EVASELIO A MATEO 4
4
Fakahalai o Sesu-Kilisito
1I te osi o te mea aena, nee taki leva ia Sesu e te Laumalie Maonioni ki te toafa ke fakahalai e te tiapolo. 2Nee sesunio leva ia ia lolotoga ni aho e fagofulu mo ni po e fagofulu, pea nee fia kai leva ia ia. 3Nee fakaoviovi age leva te fakahala, o ui kia ia: Kapau ko te Alo ia koe o te Atua, fakatotonu ke liliu te u maka aena ko ni pane. 4Nee tali leva e Sesu: E tuu i te tohi: E mole mauli anai te tagata ki te pane pe, kae ki te u folafola fuli ae e hau mai te gutu o te Atua.
5Nee ave leva ia ia e te tiapolo ki te kolo tapu, o fakatuu i oluga o te fale tapu, 6pea nee ina ui leva kia ia: Kapau ko te Alo koe o te Atua, fakato ki lalo; koteuhi e tuu i te Tohi:
E ina tuku anai ni fakatotonu ki ana aselo o uhiga mo koe;
Pea e natou amo anai ia koe i onatou nima,
Ke aua naa i tou vae ki he foi maka.
7Nee ui leva e Sesu kia ia: E tuu foki i te tohi: E mole ke ahiahii anai te Aliki tou Atua.
8Nee toe ave leva ia ia e te tiapolo ki he mouga maoluga osi, pea nee fakaha leva e te tiapolo kia ia te u puleaga fuli o te malama-nei mo onatou kololia, 9pea nee ina ui leva kia ia: E au foaki atu anai kia koe te u mea fuli aena mo kapau e ke tulolo o atolasio mai kia au. 10Nee ui leva e Sesu kia ia: Fakamamao atu ia au Satana! Koteuhi e tuu i te Tohi: E ke atolasio anai ki te Aliki, tou Atua, pea e ke tauhi anai kia ia toko tahi.
11Pea nee tuku leva ia ia e te tiapolo. Pea koeni, nee omai leva he kau aselo kia ia, pea nee natou tauhi leva kia ia.
Kamataaga o te gaue a Sesu i Kafanaume
12Ko Sesu, i tana logo kua pilisoni ia Soane, nee mavae leva o alu ki Kalilea. 13Nee mole nofo leva ia ia i Nasaleti, kae nee alu leva ia ia o nofo i Kafanaume, ae nee tuu i te kauvai o te tai o Kalilea, i te fenua o Sapulone mo Nefetali, 14o tupu ke fakahoko te folafola ae nee fakaha e te polofeta ko Esaia:
15 Ko te hahai o Sapulone mo Nefetali,
Te fenua ae e tuu i te matatai, pea mo te fenua ae e tuu i te fahai ae atu o te Solotane,
Pea mo te Kalilea o te kau pagani,
16 Ko te hahai aena, nee felalai i te fakapouli,
Kua sisio ki he malama lahi;
Pea kua hopo te malama
Kia natou ae nee nonofo i te fenua pea mo te malu o te mate.
17Nee kamata leva mai ai te akonaki a Sesu, pea nee ina ui leva: Koutou fakahemala koteuhi kua fakaovi mai te puleaga o te atu lagi.
Kalagai o te u uluaki tisipulo
18I tana haele i te matatai o Kalilea, nee sio leva ia ia ki he tautehina, ko Simone, ae nee higoa ko Petelo, mo Atelea, tona tehina, ae nee na aau he kupega i te tai; koteuhi ko ni tagata tautai naua. 19Nee ina ui leva kia naua: Kolua muli mai ia au, pea e au fakaliliu anai kolua ko ni tautai tagata. 20I te temi pe aia, nee na tuku leva ona kupega, pea nee na muli leva ia ia. 21Pea nee alu leva ia ia mai ai, pea nee sio leva ia ia ki he tahi tautehina, ko Sakopo mo tona tehina ko Soane, foha o Sepeteo, ae nee nonofo i he vaka mo Sepeteo, tana tamai, pea nee natou onoono onatou kupega. 22Nee paui leva naua e Sesu, pea i te temi pe aia, nee na tuku leva te vaka mo tana tamai, kae nee na muli leva ia ia.
Gaue a Sesu-Kilisito i Kalilea
23Nee fealuaki leva Sesu i Kalilea katoa, o akonaki i te u sinakoka, mo ina fakaha te logo lelei o te puleaga, pea mo fakamauli te u mahaki mo te u maimoa fuli i te hahai. 24Nee mafola leva tona logologona i te fenua katoa o Silia, pea nee aumai leva kia ia natou fuli ae nee mamahi i ni mahaki pea mo te u mamahi kehekehe, mo ni hahai ae nee nonofo ai ni temonio, mo ni hahai ae nee mahaki tete, mo ni hahai palalisia, pea nee ina fakamauli leva natou. 25Nee muli leva ia ia ni hahai kaugamalie, mai Kalilea, mo Tekapole, mo Selusalemi, mo Sutea, pea mo te tua Solotane.
Currently Selected:
EVASELIO A MATEO 4: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland