Johannes 7
7
ONTOPORUA 7.
Jesus ta hi kotshituci ku Jerusalem.
1Konima ha mbika Jesus h’oku endehenda mu Galilea, ndere mu Judea ina hara okuenda, oshoka aajuda oja konga je mu dipage.
2Otshituci tshaajuda, shi tshomatsari giishuari, otsha ri popepi.
3Aamuahina jo taa ti ku he: Za po mpo, ngueje u he ku Judea, opo aarongua johe ja mone uo iironga mbi to rongo.
4Oshoka kakuna ngu ta rongo tsha mehoramo, nde ta kongo okutshiuika ku ajeshe. Nge to rongo ano iironga ji cike pu mbija, ji ronga nduno u tshiuike kuujuni aushe.
5Oshoka naamuahina uo inaji iteera mu he.
6Jesus ta ti ku jo: Ecimbo rjandje inari cika, ndere ecimbo rjeni rjo opara arushe.
7Uujuni kau vura okumutonda, ndere ngaje uo ohau tondo ndje, oshoka otandi u okorora, nokutja iironga jauo iihineji.
8Ne indeni ano kotshituci tshika, ngaje itandi hi ko, oshoka ecimbo rjandje inari cika.
9Shika okue tshi ja rombuere, nde ta kara mu Galilea.
10Aamuahina sho ja ri ja hi ko, na he muene ta hi kotshituci, ha miipaci jauo, aaue, omuufuci.
11Aajuda oje mu kongo motshituci tshika, taa ti: Oku ri peni nduno?
12Eemurombo odindji ode mu popirua; oshoka jamue otaa ti: He omuanaua, ndere jamue po: Aaje, he oha pukica aantu.
13Ndere kakuna ngu te mu popi mokati kaantu, oshoka okua taa tira aajuda.
14Otshituci sho tsha ara okupita, Jesus ta hi montempeli okuronga.
15Jo aajuda oja kumua, taa ti: Uunongo uomambo oku u tshiua peni, he ine u rongua?
16Jesus h’ota jamukura mo: Erongo rjandje kari shi rjandje muene, aaue, orja nguija ngu a tuma ndje.
17Ngu a hara okuronga eharo rjandje, otu uvu momuenjo gue, nokutja erongo ndino otari zi ku Karunga nenge otii ri popi mu ngaje muene.
18Ngu ta popi mu he muene, ota kongo esimano rje, ndere ngu ta kongo esimano rja nguija, ngu a tuma ndje, he oku notshiri, ke nuumbudi.
19Moses ine mu pa nani ompango? Ndere kakuna mokati keni, ngu ta guanica ompango.
20Otshike mua ara okudipaga ndje? Aantu jo taa jamukura, taa ti: Oshoka ou nombepo ombuineji. Ore a hara okukudipaga?
21Jesus h’ota jamukura mo: Onda ronga otshironga tshimuike, nde amushe omua kumua.
22Ano Moses okue mu pere efukareko (ha kutja orja zire ku Moses, aaue, okoosho), nde tamu fukareke aantu mesiku rjesabata.
23Omuntu ngu ta fukareke mesabata, nd’ita jono ompango ha Moses, ne otamu geerere ndje tshee, ng’onde erukica omuntu agushe mesabata?
24Inamu pangura ouara momesho, aaue, pangureni epanguro rju uka!
25Jamue jo ku Jerusalem taa ti: Nguno ke shi nani omuntu ngu ja konga je mu dipage?
26Nde tareni, he ta popi miipaci, nde itaa mu ganda nande nohapu himue. Nani aakuruntu oje mu dimburura nokutja ohe tshiri Kristus?
27Ndere ngu otu tshi mpo a zi. Ndere Kristus nge te ja, kakuna ngu e tshi hu ta zi.
28Mpaka Jesus ta popi muure montempeli, ta rongo aantu, ta ti: Tshiri, omu tshi ndje ngaa na mpo nda zi, omu tshi po; ndere inandi za mu ngaje muene, aaue, ngu a tuma ndje, he omunatshiri, ndere ne kamu mu tshi.
