रोमि 8
8
पवितर आत्मा राः दोवारा ते जीवन
1हेनाते अब जे जे ईसु मसीह रे कुआ, हेंकू थरे सजा ञँमुः राः हुकूम कोवाआ। [कहेकि हेंकू देंह राः अनुसार ते मेने, लेकिन आत्मा राः अनुसार तेकू से-नेआ।]#8:1, अवुराः कागद रे नआँ कड़ी कोवाआ 2कहेकि पवितर आत्मा राः सक्ति मसीह ईसु सुदा जुड़ो कोःते इंञ जीवन चलो लगड मदेद वञाँ, अवुर नआँ आत्मा राः सक्ति मिरतू हनते ओओरा पाप राः सक्ति वरी छडो केडिञाँ। 3अबू राः बचाव धरम नियम ते बेगर होयाआ, अबू थरे पापे राः स्वाभाव इदाना ते, धरम नियम राः सक्ति कोवाआ घयते बनो यना, लेकिन जो काम धरम नियम ते मेने होया गना, हेना काम भगवान करो केडा। हेंय अनानेज होपोन, जेयसे अबू पापी होड़कू राः देंह दोहोना, हेन घयते देंह राः रूप तेय कुलतेडिया। अबू पाप तेड हेंकू राः बदला ते हेंय अनेज होपोन तू राः देंह रे दांडिय एमतेडा, नेन घयते भवगवान अनेज होपोन अबू राः पाप लगीन पूजा राः रूप ते रकब केडिय ते पाप राः कब्जा अबू उपर रे दोहो एना, हेनाय मेटो गोत्तेडा। 4हेंय नआँः नेन लगाडिय करो तेडा कि अबू देंह राः इक्छा राः अनुसार ते से-नेः सेथा, पवितर आत्मा राः सक्ति राः अनुसार ते धरम नियम जो कुछ कहनिया, हेना करो लगड न घयतेय करो तेडा। कहेकि अबू थरे पाप राः स्वाभाव राः चलते ते धरम नियम जो कुछ कहनिया, हेना अबू सयते बिल्कुल मेने होयाआ। 5देंह राः इक्छा राः अनुसार ते से-नेः हेंकू, देंह राः इक्छा रे मन कू लगोआ, लेकिन पवितर आत्मा राः अनुसार ते से-नेः हेंकू, पवितर आत्मा राः टेबोः रे मन कू लगोआ। 6देंह राः इक्छा रे मन बू लगो रेदो गोजुअबू, लेकिन आत्मा राः टेबोः रे मन बू लगो रेदो, जीवन अवुर सान्ति बू ञाँमा। 7कहेकि देंह राः इक्छा रे मन लगोः हेना दो, भगवान सुदा दुस्मनिः हवे, कहेकि हेना भगवान राः धरम नियम मेने मनोवेआ, अवुर सही मेते एनेरो मनो सको एना। 8अवुर जे होड़ देंह राः इक्छा रेय दोहोना, हेंय भगवान एरोय खुस सको एना।
9भगवान राः आत्मा अपे थरे दोहोन तन रेदो, अपे देंह राः कब्जा रे कोवा पेआ, लेकिन अपे आत्मा राः अनुसार तेपे सेनियाडा। अगर कनय थरे मसीहा राः आत्मा कोवाः रेदो, हेंय मसीह रेनिय होड़ न लगे। 10मसीहा अपे थरे इदानिय रेदो, पाप राः चलते ते अपे राः देंह गोजुः रेहो, अपे राः आत्मा जीवत दोहोना,#8:10 अवुराः कागद रे अपे पवितर आत्मा अनन्त जीवन ओवा पेआ मेनते लिखो केना कहेकि भगवान अनेज मड़ंग रे धरमिकू मेनतेय गिनो पेआ। 11भगवान ईसु मसीह गोजेन वरिय जियो तेडिया, हें-नी राः आत्मा अपे थरे इदान रेदो, हेंय जेयसे मसीहा गोजेन वरिय जियो तेडिया, हेन घयते अपे थरे इदान हेना, अनेज राः आत्मा ते अपे राः गोजुः हेना देंह होय जियो वेआ।#1 कुरि 3:16
