EVASELIO A MATEO 5
5
Akonaki i te mouga
1I tana sio ki te hahai, nee hake leva ia Sesu ki te mouga: pea nee nofo leva ia ia ki lalo, pea nee fakaoviovi age leva ana tisipulo kia ia. 2Pea nee ina avahi leva tona gutu, pea nee akonaki leva ia ia kia natou, o ui:
3Manuia natou ae e masiva i te loto, koteuhi e fakalogo kia natou te puleaga o te atu lagi.
4Manuia natou ae e loto mamahi, koteuhi e fakapelepelei anai natou!
5Manuia natou ae e agamalu, koteuhi e natou mau anai te kele!
6Manuia natou ae e fia kai mo fia inu ki te faitotonu, koteuhi e natou makokona anai!
7Manuia natou ae e manavaofa, koteuhi e natou mau anai te manavaofa!
8Manuia natou ae e loto maa, koteuhi e natou sisio anai ki te Atua!
9Manuia natou ae e natou ave te tokalelei, koteuhi e fakahigoa anai natou ko te u foha o te Atua!
10Manuia natou ae e gaohi kovii o tupu ko te faitotonu, koteuhi e fakalogo kia natou te puleaga o te atu lagi!
11Manuia anai koutou, moka tauvelei anai koutou, moka gaohi kovii anai koutou pea moka lau anai kia koutou ni kovi kehekehe i te loi, o tupu ko au. 12Kotou fimalie pea kotou fiafia lahi, koteuhi e lahi anai tokotou fakapale i te atu lagi; koteuhi nee fena foki te gaohi kovii o te kau polofeta ae nee muamua atu ia koutou.
Te masima o te kele te malama o te malamanei
13Ko te masima koutou o te kele. Kae kapau e puli te konakona o te masima, e konakonai anai ia ia aki tea? E aoga pe ia ia ke li ki fafo pea ke malamalaki e te u tagata. 14Ko te malama koutou o te malamanei. Ko he kolo ae e tuu i oluga o he mouga e mole feala ke ugia; 15pea e mole anai tutu he malama ke puloui aki he foi kesi, kae e hili ia ia ki oluga o te hiliaga malama, pea e ina fakamalamai anai natou fuli ae e nonofo i te loto fale. 16Ke mu tokotou malama ia mua o te u tagata, o tupu ke natou sisio ki akotou gaue lelei, pea ke natou fakakololia ki takotou tamai ae e nofo i te atu lagi.
Kilisito mo te lao
17Aua naa kotou ui nee au hau o holoi te lao a Moisese pee ko te kau polofeta, nee mole au hau o holoi, kae o fakahoko. 18Koteuhi e au fakaha mooni atu kia koutou, e mole puli anai te kele mo te lagi kae e heeki fakahoko te u kii puani fuli pea mo te u kii matai tohi fuli o te lao. 19Ko ae e ina holoi anai he fakatotonu e tahi o te u fakatotonu liliki osi aena, pea mo ina ako anai ki te u tagata ke fai fenai, e fakahigoa anai ia ia ko te tagata veliveli osi i te puleaga o te atu lagi; kae ko ia ae e ina fai anai natou, pea e ina ako anai ke fai natou, ko ia aena e fakahigoa anai ko te tagata lahi i te puleaga o te atu lagi. 20Koteuhi e au ui atu kia koutou, kapau e mole fakalaka age takotou faitotonu i te faitotonu a te kau sekelipa mo te kau faliseo, e mole kotou ulu anai ki te puleaga o te atu lagi.
Laukovi, molaga, fakamolemole
21Kua kotou logo nee fakaha ki te kau matua mua: Aua naa ke fakapo; ko ia ae e fakapo anai e tonu ke ave ia ia ki te fakamaauaga. 22Kae ko au, e au ui atu kia koutou ko ia ae e ita ki tona tehina, e tonu ke ave ia ia ki te fakamaauaga; ko ia ae e ina ui anai ki tona tehina: Vale! E tonu ke fakatua e te fono lahi: pea ko ia ae e ina ui anai ki tona tehina: Uluvale! E tonu ke fakatua ki te afi o te seene*. 23Koia kapau e ke momoli tau molaga i te aletale, pea e ke manatu age i ai e nofo tou tehina mo he mea kia koe, 24tuku i ai tau molaga ia mua o te aletale, kae ke alu mua o fakatokatoka mo tou tehina; pea osi, e ke hau leva o momoli tau molaga. 25Fakatokatoka vave mo tou fili i te temi ae e kolua olo ai i te ala, o tupu ke aua naa ina ave ia koe ki te tui fakamaau, pea ke aua naa ave ia koe e te tui fakamaau ki te ofisa, pea ke aua naa ave ia koe ki te pilisoni. 26E au fakaha mooni atu kia koe, e mole ke mavae anai mai hena kae e heeki ke hui te foi piesi fakaosi.
