1 Juan 4
4
Jeso'me lepaqal ñi' Dios qataxa jen' neenataxacpi 'me nep'agué'ne' so' Cristo
1'Ami ỹaqai'ỹolqa, 'ena'to' qomle da' 'au'amaqchíñii ỹima jen'me 'enapeela't da' ỹ'aqtaxanaxan ñi' Dios. Na'chidato' da' 'auachimaxachíỹa jega'me, qaidi 'auaỹáchiñiite' naua' leenataxaco ỹátaqta chiỹoqo'to ñi' Dios, 'uootaxa sa naq'áita. Qá'a jen' 'aléua ma'le sétaaque da' saqatelégue jen' qovínaxanaxaicpi 'me 'enapeela't da' ỹ'aqtaxanaxan ñi' Dios. 2Qaláxasa naqaida qomle da' 'éeta da' tadeeto' 'auaatetoñii jega'me netanỹet so' lepaqal ñi' Dios, 'eet'oi: Ỹima jen' 'eesa qa'en so' Jesucristo da' ỹátaqta 'eesa siỹaxaua, naqáina na' netanỹet so' lepaqal ñi' Dios. 3Qaláxasa jega'me sa 'te da' ỹátaqta 'eesa qa'en so' Jesús, jega'me sa 'te da' netanỹet so' lepaqal ñi' Dios. Na'chidáta da' jega'me huet'oto naua' neenataxaco 'me nep'aguee'to so' Cristo. 'Ami ma'le 'anaquiáxañiitapeelégue da' 'uo ga' nolo', da' di'ỹo't jenaua' neenataxaco. Qaláxasa naỹi jenaa'me sóxote huetralégue jen' 'aléua.
4'Ami ỹalqolqa, 'ami lalémaxase'te ñi' Dios, qataxa ma'le sóxote da' 'adoxonquii jen'me qovínaxanaxaicpi, qá'a ñi'me Dios 'me 'ami huet'asopa ỹátaqta 'uañaxaic, sa 'ená'am jeso'me paiỹac qadó'o huet'aguet jen'me quétapegue' na' janoicpi 'me huetalégue jen' 'aléua. 5Jen'me qovínaxanaxaicpi quétapee'to naua' loico 'me huetralégue jen' 'aléua, chan'eesa ỹ'axátetac, qataxa jen' 'ená'am quétapee'to naua' loico ỹátaqta naquiáxana jen'me. 6Qo'mi, qaamaxa qo'mi lalémaxase'te ñi' Dios. Jen'me ỹaateton ñi' Dios, qana'chi ỹátaqta qo'mi naquiáxanalo. Qaamaxa jen'me sa 'te da' lalémaxasetpi ñi' Dios, qaamaxa sa qo'mi 'te naquiáxanalo. Chan'eesa qo'mi sañoxotaq da' saatetonaq ga' huet'oto naua' neenataxaco 'me ỹátaqta 'eesoda qataxa ga' huet'oto naua' neenataxaco 'me desómaxanataxana'pe.
Huotaxanaqtáqaic ñi' Dios
7'Ami ỹaqai'ỹolqa, ñi' 'oonolec da' qo'mi ỹátaqta ỹauotec ga' laqáỹa, qá'a jeda'me nauo'chi chiỹoqo'ot ñi'me Dios. Ỹima jen' 'uo da' lauo'chi, jen'me lec'óqo'tepi ñi' Dios, qataxa ỹaateton jiñi'me. 8Ga' qaỹa ga' lauo'chi, qana'chi sa ỹaateton ñi' Dios, qá'a jiñi'me huotaxanaqtáqaic. 9Ñi' Dios qo'mi ỹaloxonalo da' lauo'chi joca'li namaxa jen' 'aléua so' 'oonolec lec'óxot, da' qaidi qo'mi sachiỹoxotaqaỹi jeso'me da' qadec'alaxa. 10Naqaida da' tadeeto' saỹátenaq da' lauo'chi ñi' Dios: jiñi'me 'uáiñi da' qo'mi ỹauoteque. Chan'eesa qo'mi namaxalo so' lec'óxot, da' qaidi chiỹaqaỹi qa'en jeso'me da' ỹapalaxat jen' qadoicpi. Sa na'chiqo'mi chiỹaqaavlo da' sauotaxac jiñi'me.
