Johannes 6
6
ONTOPORUA 6.
Jesu ta kutica aantu mombuga
1Konima ha mbjoka Jesus h’ota hi haandija hefuta rja Galilea, nokutja efuta rja Tiberias.
2Ongundu onene haantu h’ohe mu randura, oshoka oja mono iirongankondo, mbi a ningi maavu.
3Mpano Jesus ta hi kondundu, nde ta kaatumba ko naarongua je.
4Otshituci tsha Paska tshaajuda otsha ri popepi.
5Jesus sho a rigamene ko, ta mono ongundu onene haantu he ja ku he, nde ta pura Filipus: Otatu ka randa peni eemboroto okukutica ajeshe mbo?
6Okue tshi popi ouara okumumakera, oshoka he muene okua ri e tshi shi ta ka ninga.
7Filippus h’ota jamukura: Eemboroto da ha meendenari omacere gaari inadi guana, ngeno keshe muntu a mone nand’okatshuutshu.
8Gumue po guo maarongua je, Andreas, omumuahina gua Simon Petrus, ta ti ku he:
9Opun’omumati mpaka e neemboroto ntano neeshi mbaari. Od’ike otadi pondora po tshee mpo?
10He Jesus ta ti: Eceni aantu ja kaatumbe manka. Mpono opua ri pu nomuidi ogundji. Aarumentu taa kaatumba, oja ri pomajovi gatano.
11Jesus h’ota kuca eemboroto, ta amberere, he te di toporere ajeshe, mba ja kaatumba mpo. Tsh’otsho tuu eeshi mbaari, nga’mpa ja ara di cike.
12Sho ja kuta, ta rombuere aarongua je: Gongereni uupambu aushe, mbu u upa ko, kau kane.
13Je u gongere, nde taa huda iimbare omurongo niijari nuupambu ueemboroto ntano, mbu u upa ko ku mbono, mba ja rja.
14Aantu sho ja mono otshirongankondo, shi Jesus a ningi, oja ti: Otshiri, nguk’ohe omuprofeti, ngu te ke ja anuua muujuni.
15Ndere Jesus a hangara, aantu nokutja oja arere okumukondjica je mu ninge omukuaniirua. Otsho ano a zi po a he itshee kondundu, oh’ike.
Jesus te ende kombanda hefuta.
16Etango tari ningine. Aarongua je taa hi kefuta.
17Jo taa rondo mosikepa, nde taa taaguruka efuta okuha ku Kafarnaum. Kua ruuda manka, nde Jesus ine ja ku jo.
18Efuta rjo orja pindja, oshoka otshikunguru otshidigu otsha tukuka.
19So ja shinga osikepa puure pu cike eesitadio eemurongo mbaari na ntano nenge eemurongo ndatu, taa mono Jesus te ende kombanda hefuta, jo taa mbandara unene.
20Ndere he ta ti ku jo: Ongaje ngu, inamu tira!
21Nenjanju taa mu tuumba mosikepa. Nzija osikepa oha farua komutunda guotshirongo, mpo ja ara okuha ko.
Jesus ta shunganeke esakramente ejapuki.
22Ngaangura aantu mba ja ri haandija hefuta, oju uvu, nokutja kakuna ue osikepa huu, shira himuike ndji, ndere Jesus muene ina rondere mosikepa puamue naarongua je, aarongua ojo ike ja ka taaguruka.
23Ndere eesikepa dimue oda zire ku Tiberias, de ja popepi neshara, mpo ja rire eemboroto, di da jambekerue ku Muene.
24Ano sho ja mono, Jesus ke po naarongua je, oja rondo mesikepa, nde taa hi ku Kafarnaum okumukonga.
25Sho je mu mono haandija hefuta, oje mu pura: Muene, oue ja ko unake huno?
26Jesus h’ote ja rombuere: Tshiri, tshiri, andi mu rombuere, itamu kongo ndje, oshoka omua mona omadidiriko, aaue, otamu kongo ndje, sho mua rire eemboroto, nde tamu kuta.
27Inamu ihepica neendia di tadi shuru po, ndere akaneni okurja hu taku kara komuenjo guarushe, shika otamu tshi peua kOmuna guOmuntu. Nguka tuu okua didirikua ku Karunga She.
28Jo taa mu pura: Natu ninge ngiini tu ronge iironga ja Karunga?
29Jesus ta jamukura: Otshironga tsha Karunga otsho shi: Iteereni mu ngo, ngu a tuma.
30Jo taa pura itshee: Oto rongo otshirongankondo tshiini, tu tshi mone, sse tu ku iteere? Oto rongo tshike nduno?
31Ootate oja rire omana mombuga, ngashi pua tshangua: Onde ja pere omboroto okurja, ndji ha zire keguru.
32Jesus ta ti ku jo: Tshiri, tshiri, andi mu rombuere: Ke shi Moses, ngu e mu pere omboroto ndji ha zire keguru, aaue, oTate te mu pe omboroto hotshiri, ndji ha zire keguru.
33Oshoka omboroto ndjino oho’ndjija ha zire keguru, ho otahi pe uujuni omuenjo.
34Jo taa mu garikana: Muene, tu pa omboroto ndjija harushe.
35Jesus h’ota ti ku jo: Ongaje omboroto homuenjo. Ngu te ja ku ngaje, ka s’ondjara ue, na ngu ti iteere ndje, ka s’enota ue.
36Onde tshi mu rombuere, omua mona ndje, ndere inamu iteera ndje.
