EVASELIO A MATEO 6
6
Te fai meaofa
1Koutou tokaga ki te fai o takotou agatonu, ke aua naa kotou fai ia mua o te u tagata, o tupu ke sioi koutou: koteuhi kapau koia, pea e mole kotou mau anai he fakapale ia tafa o takotou Tamai ae e nofo i te atu lagi.
2Koia ka ke foaki he mea, aua naa ke pupuhi te fakatagi i ou mua, o hage ko te fai a te kau malualoi i te u sinakoka pea mo te u ala, o tupu ke viki ai natou e te u tagata. E au ui mooni atu kia koutou, kua natou mau tonatou fakapale. 3Kae ka ke foaki he meaofa, ke aua naa iloi e tou nima hema te mea ae e foaki e tou nima matau, 4o tupu ke fai fakafufu tau meaofa; pea e toe liufaki atu anai ia kia koe e tau Tamai ae e sio i te kogamea fakapulipuli.
Akonaki ki te faikole
5Ka kotou faikole, aua naa kotou hage ko te kau malualoi, ae e fia faikole tutuu i te u sinakoka pea mo te u magai ala, o tupu ke sioi natou e te u tagata. E au ui mooni atu kia koutou, kua natou mau tonatou fakapale. 6Kae ka ke faikole, ulu ki tou kogafale, pupunu tou matapa, pea ke faikole ki tau Tamai ae e nofo i ai i te kogamea fakapulipuli; pea ko tau Tamai, ae e sio i te kogamea fakapulipuli, e ina toe liufaki atu anai ia ia kia koe.
7Ka kotou faikole, aua naa kotou liuliuga ni kupu noa, o hage ko te kau pagani, ae e manatu e tali anai anatou kole i te lahi o anatou palalau. 8Aua naa kotou fakatatau kia natou; koteuhi e iloi e tokotou Tamai te mea ae e aoga kia koutou, i mua o takotou kole kia ia. 9Koia e tonu ke kotou faikole fenei: Tamatou Tamai ae e nofo i te atu lagi! Ke tapuha tou huafa; 10ke aumai tau pule; ke fai tou finegalo i te kele o hage ko selo. 11Foaki mai kia matou i te aho nei te pane o te aho taki tahi; 12fakamolemole mai ki amatou agahala, o hage ko tamatou fakamolemole foki kia natou ae e agahala mai kia matou; 13aua naa ke tuku matou ki te fakahala, kae fakamauli matou mai te pule kovi. Koteuhi a au te pule, mo te mafimafi pea mo te kololia i te u sekulo fuli. Ameni!
14Kapau e kotou fakamolemole ki te u tagata anatou agahala, e toe fakamolemole anai e takotou Tamai i selo kia koutou foki; 15kae kapau e mole kotou fakamolemole ki te u tagata, e mole fakamolemole anai e takotou Tamai akotou agahala kia koutou.
Sesunio
16Ka kotou sesunio, aua naa kotou mata mamahi, o hage ko te kau malualoi, ae e fetogi onatou mata koteuhi ke fakaha ai ki te u tagata e natou sesunio. E au ui mooni atu kia koutou, kua natou mau tonatou fakapale. 17Kae kapau e ke sesunio, fakamagoni tou ulu pea fakamaa ou mata, 18ke aua naa ha ki te u tagata e ke sesunio, kae ke ha ki tau Tamai ae e nofo i hena i te kogamea fakapulipuli; pea ko tau Tamai, ae e sio i te kogamea fakapulipuli, e ina liufaki atu anai ia ia kia koe.
He koloa fufu i selo
19Aua naa kotou tanaki ni koloa i te kele aeni, koteuhi ko te kogamea aena e maumau ai te ugogo mo te ukaukamea, pea ko te kogamea foki aena e puuhi ai pea mo kaihaa ai te tagata kaihaa; 20kae kotou tanaki ni koloa i selo, koteuhi ko te kogamea aena e mole maumau ai te ugogo mo te ukaukamea, pea e mole puuhi ai mo kaihaa ai te tagata kaihaa. 21Koteuhi ko te kogamea ae e tuku ai tou koloa, e tuku ai foki tou loto.
22Ko te foi mata ko te malama ia o te sino. Kapau e lelei tou foi mata, e malama anai tou sino katoa; 23kae kapau e kovi tou foi mata, e fakapouli anai tou sino katoa. Kapau anai ko te malama ae e mau ia koe e fakapouli, e feafeai anai te lahi o te fakapouli aia!
24E mole feala ki he tahi ke tauhi ki ni pule e toko lua. Koteuhi, e fehia anai ia ia ki te tahi, kae e ofa anai ia ia ki te tahi; pe e pipiki anai ia ia ki te tahi, kae e ina siaki anai te tahi. E mole feala ke kotou tauhi ki te Atua mo Mamone.
Tuania mo te u mataku
25Koia e au ui atu kia koutou: Aua naa kotou tuania ki tokotou mauli ki te mea ae e kotou kai anai, pee ki tokotou sino ki te mea ae e kotou laofi anai. Pe e mole mauhiga age te mauli i te meakai, pe e mole mauhiga age te sino i te mea laofi? 26Kotou sisio ki te u manulele o te lagi: E mole natou to magisi pe e natou utu, pea e mole pe natou tanaki he mea i ni fale tanakiaga magisi; kae e fafaga natou e takotou Tamai i selo. Pe e mole kotou mauhiga lahi age ia natou? 27Ko ai ae ia koutou e feala ke ina fakaloaloa tona mauli i he tuli nima e tahi aki ona tuania? 28Pea kotea e kotou tuania ai o uhiga mo te mea laofi? Kotou sisio pe e feafeai te tutupu ake o te u matala o te vao: E mole natou gaue pe e lalaga; 29kae e au ui atu kia koutou ko Salomone foki, i tona kololia katoa, nee mole teu o hage ko he tahi ia natou. 30Kapau kua teu fenai e te Atua te luna o te vao, ae e mauli i te aho nei, kae e liaki anai apogipogi ki te afi, pe e mole koutou mauhiga age ke ina laofi koutou, hahai tui vaivai? 31Aua pe naa kotou tuania, pea aua naa kotou ui: Kotea anai ka tou kai? Kotea anai ka tou inu? Kotea anai ka tou laofi? 32Koteuhi ko te u mea fuli aena e kumi e te kau pagani, kae e iloi e takotou Tamai i selo e natou aoga kia koutou. 33Kotou kumi mua te puleaga mo te faitotonu a te Atua, pea e fakalahi atu anai te u mea fuli aena kia koutou. 34Aua naa kotou tuania te apogipogi, koteuhi e tokaga te apogipogi kia ia totonu. Ki te aho taki tahi e feauga mo tona kinakina.
Currently Selected:
EVASELIO A MATEO 6: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland