EVASELIO A MATEO 8
8
Fakamauli o he tagata kilia
1I te hifo a Sesu mai te mouga, nee muli leva ia ia he hahai kaugamalie. 2Pea koeni, nee fakaoviovi age leva he tagata kilia o tulolo i ona mua, o ui: Aliki, kapau e ke loto ki ai, e feala ke ke fakamaa au. 3Nee faoi leva e Sesu tona nima, o fafa kia ia, o ui: E au loto ki ai, ke ke maa. I te lakaga pe aena nee maa leva ia ia i tona kilia. 4Nee ui leva e Sesu kia ia: Tokaga naa ke fakaha ia ia ki he tahi; kae alu o fakaha ia koe ki te tagata faisakilifisio, pea ave te molaga ae nee tohi e Moisese, ke fakamooni ai kia natou.
Fakamauli o te faifekau a te setulio
5I te ulu a Sesu ki te kolo ko Kafanaume, nee fakatuu leva ia ia e he setulio, 6o kolekole kia ia, o ui: Aliki, ko taku tagata faifekau e moe i fale, e palalisia pea e mamahi kovi osi. 7Nee ui leva e Sesu kia ia: E au alu anai, pea e au fakamauli anai ia ia. 8Nee tali leva e te setulio: Aliki, e mole aoga ke ke ulu mai ki toku loto fale, kae ke ui mai pe he folafola, pea e mauli anai taku tagata faifekau. 9Koteuhi, ko au aeni e maua fakalogo ki oku pule, e au pule ki ni tagata solia; pea e au ui ki he tahi: Alu! pea e alu ia ia; ki he tahi age: Hau! pea e hau ia ia; pea ki taku tagata faifekau: Fai te mea aena! pea e ina fai ia ia. 10I tana logo ki tana palalau, nee punamauli ia Sesu, pea nee ina ui leva kia natou ae nee muli ia ia: E au ui mooni atu kia koutou, i Iselaele foki, e heeki au mau he tui malohi fenei. 11Pea e au fakaha atu kia koutou, e omai anai he kaugamalie mai te hopoaga o te laa mo te toaga o te laa, pea e natou heheka anai i te laupapa mo Apalahamo, mo Isaake, pea mo Sakopo i te puleaga o te atu lagi. 12Kae e li anai te u foha o te puleaga ki te u fakapouli i fafo, ki te kogamea ae e logo ai anai ni tagi mo ni gugu nifo. 13Pea nee ui leva e Sesu ki te setulio: Alu, pea ke fai kia koe o mulimuli ko tau tui. Pea nee mauli leva te tagata faifekau i te hola totonu aia.
Fakamauli o te fae o te ohoana o Petelo
14Nee alu leva ia Sesu ki te fale o Petelo, pea nee sio leva ia ia ki te fae o tona ohoana e moe, kua ina mau te fiva. 15Nee fafa leva ia Sesu ki tona nima, pea nee mavae leva te fiva ia ia; pea nee tuu ake leva ia ia ki oluga, o selevisi kia Sesu.
16I te afiafi, nee aumai leva kia Sesu ni tagata avagaia e kaugamalie. Nee ina kapu leva te u laumalie kovi aki tana folafola, pea nee ina fakamauli leva te kau mahaki fuli, 17o tupu ke fakahoko te mea ae nee fakaha fakatomua e te polofeta ko Esaia: Nee ina too otatou maimoa, pea nee ina amo otatou mahaki.
Ahiahii o te kau tisipulo
18Ko Sesu, i tana sio ki he hahai kaugamalie ae nee natou takatakai ia ia, nee ina fakatotonu leva ke fakalaka ki te tahi ake kauvai. 19Nee fakaoviovi age leva he sekelipa kia ia, o ui: Pule e au muli atu anai ia koe i te u kogamea fuli ae ka ke alu ai anai. 20Nee tali leva e Sesu kia ia: E mau e te u lenato* ni onatou nofoaga, pea e mau e te u manulele o te lagi ni onatou fatai; kae e mole mau e te Foha o te tagata he kogamea ae ke malolo ai tona ulu. 21Nee ui leva e he tahi i te kau tisipulo kia ia: Aliki, fakagafua mai mua ke au alu o tanu taku tamai. 22Kae nee tali leva e Sesu kia ia: Muli mai ia au, pea tuku te kau mate ke natou tanu anatou mate.
Taofi e Sesu o te afa
23Nee hopo leva ia ia ki te vaka, pea nee muli leva ana tisipulo ia ia. 24Pea koeni, nee to leva he afa lahi i te tai, pea nee ta kovii te vaka e te u galu. Kae ko ia, nee moe ia ia. 25Nee fakaoviovi age leva te kau tisipulo, o fafagu ia ia, o ui: Aliki, haofaki tatou, naa tou mamate! 26Nee ina ui leva kia natou: Kotea e kotou matataku ai, hahai tui vaivai? Nee tuu leva ia ia ki oluga, o munai te matagi mo te tai, pea nee tokalelei osi leva. 27Nee punamauuli leva te u tagata aena, o natou ui: Ko ai te tagata aeni, ke fakalogo foki ki ai te u matagi pea mo te tai?
Kapu e Sesu o te u temonio i Katala
28I te kaku a Sesu ki te tahi age fahai tai, ki te fenua o te kau Katala, nee ulu mai leva ni tagata e toko lua mai ni tanuma, o omai ki ona mua. Nee fakamamahii te u tagata aena e he kau temonio. Nee na itaita kovi osi, o mole feala ke fakalaka he tahi i te ala aena. 29Pea koeni, nee na kalaga leva kia ia: Kotea te mea ae e ke loto ki ai o uhiga mo matou, Sesu, Alo o te Atua? Pe nee ke hau ki heni o fakamamahii matou i mua o te temi? 30Nee i ai he faga puaka lahi ae nee kakai o mamao maia naua. 31Nee kole leva e te kau temonio kia Sesu, o ui: Kapau e ke kapu matou, fekaui matou ki te faga puaka aeni. 32Nee ina ui leva kia natou: Kotou olo! Nee natou mavae leva, pea nee natou feulufi leva ki te faga puaka. Pea koeni, nee fetoki leva te faga puaka katoa mai te mata mato ki te tai, pea nee natou mamate leva i ai. 33Ko natou ae nee natou fafaga te faga puaka nee feholaki leva, pea nee natou olo leva ki te kolo o fakamatala i ai te u mea fuli ae nee hoko ki te faga puaka, pea mo te mea ae nee hoko ki te u tagata avea e toko lua. 34Nee hau leva te kolo katoa o fakafelavei kia Sesu; i tanatou sisio kia ia, nee natou kolekole leva kia ia ke mavae i tonatou fenua.
Currently Selected:
EVASELIO A MATEO 8: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland