपे दोहो एना। 21लेकिन अब, अपे जे काम पे गेव्वाआ, हेनाते अपे ची फयदा पे ञँम दोहो एनु? न घयते कामेः हेंकू गोजुअकू मतलोब भगवान वरी हमेसा लगड कू दूरुआ। 22अब अपे पाप वरी छडो केनते भगवान रेनकू हरवाह कुपे बनो यना, हेना राः फयदा ए हवे कि अपे पवितर बनोः राः काम पे काम यडा, अवुर नआँ घयते करोवे रे अनन्त जीवन ञँमुआँ। 23कहेकि पाप राः बनित दो मिरतू हवे, लेकिन भगवान राः बरदान अबू रेनिय परभु ईसु मसीह रे अनन्त जीवन हवे।
Actualmente seleccionado:
रोमि 6: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.