रोमि 5
5
भगवान सुदा अबू राः मेल मिलाप होया यना
1हेनाते अबू बिसवास केडा ते धरमी होड़कुय ठहरो केडबुआ, दो परभु ईसु मसीह राः दोवारा ते अबू भगवान सुदा मेल मिलाप तेबू दोहोनू। 2अबू मसीहा थरे बू बिसवास केडा ते, भगवान तीमिन दयादार गिअय हेना बू पपाड़ी लगड, हेंय अबुय मदद वडबुआ। अवुर अब हें-नी राः दया तेबू जियोः तना, हेनाते अबू खुसी तेबू दोहोनू, कहेकि अबू पूरा असरा इदाना कि भगवान राः महिमा रे भागीदार बू होयाआ। 3अबू ने-ना भर्रे अलो, दुख बिपेत मेजुः रेहो हँसी खुसी तेबू दोहोनू। कहेकि नआँ घियाआ दुख बिपेत रिम हेना ससाहो लगड चेडबुआ। 4न घयते बू सहोवेरे अबू अपन गुँड़ रे सच्चा अवुर मजबूत बू उडूंगुआ, अवुर नआँ ते अबू हेंय राः महिमा रे भागीदार बू होनोयाआ मेनते मजबूता आसा उपजोआ। 5फेर नआँ आसा अबू एरो एनेम लजियो वडबुआ, अवुर हिम्मत तबू एरो एनेम टोविज वडा, कारन ए हवे कि भगवान अबू तीमिनिय परेम बुआ हेना बू पपाड़िआ, कहेकि हेंय अबू पवितर आत्माय ओवड बुआ, हेना राः दोवारा ते अनेज राः परेम अबू राः मन रेय डलो केडा।
6कहेकि अबू अनाबू बंचो लगड बल मेने दोहो गना, ने-ना कमजोर दसा रे भगवान ठहरो तडा समय रे मसीहा अबू खराब होड़कू लगाडिय गोजेना। 7कनय धरमी होड़ लगड कनय गोजुऊ, मुस्किल गिआ, लेकिन हो सके कनय बढ़ियाँ होड़ लगड अपन जीव एम लगड कनय हिम्माते। 8लेकिन अबू पनापी होड़कू बू दोहोएन तोलोग, मसीहा अबू लगाडिय गोजेना, नेन घयते भगवान अनेज राः परेम रआ भलाई अबू थरेय तिबकेडा। 9दो मसीहा अबू लगड अनेज राः लोहुय बोहो तेडा ते, भगवान धरमिय ठहरो केडबुआ, दो हेंय भगवान राः खीस वरी ची लगड एरोय बंचो तेडबुआ। 10कहेकि अबू भगवान रेनकू मुदेय कुबू दोहो एना, लेकिन अनेज होपोन तुरआ मिरतू राः दोवारा ते, अनेज सुदाय मेल मिलाप केडबुआ, दो नआँ अनावुर पक्का गिआ कि मसीहा अबू भगवान राः खीस वरिय बंचो बुआ, कहेकि हेंय जियो रिमकेनायू, अवुर जीनिवत गिआयू। 11इतना ही कोवानू, परभु ईसु मसीह अबू लगाडिय गोजेना, अवुर अबू भगवान सुदाय मेल मिलाप केडबुअते, भगवान अबू लगड जो कुछिय करो केडा, हेना राः बारे ते अबू हँसी खुसी तेबूआ।
आदम राः दोवारा ते मिरतू अवुर मसीह राः दोवारा ते जीवन
