1 Juan 3
3
Jen' lec'óqo'tepi ñi' Dios
1Ỹa 'aulóichiỹi da' ỹátaqta let'ádaic da' loqopi'chi da' qo'mi ñi' qadet'a Dios da' qo'mi ỹimata'aque da' qo'mi lec'oqo'te jiñi'me, qataxa ỹátaqta 'eesa da' qo'mi lec'oqo'te. Chan'eesa sa qo'mi ỹaateto'n jen'me quétapegue' jen' janoicpi 'me huetalégue jen' 'aléua, qá'a sa ỹaateton ñi'me Dios. 2'Ami ñauotaxa'u ỹaqai'ỹolqa, naỹi ma'le qo'mi lec'oqo'te ñi' Dios. Qataxa maliaxa da' qo'mi sa qoỹichoxotema jái'chogamaxa 'éeta qomle ga' qadasoxoc ga' p'áteegue nolo'. Qaláxasa qo'mi saỹátenaq da' qomle naloxon so' Jesucristo, qana'chi ỹátaqta senqá'am jeso'me, qá'a ỹátaqta qademá'i da' seloqot'ot. 3Ỹima jen'me 'uo da' lpé'e jeso'me, jen'me ỹátaqta niỹóta, 'ená'am da' 'éeta so' Jesucristo da' ỹátaqta ỹoqovíta.
4Qaláxasa ỹima jen'me ỹí'et ga' jaloic, jen'me sa ỹalaxalégue jen' laqátaxacpi ñi' Dios, qá'a da' 'uo ga' qoỹasouaxat, 'ená'am da' sa qoỹalaxalégue jen' naqátaxacpi. 5Qá'a 'ami ma'le 'auaỹáchiñii so' Jesucristo jeso'me nec'áta jen' 'aléua, da' qaidi ỹapalaxat ỹima jen' qadoicpi. Jeso'me ỹátaqta qaỹa 'te ga' 'oonolec loic. 6Qana'chi ỹima jen'me quet'ot da' ỹoqotéta'uo so' Cristo, qana'chi jen'me sa quet'ot da' ỹ'étet'ape naua' loico. Qaláxasa ỹima jen'me quet'ot da' 'uo jen' jaloicpi, jen'me sa ỹilá'a qataxa sa ỹaateton jeso'me. 7'Ami ỹalqolqa, qaỹa 'te qomle da' 'uo ga' 'ami ỹoqovi'n. Jega'me ỹí'et ga' ỹiỹamqáchiiñi, jega'me ỹátaqta 'ónaxaic siỹaxaua, 'ená'am so' Cristo da' ỹátaqta 'ónaxaic siỹaxaua. 8Qaláxasa jega'me quet'ot da' ỹ'étet'ape naua' loico, jega'me quétapegue' jeso'me paiỹac qadó'o. Qá'a jeso'me chi'ena da' ỹátaqta 'itaxalóxoic joca'li ỹímta 'uo jen' 'aléua. Chan'eesa so' lec'óxot ñi' Dios janac da' qaidi noláxachiñi ỹima jen'me l'onatacpi jeso'me.
9Qaláxasa jen'me lec'óqo'tepi ñi' Dios sa 'te da' 'uootaxa 'uo ga' quet'ot da' ỹ'étet'ape naua' loico, qá'a jega'me huet'ot da' n'óiỹaxac 'me ỹanem ñi' Dios. Qana'chi jega'me sa 'te quet'ot da' ỹ'étet'ape naua' loico, qá'a lec'óxot ñi' Dios. 10Huá'a, qana'chi qoỹaỹáten jega'me ỹátaqta 'eesa da' lec'óqo'tepi ñi' Dios qataxa jega'me lec'óqo'tepi so' paiỹac qadó'o, qá'a jega'me sa ỹí'et ga' 'ónaxaic, 'uootaxa sa ỹauotec ga' laqáỹa, qana'chi jega'me sa lalémaxaset ñi' Dios.
Ñi' 'oonolec da' qo'mi ỹátaqta ỹauotec ga' laqáỹa
11Qá'a jeda'me n'aqtaxanaxac 'me 'anaquiáxañiichiỹi joca'li ỹímta da' 'au'amaqténataxañii 'eet'oi: Ñi' 'oonolec da' qo'mi ỹátaqta ỹauotec ga' laqáỹa. 12Sa 'te qomle da' senqá'am so' Caín 'me quétapegue' jeso'me paiỹac qadó'o, qana'chi ỹalaat joca'li so' lanogaxaua. ¿Tóoqo'chi da' ỹalaat? Qá'a ỹ'étetac so' Caín da' sa nó'in, jeso'me laqáỹa, qaa'le ỹátaqta 'ónaxaic da' ỹ'étetac.
13'Ami ỹaqáỹa', sa 'te qomle da' 'adouáli'ỹa qomle 'ami niquiỹa'alo jen'me quétapegue' jen' janoicpi 'me huetalégue jen' 'aléua. 14Qá'a qo'mi ma'le qolqá'ai da' sega'me qadeleuaxa, qana'chi 'uo da' qadec'alaxa. Jeda'me saỹátenaqta, qá'a sauotaxac jen' qadaỹi. Jega'me sa 'te ỹauotec ga' laqáỹa, jega'me maliaxa na'chi 'eeta't da' leleuaxa. 15Ỹima jen'me niquiỹátapega ga' laqáỹa, jen'me 'me laataxanaxaic. 'Ami 'auaỹáchiñii da' sa 'te 'uo ga' laataxanaxaic da' ỹinoxoneuó'o da' nec'alaxa 'me qaỹa 'te loiquiaqa'. 16Saỹátenaq da' 'éeta da' noqopi'chi, qá'a so' Jesucristo qo'mi ỹapaxaguenque ca'li ỹan da' l'óiỹaxac da' qo'mi ỹileualóo'te. Chan'eesa nataq'en qo'mi sanaxáỹi da' mai'chi qad'óiỹaxac da' ñañanaxalégue jen' qadaỹi. 17Chan'eesa da' 'uo ga' 'oonolec da' qo'mi da' 'uo ỹima jen'me leuénecpi da' l'óiỹaxac, da' 'uootaxa ỹilót'a ga' laqáỹa, da' 'uootaxa 'uo da' leuénaxanaxa, qaa'le sa 'te da' ỹichoxoden jega'me, qana'chi ¿hua'ago' ga' 'éeta jega'me da' ỹauotec ñi' Dios? 18'Ami ỹalqolqa, dójo' qadesóxodic 'ena'to' qomle da' 'chi nedótreegue naua' qad'aqtaqa, na'chidato' qomle da' ỹátaqta 'eesa da' qadesóxodic, qaidi ỹátaqta qoỹilá'a da' 'uo ga' s'étaq.
Qaỹa 'te ga' 'andáqtaaque da' 'ouet'ot ñi' Dios
19Naqaida da' 'éeta da' qo'mi saỹátenaq da' ỹátaqta qo'mi 'eesoda qataxa da' sa ñ'alóxonaqtac da' souqat'ot ñi' Dios. 20Qá'a jañi' qadiquidiaqte da' 'uootaxa ỹ'axat da' 'uo ga' qadoic, qana'chi saỹátenaq ñi' Dios ỹátaqta ỹágueegue da' ỹaỹáten jañi' qadiquidiaqte, qataxa jiñi'me ỹaỹáten ỹima da' qadasoxoc. 21Chan'eesa 'ami ỹaqai'ỹolqa, jañi' qadiquidiaqte da' 'uootaxa qaỹa 'te ga' qadoic qa'en, qana'chi ỹátaqta sa qadepecoqot ñi' Dios. 22Qana'chi jiñi'me qo'mi ỹanema ỹima jega'me siỹáxanaqtaaque, qá'a ỹátaqta salaxasoxoguet jen' lamaxasóxonaxacpi, qataxa s'étaq ga' ỹiỹamaxaden jiñi'me. 23Da' lamaxasóxonaxac jiñi'me 'éetapega da' qo'mi s'amaqténaq so' lec'óxot Jesucristo, qataxa 'éetapega da' ñi' 'oonolec da' qo'mi ỹátaqta ỹauotec ga' laqáỹa. Naqaida da' qo'mi ỹamaxalóo'te. 24Jen'me ỹalaxalégue jen' lamaxasóxonaxacpi, qana'chi ỹátaqta ỹoqotéta'uo jiñi'me, qataxa jiñi'me huet'aguet jen'me siỹaxadipi. Saỹátenaq jiñi'me qo'mi huetaavlo, qá'a so' lepaqal 'me qo'mi ỹanema, jeso'me qo'mi ỹaỹátenaxanaxa'n.
Currently Selected:
1 Juan 3: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.