مَرکاس 10
10
سور و سئونئے بارئوا
(مَتّا 19:1–12؛ لوکا 16:18)
1ایسّا چه اۆدا در آتک و یَهودیَهئے دَمگا و اُردُنئے کئورئے آ دستا شت. اِدا هم مردم رُمب رُمبا آتک و آییئے کِرّا مُچّ بوتنت. اَنچۆ که آییئے آدت اَت، پدا مردمانی تالیم دئیگا دزگٹّ بوت. 2لهتێن پَریسی آتک و په آییئے چَکّاسگا جُستِش کرت: ”بارێن، رئوا اِنت که مرد وتی جَنئے تلاک و سئونان بدنت؟“ 3ایسّایا پَسّئو دات: ”موسّایا شمارا چے هُکم داتگ؟“ 4آیان پَسّئو دات: ”موسّایا رَزا داتگ که مرد په وتی جَنا تلاک‌نامَهے نبشته بکنت و چه لۆگا دَری بکنت.“ 5ایسّایا گوَشت: ”موسّایا شمئے سِنگدلیئے سئوَبا په شما اے هُکم نبشته کرتگ. 6بله جهانئے جۆڑ کنگئے وهدا، هُدایا انسان اَڈّ کرتگ، مردێن و جنێن. 7پمێشکا مرد وتی پت و ماتا یلهَ کنت و گۆن وتی جَنا هۆر و یکجاهَ بیت. 8مرد و جَن، یکّ جسم و جانَ بنت،#10:8 پێدائِش 1:27؛ 2:24. اے پئیما، نون آ دو نه‌اَنت، یکّ جسم و جانَ اَنت. 9پمێشکا، آ که هُدایا یکّ کرتگ‌اَنت، انسان آیان جِتا مکنت.“
10آ که لۆگێا شتنت، مُریدان چه آییا اے بارئوا جُست کرت. 11ایسّایا پسّئوا گوَشت: ”کَسے که وتی جنئے سئون و تلاکان بدنت و گۆن دگه جنێنێا سور بکنت، وتی ائولی جنئے هِلاپا زِنا کنگا اِنت. 12همے ڈئولا، اگن جنێنے چه وتی مردا سئون بگیپت و گۆن دگه مردێا سانگ و سور بکنت، آ هم زِنا کنگا اِنت.“
ایسّا و کَسانێن چُکّ
(مَتّا 19:13–15؛ لوکا 18:15–17)
13یکّ رۆچے مردمان وتی کَسانێن چُکّ ایسّائے کِرّا آورتنت که وتی دستا آیانی سرا پِر بمُشیت، بله مُریدان نِهرّ و هَکَّل داتنت. 14ایسّایا که دیست زهر گپت و گۆن مُریدان گوَشتی: ”چُکّان بِلّێت منی کِرّا کاینت، آیانی دێما مدارێت، چێا که هُدائے بادشاهی اَنچێن مردمانیگ اِنت. 15شمارا راستێنَ گوَشان، هرکَس که هُدائے بادشاهیا هما پئیما مَمنّیت که کسانێن چُکّیَ منّنت، آ هچبر هُدائے بادشاهیا سرَ نبیت.“ 16رَندا ایسّایا چُکّ گُلاێش کرت و دست سرا پِر مُشت و برکت داتنت.
زَردارێن وَرنا و اَبدمانێن زِند
(مَتّا 19:16–30؛ لوکا 18:18–30)
17وهدے ایسّا راه گپت، مردے تچانا آتک، کۆنڈان کپت و جُستی کرت: ”او نێکێن استاد! من چے بکنان که اَبدمانێن زِندئے واهند ببان؟“ 18ایسّایا گوَشت: ”تئو منا ’نێکێن‘ پرچا گوَشئے؟ اَبێد چه هُدایا، کَسّ نێک نه‌اِنت. 19هُدائے پرمانان وَه تئو زانئے: هۆن مکن، زِنا مکن، دُزّی مکن، درۆگێن شاهدی مدئے، دگرئے مالا مئوَر، وتی پت و ماتا اِزّت بدئے.“#10:19 دَررئو 20:12 و رَند. 20مردا پَسّئو دات: ”او استاد! من چه کسانیا اے سجّهێن هکمانی سرا اَمل کرتگ.“ 21گڑا ایسّایا په مِهرے آییئے نێمگا چارت و گوَشتی: ”ترا اَنگت یکّ کارے کنگی اِنت، برئو وتی سجّهێن مال و هستیا بَها کن و زَرّان گریب و نێزگارێن مردمانی سرا بهر کن. اے پئیما ترا آسمانی گنجے رسیت. نون بیا و منی رَندگیریا بکن.“ 22چه اے هبرا آ مَردئے دل پرشت، گمیگ بوت و شت چێا که سێر و هَزگارێن مردے اَت.
