रोमि 7
7
बियाह राः उदाहरड़
1एगा भाईकू, अपे मेने पे पपाड़ी तना किदो? इंञ धरम नियम पपाड़ितन कू थरेंञ कहनी यडा, होड़ जीवातिय दोहोना, हेना मेन दिन हेंय थरे धरम नियम राजेआ। 2कहेकि बियाह कोअय कोड़ीहोन, अपत कू जीवत मेन दिन धरम नियम राः अनुसार ते अपत कू राः बंधनू रेय दोहोना, लेकिन अपत कू फटियो जोम रे, हेंय बियाह राः नियम राः बंधनू रे मेनेय दोहोना। 3हेंय अपत कू जीवातिय दोनोहोन रे, कनय एटागी कोड़ाहोन थरेय सेनुः रे, हेंय लंद-फँदुःअय मेनते कू कहनी वया। लेकिन अपत कू फटियो जोम रे नियम राः बंधनू रे मेनेय दोहोना, हेनाते हेंय एटागी कोड़ाहोन थरेय बियाहुः रेदो, हेंय लंद-फँदुःअय मेनते मेने कू कहनी वया।
4एगा भाईकू, नेन घयते अपे हो मसीहा कुरूस रेय गोजुः तोलोग, धरम नियम लगड हेंय सुदा पे गोजियाना, अवुर अब जे गोजेन वरिय जियो रिमकेना, हेंय रेनकू पे बनो यना, ताकि अबू भगवान लगड फल बू आगू, मतलोब भगवान राः नँजेर रे धरमी जीवन बू जियोऊ। 5पहील अबू मरिआ स्वाभाव राः अधीन रेबू दोहो एना, हेना तोलोग पापे राः इक्छा अपे राः देंह रे दोहो एना, अवुर अबू धरम नियम पपाड़ियन ते नआँ पापे राः इक्छा अनावुर बड़हो यनु, हेनाते अबू बुरा काम बू करो तेडा, अवुर नआँ बुरा काम अबू लगड मिरतू अगतेडा, मतलोब भगवान वरी अलग तेडबुआ। 6लेकिन जे राः बंधनू रेबू दोहो एना, हेंय लगड बू गोजियाना, अबू अब धरम नियम राः बंधनू वरी बू छडो यना, ताकि मरिआ नेत नेंवर घयते मेने, बल्कि आत्मा राः नवाँः नेत नेंवर घयते बू सेसेवा तना।
मूसा राः नियम अवुर पाप
7दो अबू ची मेनते बू कहनियाँ! धरम नियम पाप हवे किदो? बिलकुल मेने, धरम नियम ते पाप ची हवे हेना इंञ जेर केडा, अलोम लालाचुऊ मेनते धरम नियम मेने लाय गडिंञ रेदो, लालच ची हवे, हेना इंञ एरोंञ पपाड़ीः एन मेनू।#निर्ग 20:17; बेवस्था 5:21 8लेकिन पाप, हेना धरम नियम रे इदाना हुकूम राः दोवारा ते दाव ञँमकेते इंञ थरे जे-निरीता लालच पयदा तेडा, कहेकि धरम नियम मेने दोहोगन रेदो, पापे लगड इक्छा एरो पयदा एन मेनू। 9पहिल इंञ धरम नियम अनायीनिंञ पपाड़ी तोलोग बे-फिकीर तेंञ दोहो एना, लेकिन अलोम ललाचुऊ मेनाआँ, भगवान राः हुकूमिंञ पपाड़ी एन सी, अचाकते इंञ जेर गोत्तेडू कि इंञ धरम नियामिंञ टोविज केडा, अवुरिंञ पाप यडा मेनते; अवुर इंञ गोजकेन होड़ घयगिअञूँ मेनाअंञ जेर गोत्तेडू। 10हेना धरम नियम राः हुकूम इंञ अनन्त जीवन ञँम लगड मदेद वडिंञ मेनू, लेकिन हेना सेथा ते हेना हुकूम मिरतू दंड ञँमियाना मेनते पपाड़ी लगड मदेद वडिञाँ। 11कहेकि पाप हुकूम राः दोवारा ते दाव ञँमकेड ते छरो गोत्तेडिञाँ, अवुर हुकूम राः दोवारा ते ञेंड हो ञेंड गोत्तेडिञाँ।#उत्प 3:13