11'Ami ỹaqai'ỹolqa, da' na'chi 'éeta dójo' da' qo'mi ỹauoteque ñi'me Dios, nataq'en ñi' 'oonolec da' qo'mi ỹátaqta sauotaxac ga' qadaqáỹa. 12Ñi'me Dios qaỹa 'te 'uo ga' nemá'i da' ỹaateton. Qaláxasa ñi' 'oonolec da' qo'mi da' ỹátaqta sauotaxac ga' qadaqáỹa, qana'chi ñi' Dios qo'mi huetaavlo, qana'chi da' lauo'chi jiñi'me ỹivíd'a da' nalóchiiñi da' qo'mi huetaavlo. 13Da' ỹátaqta di'ỹoq qa'en da' qo'mi soqotaqáta'uo ñi' Dios qataxa da' qo'mi huetaavlo jiñi'me 'eet'oi: Jiñi'me qo'mi ỹanema so' lepaqal. 14Qataxa qo'mi nataq'en ỹátaqta sauanáqchiỹi ñi' qadet'a Dios qataxa s'axátaqtac jiñi'me namaq so' lec'óxot da' qaidi nec'alaxatéegue ỹima jen' huetalégue jen' 'aléua. 15Jega'me 'eesa qa'en so' Jesús da' na'chiso so' lec'óxot ñi' Dios, jega'me ỹoqotéta'uo ñi' Dios, qataxa jiñi'me huet'asop jega'me.
16Naqaida da' 'éeta da' tadeeto' saỹátenaq qataxa s'amaqténaq ñi' Dios qo'mi ỹauoteque. Ñi' Dios huotaxanaqtáqaic. Jega'me huet'ot da' nauo'chi, jega'me ỹoqotéta'uo ñi' Dios, qataxa jiñi'me huet'asop jega'me. 17Qaidi sevídaqat'a da' ỹátaqta nalóchiiñi da' qadauo'chi, qaidi ga' nolo' qomle qonimit ỹima na' siỹaxadipi, qaláxasa sa 'te da' qadepecoq. Qá'a qo'mi naỹi da' maliaxa souqatalégue jen' 'aléua, qá'a da' qad'óiỹaxac ỹátaqta 'ená'am da' l'óiỹaxac so' Jesucristo. 18Ga'me huet'ague dójo' nauo'chi, qana'chi qaỹa 'te ga' noqolánaxa. Qá'a nauo'chi 'me nalóchiiñi, jeda'me ỹ'odáiỹi da' noqolánaxa. Qá'a dójo' noqolánaxa, jeda'me ỹilot'aguet da' ne'uaxánaguec. Chan'eesa ga' 'uo da' loqolánaxa, qana'chi jega'me sa 'te da' ỹátaqta 'uo da' lauo'chi.
19Qo'mi ỹátaqta sauotaxac ñi'me Dios, qá'a jiñi'me 'uáiñi da' qo'mi ỹauoteque. 20Qaláxasa da' 'uo ga' 'enaac: “Jaỹim sauotec ñi' Dios,” qaláxasa jega'me da' maliaxa niquiỹátapega ga' laqáỹa, qana'chi jega'me 'chi doqovínaxaatac. Qá'a ga' 'oonolec siỹaxaua da' 'uootaxa sa 'te ỹauotec ga' laqáỹa 'me ỹilót'a, qana'chi jega'me ¿hua'ague toqo' da' ỹañoxot da' ỹauotec ñi' Dios 'me sa ỹañoxot da' ỹilá'a? 21Jiñi'me qo'mi ỹanema da' lamaxasóxonaxac 'eet'oi: Ga' ỹauotec ñi' Dios, n'óota da' nataq'en ỹauotec ga' laqáỹa.
Currently Selected:
1 Juan 4: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.