Luk 12

Tising agensim wei fo no laea long pipol

(Matiu 10:26-27)

1Long#Matiu 16:6; Mak 8:15. wanfala taem, plande taosen pipol nao olketa hipap kam, go-go ples ya hemi barava ful fogud nao. An Jisas hemi tok olsem fastaem long olketa disaepol blong hem, “Yufala mas lukaot long diskaen yist wea hemi olsem wei blong olketa Farasi wea olketa save laea tumas long olketa pipol. 2Evrisamting#Mak 4:22; Luk 8:17. wea man hemi haedem, bae evriwan save luksave long hem nomoa. Ya, evrisamting wea hemi staphaed distaem, bae evriwan save long hem nomoa. 3An wanem yufala bin talemhaed, bae olketa pipol olketa heresave long hem. An wanem yufala bin talem smol long ia blong nara man insaet long rum blong yufala seleva, bae olketa talemaot bikfala fo olketa pipol herem.”

Tising abaotem paoa blong God

(Matiu 10:28-31)

4An Jisas hemi sei moa, “Mi talem long yufala olketa fren blong mi, yufala mas no fraetem olketa pipol wea olketa save kilim dae bodi blong yufala, an bihaen ya, bae olketa no save duim enisamting wea hemi nogud moa fo spoelem yufala. 5Bat bae mi som yufala watkaen man nao yufala mas fraetem. Yufala mas fraetem God hu hemi save kilim dae bodi blong yufala, an hu hemi garem paoa tu fo torowem yufala go long hel. Ya, mi talem long yufala moa, yufala mas fraetem hem.

6“Yufala save, faefala smolfala bed olketa save salem fo tufala blaksens#12:6 “blaksens” Long langguis long Grik hemi sei,“asarion”. Lukim “Seleni” long diksonari. nomoa. Bat nomata olsem, no eniwan long olketa bed ya God hemi fogetem ya. 7Yufala save, nomata olketa hea long hed blong yufala, God hemi save long evriwan. So yufala mas no fraetem enisamting, bikos yufala nao bikfala winim go moa plande bed ya.”

Tising abaotem man blong Kraes

(Matiu 10:32-33; 12:32)

8An Jisas hemi sei moa, “Mi talem long yufala, sapos eniwan hemi talemaot long olketa pipol wea hemi blong mi, bae mi San Blong Man tu mi talem long olketa enjel blong God wea disfala man ya hemi blong mi. 9Bat eniwan hu hemi talemaot long olketa pipol wea hemi no blong mi, bae mi San Blong Man tu mi talem long olketa enjel blong God wea disfala man ya hemi nating blong mi.

10“An#Matiu 12:32; Mak 3:29. sapos eniwan hemi talem samting agensim mi San Blong Man, God hemi save fogivim hem nomoa. Bat eniwan hu hemi tokspoelem waka blong Holi Spirit, bae God hemi nating save fogivim hem.

11“Bae#Matiu 10:19-20; Mak 13:11; Luk 21:14-15. olketa tekem yufala go long kot long olketa preahaos, an long frant blong olketa primia an long olketa nara man hu i rulim yufala. Bat long taem ya, yufala no wari abaotem wanem nao fo talem an hao nao fo ansarem toktok blong olketa. 12Bikos long taem ya, Holi Spirit nao bae hemi tisim yufala long wanem yufala mas talem.”

Tising abaotem risis long wol

13Nao, wanfala long olketa hu hemi stanap fo herem toktok blong Jisas, hemi talem Jisas olsem, “Tisa, yu talem brata blong mi fo hemi mas divaedem olketa samting wea dadi blong mitufala hemi lusim taem hemi dae, mekem hemi givim kam haf long mi.”

