Luka 13
13
Ku kai ngiatatupela lri pacai
1Sakamani kwidra, la ikai ku umawmase ku peaelaela ki Yesu iya kai, yakai kudra la swa Galrilri sa patarumaramara ki Twaumase ku sapatarumarane kiapapacai ki Pilatu. 2Ku Yesu la iya kai, “Amani kikai la swa Galrilri sa vutha pacai, lu kidremedreme numi madradrau ku pasalrivane lini kudra ki drumane ka swa Galrilri amia numi? 3Nau pelaela numiane, kaika ngimiyaiya kwini; kathane lu ngitatupela numi, mialri numi ka lri kipadradresenge ku thadalrane ku angimiane. 4Sa mukadrulu ku abelenge ka daane ka Siluame la ta 18 ku umawmase ku kiadrepete si pacai, lu kidremedreme numi kai lalasu ngililisiane kudra ki drumane ku yakai Yerusalrime ku umawmase la iya numi? 5Nau pelaela numiane, kaika ngimiyaiya kwini; lwiyasi kai numi ngitatupela, mialri numi ka lri pacai.”
Kai pwamadru ka icizike ka angatu ka pathalrilriku
6La pacuungulu, ku Yesu pelaela liniane ku vaeva ka pathalrilriku, “Yakai kudra tangea ku umawmase ku yakai ki babudwaneini lredreke ku vaeva ka icizike ka angatu. La murimadru kwini ki angatu, ai kai maka kiadringai. 7La kawriva ki taramarasikaikai, ‘Drela, kai ki tinara tulrwane ka caili, wasilapaku ku madru kai ki icizike ka angatu, ai kadrwa ku kidringaili. Alra calrigi pulebe iniane! Asi pasawlrawlra pangutaikaiyanane ki kadaengane?’ 8Kwini taramarasikaikai ki angangade la iya kai, ‘Tawki, ala nau tara cailiana, mamelreana thalringulu si pulrange. 9Lwiyasi pumadru luicaili la palrainga; sana kai ngimia kwini, pwanga calrigi.’ ”
Yakai ki Taisadrasadrane ka vai pawdringai ki macukulu ka ababai
10Yakai saka Taisadrasadrane ka vai, ku Yesu la ikai kudra ki taluvaale ki rarubwane ki swa Yuda bulrubulru ki umawmase. 11La ikai kudra ababai ku kiaikai ki aidridringane, ku takacaemane tara 18 ka caili, la tacukulanane kai maka dringelresane. 12Ku Yesu sadrele iniane, la dawlu iniane, si iya kai iniane, “Kusu ka ababai, kiadailinga muswane kwini caemanesu!” 13Ku Yesu la ansu iniane, la makakaai dringelresane kwini alisu, si drengedrengere ki Twaumase.
14Kwini mabelenge ki tarakadrekadrenge ki rarubwane ki swa Yuda sadrele ki Yesu sa pawdringai ki macaeme ikai ki Taisadrasadrane ka vai, la kagirimucu turamuru, si iya kai ki laumawmase, “Kuta yakai ku minakanemelane ku takawaungane, lu lri sulravane ki macaeme naika yakai adringi madu kai ki minakanemelane, naikai ikai ki Taisadrasadrane ka vai.”
15Ku Tamatama la tubalre iniane, “Kusu ka ngiakathaithaitharirane ka umawmase, bekace numi kai mukerenge ku lwange, ku ruba, si iluku paungulu ku acilai luka Taisadrasadrane ka vai? 16Kikai alisu mwabaibalrithi ki Aberahame, ka kiakerenge ki Satange tara 18 ka caili, ikai ki Taisadrasadrane ka vai, bekaceta kai mwalra mukerenge kwini sakerengane iniane?” 17Kikai vaga ki Yesu la kainu turamuru ku labadhaini, ai ku laumawmase papia kudra ki piaini patuelre ku matiasamali ku awngane makitu kiraragai makanaelre.
Sapaivai ka Masetarade ka pathalrilriku
(Matai 13.31-32; Maruku 4.30-32)
18Ku Yesu la iya kai, “Ku kuni ki Twaumase mia ki manemane? Lri malraku ku manemane si pakiramau? 19Ku kuni ki Twaumase maru amaninga kwidra beraberathane ka sapaivai ka masetarade, la ikai ku umawmase ku paivai pwa ki lrialringuluini. Kwi masetarade sa cebe kadrawnga, avaeva ka angatu, adravane ka laadhadhame la ikai tulisisuku ibelenge ki ricingini.”
Sapawsemasemakane ka pathalrilriku
(Matai 13.33)
20Ku Yesu la iya kai, “Lri malraku ku manemane si pakiramau ki kuni ki Twaumase? 21Maru amaninga kwidra sapawsemasemakane, la ikai ku tangea ku ababai ku wamalra pwadringi ki masupatele ka kunsenge ka milrikinku, la pawsemake patueelre ki milrikinku.”
Ngwatiki ka lrawlrawdru
(Matai 7.13-14, 21-23)
22Ku Yesu la lribate ki taikaalra ka cekele, papia Yerusalrime katwase, la tarakadalranane bulrubulru ki umawmase. 23La ikai ku umawmase ku kiavaga iniane, “Tamatama, ku kiapalribulu ku umawmase kai lri takalra?”
24Ku Yesu la tubalre liniane, “Kunumi lri kisamula numi ngukakai ki ngwatiki ki lrawlrawdru mudaane. Nau pelaela numiane, yakai ku takaalra ku umawmase ku apia mudaane, ai kai maka mwadaane. 25Lu ngidrakalenga si elebe kudra tawki ki daane, la acegecege numi ikai lrawlrawdru si bangebange, iya kai, ‘Sinsi, mueleba naiane!’ Kwi lasu lri tubalre iya kai, ‘Kainaku wathingale numiane luka twalai numi inu kainganai!’ 26Lai lri iya numi kikai, ‘Kunai nataelre nai muswane kalringulu kanekane ungungulu; la ikaisu ki kadalranane ki cekele nai bulru naiane.’ 27Ai, kwini lasu lri iya kai, ‘Nau pelaela numiane, kainaku wathingale numiane luka twalai numi inu kainganai. Kunumi ka manganga ka laumawmase, lu katwasa!’ 28Wadrele numi ki Aberahame, Isake, Yakubu, si layuginsia yakainga adringi ki kuni ki Twaumase makanaelre, ai lu kipakatwasenga numi pulatadre, lai lri tubitubi numi si apararitaitaiti ku valisi! 29Twalai ki tali talrawane tali sapakalriwgu tali lrawdru tali dradha ikai inu kidruanga lri ikai ku umawmase kela kipaelre ki apangiakaneanane ikai ki kuni ki Twaumase. 30Kudra la naabilrili, lri athamadalanenga; ala ku athamadalane, lai lri abiilrilinga.”
Pasiakai Yerusalrime adirivane tubi
(Matai 23.37-39)
31Ki kwidra yai, yakai ku tapiya ku swa Palrisai ku wakela mwa ki Yesu, si iya kai iniane, “Lri tara katwasesu kidaili kikai mwa talidrumane, asi lwiyane ku Hirudi kiasanu papacapacai muswane.”
32Ku Yesu la tubalre liniane iya kai, “Lu katwasa pelaela kwini ki kalailalri, ‘Dredreela! Kaikameane si lwiya lri pakatwasaku ki aidridringane si pawdringai ki macaeme, luka samakatulrulu lai lri patulrepengaku kai awnganeli.’ 33Adravane ka ngimiyaiya kai, kaikameane, lwiya, lu pakavale, lri tara padrumulraku katwase, asi lwiyane, kai yuginsia kai swadalepe kipapacai itali drumane lukai ikai Yerusalrime.
34“Swa Yerusalrime, swa Yerusalrime, papacaisu ki layuginsia, la arakaisu ku lrenege papacainga ku sikawlu ki Twaumase ku nisikawlane mwa muswane kikai! Kingipialenga naku nau palribulu iya ki lalalakesu, mia ki tina ka kuka ka waalra sarubu ki lakiakiau pilebe ki sapakepake. Ai kai numi mwabangalre! 35Drela, ku daane numi lri aubulane. Nau pelaela numiane, twalai kaikameane kai numi lri drelenga nakwane, pakeela ku aiyane numi kai, ‘Ku Twaumase ani subulrubulru kudra ki pangwakai ku nagane ki Tamatama si kela!’ ”
Dewis Presennol:
Luka 13: NDV
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2017
All rights reserved
© 臺灣聖經公會版權所有，2017