23ایسّایا چارێن نێمگان چارت و گۆن وتی مُریدان گوَشتی: ”په سێر و هَزگارێن مردمان هُدائے بادشاهیا پادئے اێر کنگ سکّ گْران اِنت.“ 24آییئے مُرید چه اے هبران هئیران و هَبکّه بوتنت. ایسّایا پدا گوَشت: ”چُکّان! هُدائے بادشاهیا پادئے اێر کنگ #10:24 لهتێن دَزنبشتا گێش کنگ بوتگ: په آیان که زَرّ و مالئے سرا اِهتبارَ کننت. سکّ گران اِنت. 25چه سوچنئے دُمکا اُشترئے گوَزگ وَه باز گران اِنت، بله په هزگارێن مردمێا هُدائے بادشاهیا پادئے اێر کنگ اَنگت گرانتر اِنت.“ 26مُرید، گێشتر هئیران بوتنت و گۆن یکدومیگا گوَشتِش: ”گڑا کئے رَکّتَ#10:26 رَکّگ، بزان نجات رسَگ، بَچّگ. کنت؟“ 27ایسّایا پدا آ چارتنت و گوَشتی: ”انسانئے دستا نبیت، بله په هُدایا چُش نه‌اِنت، چێا که هدائے دستا هر چیزَّ بیت.“
28گڑا پِتْرُسا گوَشت: ”ما هر چیزّ یله داتگ و تئیی رَندگیریا کنگا اێن.“ 29ایسّایا پَسّئو دات: ”شمارا راستێنَ گوَشان، اگن کَسێا په من و وشّێن مِستاگا وتی لۆگ یا برات یا گهار یا مات یا پت یا چُکّ یا ڈگار یله داتگ و منی رَندگیری‌ای کرتگ، 30هُدا آییا سَد سری#10:30 سَد سری، بزان سد برابر. گێشترَ دنت. همے جهانا، سکّی و سۆریانی همراهیا، لۆگ و برات و گهار و مات و چُکّ و ڈگار آییا رسیت و آ دگه جهانا هم اَبدمانێن زِندئے واهندَ بیت. 31بله بازێنے که ائولی اِنت، آهِریَ بیت و بازێنے که آهِری اِنت، ائولیَ بیت.“
ایسّائے مَرکئے سئیمی پێشگۆیی
(مَتّا 20:17–19؛ لوکا 18:31–34)
32ایسّا پێسر و مُرید آییئے رَندا، اورشَلیمئے نێمگا رئوگا اَتنت. مُرید، هئیران و هَبکّه اَتنت و آ دگه همراهانی دلا تُرس و بیمّے ودی بوتگ‌اَت. ایسّایا وتی دوازدهێن کاسِد پدا یکّ کِرّێا برتنت و گوَشتی که گۆن من چے بئیگی اِنت. 33”بچارێت، نون ما اورشَلیما رئوگا اێن. اۆدا انسانئے چُکّ مزنێن دینی پێشوا و شَریَتئے زانۆگرانی دستا دئیگَ بیت. آییا مَرکئے سزا دئیَنت و درکئومێن مردمانی دستا دئیَنتی. 34درکئومێن مردم آییا کَلاگَ گِرنت، آییئے دپ و دێما تُکَّ جننت، شلّاک و هئیزرانیَ جننت و کُشنتی، بله سئے رۆچا رَند آ پدا جاهَ جنت.“
ناجائِزێن واهگ
(مَتّا 20:20–28)
35زِبْدیئے چُکّ آکوب و یوهَنّا، ایسّائے کِرّا آتکنت و گوَشتِش: ”او استاد! مارا واهگے هست، پورهی بکن.“ 36ایسّایا گوَشت: ”چے لۆٹێت؟ من په شما چے بکنان؟“ 37گوَشتِش: ”وهدے تئیی بادشاهیَ کئیت، وتی پُرشئوکتێن دیوانا، بِلّ که چه ما یکّے تئیی راستێن کَشا و دومی چپّێن کَشا نندیت.“ 38ایسّایا گوَشت: ”شما نزانێت چے لۆٹگا اێت. آ پیاله که منا نۆشگی اِنت، شما نۆشِتیَ کنێت؟ و آ پاکشۆدی که منا کنگی اِنت، شما کرتیَ کنێت؟“#10:38 چه پیاله و پاکشۆدیا ایسّائے مکسد وتی مرک، بزان سلیبئے سکّی و سۆریانی سگّگ اِنت. 39پسّئواِش دات: ”جی هئو، ما کرتَ کنێن.“ ایسّایا گوَشت: ”اے پیالها که منَ نۆشان، شُمارا هم نۆشگی اِنت و اے پاکشۆدیا که منَ کنان، شمارا هم کنگی اِنت، 40بله اے چه منی واکا در اِنت که کئے منی راستێن و کئے چپّێن کشا بنندیت. اے جاگه همایانیگ اَنت که په آیان گیشّێنگ بوتگ‌اَنت.“ 41وهدے آ دگه دهێن کاسدان اے هبر اِشکت، آکوب و یوهَنّائے سرا زَهر گپتنت. 42گڑا ایسّایا دوازدَهێن کاسد لۆٹاێنت و گوَشتنت: ”شما زانێت، آ که درکئومانی هاکم زانگَ بنت، مردمانی سرا هاکمیَ کننت و کئومانی مستر، چێردستانی سرا وتی اِهتیارا کارَ بندنت. 43بله شما چُش مکنێت، چه شما هرکَس که مزنیَ لۆٹیت، باید اِنت شمئے هِزمتکار ببیت و 44چه شما هرکَس که مستریَ لۆٹیت، سجّهێنانی کَستر ببیت. 45همے ڈئولا، انسانئے چُکّ په اے مکسدا نئیاتکگ که مردم آییئے هِزمتا بکننت، په اے مکسدا آتکگ که مردمانی هِزمتا بکنت و گۆن وتی ساهئے دئیگا بازێنے بمۆکیت#10:45 مۆکَگئے مانا اِدا اِش اِنت که په کَسێئے جانئے رَکّێنگا گرانێن کیمتے دئیگ ببیت، پارسیا ”بازخرید“..“
کۆرێن بارتیماووسئے دْرهبکشی
(مَتّا 20:29–34؛ لوکا 18:35–43)
46رندا اَریهائے شهرا آتکنت. ایسّا وتی مُرید و مردمانی مزنێن رُمبێئے همراهیا چه اَریهایا در کپگا اَت. راهئے کشا بارتیماووس نامێن کۆرێن پِنڈۆکے نِشتگ‌اَت که تیماووسئے چُکّ اَت. 47وهدے بارتیماووس سَهیگ بوت که اے ایسّا ناسِری اِنت، کوکّاری کرت و گوَشتی: ”ایسّا، او داوود بادشاهئے چُکّ! منی سرا رهم کن.“ 48بازێنێا هکّل کرت و گوَشت: ”بسّ کن!“ بله آییا گێشتر کوکّار کرت: ”او داوود بادشاهئے چُکّ! منی سرا رهم کن.“ 49ایسّا اۆشتات و گوَشتی: ”تئواری کنێت.“ مردمان تئوار کرت و گوَشتِش: ”دلا ڈَڈّ کن! پاد آ، بیا که ترا لۆٹَگا اِنت.“ 50بارتیماووسا وتی کباه کِرّے دئور دات، کُپّی کرت و پاد آتک و ایسّائے گوَرا شت. 51ایسّایا جُست کرت: ”چے لۆٹئے؟ من په تئو چے بکنان؟“ گوَشتی: ”او استاد! منی چمّان رُژنا کن.“ 52ایسّایا گوَشت: ”برئو، تئیی ایمانا ترا دْراه کرت.“ کۆر هما دمانا بینا بوت و ایسّائے همراه بوت.
Actualmente seleccionado:
مَرکاس 10: HPKB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2016-22 Wycliffe Bible Translators, Inc.