Eistedd mewn Llonyddwch: 7 Diwrnod i aros y tu mewn i Addewid DuwSampl

DIWRNOD 2

EISTEDD MEWN LLONYDDWCH: BETH I’W WNEUD PAN MAE DUW YN DWEUD DIM BYD.

Mae yna adegau pan wnes i glywed Duw yn siarad, cael fy hun yn barod, gan ddisgwyl cyfarwyddiadau pellach, a chlywed dim am amser hir iawn. Mae yna hefyd adegau pan mae Duw wedi rhoi addewid i mi, ac roedd ar fy mhen cyn i mi gael amser i dreulio'r cyfan. Mae pwrpas i adegau fel hyn ac adegau pan mae wedi cymryd blynyddoedd i gerdded i mewn i addewid Duw dros fy mywyd.

Dw i’n cofio bod yn ifanc ac yn sengl yn ystod un tymor o fy mywyd. Ro’n i’n sengl iawn, y math o sengl lle nad oes cymar addas posib ar y gorwel. Ro’n i'n gwybod bod priodas wedi’i addo imi flynyddoedd lawer yn ôl, felly wnes i gario’r addewid hwn gyda mi. Wnes i erioed amau cynllun Duw ar gyfer fy mywyd, ond fe wnes i droi pob carreg drosodd i chwilio amdano. Weithiau ro’n i mor ofnus fel y byddwn yn ofni methu Duw trwy beidio canlyn neb. Byddwn yn poeni pe bawn i'n diystyru rhywun yn rhy gyflym, hyd yn oed pan doedd y person ddim yn teimlo'n iawn i mi. Doeddwn i ddim eisiau colli Duw, felly fe wnes i barhau i chwilio trwy ei dawelwch.

Dw i’n siŵr bod llawer o’r dewisiadau a wnes i yn ystod yr amseroedd tawel hynny, wrth drio “cynorthwyo Duw,” falle, wedi gohirio addewid Duw am fy mywyd. Fe wnes i ddewisiadau a achosodd i mi brofi mwy o dorcalon nag a gynlluniodd Duw ar fy nghyfer ar y daith hon. Fel Sarai, ro’n i'n meddwl bod angen fy help ar Dduw. Yn lle profi’n llawn y “mannau tawel” a osododd Duw ar fy nghyfer, wnes i drio helpu Duw a chyflymu’r broses.

Wrth edrych yn ôl, rwy’n gweld lle mae’r “mannau tawel” hynny wedi fy mharatoi ar gyfer lle dw i nawr. Roedd y lleoedd hynny yn dal i ddysgu ffydd a dyfalbarhad i mi ac yn caniatáu i mi brofi rhai pethau roedd angen i mi fynd drwyddyn nhw i gyrraedd lle dw i nawr. Dw i wedi bod yn briod ers saith mlynedd bellach, ac yn fy nghalon, dw i’n gwybod mai dyma'r lle y mae Duw wedi'i dynghedu i mi.

Beth wyt ti'n ei wneud yn yr amser rhwng Duw yn gosod addewid yn dy galon neu'n ei siarad dros dy fywyd a'r eiliad rwyt yn cerdded i mewn iddo? Rwyt ti'n oedi. Rwyt ti’n paratoi. Rwyt ti'n aros. Rwyt ti'n caniatáu i Dduw weithio ynot ti a thrwot ti. Mae Duw yn gwybod beth fydd ei angen arnat ti ar gyfer ble sydd ar dy gyfer, a dw i'n credu ei fod yn dy baratoi di yn y “mannau tawel.” Tra rydyn ni’n meddwl bod Duw wedi anghofio amdanon ni, mae’n gwneud ei waith pwysicaf yn yr amseroedd tawel hyn.