12हेनाते एगा भाईकू, भगवान राः आत्मा कहनी वबुआ हेना राः अनुसार तेबू से-ने, कहेकि अबू अब देंह राः इक्छा राः कब्जा वरी बू छडो यना, अब अबू उपर रे देंह राः कनर करजा केवाआ, कहेकि अबू पाप रेनकू हरवाहकू न लगे। 13अगर अपे देंह राः इक्छा राः अनुसार तेपे से-ने रेदो पे गोजुआ, लेकिन अपे थरे दोहोना भगवान राः आत्मा राः सक्ति ते अपे देंह राः इक्छा नहकर केते पे ञें-डे रेदो, अपे जीवत पे दोहोना। 14हेनाते भगवान राः आत्मा कहनिय घयते कू से-नेआँ, हेनकू भगवान होपोनकू हवे। 15कहेकि भगवान हनवरी पे ञँमकेडा आत्मा, हरवाहकू जेयसे गिरहत तकुकू बोरो वआ, हेना घयते भगवान बोरोवा लगड बेगारिय बनो पेआ, हेना राः बदला ते ञँमकेना हेंय राः आत्मा राः काम ते, भगवान अनेज रेनकू होपोनकू घयते गोद रेय तिला केडपेआ, अब हेंय राः आत्मा राः सक्ति ते भगवान ओ अब्बा,#8:15 अरामिक भासा ते अपा मेनाअकू अब्बा वआ ओ अपा मेनते कहनी केतेबू हाक वया।#मरकुस 14:36; गला 4:6 16भगवान राः आत्मा अबू राः आत्मा सुदा गोवाही एमेया कि अबू भगवान होपोनकू हवे। 17अबू अब हेंय रेनकू होपोनकू हवे, अबू हेंय राः आसीस राः हँकदारी कुबू बनोआ, कहेकि भगवान अनेज होपोन मसीहाय ओवाआ हेना, सगोर अबू राः हो होयाआ, लेकिन अबू मसीहा सुदा हेंय राः आसीस अवुर महिमा रे भाग बू तिला रेदो, अबू हेंय राः दुख रेहो भाग लेहेक पड़ोआ।#गला 4:5-7
भविस्य रे ञँमुआँ मान मरजाद
18इंञ पसींद यडा नआँ समय राः दुख बिपेत, अबू मान मरजाद ञँमुः हेना मड़ंग रे, कनर कोवाआ। 19कहेकि नआँ धरती राः जो कुछिय सिरजो केडा, हेना सींड़ भगवान होपोनकू कब कू देखारूआ मेनते, आसा लगय ते तँगी यडकुआ। 20कहेकि नआँ धरती रे गोटाय सिरजो केडा, हेना अपन मन ते बेगर बेकारा, लेकिन भगवान अनेज राः मन ते अनेज थरे आसा लगो लगड न घयतेय करो केडा। 21ताकि हेंय गोटाय सिरजो केडा, हेना नासुः वरिय छडो बुआ मेनते, अवुर भगवान होपोनकू मान मरजाद ञँमुः हेना, सिरजो केड हेना चीज हो ञाँमे लगड असरा केना। 22कहेकि अबू पपाड़ी तना, नआँ धरती रे गोटाय सिरजो केड हेना, सगोर निहों मेनते, चिली करा कोड़ीहोन बलेय हँबुड तोलोग हहस तेय कँहरोआ, हेन घयते सगोर कँहरोः तना। 23अवुर ने-ना भर मेने, जे थरे पवितर आत्मा राः पहला फल इदाना, हेंकू होबू कँहरोः तना; अवुर हेंय रेनकू अपन होपोनकू बनोः लगड मतलोब देंह वरिय छडो बुआ हेना बू तँगी यडा।#2 कुरि 5:2-4 24असरा केन हेना राः दोवारा ते अबू उबर केना, लेकिन जे चीज बू असरा वआ, हेना ञेंलुः रेदो, असरा तबू मेने दोहोना, कहेकि कनय कनारा चीजिय ञें-लू, हेना थोरेय असरा वआ। 25लेकिन जे चीज अबू मेने बू ञें-लेआ, अगर हेना बू असरावा रेदो, हेना धीरज राः साथ ते तँगित होबू तँगिया।
26नेन घयते पवितर आत्मा हो अबू राः कमजोरी रे सहेतावा बुआ, कहेकि अबू काःते बिनती करेक इदान हेना मेने बू पपाड़िआ, लेकिन पवितर आत्मा खुद अबू लगड कँहरोः तींग ते एयसा बिनतीआ कि अबू हेना मेने बू टेबोः सकोआ। 27भगवान सींड़कू राः मानिय पपाड़िआ। हेंय पवितर आत्मा ची मेनते कहनियाँ, हेनाय जेर गोत्तेआ, कहेकि पवितर आत्मा, पवितर होड़कू लगड भगवान राः इक्छा इदान घयते बिनतीआ।
भगवान बू परेम रे ची फल ञँमुआँ
