مَرکاس 9
9
1ایسّایا گۆن آیان گوَشت: ”من شمارا راستێنَ گوَشان، لهتێن مردم که اِدا اۆشتاتگ، تانکه مگندنت که هُدائے بادشاهی گۆن واک و کدرت آتکگ، اے نَمِرنت.“
ایسّائے دێم و دْرۆشمئے دْرپشناکی
(مَتّا 17:1–13؛ لوکا 9:27–36)
2شَش رۆچا رَند، ایسّایا پِتْرُس و آکوب و یوهَنّا وتی همراه کرت و بُرزێن کۆهێئے سرا برتنت که اۆدا تهنا ببنت. آیانی دێما، ایسّائے رَنگ و دْرۆشم بدل بوت و 3آییئے پۆشاک اَنچۆ اِسپێت بوتنت که جهانئے هچّ گُدشۆدے گُدان اے ڈئولا اِسپێت کرتَ نکنت. 4همے وهدا اِلیاس و موسّا زاهر بوتنت و گۆن ایسّایا هبرا لگّتنت، 5گڑا پِتْرُسا گۆن ایسّایا گوَشت: ”استاد! مئے اِدا بئیگ سکّ شَرّ اِنت، بِلّ که ما سئے ساهگ و کاپارَ#9:5 کاپار، کاپَر، کَپَر. بندێن، یکّے په تئو، یکّے په موسّایا و یکّے په اِلیاسا.“ 6پِتْرُسا نزانت چے بگوَشیت، چێا که آ سکّ تُرسگا اَتنت. 7بله هما دمانا جمبرے#9:7 جَمْبَر، بزان اَبر. آیانی سرا ساهێل بوت. چه جمبرا تئوارے آتک: ”اے منی دۆستیگێن بَچّ اِنت، اِشیئے هبران گۆش بدارێت!“ 8اَناگت،#9:8 اَناگت، بزان یَبّرا، اَچانَک، ناگهان. مُریدان چپّ و چاگردا چارت، بله اَبێد چه ایسّایا دگه هچکَسِش ندیست.
9چه کۆها اێر کپگئے وهدا، ایسّایا هُکم کرتنت: ”تان هما وهدا که انسانئے چُکّا چه مُردگان جاه نجتگ، هچکَسا هال مدئیێت که شما چے دیستگ.“ 10آیان هرچے که دیستگ‌اَت وتی دلا داشت و وت‌مان‌وَت هبرشَ کرت که چه مُردگان جاه جنَگئے مانا چے اِنت؟ 11گڑا چه ایسّایا جُستِش کرت: ”شَریَتئے زانۆگر چێا گوَشنت که چه مَسیهئے آیگا پێسر، باید اِنت اِلیاس نبی بیئیت؟“ 12ایسّایا پَسّئو دات: ”شَریَتئے زانۆگرانی اے هبر راست اِنت که اِلیاس نبی پێسرا کئیت و هر چیزّا پدا بَرجاهَ کنت. بله پرچا نبیسگ بوتگ که انسانئے چُکّ باید اِنت باز سکّی و سۆری بسگّیت و بےاِزّت کنگ ببیت؟ 13اِلیاس نبیئے بارئوا شمارا گوَشان که آ هکّ و دل آتک و اَنچُش که آییئے بارئوا نبیسگ بوتگ، هر پئیما که مردمانی دلا لۆٹت، گۆن آییا هما ڈئولِش کرت.“
ایسّا بچکّێئے جِنّا کشّیت
(مَتّا 17:14–21؛ لوکا 9:37–43)
14وهدے ایسّا و سئیێن مُرید پِر ترّت و اے دگه مُریدانی کِرّا آتکنت، مردمانی مزنێن رُمبے دیستِش. لهتێن شَریَتئے زانۆگر هم همۆدا اَت و گۆن مُریدان دَپجاکا اَتنت. 15اَنچۆ که سجّهێن رُمبا ایسّا دیست، آ هئیران بوتنت و تچانا آییئے نێمگا آتکنت و وشّاتکِش کرت. 16آییا جُست کرت: ”شما گۆن اِشان چِه چیزّئے بارئوا دَپجاک کنگا اێت؟“ 17چه رُمبا مردێا پَسّئو دات: ”استاد! من وتی چُکّ تئیی گوَرا آورتگ. آ هبر کرتَ نکنت، چێا که جِنّێا گپتگ و گُنگ کرتگ. 18وهدے جِنّ آییا گیپت، زمینا دئوریَ دنت. چُکّ گجّ و کَپَ بیت، دنتانَ درُشیت و کُنٹ و هُشکَ بیت. من گۆن تئیی مُریدان گوَشت که اِشیئے جِنّا بکَشّێت، بله آیان کشّت نکرت.“ 19ایسّایا گوَشت: ”او بێباورێن نَسل و پَدرێچ!#9:19 پَدرێچ، بزان نَسل، چُکّ و اۆبادَگ. من تان کدێنا گۆن شما بمانان، تان کدێنا شمارا بسگّان؟ چُکّا منی کِرّا بیارێت!“ 20گڑا بچکِّش آورت. وهدئے جِنّئے چمّ په ایسّایا کپتنت، هما دمانا بچکّی ژامبلێنت. بچکّ زمینا کپت و پێچ و تابی وارت و گجّ و کَپ بوت. 21ایسّایا چه آییئے پتا جُست کرت: ”چُنت وهد اِنت که اے ڈئولا اِنت؟“ پتا پَسّئو دات: ”چه کسانیا. 22باز رَندا، جِنّ آییا په کُشگا آس و آپا دئورَ دنت. اگن تئیی دستا بوتَ کنت، مئے سرا بزّگ کن و مارا مَدَت کن.“ 23ایسّایا گوَشت: ”اے چِه گپّے؟ اگن منی دستا بوتَ کنت؟ آ که باوَرَ کنت، په آییا هر چیزّ بوتَ کنت.“ 24بچکّئے پتا هما دمانا کوکّار کرت و گوَشت: ”منا باور اِنت، منی ناباوریا اِلاج کن.“ 25وهدے ایسّایا دیست که مردمانی رُمبے تچانا پێداک اِنت، جِنّی هَکَّل دات و گوَشتی: ”او کَرّ و لِلّێن جِنّ! من ترا هُکمَ دئیان که اے بچکّا یله دئے و پدا هچبر اِشیئے جسم و جانا مپُتر.“ 26گڑا جِنّا کرینژگے جت و بچکّی سکّ ژامبلێنت و یله دات. بچکّ چۆ مُردگا بوت و بازێنێا گوَشت: ”اے مُرت“. 27بله ایسّایا آییئے دست گپت و پادی کرت و بچکّ اۆشتات. 28ایسّا لۆگێا شت و مُریدان اِهوَتا#9:28 اِهوتا، بزان دگه کَسے مزانت. چه آییا جُست کرت: ”ما چێا اے بچکّئے جِنّ کَشّت نکرت؟“ 29آییا پَسّئو دات: ”اے ڈئولێن جِنّ، بے دْوا کنگا#9:29 لهتێن دَزنبشتا آتکگ: بے دْوا کنگ و رۆچگ بئیگا. کَشّگَ نبنت.“
ایسّائے مَرکئے دومی پێشگۆیی
(مَتّا 17:22–23؛ لوکا 9:43–45)
30ایسّا و آییئے مُریدان آ جاگه یله دات و جَلیلِش گوازێنت، بله ایسّایا نلۆٹت کَسے بزانت که آ کجا اِنت، 31چێا که وتی مُریدانی تالیم دئیگا دزگَٹّ اَت. گوَشتی: ”انسانئے چُکّ درۆهگَ بیت و اَنچێن مردمانی دستا دئیگَ بیت که کُشنتی، بله سئے رۆچا رَند، پدا زندگَ بیت و جاهَ جنت.“#9:31 جاه جنَگ، بزان چه وتی جاها یکدم پاد آیگ، زندگ بئیگ، چست بئیگ. 32بله مُرید آییئے اے هبرا سرپد نبوتنت و چه آییا جُست کنگِش هم تُرست.
مزنی
(مَتّا 18:1–5؛ لوکا 9:46–48)
33پدا آ کَپَرناهوما آتکنت. لۆگا که آتک، ایسّایا چه مُریدان جُست کرت: ”شما راها چے گوَشگا اَتێت؟“ 34آیان هچّ نگوَشت چێا که راها گۆن یکدومیا دپجاکا اَتنت که مئے تها مسترێن مردم کئے اِنت؟ 35گڑا ایسّا نِشت، دوازدهێن کاسِدی تئوار کرتنت و گوَشتی: ”آ کَس که مستریَ لۆٹیت، باید اِنت وتا چه سجّهێنان کَستر بکنت و سجّهێنانی هِزمتکار ببیت.“ 36گڑا، کَسانێن چُکّے آیانی نیاما اۆشتارێنتی، گُلاێش کرت و گوَشتی: 37”هرکَس که په منی ناما اے ڈئولێن کسانێن چُکّے وَشّاتکَ کنت و شرپَ دنت، منا شرپَ دنت و هرکَس که منا شرپَ دنت، بزان آییا هم شرپَ دنت که منا راهی داتگ.“
آ که مئے هِلاپ نه‌اِنت، مئے نێمگا اِنت
(لوکا 9:49–50)
38یوهَنّایا گۆن ایسّایا گوَشت: ”استاد! ما یکّ مردے دیست که تئیی نامئے سرا مردمانی جِنّان کشّگا اَت، بله ما گوَشت چۆ مکن، چێا که آ چه ما نه‌اَت.“ 39ایسّایا گوَشت: ”نه، چۆ مکنێت، چێا که هرکَس منی نامئے سرا یک دمانے مۆجزهے کنت، دگه دمانے منا بد گوَشتَ نکنت و 40آ که مئے هِلاپ نه‌اِنت، مئے نێمگا اِنت. 41اگن کَسے اے نامئے سئوَبا شمارا تاسے آپ بدنت که شما مَسیهئیگ اێت، من شمارا راستێنَ گوَشان که آییا وتی مُزَّ رسیت.
گُناهئے چَکّاس
(مَتّا 18:6–10؛ لوکا 17:1–2)
42اے گوَنڈۆ که منی سرا باوَرَ کننت، هرکَس که چه اِشان یکّێا هم دێم په گناها ببارت، شَرتِر همِش اِنت که جنتری#9:42 جنتِر دو سِنگ اَنت که گۆن آیان دانَ درُشنت و آرتَ کننت. تاے گمراه کنۆکئے گُٹّا ببندنت و دریایا چَگلیَ بدئینت. 43اگن تئیی دستے ترا دێم په گناها بارت، آییا گُڈّ. چێا که گۆن دوێن دستان دۆزهئے ابَدی آسا کپگئے بدلا، شرتر همِش اِنت که گۆن یکّ دستے، اَبدمانێن زِندئے واهند#9:43 واهند، بزان مالِک، هُدابُند. ببئے. 44#9:44 لهتێن دَزنبشتا بَند 44 و 46 هست‌اَنت، لهتێنا نێست‌اَنت. اے دوێن بند گۆن چِلّ و هشتمی بَندا یکّ اَنت. 45اگن تئیی پادے ترا دێم په گناها بارت، آییا گُڈّ. چێا که گۆن دوێن پادان دۆزها کپگئے بدلا، شرتر همِش اِنت که گۆن یکّ پادے اَبدمانێن زِندئے واهند ببئے. 46#9:46 لهتێن دَزنبشتا بَند 44 و 46 هست‌اَنت، لهتێنا نێست‌اَنت. اے دوێن بند گۆن چِلّ و هشتمی بَندا یکّ اَنت. 47اگن تئیی چمّے ترا دێم په گناها بارت، آییا کشّ. چێا که گۆن دوێن چمّان دۆزها کپگئے بدلا، شرتر همِش اِنت که گۆن یکّ چمّے هُدائے بادشاهیا برئوئے. 48دۆزها جۆنوارێن کِرم هچبرَ نمرنت و آس هچبر کُشَگَ نبیت. 49آس هرکَسا پَلگاریت هما پئیما که واد کُربانیگا پاک و پَلگارَ کنت. 50واد شَرّ اِنت، بله اگن آییئے تام گار ببیت، شما چۆن آییا پدا تامدارَ کنێت؟ شما هم وتا وادۆک و تامدار بکنێت و گۆن یکدگرا په سُهل و اێمنی زِند بگوازێنێت.“
Actualmente seleccionado:
مَرکاس 9: HPKB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2016-22 Wycliffe Bible Translators, Inc.