29Ngaje ondi mu tshi, oshoka onda zire ku he, ohe a tuma ndje.
30Jo oja ara okumukuata nokuri, ndere kakuna nand’ogumue te mu njenge, oshoka ecimbo rje inari cika manka.
31Ndere ojendji jo maantu oji iteera mu he, jo taa ti: Kristus nge te ja, ota ka ronga ngeno iirongankondo ji vure mbi a ronga?
32Aafariseji jo taa huvu aantu, sho taa tshi mu popi taa nongona, ano aapristeri aakuruntu naafariseji taa tumu ko aapija je mu kuate.
33Nde Jesus ta ti ku jo: Okacimbo kouara ondi ri pu ne, nde te hi ku ngu a tuma ndje.
34Ne otamu ka konga ndje, nd’itamu mono ndje, Mpoka ndi ri, itamu vuru okuja ko.
35Mpaka aajuda taa rombueracana: Ona hi kuni, sse katu mu mone ue? Ota hi ando kaapagani a sharakane mokati kauo, h’a ka ronge aapagani?
36Omurombo gue ogua tja ngiini, sho ta ti: Otamu ka konga ndje, nd’itamu mono ndje, mpoka ndi ri, itamu vuru okuja po?
37Mesiku enene rjoshugunina rjotshituci Jesus ta cikama, he ti igida, ta ti: Nge pu na ngu a s’enota, ne je ku ngaje a nue.#7:37 Egano rjongura nenge rjonguroshi nge rja pu, aapristeri aajuda oja teka omeja mecicija rja Siloe, ndi tari zi mondundu hontempeli, nde taa ga fara motshoto tshontempeli; jo taa ga vundakanica nomavinju gegano rjesiku ndija, taa ga tire motshijuma nokuimba eehapu di da Isaias 12:3. Jo aantu otaa nu. Mpa Jesus oti igida: Nge pu na ngu a s’enota, ne je ku ngaje; e ja pe okunua erongo nehiteero noshenda.
38Ngu a hiteera ndje, meni rje tamu zi, ngashi pua tshangua, eemuronga domeja ge nomuenjo.
39Shino okue tshi rombuera tsh’Ombepo, ndji ajeshe taa ka peua, mba taa ki iteera mu he; nd’Ombepo inahi gandjua manka, oshoka Jesus okua ri ina adimicua natango.
40Jamue jo mongundu sho ju uvu eehapu di, oja ti: Tshiri, nguk’omuprofeti.
41Jamue po oja ti: Ngoka oKristus. Itshee jamue ji iri taa pura: Kristus ngeno one ja nokuza mu Galilea?
42Nani omambo itaga ti: Kristus one ja ta zi morudi rua David no mokakunda Betlehem, hu David a zire?
43Aantu jo taa patacana moru’e.
44Jamue ja ara okumukuata, ndere kakuna ngu te mu njenge.
45Tsh’otsho aapija ja tshuna kaapristeri aakuruntu no kaafariseji mbo taa ja pura: Otshike nduno inamu mu eta hu?
46Jo aapija otaa jamukura mo: Kapun’omuntu a popja otshongii nga ngu.
47Aafariseji taa ti ku jo: Na ne omua pukicua ando?
48Okuna gumue guo maakuruntu nenge maafariseji, ngu a hiteera?
49Ndere aantu mboka, mb’inaa tshiua ompango, otaa kara ja cingua.
50Mpaka Nikodemus, ngu a hire ku Jesus uusiku, ngu a ri gumue guo mu jo, ta ti ku jo:
51Nani ompango hetu ohahi pangura ngeno omuntu, ng’inahi mu puakena tango, ho inahi dimburura uo shi a ninga?
52Jo taa jamukura, taa ti ku he: Na ngueje uo omugalileji? Nongera omambo, ngueje u tshiue, nokutja mu Galilea kamu za omuprofeti.
53Jo taa tshuna, keshe gumue kaandje.
Currently Selected:
Johannes 7: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.