EVASELIO A MATEO 7
7
Aua te fakamaau
1Aua pe naa kotou fakamaau, o tupu ke aua naa fakamaaui koutou. 2Koteuhi e fakamaaui anai koutou aki te fakamaau ae nee kotou fai, pea e fuafua anai koutou aki te fua ae nee kotou fakaaoga. 3Kotea e ke sio ai ki te kii otaota ae e pipiki i te mata o tou tehina, kae e mole pe ke tokagai te foi lalago ae e pipiki i tou mata? 4Pe e feafeai tau lava palalau ki tou tehina: Tuku mua ke au too te kii otaota mai tou foi mata, ia koe ae e pipiki te foi lalago i tou foi mata? 5Malualoi, too mua te foi lalago mai tou foi mata, pea hoki ke sio leva pe e feafeai te too o te kii otaota mai te foi mata o tou tehina.
6Aua naa kotou foaki te u mea taputapu ki te u kuli, pea aua naa kotou laku akotou lopa kia mua o te u puaka, koteuhi ke aua naa natou malamalaki natou aki onatou vae, pea ke aua naa natou mafuli mai, o hae koutou.
Fakamalohi ki te faikole
7Koutou kole, pea e foaki atu anai kia koutou; koutou kumi, pea e koutou mau anai; koutou fisifisi, pea e avahi atu anai kia koutou. 8Koteuhi ko ae e kole e ina tali, ko ae e kumi e ina mau, pea e avahi ki ae e fisifisi. 9Pe ko ai ia koutou e ina foaki anai he foi maka ki tona foha, moka ina kole age kia ia he moi pane? 10Pee, kapau e ina kole age he moi ika, pe e ina foaki age anai kia ia he gata? 11Koia kapau ko koutou, ae e agakovi, e kotou iloi te foaki o ni mea lelei ki akotou fanau, pe e mole toe lahi age te fia foaki e takotou Tamai i selo o ni mea lelei kia natou ae e kole age kia ia?
Te lao mauhiga; ala e lua
12Ko te u mea fuli ae e koutou loto ke fai atu e te u tagata kia koutou, koutou fai feia natou kia natou, koteuhi koena te lao pea mo te kau polofeta.
13Koutou ulu i te matapa lau veliveli. Koteuhi e lau lahi te matapa, pea e lau lahi mo te ala ae e na taki ki te maumau, pea e kaugamalie natou ae e ulu i ai. 14Kae e lau veliveli te matapa, pea e lau veliveli mo te ala ae e na taki ki te mauli, pea e toko sii natou ae e natou mau.
Polofeta loi
15Koutou tokaga ki te kau polofeta kaka. E natou omai kia koutou kua natou kofu o hage ko ni ovi, kae i loto ko ni lupo fekai natou. 16E kotou iloi anai natou i onatou fua. Pe e toli ni fuai vite i ni akau talatala, pee ko ni fiki i ni malualoi? 17Ko te fuu akau lelei fuli e fua lelei, kae ko te fuu akau ae e kovi e fua kovi. 18Ko he fuu akau lelei e mole feala ke fua ki ni fua e kovi, pee ko he fuu akau kovi ke fua ki ni fua e lelei. 19Ko te u fuu akau fuli ae e mole fua ki ni fua lelei e tuusi anai ia ia, o li ki te afi. 20Koia e kotou iloi anai natou i onatou fua.
Tauhi lotu loi
21Ko natou ae e natou ui mai kia au: Aliki, Aliki! e mole natou ulu fuli anai ki te puleaga o te atu lagi, kae e gata pe ki ae e ina fai te finegalo o taku Tamai ae e nofo i te atu lagi. 22E ui mai anai e he kaugamalie kia au i te aho aia: Aliki, Aliki, pe nee mole matou kikite i tou huafa? Pe nee mole matou kapu ni temonio i tou huafa? Pe nee mole matou fai ni tuuga milakulo i tou huafa? 23Pea e au palalau fakahaha atu anai kia natou: Nee mole pe au iloi koutou i he temi, kotou fakamamao atu ia au, koutou ae e kotou fai te agakovi.
Fale e lua
24Koia, ko ae e logo ki te u folafola aeni e au fakaha pea e ina fai natou, e tatau anai ia ia mo he tagata poto ae nee ina fakatuu tona fale i oluga o te utu. 25Nee to te ua, nee hau te u tafe, nee agi te u matagi, pea nee natou pato ki te fale aena: Nee mole pe holo ia ia, koteuhi nee fakatafito ia ia i te utu. 26Kae ko ae e logo ki te u folafola aeni e au fakaha, pea e mole ina fai natou, e tatau anai ia ia mo he tagata vale ae nee ina fakatuu tona fale i oluga o te one. 27Nee to te ua, nee hau te u tafe, nee agi te u matagi, pea nee natou pato ki te fale aena: Nee holo ia ia, pea nee lahi osi tona maumau.
28I te osi o tana palalau, nee punamauli osi te hahai i tana akonaki; 29koteuhi nee akonaki ia ia o hage ko he tahi ae e nofo mo te pule, kae e mole hage ko anatou sekelipa.
Currently Selected:
EVASELIO A MATEO 7: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland