1 Juan 2
2
So' Cristo naqaiso jeso'me qo'mi detaqátapeelóo'te
1'Ami ỹalqolqa, sidíñi dójo' da' 'ami samaxalo, qaidi sa 'te 'uo ga' 'av'íchii 'adóiquii. Qaláxasa da' 'uootaxa 'uo ga' 'uo ga' loic, qaláxasa 'uo so' ỹañoxot da' qo'mi detaqátapeelóo'te da' detaxaỹapégue' ñi'me qadet'a Dios. Jeso'me naqaiso so' Jesucristo 'me ỹí'et ga' ỹiỹamqáchiiñi. 2Qá'a jeso'me naqaiso so' chiỹaqaỹi da' tadeeto' qoỹapalaxa't naua' qadoico, qataxa sa 'te na'chiqométa, qá'a nataq'en ỹima na' siỹaxadipi 'me huetalégue jen' 'aléua.
3Da' ỹátaqta salaxasoxogueta naua' lamaxasóxonaxaco ñi'me Dios, qana'chi huá'a da' saỹátenaq da' saatetonaq jiñi'me. 4Qaláxasa da' 'uo ga' 'enaac: “Jaỹim saateton ñi'me Dios,” qaláxasa sa ỹalaxagueta naua' lamaxasóxonaxaco jiñi'me, qana'chi jega'me 'chi doqovínaxaatac qataxa sa 'eesa. 5Qaláxasa jega'me ỹ'e't naua' lamaxasóxonaxaco jiñi'me, qana'chi jega'me ỹivídaxat'a da' ỹátaqta ỹauotec ñi'me Dios. Naqaida da' 'éeta tadeeto' saỹátenaq da' qo'mi soqotaqáta'uo jiñi'me. 6Qataxa ga' 'éetapega da' ỹoqotéta'uo ñi' Dios, qana'chi jega'me 'ónaxaic da' ỹadénaxachichiỹi da' lasoxoc so' Jesucristo.
Da' dálaxaic namaxasóxonaxac
7'Ami ỹaqáỹa', jaỹim sa 'te dálaxaic ga' namaxasóxonaxac 'me sidíñi da' 'ami samaxalo, qá'a na'chidáta jeda'me namaxasóxonaxac 'me sóxote 'auacoñiiỹet ca'li ỹímta da' 'au'amaqténataxañii. Dójo' namaxasóxonaxac 'me 'uáichiiñi, naqaida jeda'me 'anaquiáxañiichiỹi joca'li. 8Qaláxasa taqadíta dójo' sidíñi 'ená'am da' dálaxaic namaxasóxonaxac. Jeda'me ỹátaqta 'eesa, 'ená'am da' naq'áit'ec joca'li so' Cristo, qana'chi 'ená'am nataq'en da' 'oñíita. Qá'a so' n'álaxa ỹamtaa'le da' ỹoxoi'ỹi, ỹim, qana'chi janac jen' ỹátaqta 'eesa da' ỹ'oqóchiiñi.
9Da' 'uo ga' 'éetapega da' nichaatétaaue jen' ỹ'oqóchiiñi, qaláxasa niquiỹátapega ga' laqáỹa, qana'chi jega'me maliaxa nichaatétaaue na' n'álaxa. 10Ga'me ỹauotec ga' laqáỹa, jega'me nichaatétaaue jen' ỹ'oqóchiiñi, qana'chi sa 'te da' qoỹa'uo ga' loic. 11Qaláxasa jega'me niquiỹátapega ga' laqáỹa, qaa'le jega'me nichaatétaaue jen' n'álaxa, qataxa sa ỹaỹáten jega'me tat'ague, qá'a jen' n'álaxa sa 'te taa'le nauáañi qa'en jega'me.
12'Ami ỹalqolqa, 'ami samaxalo jan' ỹide, qá'a ñi'me Dios ma'le sóxote da' ỹapalaxa't naua' 'adoicódii' ỹasouaxat so' Jesucristo. 13Qataxa 'ami ỹ'axaicpi, 'ami samaxalo jan' ỹide, qá'a ma'le ỹátaqta 'auaatetoñíita jeso'me chi'ena da' 'uo joca'li maliaxása da' 'uo jen' 'aléua. Qataxa 'ami soxodipi, 'ami samaxalo jan' ỹide, qá'a sóxote ma'le 'adoxonquii so' paiỹac qadó'o.
Qataxa 'ami ỹalqolqa, 'ami samaxalo jan' ỹide, qá'a ma'le 'auaatetoñii ñi' qan'étoqo't qadet'a. 14'Ami ỹ'axaicpi, 'ami samaxalo jan' ỹide, qá'a sóxote 'auaatetoñii jeso'me chi'ena da' 'uo joca'li maliaxása da' 'uo jen' 'aléua. Qataxa 'ami soxodipi, 'ami samaxalo jan' ỹide, qá'a ỹátaqta 'ami 'uañaxaiqa qataxa 'auacoñiiỹet da' l'aqtac ñi' Dios, qataxa ỹasouaxat da' sóxote 'adoxonquii jeso'me paiỹac qadó'o.
15'Ena't qomle da' 'adoqopichíỹa jen' 'aléua qataxa jen'me janoicpi 'me huetalégue jen'me. Qá'a da' 'uo ga' noqopita jen' 'aléua, qana'chi jega'me sa 'te da' ỹauotec ñi' qadet'a Dios. 16Qá'a qaỹa 'te da' 'uo ga' 'oonolec jen' janoicpi jen' 'aléua da' 'uootaxa chiỹoqo'ot ñi' qadet'a Dios, qá'a na'chínata jen'me janoicpi 'me huetalégue jen' 'aléua. Jen'me naqaina jen' sa nó'in leenataxacpi da' qadapáchiỹaxac, qataxa da' loqopi'chi naua' qad'ai'te, qataxa da' ni'ỹoxodénaxac da' qad'óiỹaxac. Ỹima jen'me chiỹaqaỹi jen' janoicpi 'me huetalégue jen' 'aléua. 17Qaláxasa jen' 'aléua taỹá'a da' ỹiméta qataxa ca'nỹi ỹima jen' sa nó'inpi neenataxacpi 'me huetalégue jen'me. Qaláxasa ga' ỹí'et jega'me 'éetapeec ñi'me Dios, qana'chi jega'me na'chi 'eeta't da' l'óiỹaxac.
Ga' ỹátaqta 'eesa qataxa ga' sa 'eesa
18'Ami ỹalqolqa, sóxote nivídedeuo naua' p'átreegue noloqo'te. 'Ami 'auaỹáchiñii da' 'uo qomle ga' nata't 'me nep'agué'ne' so' Cristo. Qá'a naỹi jalcote na' di'ỹoq 'me ne'pagué'ne' jeso'me, chan'eesa qo'mi saỹátenaq da' sóxote nivídedeuo naua' p'átreegue noloqo'te. 19Jen'me siỹaxadipi qo'mi ca'ai, qaláxasa ỹátaqta 'eesa da' jen'me sa 'te qadaỹi. Qá'a táxa da' ỹátaqta mai'chi qo'mi laqáỹa', qana'chi sa 'te taa'le qo'mi ca'ai. Qaláxasa jen'me 'éet'ec dójo', qaidi di'ỹoqóta da' sa 'te 'ena'a't da' ỹátaqta qadaỹi.
20Qaláxasa so' Cristo ma'le 'ami ỹanema so' Espíritu Santo, qana'chi ỹima da' 'oñíita 'uo da' 'adaatetonaxanaxaquii. 21'Ami samaxalo jan' ỹide, qá'a 'ami 'auaatetoñii da' 'eesa lasoxoc, sa 'te taa'le sa 'auaatetoñii. Qataxa 'ami 'auaỹáchiñii da' qaỹa 'te ga' noqovínaxanaxac da' 'uootaxa chiỹaqaỹi jeda'me 'eesa lasoxoc.
22¿Jái'chogamaxa qovínaxanaxaic? Naqaiga ga' 'éetapega jeso'me Jesús sa 'te da' na'chiso so' net'a 'me qadec'alaxaqui. Naqaiga ga' nep'aguénaxaua jeso'me, qá'a jega'me noqolgué'te' ñi' qadet'a qataxa jeso'me lec'óxot. 23Ỹima jen'me ỹoqolguet jeso'me lec'óxot ñi' Dios, jen'me sa huet'aguet ñi' qadet'a. Qaláxasa jen'me sa ỹoqolguet so' lec'óxot ñi' Dios, jen'me nataq'en huet'aguet ñi' qadet'a.
24Chan'eesa 'ami ỹátaqta 'auachíỹailo qomle naua' 'adiquidiaqtéldii' da' n'aqtac 'me 'anaquiáxañiichiỹi joca'li ỹímta da' 'au'amaqténataxañii. Qá'a dójo' n'aqtac 'me 'anaquiáxañiichiỹi joca'li da' 'uootaxa ỹátaqta huetaavlo naua' 'adiquidiaqtéldii', qana'chi 'ami ỹátaqta 'auoqochíita'uo ñi'me qadet'a qataxa so' lec'óxot. 25Jeso'me Jesucristo qo'mi ỹaloxóotapegalo joca'li da' n'óiỹaxac 'me qaỹa 'te loiquiaqa'.
26Sidíñi dójo' da' 'ami samaxalo, ỹasouaxat jen'me siỹaxadipi sétaaque da' 'ami ỹoqovi'n. 27Qaláxasa 'ami ma'le 'ami netaỹilo so' Espíritu Santo 'me 'ami ỹanema so' Jesucristo. Qana'chi sa ỹiuen da' 'uo ga' 'ami ỹapaxague'n, qá'a na'chiso so' Espíritu 'ami ỹapaxaguenque ỹima jen' lasoxocpi. Jen'me lapaxaguenataxanaxacpi jeso'me ỹátaqta 'eesa, sa 'te sa 'eesa. Chan'eesa na'chi 'eeta't qomle da' 'auoqochíita'uo so' Cristo, qá'a na'chi'ami ỹapaxaguenque so' Espíritu.
28Chan'eesa 'ami ỹalqolqa, na'chi 'eeta't qomle da' 'auoqochíita'uo so' Cristo, qaidi ỹátaqta 'uo qomle da' qadpé'e qomle ỹivíta da' naloxon jeso'me, qana'chi qaỹa 'te ga' qad'alóxo qomle ỹivíta da' n'iỹílaq. 29Qá'a 'ami ma'le sóxote da' 'auaỹáchiñii so' Jesucristo da' ỹí'et ga' 'ónaxaic, qana'chi 'auaỹáchiñiita nataq'en da' ỹima jen'me ỹí'et ga' 'ónaxaic jen'me lec'óqo'tepi ñi' Dios.
Currently Selected:
1 Juan 2: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.