रोमि 9
9
भगवान इसराएलिकुय चुनो तेडा
1इंञ मसीह रे जलिया ते मेने, सही मेतेंञ कहनी यडा, अवुर पवितर आत्मा राः अधीन रे दोहोन हेना ईञाः मन हो जलिया ते मेनेंञ टेबोः तना हेना गोवाही ओवंञ तना। 2इंञ अपे थरेंञ लाय यडा कि अले एहूदिकू लगड इंञ अखीर दुख लगोः तना, अवुर जीविंञ लोः तना। 3नेकू ईञाःकू सगा बबा कू मसीहा थरे बिसवास केतेकू बंचो एन रेदो, हेंकू लगड भगवान इंञ सरापिय ओवांञ रेहो, अवुर मसीहा वरिय अलग तेडिंञ रेहो, इंञ लगड ठिके दोहोएन मेनू। 4हेंकू इसराएलिकू हवे; अवुर हेंकू भगवान रेनकू चोंडिजकू बनोः राः हँक ञँमेना; अवुर अनेज तीमिन बडेगिअय हेनाय तिःवड कुआ, अवुर हेनकू थरे वाचाय तोल तेडा, अवुर हेंकू धरम नियामिय ओवड कुआ; अवुर अनेज काःतेकू मनोविया हेना होय लाय वडकुआ, अवुर हेनकू थरेय जबान तेडा।#निर्ग 9:4 5हेंकू रेनकू ददी पुरखाकू भगवान अखीर कू मान दान तेडिया, अवुर मसीहा होड़ राः रूप ते हेनकू खुटी खनदान रेय जनम एना, ने-नी सींड़कू रेनिय भगवान हवे, अवुर सींड़कू थरेय राजेआ, ने-निराः बड़ाई जुग जुग होयाऊ। आमेन।
6भगवान अनेज राः बचन बेगारिय पूराआ मेनते अलोपे अड़ींगू; कहेकि जे जे इसराएलिकू खुटी खनदान रेकू जनामुः हेंकू, सींड़कू भगवान रेनकू न लगे। 7अबराहम राः खुटी खनदान रे जनम एन हेंकू सींड़कू अबराहम रेनकू चोंडिजकू न लगे, कहेकि भगवान अबराहम थरेय कहनी तेडा कि “इसहाक वरी जनामुः हे-नकू अमाःकू चोंडिजकू कहोआ।”#उत्प 21:12 8न राः मतलोब नआँ हवे, अबराहम राः खुटी खनदान वरी कू जनम केनकू सींड़कू, भगवान रेनकू चोंडिजकू न लगे, लेकिन भगवान राः जबान राः अनुसार ते इसहाक राः खुटी खनदान रेकू जनम केना, हेनकू अबराहम रेनकू चोंडिज कुकू गिनोआ। 9कहेकि अबराहम, भगवान न याःतेय जबान वडिय दोहो एनु, कि “इंञ नेन घय तोलोग मड़ंग हँडेंञ मेजुआ, अवुर सारा कोड़ा चोंडीजिय हँबुडा।”#उत्प 18:10
10अवुर हेंय चोंडिज अबू रेनिय पुरखा इसहाक दोहो एना, अवुर हेंय राः बियाह रिबका सुदा होया एना, अवुर रिबका जवा कीञिंय हँबुड तेडा। 11लेकिन हेंय चोंडिज कीञिंय हँबुड वरी पहील ते, अवुर कनर भला बुरा अनायिनकींञ करोवे रे, भगवान रिबका थरेय कहनी तडा, “बडेअय होडीञाँय राः टेबोईय चे-डा।” 12नआँ टेबोः ते पता चलोआ कि भगवान अनेज राः सोच राः अनुसार ते होड़कू जनामुः वरी पहिल तेय चुनो कुआ, हेंकू राः भला बुरा काम ञेंलके ते मेनेय चुनो कुआ, हेनाते भगवान करकू करकुय चुनोआ हेना दो अनेज उपर रेआ। 13अवुर धरमग्रंथ रे न याःते लिखल इदाना, “इंञ एकूबिंञ परेम तेडा, अवुर एसाविंञ नहकार तेडा।”#मला 1:2,3
14दो अबू ची मेनते बू कहनिया? भगवान सही सही ते मेनेय न्यायेआ किदो? हेना घयते कोवानू! 15कहेकि हेंय मूसा थरे न याःतेय कहनी तेडा,
“इंञ जे थरे दया गिसानिञाँ, हेंय थरेंञ दयाआ,
अवुर जे थरे सोग गिसानिञूँ, हेंयिंञ सोग वया।”#निर्ग 33:19
16हेनाते नआँ होड़ राः मन ते चहे हेंय राः मेहनत ञेंलके ते मेनेय चुनो कुआ, हेना दो दयाअय भगवान उपर रेआ।
17कहेकि धरमग्रंथ रे भगवान फिरोन थरे नआँ घयतेय कहनी तेडा, “इंञ नेन लगड अम राजांञ बनो केडमिआँ कि आँमिंञ स्तेमाल केते ईञाः सक्तिंञ ती बू, अवुर गोटा चँवदीस रे ईञाः ञुमू राः परचार होयाऊ।”#निर्ग 9:16 18हेनाते भगवान जे थरे दया गिसानियाँ, हेंय थरेय दयाआ; अवुर जे राः जीव कठोर गिसानियू, हेंय राः जीविय कठोर गोत्तेआ।
भविस्य रे प्रगटुआ महिमा
19दो, अपे इंञ थरे पे कहनियाँ, “सींड़ अनेज राः इक्छा राः अनुसार तेय करोवे रेदो, अबू ची लगाडिय बदी बुआ? हेंय राः इक्छा ईया रोको सकोआ?” 20ए मनवाँ, भगवान उल्टी याःते टेबोः मिड़ाः वअय अम ईया हवे? बनो तआ चीज “ची लगड न घयतेम बनो केडिञाँ” मेनते बबानोवय थरे, कहनिया किदो?#एसा 29:16; 45:9 21कुँभर मिनियेंटंग भेली वरी खास काम अवुर सोज सुरखाः काम रे मेजुआ बसन बबानो राः हँक इदाना, दो ना रे अहचराजुः राः दो बाते कोवाआ। 22नेन घयते भगवान, अनेज खीस केन हेना, अवुर सक्तिय तिब हेना, अनेज उपर रेआ, लेकिन जे-जेय धको वकुआ, अवुर नास कू लगाडिय तयार केडकुआ, हेंकू रअय सहो एनेज तना। 23अवुर जे जे थरेय दयाआ, हेंकू अनेज तीमिन बडे गिआ मेनाः तिब लगड, हेंकू रअय सहो तेडा, अवुर अनेज राः मान मरजाद रे भागीदार होयाः लगड, पनाहिल तेय तयार केडकुआ। 24नआँ लगाडिय चुनो केडकुः हेंकू अनाबू हवे, अवुर हेंकू अबू एहूदिकू भर मेने, अनजातकू होय राःकेड कुआ।
25नआँ राः बारे ते धरमग्रंथ रे होसे मेनते कू कहनी वया भविस्यवक्ता राः पोथी रे भगवान न घयतेय कहनियाँ,
“जे ईञाःकू होड़कू मेने कू दोहो गना,
हेंकू ईञाःकू होड़कू मेनतेंञ कहनी वकुआ,
अवुर इंञ मेनेंञ परेम कू दोहो एनु, हेंकू ईञाःकू दुलर होड़कू मेनतेंञ कहनी वकुआ।#होसे 2:23
26अवुर न घयते हो इदाना,
जे जघा रे भगवान ‘अपे ईञाःकू होड़कू न लगे’ मेनतेय कहनी वडकुआ,
हेनेन जघा रे हेंकू जीवातय भगवान रेनकू चोंडिजकू मेनते कू कहोआ।”#होसे 1:10
27अवुर एसायाह हो इसराएलिकू राः बारे तेय कहनी केडा,
“भले न इसराएलिकू राः गिनती समुन्धर राः बितील राः बरोबर दोहोनू,
हेंडे रेहो हेंकू मेंडे ठूनुवा कू बंचोआ।
28कहेकि परभु जेयसेय कहनी केडा हेन घयते,
नआँ चँवदीस रेनकू होड़कू राः एगो एगोय न्याय केते, हनालिते सजाय ओवा कुआ।”#एसा 10:22-23
29नआँ राः बारे ते एसायाह अवुर मियाँ थरेय होय कहनी केडा,
“सेनाकू रेनिय परभु अबू मेंडे कुछ होड़कू मेनेय बगी गडकू रेदो,
अबू सदोम अवुर अमोरा रेनकू घयते बू नास एन मेनू।”#एसा 1:9
बढ़ियाँ खभेर इसराएलिकू लगड हो हवे
30अबू कहनी यड हेना राः मतलोब नआँ हवे, अनजातकू भगवान राः नँजेर रे धरमी बनोः राः कोसीस रे मेने कू दोहो गना, लेकिन हेंकू मसीहा थरे कू बिसवास तेडा ते भगवान राः नँजेर रे धरमिकू बनो यना, कहेकि हेंकू बिसवासे रेदो भगवान धरमिय ठहरो कुआ मेनाअकू जेर तेडा। 31लेकिन इसराएलिकू धरम नियम मनो केते धरमी बनोः मेनते अखीर कू कोसीसे दोहो एनु, लेकिन हेंकू मेने कू बनो सको गना। 32ची लगड मेने कू बनो गना? कहेकि हेंकू भगवान थरे बिसवास केते धरमी बनोः लगड मेने कू कोसीस गडा, लेकिन हेंकू धरम नियम मनो केते अपन काम ते धरमी बनोः लगड कू कोसीसे दोहो एनु,#9:32 कहेकि मसीहा मतलोब भगवान चुनो केडिया राजा अले राः पाप मेटो लगड पूजा राः रूप तेय रकाबा मेनते मेने कू पसींद गडा, हेंकू ईसु राः मिरतू ते खुस मेने कू दोहो गना, हेनाते हेंकू ईसु, मसीहा हवे मेनते मेने कू मनो गडिया। हेनाते हेंकू धरम नियम मनो केते धरमी बनोः राः कोसीस इसराएलिकू लगड मियाँटंग तोहोड लोलोजोरा दिरी घयते बनो यनु।#एहुन्ना 7:19; 8:44 33भगवान धरमग्रंथ रे हेंकू न राः बारे तेय चेतवन तेडकू दोहो एनु, हेना रे मसीहा राः बारे ते नआँ घयतेय कहनी तडा, कि
“ञें-लेपे, इंञ सियोन रे मियाँटंग दिरिंञ मँडो केडा,
अवुर हेना दिरी ते अखीर होड़कू तोहोडुआ,
मतलोब लोलोजोरा चटाँड़िंञ मँडो केडा;
लेकिन जे हेंय थरे कू बिसवासेआ, हेंकू एरो कू लजियो एना।”#एसा 28:16
Actualmente seleccionado:
रोमि 9: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.