12हेनाते धरम नियम पवितर गिआ, अवुर हुकूम हो ठीक अवुर बढ़ियाँ गिआ। 13न घय मेंडे रेदो, हेना धरम नियम इंञ लगड मिरतू अगतेडा किदो? बिल्कुल मेने! लेकिन पाप धरम नियम राः दोवारा ते इंञ लगड मिरतू अगतेडा, हेनाते अब पाप ची हवे मेनाअबू जेर यडा; अवुर ने-ना राः चलते ते अलोपे पापे मेनते धरम नियम कहनिया, ने-ना ते पाप तीमिन खराब गिआ हेना ञेंल गोडुः तना।
मनवाँ राः अन्दर रे होयाः हेना भीतर राः लड़ाई
14अबू पपाड़िआ कि धरम नियम भगवान हनवरी ञँमकेना, लेकिन इंञ पाप राः स्वाभाव रे दोहोनय होड़ हवे, अवुर पाप अनेज रेनिय हरवाह घयते एकदम ते कब्जा केडिञाँ। 15कहेकि इंञ चिंञ बनो यडा, हेना मेनेंञ जेर यडा; जे इंञ करोवे लगाडिंञ चहोआ, हेना इंञ सयते मेने होयाआ; लेकिन जे चीजिंञ मेरंग वआ, हेनेनांञ करोआ।#गला 5:17 16अगर जे चीज इंञ मेने करो गिसानिञाँ, हेनेनांञ करो यड रेदो, इंञ नअँञ मनो यडा कि धरम नियम सही गिआ। 17हेनाते नआँ बुरा काम ककरोवय इंञ न लगे, लेकिन ईञाः अन्दर रे पाप इदाना, हे-ना करो यडा। 18कहेकि इंञ पपाड़ी तनाञूँ, ईञाः अन्दर रे मतलोब ईञाः देंह रे कनर बढ़ियाँः चीज मेने दोहोना, धरम काम दो करो गिसानिञाँ, लेकिन इंञ सयते मेने होयाआ। 19कहेकि धरम काम करो गिसानिञाँ, हेना इंञ मेनेंञ करो सकोआ, लेकिन इंञ बुरा काम मेने करो गिसानिञाँ, उल्टी याःते हेनेनांञ करोआ। 20फेर इंञ जे काम मेने करो गिसानिञाँ, हेनेनांञ करो यड रेदो, हेना ककरोवय इंञ न लगे, लेकिन ईञाः अन्दर रे पाप इदाना, हे-ना करो यडा।
21हेनाते इंञ थरे मियाँटंग धरम नियम इदाना हेनांञ चिन्हों यडा, हेना नआँ हवे कि धरम काम दो करो गिसानिञाँ, लेकिन बुरा कामिंञ करो गोत्तेआ। 22इंञ भितरे भीतर रेदो, भगवान राः धरम नियम रे अखीर खुस इदानिञाँ। 23लेकिन कनारा एटाआ सक्ति ईञाः देंह राः सगोर अंग रे इदाना घयतेंञ अटकर यडा, नआँ सक्ति ईञाः मन रे इदाना, धरम नियम सुदा लड़ायुः तना, अवुर ईञाः देंह रे पापेः राः सक्ति राः कब्जा रे तोलकेंञ ते पाप राः हरवाह बनो यडिञाँ। 24ओहो, इंञ करा घियाअय बेगर भागय होड़ हवे! इंञ मिरतू हनते ओर गोगेंञाँ, नआँ पाप राः देंह राः इक्छा राः कब्जा वरी इंञ ईया छडोविञाँ? 25इंञ भगवान धन्यावादिंञ ओवाय तना, इंञ अबू रेनिय परभु ईसु मसीह छडोविञाँ,
हेनाते ईञाः दसा ए हवे कि ईञाँः मन रेदो भगवान राः धरम नियम मनो लगड इक्छा दो इंञ थरे सही मेते इदाना, लेकिन इंञ पापेः राः स्वाभाव राः चलते ते इंञ पाप रेनिय हरवाह हवे।
Actualmente seleccionado:
रोमि 7: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.