Johannes 5
5
ONTOPORUA 5.
Jesus te eruda omuntu pondombe.
1Konima ha mbjoka okua ri otshituci tshaajuda; Jesus ta hi uo ku Jerusalem.
2Mo mu Jerusalem omua ri ondombe potsheero tsheenzi, edina rjaho motshihebereji Beteseta. H’oha ri neendunda eende ntano.
3Omo mua rara eengundu daavu, aaposi, iirema naankundi, mba ja tegerere ngaa omeja gi injenge.
4Oshoka okua hapu ja peempito no peempito omujengeli gua Muene, ta hi mondombe, nde ti injengica omeja. Ngu a hi nduno mondombe tango, shimpa ngaa omeja gi injenga, ohe te eruka, keshe ngu e nuuvu iri nou iri.
5Mpoka opua ri omuntu a ninga eemuvo eemurongo ndatu nuunutatu nuuvu.
6Jesus sho e mu mono a rara mpono — oku tshi nokutja okua arukua nare orure — okua ti ku he: Oua ara nduno u eruke?
7Omuvu h’ota jamukura, ta ti: Muene, kandi na muntu, ta fara ndje mondombe, omeja nge taji injenge, oshoka manka tandi engene ko, ngaje nda pitua ko nare ku gumue a hiri.
8Jesus te mu rombuere: Cikama, kuca okariri kohe, nguee to hi.
9Pokarara oko hoka omuntu okue eruka, ta kuca okariri ke, he ta hi. Esiku ndioka esabata.
10Mpa aajuda taa rombuere omuntu, ngu a heruka: Nena esiku rjesabata. Oue tshi indikua okuumbata okariri kohe.
11H’ota jamukura: Ngu a herukica ndje, ohe e tshi rombuerendje, ta ti: Kuca okariri kohe, nguee to hi.
12Jo otaa mu pura: Omuntu ngono, ngu a ti: Kuca okariri kohe, nguee to hi, ore?
13Ndere ngu a heruka, ka ri e mu tshi, oshoka Jesus okua ri a za mo mongundu haantu, ndji ha ri ha gongara mpoka.
14Konofu ta adikua ku Jesus montempeli, he te mu kumagida: Tara, nena oue eruka, ino jona ue, ku mone komesho iishuna ji vure mbi.
15Nzija omuntu nguno ta hi kaajuda, te ja rombuere: Ohe nduno Jesus, ngu e mu erukica.
16Ano aajuda taa rangere Jesus, oshoka okue tshi ningire mesiku rjesabata.
Jesus to okororere She.
17Nde Jesus ta jamukura: Tate oha rongo arushe sigo onena, na ngaje otandi rongo.
18Unene po aajuda jo je mu uka nena ja ara ngeno je mu dipage, ka kutja oshoka okua jon’ike mesabata, aaue, itshee oshoka okua rombora, Karunga’erera muene She, nokuiningi uo e cike pu Karunga. Ano Jesus ta jamukura ta ti ku jo:
19Tshiri, tshiri, andi mu rombuere: Omona ita vuru okuninga tsha mu he muene, otsho ike shi ta mono She ta ningi, oshoka atshishe shi ta ningi, nOmona otsho ngaa ta ningi tsha facana.
20Oshoka Tate oku ore Omona, h’ote mu urukire shi ta ningi muene; ote ke mu urukira iironga ji vure mbino, ne mu ji kuminue.
21Ngashi ngaa Tate ta jumuda aasi e ja pe omuenjo, nOmona otsho ngaa ta jumuda ajeshe, mba a hara.
22Tate ita pangura nand’omuntu; epanguro arishe okue ri pe Omona.
23Opo ajeshe ja simaneke Omona ngashi taa simaneke Tate. Ngu ita simaneke Omona, h’ita simaneke uo Tate, ngu e mu tuma.
24Tshiri, tshiri, andi mu rombuere: Ngu ta puakene ohapu handje, ti iteere mu ngu e mu tuma, oku nomuenjo guarushe, h’ita hi mepanguro, ndere okuza mokusa ta hi momuenjo.
25Tshiri, tshiri, andi mu rombuere: Erara tari ja — rjo ori ri po ngashiingika, aasi onaa huvu eui rjOmumua Karunga, jo mba taa ri uvu, otaa ka kara je nomuenjo.
26Ngashi Tate e nomuenjo mu he muene, otsho ngaa uo okua pa Omona a kare nomuenjo mu he muene.
27Okue mu pe eenkondo dokupangura, oshoka h’Omuna guOmuntu.
28Inamu tshi kuminua, oshoka erara otari ja, ajeshe mba je ri meembira, mu naa huvu eui rjOmumua Karunga.
29Mba ja ronga otshaanaua, otaa jumuka ja he komuenjo, nde mba ja ronga otshineji, otaa jumuka ja he mepanguro.
30Itandi vuru okuninga tsha mu ngaje muene. Ngashi ndu uva, otsho tandi pangura, rjo epanguro rjandje orju uka, oshoka ite kongo eharo rjandje muene, aaue, eharo rja ngu a tuma ndje.
She ho meguru to okororere Jesus.
31Nge tandi ihokorora ngaje muene, ehokororo jandje kari shi rju uka.
32Gumue a hiri to okorora ndje; ngaje ondi tshi naua nokutja ehokororo rje ori notshiri, ndi to okorora ndje na rjo.
33Ne omua tuma ku Johannes, h’okuo okorora otshiri.
34Ndere ngaje inandi ara ehokororo rjaantu, ndere andi tshi popi ike, ne mu upicue.
35Nguija okua ri onjeka ha tema, ho tahi minikire, ne mua arere okudanica uujerere ue okacimbo okatshona.
36Ngaje ondi nehokororo ri vure ndija rja Johannes. Oshoka iironga mbi nda rombuerua ku Tate ndi ji ronge, nokutja iironga mbi te rongo, otaji okorora ndje, nokutja onda tumua ku Tate.
37Na Tate, ngu a tuma ndje, h’oto okorora ndje; inamu uva eui rje, ne inamu mona uo orupe rue nand’orumue.
38Nitshee kamu na arushe ohapu he mu ne, oshoka itamu iteere ngu a tumua ku he.
39Otamu nongere momambo, oshoka omua ruka, mu tamu mono mo omuenjo guarushe, ndere ogo ngaa nga tago okorora ndje.
40Ndere inamu ara okuja ku ngaje mu peue omuenjo.
41Ngaje inandi ara esimano kaantu.
42Ondi mu tshi, nokutja ohore ha Karunga kahi ri mu ne.
43Onde ja medina rja Tate, ndere ne inamu tuumba ndje; gumue a hiri, nge te ja medina rje muene, otamu mu tuumba ngaa.
44Otamu vuru ngiini okuiteera, ne, mbo tamu tuumbacana esimano, ndere itamu kongo esimano, ndi tari zi ku Karunga gumuike.
45Inamu tja, ngaje otandi ke mu popa pu Tate, aaue, gumue po a hiri ngu te mu popo, oMoses, ngu mui inekera mu he.
46Ngeno kua mui iteera Moses, ando mui iteera ndje uo, oshoka okua tshangere ta popi ndje.
47Ng’itamu iteere omambo ge, otamu k’iteera ngiini eehapu dandje?
Currently Selected:
Johannes 5: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.