12मियाँहोड़ होड़ राः दोवारा ते न दुनिया रे पाप मेजेना, अवुर पाप राः दोवारा ते मिरतू मेजेना, हेनाते गोटा मनवाँकू थरे मिरतू फयलो यना, कहेकि सगोर कुकू पाप केडा।#उत्प 3:6 13धरम नियम वरी पहिल ते नआँ दुनिया रे पाप दोहो एना, लेकिन जहाँ रे धरम नियम मेने दोहोना, हेना रे पाप राः गिनती मेने होयाआ। 14हेंडे रेहो मिरतू आदम वरी मूसा अँगम, होड़कू थरे राज तेडा। आदम, भगवान राः हुकूमिय टोविज तेडा तेय पाप तेडा, अवुर हेंय गोजियानियू। लेकिन जेयसे आदम, भगवान मंदरो तडिया हुकूम टोविज केतेय पाप तेडा, हेंय घयते मेने पाप गडकू हो मरेक पड़ो एना। आदम दो मियाँहोड़, मसीहा मेजुअय राः चिन्ह दोहो एना, अवुर हेंय तयोम ते मेजुअय मसीहा अवुर आदम राः बीच रे अखीर फरक इदाना।
15कहेकि भगवान अनेज राः किरपा ते ईसु मसीह राः दोवारा ते ञँमुआँ बरदान, आदम राः पाप घयते कोवाआ, नआँ टेबोः सही गिआ कि मियाँहोड़ पाप तेडा तेकू गोजेना। लेकिन भगवान वरी होड़कू लगड ञँमकेना किरपा, अखीर बडे गिआ। मियाँहोड़ होड़ राः मतलोब ईसु मसीह राः किरपा ते अखीर होड़कू भगवान राः दान अनन्त जीवन कू ञँमकेडा। 16फेर भगवान राः दान अवुर मियाँहोड़ होड़ राः पाप राः बीच रे अखीर फरक इदाना, आदम मियाँ एसिय पाप केड राः बाद रे, भगवान “अम पाप केडामू, अवुर मी गोजुआ” मेनतेय कहनी वडियू, हेना वरी होड़कू राः पाप रे दंड मेजेना, लेकिन अखीर होड़कू अखीर कू पाप केड राः बाद रे भगवान किरपा केनते ईनामिय ओवड कुआ। 17हेना नआँ हवे, हेंय धरमिकू हवे मेनतेय ठहरो केडकुआ। मियाँहोड़ होड़ मतलोब आदम पाप तेडा, अवुर सगोरकू थरे मिरतू राज तेडा, लेकिन भगवान अखीर ते किरपा केनते पूरा पूराय लाय वडकुआ, हेंकू अनेज राः ईनाम मतलोब धरमी होड़कू हवे मेनतेय ठहरो कुआ ईनाम ञँमकेड हेंकू सींड़कू, जरूर कू राजेआ, कहेकि हेंकू कबोह एरो कू गोजेना, अवुर हमेसा जीवतकू दोहोना, ईसु मसीह मनवाँकू लगड जो कुछिय करो केडा हेना राः चलते तेकू राजेआ।
18हेनाते आदम राः मिनियेंटगाँः पाप राः चलते ते सगोरकू दंड ञँमेना, लेकिन मसीहा राः मिनियेंटगाँः धरम काम राः चलते ते सींड़कू भगवान मड़ंग रे धरमी होड़कू बनो कुआ, अवुर हेंकू जीवानिय ओवा कुआ। 19कहेकि मियाँहोड़ भगवान राः हुकूम मेनेय अँजोम गडा ते अखीर होड़कू पापिकू ठहरो एना, हेन घयते मियाँहोड़ भगवान राः हुकूमिय अँजोम तेडा ते अखीर होड़कू धरमिकू ठहरोआ।
20होड़कू तीमिन कू पाप यडा, हेना कू पपाड़ी लगड भगवान धरम नियामिय एमतेडा, लेकिन होड़कू जेतना कू पाप तेडा, हेना वरी हो भगवान अखीरिय किरपा वडकुआ। 21जेयसे पाप मिरतू फयलो तींग ते राज तेडा, हेन घयते अब भगवान राः किरपा राज यडा, ने-ना किरपा ते भगवान अबू रेनिय परभु ईसु मसीह धरम कामिय काम तेडा ते धरमी होड़कुय ठहरो केडबुआ, न राः मतलोब हवे कि अबू अनन्त जीवन ञँमुआँ।
Actualmente seleccionado:
रोमि 5: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.