14Nao Jisas hemi sei, “!Man! Mi no garem paoa ya fo jajem bisnis blong yutufala an fo searemaot olketa samting long yutufala.” 15An Jisas hemi gohed fo tok olsem long olketa, “Yufala mas lukaot gudfala, nogud yufala garem diskaen tingting fo tekem enikaen samting fo yufala seleva nomoa. Bikos tru laef blong man hemi no stap long olketa samting wea hemi garem, nomata hemi garem plande samting tumas.”

16Bihaen, Jisas hemi talem wanfala tokpiksa long olketa olsem, “Wanfala ris man hemi stap an graon blong hem hemi gudfala graon, so hemi garem plande frut nao wea hemi redi long gaden blong hem. 17So go-go hemi tingting olsem long hem seleva nao, ‘?Wanem nao bae mi duim? Mi nating garem eni ples wea hemi fitim fo mi save kipim evri kaikai blong mi long hem.’ 18So hemi sei long hem seleva olsem, ‘Hem nao wanem bae mi duim ya. Olketa haos blong mi fo kipim kaikai long olketa, bae mi brekemdaon nomoa an bae mi wakem olketa haos wea olketa barava bikfala go moa. Bihaen, bae mi tekem olketa kaikai ya wetem evri narasamting blong mi moa an bae mi hipimap insaet long olketa haos ya nao. 19An bae mi tok olsem long mi seleva, yu garem plande gud samting fitim plande yia nao. So long distaem yu save stapgud an no wari. Yu save kaikai an dring an stap hapi nomoa evritaem.’ 20Bat God hemi tok olsem long man ya, ‘!Yu krangge man! Long disfala naet ya, bae yu barava lusim laef blong yu ya. ?An yu tingse hu nao bae hemi tekem olketa samting wea yu bin hipimap fo yu seleva?’”

21An Jisas hemi tok olsem nao, “Hemi olsem tu ya fo eniwan hu hemi hipimap olketa risis fo hem seleva nomoa, bat long saet blong God hemi nating garem enisamting.”

Tising abaotem wei fo trastem God

(Matiu 6:25-34)

22Jisas hemi tok olsem long olketa disaepol blong hem, “Dastawe nao mi talem long yufala, yufala mas no wari abaotem wanem nao bae yufala kaikaim, mekem yufala stap laef. An yufala mas no wari tu abaotem wanem nao bae yufala save werem long bodi. 23Bikos laef nao hemi bikfala samting moa winim kaikai, an bodi nao hemi bikfala samting moa winim kaleko yu werem. 24Yufala tingting fastaem long olketa bed ya. Olketa nating wari fo wakem eni gaden o fo tekem kaikai kam long gaden, an olketa no garem eni haos tu fo kipim kaikai long hem. Bat nomata olsem, God nao hemi fidim olketa. Bat yufala ya, yufala nao bikfala samting long ae blong God winim olketa bed ya. 25An nomata yufala wari tumas long laef blong yufala, yufala no save mekem laef blong yufala fo stap lelebet longtaem moa.#12:25 “yufala no save mekem …” Nara wei fo talem moa,“yufala no save mekem yufala kamap lelebet longfala moa”. 26?Sapos yufala no save fo duim olketa smolfala samting olsem ya, fo wanem nao yufala wari tumas abaotem olketa narasamting ya? 27Yufala#1 Kings 10:4-7; 2 Kronikols 9:3-6. tingting fastaem long olketa flaoa wea olketa grou olobaot. Olketa no duim eni waka an olketa no mekem eni kaleko. Bat mi talem long yufala, olketa flaoa ya barava lukgud tumas winim King Solomon hu hemi ris tumas an hemi werem enikaen barava spesol kaleko blong hem. 28Olketa flaoa olobaot ya, olketa save stap fo lelebet taem nomoa, an bihaen ya, olketa pipol save torowem olketa go long faea nomoa. Bat nomata olketa olsem, God hemi givim samting wea hemi lukgud tumas fo olketa werem. ?Bat yufala tingse bae God hemi no save givim kaleko long yufala? Biliv blong yufala hemi smolfala tumas ya.

