مَرکاس 7
7
دِلئے گَندگی
(مَتّا 15:1–20)
1چه اورشَلیما آتکگێن پَریسی و شَریَتئے لهتێن زانۆگر ایسّائے کِرّا مُچّ بوتنت. 2دیستِش که ایسّائے لهتێن مُرید گۆن سِلّێن، بزان گۆن نشُشتگێن دستان وراک ورَگا اِنت. 3بله پَریسی و سجّهێن یَهودی، تانکه وتی پت و پیرُکی رسمئے رِدا دست مشۆدنت، وراکَ نئورنت. 4وهدے چه بازارا کاینت، تان شُشت و شۆد مکننت، هچَّ نئوَرنت و دگه بازێن همے ڈئولێن دۆد و رَسمِش هست چۆ که، تان پیاله و آبدان و لۆهیگان مشۆدنت، کارمرزِشَ نکننت.
5نون پَریسی و شَریَتئے زانۆگران چه ایسّایا جُست کرت: ”تئیی مُرید چێا پت و پیرُکی رسما نَمَنّنت و گۆن سِلّ و ناپاکێن دستان وراکَ ورنت؟“ 6ایسّایا گوَشت: ”او دورو و دوپۆستێن مردمان! اِشئیا نبیا شمئے بارئوا شَرّ نبشتگ:
اے مردم دپا منا اِزّتَ دئینت،
بله دلِش چه من سکّ دور اِنت.
7 اے مُپتا منا پرستشَ کننت و
مردمانی راه و رَهبندانی تالیما اَنچُشَ دئینت
که گُشئے هُدایی هُکم اَنت. # 7:7 اِشئیا نبیئے کتاب 29:13.
8شما هُدائے هُکم یله داتگ و مردمانی رَسم زُرتگ.“
9رَندا گوَشتی: ”شما په وتی رسمانی دارگا هُدائے هُکمانی یله دئیگئے شَرّێن راهے در گێتکگ. 10موسّایا گوَشتگ: وتی پت و ماتا اِزّت بدئے. هرکَسا که وتی پت یا مات نالَت کرت، آییئے سِزا مَرک اِنت.#7:10 دَررئو 20:12؛ 21:17. 11بله شما سۆجَ دئیێت که اگن یکّے وتی پت یا ماتا بگوَشیت: ’پَهِلّ کن، آ کُمکّ که من باید اِنت ترا بداتێن، آ من هُدائے راها کُربان کرتگ.‘ 12گڑا شما آییا چه پت و ماتئے کُمکّ کنگا مَنَه و مکنَ کنێت و کرۆجێت. 13شما وتی رسمان برجاهَ دارێت و اے پئیما هُدائے هبران هلاس و ناکارَ کنێت. دگه هم بازێن همے ڈئولێن کارَ کنێت.“
14ایسّایا مُچّ بوتگێن مردم پدا وتی کِرّا تئوار کرتنت، گوَشتی: ”شما درُست منی هبران گۆش بدارێت و سرپد ببێت. 15چیزّے که مردمئے لاپا رئوت آییا سِلّ و ناپاکَ نکنت، بله چیزّے که چه آییئے دلا درَ کئیت، آییا ناپاکَ کنت. 16هرکَسا په اِشکنگا گۆش پِر، بِشکنت.“#7:16 لهتێن دَزنبشتا، بَند 16 نێست.
17وهدے مردمی یله داتنت و لۆگا آتک، مُریدان گوَشت: ”مارا اے مِسالئے مکسَدا سرپد کن.“ 18ایسّایا گوَشت: ”شما همینکدر ناسرپد اێت؟ نزانێت که هچّ وراکئے ورگ مردما سِلّ و ناپاکَ نکنت؟ 19چێا که وراک دلا نرئوت، لاپا رئوت و چه رۆتان درَ کئیت.“ گۆن اے هبرا آییا گیشّێنت که سجّهێن ورگی چیزّ هِلار و پاک اَنت. 20آییا وتی هبر دێما برت و گوَشت: ”آ چیزّ که مردما ناپاکَ کنت، چه آییئے دل و درونا#7:20 درون، بزان باتِن، اَندرون. دَرَ کئیت، 21چۆ که بدێن پِگر و هئیال، بێننگی، دُزّی، هۆن و کۆش، زِنا، 22لالِچ#7:22 لالِچ، بزان تماه، هِرس. و تَماه، بَدواهی، مکّاری، وئیلانکی،#7:22 وئیلانکی، بزان بدکاری، کَهبگی. هَسَدّ، کُپر، تَکبّر و بےاَگلی. 23اے سجّهێن بَدی، چه مردمئے دل و درونا دَرَ کایَنت و مردما ناپاکَ کننت.“
درکئومێن جنێنێئے ایمان
(مَتّا 15:21–28)
24ایسّا چه اۆدا در آتک و سورئے#7:24 سور یکّ شهرے. دَمگا شت. اۆدا لۆگێا شت و نلۆٹتی که کَسے آییئے آیگا سَهیگ ببیت، بله اے هالی چێر دات نکرت. 25جنێنے که آییئے جنکُّکا جِنّے پِر اَت، وهدے ایسّائے آیگئے هالی اِشکت، هما دمانا آتک و آییئے پادان کپت. 26اے جنێن یونانیے اَت و سوریَهئے دَمگ پینیکیَها پێدا بوتگ‌اَت. آییا چه ایسّایا دَزبندی کرت که منی جنکّئے جِنّا کشّ. 27ایسّایا گوَشت: ”ائولا باید اِنت چُکّ ورگ بوَرنت و سێر بکننت، چێا که چُکّانی نگنئے پَچ گِرگ و کُچکّانی دێما دئور دئیگ شَرّ نه‌اِنت.“#7:27 ایسّائے مکسد اِش نه‌اَت که اے جنێن ناپاک اِنت. آییئے مکسد اِش اَت که جنێنئے باور چه یَهودیانی باوَرا گێش اِنت. 28جنێنا گوَشت: ”جی هئو، هُداوند! بله پَرزۆنگئے#7:28 پَرزۆنَگ، بزان سُپره، کُپار. کِرّئے کُچکّ هم چُکّانی نگنانی چُنڈانَ وَرنت.“ 29ایسّایا گوَشت: ”تئو شَرّێن پَسّئوے دات، برئو، تئیی جنکّئے جِنّ در آتکگ.“ 30وهدے جنێن لۆگا پِر ترّت، دیستی که جنکّ تَهتئے سرا وپتگ و جِنّا یله داتگ.
کَرّ و لِلّێن مردێئے دْرهبکشی
31ایسّا، چه سورئے دَمگا پِر ترّت، سئیدونی گوازێنت و جَلیلئے مَزَن‌گوَرم و دِکاپولیسئے دَمگا آتک و رَست. 32مردمان کَرّێن مردے که آییا شَرّیئے سرا گپّ جت هم نکُرت، ایسّائے کِرّا آورت و دَزبندی‌اِش کرت که تئو وتی دستا اِشیئے سرا پِر مُش. 33ایسّایا آ مرد چه مردمانی مُچّیا یکّ کِرّے برت و لَنکُکی آییئے گۆشان مان کرتنت. رندا وتی دستی تُکّ جت#7:33 تُکّ جنگ، بزان تُه جنگ و آییئے زبانا پِری مُشت. 34آسمانئے نێمگا چارتی، آه و گینسارتے#7:34 گینسارت، بزان گیسّارْت. کَشّت و گوَشتی: ”اِفَّتَه!“ (بزان ”پَچ بئے!“) 35هما دمانا، مردئے گۆش پَچ بوتنت، زبانی هم پَچ بوت و په شَرّی هبر کنگا لگِّت. 36ایسّایا، مردم کَڈّن کرتنت که گۆن کسّا اے بارئوا هچّ مگوَشێت، بله همینچُک که آییا په هبر نکنگا کَڈّن کرت، مردمان همینکدر گێشتر هبر تالان کرت. 37مردم سکّ هئیران و هبکّه اَتنت و گۆن یکدومیگا گوَشتِش: ”چۆنێن شَرّێن کارَ کنت، کَرّانی گۆشان پَچَ کنت و گُنگان زبانَ بَکشیت.“
Actualmente seleccionado:
مَرکاس 7: HPKB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2016-22 Wycliffe Bible Translators, Inc.