28नआँ अबू पपाड़िआ कि जे जे भगवान सुदा परेम कू रखोआ, मतलोब हेंय राः इक्छा राः अनुसार तेय राःकेड कुआ; हेंकू लगड सगोर टेबोः भनालाई उपजोआ। 29कहेकि जे जे होड़कू भगवान पनाहिल तेय पपाड़िआ, हेंकू अनेज होपोन राः स्वाभाव घयते बनोः लगड पनाहिल तेय ठहरो केडकुआ, ताकि हेंय अखीर भाईकू मेंडे जेठ बेटाय बनोऊ।#8:29 कहेकि भगवान पनाहिल तेय पपाड़िआ, कि ईया ईया बिसवास केते, अवुर पनाहिल तेय चुनो केडकुः हेंकू, अनेज होपोन तू राः स्वाभाव इदान घयते बनोः लगड पहिल ते फसलत होय फसला केडा, ताकि मसीहा जेठ बेटाय बनोऊ, अवुर भगवान ठहरो केडकुः हेंकू होपोनकू, मसीह ईसु रेनकू बोहोत कू अवुर मीसित कू घयतेकू बनोऊ। 30अवुर जे जे हेंय पहिल तेय ठहरो केडकुआ, हेंकू राः होय राःकेड कुआ, अवुर जे-जेय राःकेड कुआ, हेंकू धरमिय होय ठहरो केडकुआ, अवुर जे जे धरमिय ठहरो केडकुआ, हेंकू महिमा होय ओवड कुआ।
भगवान राः परेम वरी कनर एरो अलग तेडबुआ
31हेनाते भगवान अबू लगाडिय करो केडा, हेना राः बारे ते अबू, अब ची मेनते बू कहनिया? भगवान अबू सुदाय रेदो, अबू रेनिय बिरोधी ईया होया सकोआ? 32हेंय अनानेज कोड़ा होपोन तू घलय मेनेय अटा गडिया, लेकिन हेंय अबू सींड़कू लगड पूजा राः रूप तेय एमतेडिया, दो हेंय सुदा अबू अवुर सगोर चीज ची लगड एरोय ओवड बुआ? 33भगवान चुनो केडकुः हेंकू थरे ईया दोस लगो वेआ? कनय एरोआ! भनगवान हेंकू बेगर मी कसूरा मेनते धरमिय ठहरो कुआ। 34फेर हेंकू अपे पाप केडा पे हेनाते दंड ञँमुआ मेनते ईया कहनी वकुआ? मसीह ईसु दांडिय ओवा कुआ किदो? एरोआ! हें-नी दो अबू लगाडिय गोजेना, अवुर अबू लगाडिय जियो रिमकेना, अवुर हेंय अब मान मरजाद अवुर अधिकार ञँमुः हेना जघा रे मतलोब भगवान राः जोम गतर रे इदानिया, अवुर भगवान सुदाय राज यडा, अवुर अबू लगड भगवान थरे अरजी होय अरजीः तना। 35दो अबू मसीहा राः परेम वरी ईया अलग बुआ? कलेस, संकट, अत्याचार, अकाल, ओढ़ना कपड़ा राः सस्ता, चहे पहट रेबू पड़ोः हेना, चहे तरवार तेकू ञेंड बुः हेना, मसीहा राः परेम वरी अलग बुआ किदो?
36धरमग्रंथ रे नआँ घयते लिखल इदाना,
“अमाःकू होड़कू हवे ते अले दिन भर ले एर ञेंडुः तना;
हेंकू अले पूजा ञेंडेया भेंड़िकू घयतेकू अड़ींग वले तना।”#सिरिंग 44:22
37नआँ घियाः दुख होयाः रेहो, नआँ सगोर टेबोः रे अबू अखीर बडेआ जीत बू ञाँमा; अबू परेम केडबुआ हेनी मसीहा, नआँ घियाः वरी जीतोः लगाडिय सहेतावा बुआ।
38कहेकि इंञ पक्कांञ पपाड़िआ कि अबू हेंय राः परेम वरी कनर एरो अलग सको एना, अबू गोजुः रेहो कनर फरक एरो पड़ो एना, अवुर जीवत गिरे हो कनर फरक मेने पड़ोआ, सरगदूतकू हो हेंय राः परेम वरी एरो कू अलग सको एना, भूतकू सयते हो एरो होया एना, अब जो होयाः तना हेना घटना हो एरो अलग तेडबुआ, अवुर मड़ंग हँडे होयाः हेना घटना हो एरो अलग तेडबुआ, अवुर नरक कुंड राः भयानक सक्ति हो एरो अलग सको एना, अवुर सरग रे दोहोना सक्ति हो एरो अलग तेडबुआ। 39अवुर धरती पेंदी रे दोहोना सक्ति हो एरो अलग तेडबुआ, अवुर भगवान जो कुछिय बनो केड हेना हो, अबू हेंय राः परेम वरी कभी एरो अलग तेडबुआ, नआँ हेंय राः परेम, अबू रेनिय परभु ईसु मसीह रेय तिबकेडा।
Actualmente seleccionado:
रोमि 8: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.