37Ajishe mbi te peua ku Tate, otaji ja ku ngaje; na ngu te ja ku ngaje, itandi mu ekereshi.
38Oshoka onda zire keguru, nde ja muujuni, ha kutja ndi ronge eharo rjandje, aaue, eharo rja ngu, ngu a tuma ndje.
39Eharo rja ngu a tuma ndje, nokutja orja Tate oondika: Inandi kanica tsha shi nda peua ku he, ndere ndi tshi pendure mesiku rjoshugunina.
40Eharo rja Tate, ngu a tuma ndje, orjo ndika: Keshe ngu ta mono Omona, he ti iteere uo mu he, na peue omuenjo guarushe, onandi mu pendura mesiku rjoshugunina.
41Mpaka aajuda oja ngungutura, oshoka okua tire: Ongaje omboroto homuenjo, ha zire keguru, he ja poshi.
42Nde taa ti: Ngu Jesus, k’ohe mumua Josef nani, she na hina tu ja tshi. Nena ota tshiua ngiini okupopja nokutja: Onda zire keguru?
43Jesus h’ota jamukura mo: Inamu ngunguturiracana!
44Kakuna ngu te ja ku ngaje, Tate, ngu a tuma ndje, ng’ite mu ciminike ko. Nde ngaje otandi mu jumuda mesiku rjoshugunina.
45Okua tshangua kaaprofeti: Ajeshe onaa rongua ku Karunga. Keshe ngu a huva ku Tate, he a rongua uo ku he, ote ja ku ngaje.
46Ha kutja ngeno oku na ngu a mona Tate; aaue, oh’ike tuu, ngu a zire ku Tate, he okua mona Tate.
47Tshiri, tshiri, andi mu rombuere: Ngu ti iteere ndje, oku nomuenjo guarushe.
48Ongaje omboroto homuenjo.
49Oosho oja rire omana mombuga, nde oja sa.
50Oho omboroto, ndji, ha zire keguru, opo keshe ngu te hi ri, ka se.
51Ongaje omboroto homuenjo, ngu nda zire keguru.
Ngu ta ri omboroto ndjino, ota kara e nomuenjo sigoosigo. Nd’omboroto, ndji onandi gandja, onjama handje hi ninge omuenjo guujuni.
52Mpa aajuda taa patacana, jo taa ti: Ota tshiua ngiini okutupa onjama he oho tu rje?
53Jesus h’ote ja rombuere: Tshiri, tshiri, andi mu rombuere: Ng’itamu ri onjama hOmuna guOmuntu, ne itamu nu ombinzi he, itamu kara mu nomuenjo mu ne.
54Ngu ta ri onjama handje, he ta nu ombinzi handje, ota kara e nomuenjo, nde ngaje onandi mu jumuda mesiku rjoshugunina.
55Oshoka onjama handje okurja kuotshiri nombinzi handje okunua kuotshiri.
56Ngu ta ri onjama handje, he ta nu ombinzi handje, ota kara mu ngaje, na ngaje omu he te kara.
57Ngashi Tate omunamuenjo a tuma ndje, nde ngaje te rumbu morua Tate, otsho uo ngaa ngii ta rumbu morua ndje, ngu ta ri ndje.
58Oho omboroto, ndji ha zire keguru, ha kutja ngashi oosho ja rire omana mombuga, nde ja sa; ngu ta ri omboroto ndjino, ota rumbu sigoosigo.
59Eehapu dika okue di popja, sho a ronga aantu ku Kafarnaum mosinagoga.
60Ojendji jo maarongua je, sho je tshi uvu, oja ti: Ndjoka ohapu odigu ndjo. Ore te hi kuata ndjono?
61Jesus h’okua tshiua mu he muene, nokutja aarongua oje hi ngunguturire. He ta ti ku jo: Eehapu dino otadi shindi ne?
62Ndere uunarumue ng’onamu ka mona Omuna guOmuntu ta rondo hu a zire?— #6:62 Jesus ina shurica eehapu de, aarongua jo ojene naa guedere po: itamu ki iteera itshee, nenge tamu ka shindua uo kokuronda kuandje keguru?
63Ombepo oho hahi gandja omuenjo, onjama kahi noruporo. Eehapu di nde di mu rombuera, odo ombepo nomuenjo.
64Ndere uo mokati keni omu na jamue, mb’inaji iteera. Oshoka okuza ketameko Jesus okua ri e ja tshi, mb’inaji iteera, na ngu te ke mu orora.
65H’ota ti: ano onde tshi mu rombuera: Kakuna ngu ta vuru okuja ku ngaje, ng’ine tshi peua ku Tate.
66Okuza petango mpo aarongua ojendji ja za po, jo kaa hende ue na he.
67Jesus ta rombuere nduno mbeja omurongo na jaari: Na ne uo omua ara mu cige ndje po?
68Nde Simon Petrus ta jamukura mo: Muene, sse atu hi ku re? Ngueje ou neehapu domuenjo guarushe.
69Ss’otui iteera, sse tua tshiua, nokutja onguee Kristus, Omumua Karunga.
70Jesus h’ote ja jamukura, ta ti: Inandi ogorora nani omurongo na jaari, ndere gumue mokati keni osatana?
71He ta popi Judas Iskariot, omumua Simon; oshoka ngu one ke mu orora, nande a ri gumue gua mbeja omurongo na jaari.
Currently Selected:
Johannes 6: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.