29“An yufala no wari tumas, an yufala no tingting olowe long wanem nao bae yufala kaikaim an wanem nao bae yufala dringim. 30Olketa pipol long disfala wol wea olketa no biliv long God, olketa save wari oltaem abaotem olketa samting olsem ya. Bat yufala ya, Dadi blong yufala hemi save finis wea yufala laekem olketa samting ya. 31So yufala mas tingting oltaem long kingdom blong God. An evrisamting wea yufala laekem ya bae God nao hemi givim kam long yufala.”

Tising abaotem risis long heven

(Matiu 6:19-21)

32An Jisas hemi sei moa, “Yufala no fraet, nomata yufala smolfala seksin nomoa, bikos Dadi blong yufala hemi hapi tumas fo letem yufala stap insaet long kingdom blong hem. 33So yufala mas salem evrisamting wea yufala garem, an yufala mas givim evri seleni ya fo go long olketa pua pipol. Yufala mas yusim diskaen paos wea hemi no save olo an brek. Long disfala wei ya, yufala hipimap olketa risis blong yufala long heven wea bae olketa no save finis enitaem. An long heven ya, bae no eni man fo stil i save kam an no eni kokoros tu i save spoelem olketa samting. 34Bikos ples wea olketa risis blong yufala hemi stap long hem, long ples ya nao tingting blong yufala hemi stap long hem tu.”

Tising abaotem hao fo stap redi oltaem

35An#Matiu 25:1-13. Jisas hemi sei moa, “Evritaem, yufala mas stap redi nomoa olsem man wea lam blong hem hemi laet an hemi putum redi kaleko blong hem finis. 36Yufala#Mak 13:34-36. mas olsem olketa wakaman hu olketa weitem bikman blong olketa fo kambaek from fist blong marit, mekem taem hemi kam an noknok long doa, semtaem nomoa olketa save openem doa fo hem. 37Olketa wakaman ya olketa hapi tumas taem bikman blong olketa hemi kambaek an lukim dat olketa redi finis weitem hem. Mi talem yufala tru samting nao, bae bikman blong olketa hemi talem olketa fo sidaon fastaem, an bae hemi putum redi kaleko blong hem an gohed fo mekem kaikai fo olketa nao. 38Olketa wakaman i save hapi ya taem bikman blong olketa hemi lukim dat olketa redi finis weitem hem, nomata hemi kambaek long midol long naet o long eli moning, taem hemi tudak yet.

39“An#Matiu 24:43-44. yufala save, sapos man wea hemi onam haos hemi save long taem wea man fo stil bae hemi kam, bae hemi stopem disfala man fo no go insaet long haos blong hem. 40So yufala tu yufala mas redi olowe, bikos mi San Blong Man bae mi kambaek long taem wea yufala i nating save long hem.”

Tokpiksa abaotem tufala kaen wakaman

(Matiu 24:45-51)

41Nao Pita hemi sei, “?Masta, yu minim disfala tokpiksa ya fo mifala nomoa, o fo evriwan hu i hipap ya?”

42Nao Masta hemi tok olsem, “?Hu nao wakaman hu hemi waes an hemi save kipim promis olowe? Hem nao disfala man wea bos blong hem hemi putum hem fo lukaftarem olketa nara wakaman blong hem, mekem hem nao save givim kaikai long olketa long barava taem fo kaikai. 43Disfala wakaman ya, hemi save hapi tumas taem bos blong hem hemi kambaek an lukim dat hemi gohed fo duim waka blong hem gudfala. 44Ya, mi talem yufala tru samting nao, bae bos blong hem hemi putum hem fo lukaftarem evrisamting blong hem nao ya. 45Bat sapos wakaman ya hemi tok olsem long hem seleva, ‘Bos blong mi hemi no save kambaek kuiktaem ya.’ So hemi gohed fo ki-kilim olketa nara man an olketa nara woman wea olketa waka ya, an hemi gohed fo kaikai an dring go-go hemi drang fogud nao. 46Bat seknomoa, bos blong hem hemi kambaek nao long de an long taem wea wakaman ya hemi nating redi long hem. Bae disfala bos ya hemi panisim fogud#12:46 “panisim fogud” Nara wei fo talem moa,“torowem go”. disfala wakaman. Bae hemi panisim hem tugeta wetem olketa nara pipol wea olketa no duim waka blong olketa gudfala.

47“Nao sapos wanfala wakaman hemi save nomoa long olketa samting wea bos blong hem hemi laekem hem fo duim, bat hemi nating mekredi an hemi no duim olketa samting ya, bae olketa mas panisim hem fogud. 48Bat wanfala wakaman wea hemi no save wanem bos blong hem hemi laekem hem fo duim, an hemi duim rong samting ya tu, bae olketa no panisim hem tumas ya. Hemi olsem, bikos man wea God hemi givim plande samting long hem, bae God hemi laekem man ya fo hemi mas mekem plande samting ya. An man wea God hemi givim barava plande samting tumas moa long han blong hem, bae God hemi laekem man ya fo mekem plande samting tumas moa tu.”

Tising abaotem waka blong Jisas fo divaedem olketa pipol long wol

(Matiu 10:34-36)

49An Jisas hemi sei moa, “Mi ya, mi kam fo mekem faea long disfala wol. An mi laekem tumas fo disfala faea ya fo laet gudfala, bat hemi no kam yet. 50Bat#Mak 10:38. fastaem, mi mas go insaet long samting olsem baptaes wea bae mi safa an dae long hem. An oltaem nomoa, mi wari fogud go-go kasem taem disfala samting ya hemi gopas. 51?Waswe, yufala tingse mi kam fo mekem evriwan stap long piis long disfala wol? Nomoa ya. Bat mi kam fo divaedem olketa pipol ya. 52Stat long distaem, raoa bae hemi stap insaet long olketa famili. Trifala bae i raoa wetem tufala, an tufala bae i raoa wetem trifala. 53An#Maeka 7:6. bae dadi i raoa wetem san blong hem, an san i raoa wetem dadi blong hem. An bae mami i raoa wetem dota blong hem, an dota i raoa wetem mami blong hem. An bae mami-inlo hemi raoa wetem dota-inlo blong hem, an dota-inlo hemi raoa wetem mami-inlo blong hem.”

Tising abaotem olketa saen an fo stap redi fo panis blong God

(Matiu 16:2-3; 5:25-26)

54Nao Jisas hemi tok olsem long olketa pipol ya tu, “Sapos yufala lukim olketa klaod kamap long west, semtaem yufala tok olsem, ‘Oo, bae hemi ren ya.’ An go-go hemi ren tru nao. 55An taem win hemi blou kam long saot, yufala talem olsem nao, ‘Oo, bae hemi hot ya.’ An go-go hemi hot tru nao. 56Yufala barava krangge tru ya. Yufala save luksave long olketa samting long disfala wol an long skae tu. ?So waswe nao yufala no save luksave nomoa long wanem hemi go-gohed long distaem?”

57An Jisas hemi sei moa, “?Waswe nao yufala no save jajem fo yufala seleva wanem hemi stret samting fo yufala duim? 58Taem wanfala man hemi tekem yu go long kot, yu mas traehad fo stretem disfala trabol wetem hem, taem yutufala no kasem kot yet. Nogud hemi tekem yu go long frant blong jaj, an jaj hemi givim yu go long han blong olketa pulis, an olketa pulis i putum yu go insaet long prisin. 59Mi talem long yufala, sapos olsem, bae yu no save goaot from prisin nao, go-go kasem taem wea yu givim las seleni#12:59 “seleni” Long langguis long Grik hemi sei,“lepton”. Lukim “Seleni” long diksonari. wea hemi stap fo finisim faen blong yu.”

Zur Zeit ausgewählt:

Luk 12: SIPB

Markierung

Kopieren