مَرکاس 8
8
چار هزار مردما وراک دئیگ
(مَتّا 15:32–39)
1هما رۆچان، یکّ بَرے پدا ایسّائے گوَرا مردمانی مزنێن رُمبے یکجاه بوت. آیان وَرد و وراک نێست‌اَت. پمێشکا، آییا وتی مُرید لۆٹاێنت و گوَشتنت: 2”منا اے مردمانی سرا بَزّگَ بیت. نون سئے رۆچ اِنت که منی گوَرا اَنت و په ورگا هچِّش نێست. 3اگن اِشان گۆن شدیگێن#8:3 شُدیگ، بزان گُژنَگ. لاپے رُکست بکنان، راها تُسنت و کپنت، چێا که لهتێن چه دورێن جاگهان آتکگ.“ 4مُریدان آییئے پَسّئوا گوَشت: ”اے گیابانا په اینچُک مردمئے سێر کنگا، نان چه کجا بیارێن؟“ 5جُستی کرت: ”شمارا چُنت نگن گۆن؟“ گوَشتِش: ”هپت.“
6آییا گون مردمان گوَشت: ”زمینئے سرا بنندێت.“ هپتێن نگنی زرتنت، هُدائے شُگری گپت، چُنڈ چُنڈی کرت و مُریدانا داتنت که مردمانی دێما اێرِش بکننت. مُریدان اَنچُش کرت. 7آیانی کِرّا لهتێن هُردێن ماهیگ هم هست‌اَت. ایسّایا ماهیگانی سرا هم هُدائے شُگر گپت و گۆن مُریدان گوَشتی: ”مردمانی دێما اێرِش کنێت.“ 8سجّهێنان سێرا وارت و رندا چه سر آتکگێن چُنڈان، مُریدان هپت لَچ#8:8 لَچ چه پیشّ یا دگه تاکان جۆڑ کرتگێن مزنێن دَرپے. پُرّ کرت. 9آ مردم چار هزارئے کِساسا اَتنت. رَندا آییا مردم رُکست کرتنت و 10هما دمانا گۆن وتی مُریدان بۆجیگا سوار بوت و دَلمانوتَهئے دمَگا شت.
آسمانی نشانیئے لۆٹگ
(مَتّا 16:1–4)
11پَریسی ایسّائے کِرّا آتکنت و په آییئے چکّاسگا جست و پرسِش بندات کرت. گوَشتِش: ”مارا آسمانی نشانیے پێش دار که تئیی سرا ایمان بیارێن.“ 12ایسّایا چه دلا آهے کَشّت و گوَشت: ”اے زمانگئے مردم چێا نشانیَ لۆٹنت؟ شمارا راستێنَ گوَشان که اے زمانگئے مردمان هچّ نشانیے دئیگَ نبیت.“ 13گڑا ایسّایا آ اِشتنت، پدا بۆجیگا سوار بوت و گوَرمئے آ دستا شت.
هیرودیس و پَریسیانی بدێن هُمیر
(مَتّا 16:5–12)
14مُریدان شمُشتگ‌اَت که گۆن وت نگن بزورنت. بۆجیگا گۆن آیان بسّ یکّ نگنے هست‌اَت. 15ایسّایا هُکم کرتنت: ”هُژّار بێت! چه پَریسیانی هُمیرا و چه هیرودیس بادشاهئے هُمیرا پهرێز بکنێت.“ 16آ وت‌مان‌وت هبرا لگِّتنت: ”واجه پمێشکا چُشَ گوَشیت که ما گۆن وت نگن نئیاورتگ.“ 17ایسّایا زانت و گوَشتی: ”چێا جێڑگا اێت که گۆن ما نگن نێست؟ اَنگتَ نزانێت و سرپد نه‌اێت؟ شمئے دل اَنچۆ سِنگ اَنت؟ 18شمارا چمّ پِر، گڑا پرچا نگندێت؟ شمارا گۆش پِر، گڑا پرچا نه‌اِشکنێت؟ شما شمُشتگ که 19من چِه پئیما پنچ نگن چُنڈ چُنڈ کرت و پنچ هزار مردما سێرا وارت و شما چه سر آتکگێن چُنڈان چینچُک سَپت پُرّ کرت؟“ مُریدان پَسّئو دات: ”دوازده.“ 20”و وهدے من هپت نگن چُنڈ چُنڈ کرت و چار هزار مردما وارت، شما چه سَر آتکگێن چُنڈان چینچُک لَچ پُرّ کرت؟“ آیان پَسّئو دات: ”هپت.“ 21ایسّایا گوَشت: ”گڑا اَنگت منی هبران سَرپدَ نبێت؟“
ایسّا کۆرێئے چمّان رُژنا کنت
22وهدے ایسّا گۆن وتی مُریدان بئیت‌سئیدایا سر بوت، کۆرێن مردے آییئے کِرّا آورتِش و دَزبندی‌اِش کرت که ”وتی دستا اِشیئے سرا پِر مُش.“ 23ایسّایا کۆرئے دست گپت، چه مێتگا ڈنّ برت و آییئے چمّی تُکّ جتنت. رَندا وتی دستی آییئے چمّانی سرا اێر کرتنت و جُستی گپت: ”تئو چیزّے گندئے؟“ 24آ مردا سر چست کرت و گوَشت: ”مردمانَ گِندان، گوَشئے درچک اَنت که گردگا اَنت.“ 25ایسّایا پدا وتی دست آییئے چمّانی سرا اێر کرتنت، اے رَندی آییئے چمّ سَرجما دراه بوتنت و سجّهێن چیزّی شَرّیئے سرا دیستنت. 26نون ایسّایا گوَشت: ”تچکا وتی لۆگا برئو و مێتگا هچّ ترّ و گرد مکن.“
پِتْرُسئے گواهی
(مَتّا 16:13–20؛ لوکا 9:18–21)
27ایسّا گۆن وتی مُریدان دێم په کئیسَریَه پیلیپیئے کلّگان شت. راها، چه وتی مُریدان جُستی کرت: ”منی بارئوا مردم چے گوَشنت، من کئے آن؟“ 28آیان پَسّئو دات: ”لهتێنَ گوَشیت که تئو پاکشۆدی دئیۆکێن یَهیا ائے، لهتێنَ گوَشیت تئو اِلیاس نبی ائے. دگه لهتێنَ گوَشیت چه آ دگه نبیان یکّے ائے.“ 29گڑا جُستی کرت: ”شما وت منی بارئوا چے گوَشێت، من کئے آن؟“ پِتْرُسا پَسّئو دات: ”تئو مَسیه ائے.“ 30بله آییا کَڈّن کرتنت: ”اے هبرا پاشک مکنێت که من مَسیه آن.“
وتی مَرکئے بارئوا، ایسّائے ائولی پێشگۆیی
(مَتّا 16:21–23؛ لوکا 9:22)
31رَندا، ایسّا مُریدان تالیم دئیگا لگّت. گوَشتی: ”انسانئے چُکّ باید اِنت بازێن سکّی و سۆریے#8:31 سکّی و سۆری، بزان جنجالی، تکلیپ. بسگّیت#8:31 سَگّگ، بزان برداشت کنگ.. کئومئے کماش و مزنێن دینی پێشوا و شَریَتئے زانۆگر اَلّما آییا نمَنّنت و کۆشارێننت و سئے رۆچا رند آ پدا زندگَ بیت.“ 32وهدے ایسّایا تچکاتَچک اے سجّهێن هبر کرتنت، پِتْرُسا آ یکّ کِرّے برت و په ترْندی گوَشگا لگّت: ”او واجه! اے گپّا مکن.“ 33بله ایسّایا چَکّ تَرّێنت، مُریدانی نێمگا چارت و پِتْرُسی هَکَّل دات و گوَشتی: ”او شئیتان! چه منی دێما دور بئے. تئیی هئیال هُدایی هئیالے نه‌اِنت، انسانی هئیالے.“
ایسّائے رَندگیری
(مَتّا 16:24–28؛ لوکا 9:23–27)
34ایسّایا، سجّهێن مهلوک و مُرید لۆٹاێنتنت. گوَشتی: ”اگن کَسے لۆٹیت منی رَندگیریا بکنت، باید اِنت وتی دلئے سجّهێن لۆٹ و واهگان بکُشیت و وتی جندئے سَلیبا بَڈّا بکنت و منی راها بئیئیت. 35چێا که، هرکَس که وتی ساهئے رَکّێنگئے جُهدا کنت، گاریَ دنت، و هرکَس که منی و وَشّێن مستاگئے هاترا وتی ساها نَدرَ کنت، رَکّێنیتی. 36اگن یکّێا سجّهێن دنیا برسیت بله وتی ساها گار بِدنت، گُڑا آییا چِه پائدگَ رسیت؟ 37مردم وتی ساهئے بدلا چۆنێن کیمتے داتَ کنت؟ 38اگن کَسے اے بێوَپا و رَدکارێن اَهد و زمانگا چه من و منی هبران شرمیگَ بیت، گڑا انسانئے چُکّ هم، وهدے هُدائے پاکێن پرێشتگانی همراهیا گۆن پتئے شان و مَڑاها پدا کئیت، چه آییا شرمندگَ بیت.“
Actualmente seleccionado:
مَرکاس 8: HPKB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2016-22 Wycliffe Bible Translators, Inc.