Manumanu, tono, mavete ohoana
27Kua kotou logo nee fakaha: Aua naa ke tono. 28Kae ko au, e au ui atu kia koutou, ko ae e sio ki he fafine i he sio manumanu, kua tono ia ia mo te fafine aena i tona loto. 29Kapau e fakatupu higa kia koe tou foi mata matau, kapei ia ia o li mamao maia koe; koteuhi e lelei age kia koe ke mate he koga e tahi i ou koga sino, kae ke aua naa li tou sino katoa ki te afi. 30Pea kapau e fakatupu higa kia koe tou nima matau, tuusi ia ia o li mamao maia koe; koteuhi e lelei age kia koe ke mate hou koga sino e tahi i ou koga sino fuli, kae ke aua naa li tou sino katoa ki te afi.
31Kua fakaha: Ko te tagata ae e ina kapu tona ohoana e ina foaki anai kia ia he tohi mavete. 32Kae ko au, e au ui atu kia koutou ko te tagata ae e ina kapu tona ohoana, gata pe mo kapau nee tono ia ia mo he tagata, e ina tuku tona ohoana ke tono mo he tahi age tagata; pea ko te tagata ae e ohoana anai mo he fafine ae nee kapu e tona ohoana e ina fai anai he tono mo te fafine aena.
Takua noa, lagavaka
33Kua kotou logo foki nee fakaha ki te kau matua mua: Aua naa motuhi tau fakapapau, kae e ke fai anai ki te Aliki te mea ae nee ke fakaha i tau fakapapau. 34Kae ko au, e au ui atu kia koutou ke aua pe naa kotou fai he fakapapau e tahi: pee i te lagi, koteuhi ko te hekaaga ia o te Atua; 35pee i te kele, koteuhi ko tona hiliaga vae ia, pee i Selusalemi, koteuhi ko te kolo ia o te hau lahi. 36Aua naa ke fai foki he fakapapau i tou ulu, koteuhi e mole feala ke ke fakaliliu o hina pee uli he fului ulu pe e tahi. 37Ko takotou io ke io, pea ko takotou kailoa ke kailoa; ko te mea ae e ina fakalahi ia ia e hau mai te pule kovi.
Ofa ki te fili
38Kua kotou iloi nee fakaha: Mata ki te mata, nifo ki te nifo. 39Kae ko au, e au ui atu kia koutou ke aua naa kotou fakatutuu ki te tagata agakovi. Kapau e paaki koe e he tahi i tou kauahe matau, tuku age kia ia te tahi kauahe. 40Kapau e loto he tahi ke ina ave koe ki te fakamaauaga, o tupu ko tou kofu loto, toe tuku age kia ia mo tou pulupulu. 41Kapau e fakamalohi atu he tahi kia koe ke kolua fai he kilometa e tahi, fai ni kilometa e lua mo ia. 42Foaki ki ae e kole atu kia koe, pea aua naa ke litua ki ae e fia too maua ia koe.
43Kua kotou logo nee fakaha: E ke ofa anai ki tou oloi pea e ke fehia anai ki tou fili. 44Kae ko au, e au ui atu kia koutou: Kotou ofa ki okotou fili, koutou tapuaki kia natou ae e natou tutuku koutou, koutou fai te mea ae e lelei kia natou ae e fehihia mai kia koutou, pea koutou hufaki natou ae e agakovi mai kia koutou pea mo fakatagai koutou, 45o tupu ke kotou liliu ko te u foha o takotou Tamai ae e nofo i te atu lagi; koteuhi e ina fakahopo fakatatau tana laa ki te kau agakovi pea mo te kau agalelei, pea e ina fakato fakatatau tana ua ki te kau agatonu pea mo te kau agahala. 46Kapau e kotou ofa pe kia natou ae e ofa mai kia koutou, kotea te fakapale ae e kotou mau anai? Pe e mole fai fena foki te kau popelikano? 47Pea kapau e kotou fakaalofa pe ki okotou tehina, pe e kotou fai he mea mauhiga? Pe e mole fai fena foki te kau pagani? 48Koia ke kotou lelei tukupau, o hage ko takotou Tamai i selo e lelei tukupau.
Currently Selected:
EVASELIO A MATEO 5: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland