Luka 12
12
Pakiapapawlringau ki ngikathaithaitharirane
(Matai 10.26-27)
1Kikwidra, tathathatha ku laumawmase taelre madrikidrikidrikisi, la madredredredrenga. Ku Yesu la paswala ki lasitu iya kai, “Kunumi ngipapalakeba ki sapawsemasemakane ki swa Palrisai, amani kudra ngikathaithaitharirane lini. 2Sanaka nisekeseketane patuelre lri tara kiputaluvaivai kimatikai; kudra kaika nithingathingalane lri kiputaluvaivai kithingale. 3Lakamani, ku ikai numi kadradridrimitane kawriva ku vaga lri ikai ki kalealedrane kikilalra ki laumawmase; kudra nimatetengeane ku vaga ikai ki nielebane ka daane lri ikai kwini ki cavalri ki daane si kimatikai pulatadre.”
Aneane ku lrika amukuludrane
(Matai 10.28-31)
4“Latalragilragi, nau pelaela numiane, kudra wadulru papacai ki kinawmasane sikakathane, lai kai lri dulru kabebetethe numiane, madha mukulukuludru. 5Lri pakipapawlringavaku ku naika amukuludrane numi lukaaneane: Ku amukuludrane numi amani kudra lri malra iluku ku niake ki umawmase, si la ikaiyana ku puku malra cilri pwa swadriadringi ka Twaumase. Unu, nau pelaela numiane, kudra naika amukuludrane numi ala amani kwini lasu!
6“Ku lrima ka rulungu wadulru madu arakai ku drusa ku paisu langai, ai ku Twaumase adravane ka vaeva kai lri karimuru; 7adravane ka isiu numi niasipaneenga. Lakamani, kunumi madha mukuludru, kunumi makuciacingalre numi turamuru ki thathatha ka rulungu!”
Wathingale ki Kirisitu
(Matai 10.32-33; 12.32; 10.19-20)
8“Nau pelaela numiane, sanaka yacucubungu ki umawmase si wathingalaku iya nakwane, ku Lalake ki Umawmase lri icucubungu ki sasiakawlu belenge ki Twaumase lri mialri wathingalaku iniane iya; 9sanaka yacucubungu ki umawmase si kainaku wathingale iya nakwane, kai Lalake ki Umawmase lri icucubungu ki sasiakawlu belenge ki Twaumase mialri kainaku wathingale iniane iya.
10“Kudra kawariva pasalriu ki Lalake ki Umawmase, lri dulru kipacepe; ai kudra twadreadrekase ki Siri ku umawmase, kailri maka dulru kipacepe.
11“Ku palrapalra lu iluku numiane pwa rarubwane ki swa Yuda, ku wailuku numiane mucucubungu ki tabebelenge ku wamwa ki warathudu si kisaibaibange, madha kakalikalithi ku lrika angipapasikaiyane ngipapalribulu kidrikisi kawrivariva, si ku manemanaini ku akawrivaneli iya; 12asi lwiyane lukamaninga kwidra, ku Siri lri pelaela numiane ku aiyane numi avavaga.”
Kadrwa ku thingale ka maesaesaesai
13Kwini ki mapapangale yakai ku tangea ku amia kai ki Yesu, “Sinsi, ala kawriva ki betakaneli, nai mavala ka cungulu ki ama ka tacekecekelane nai.”
14Ku Yesu la tubalre, “Talragi, aneane ku wacegecege nakwane tu tarasaibaibange numiane si pasikai numiane apavalavala ku tacekecekelane?” 15La pacungulu papia ki laumawmase iya kai, “Kunumi kipapawlringava ngikakadrenge, mubera kwini ki makaelaela ka laravane; asi lwiyane kuta ka umawmase adravane ka ngitwatumane ku takaesadhane, kudra patengatengane ka niakeini, kai singiakai kudra luka thaininu ku tacekecekelaneini.”
16Ku Yesu la pelana pelaela liniane ku vaeva ka pathalrilriku, “Yakai ku tangea ka maesaesaesai ka umawmase, la ngiesadhane ku umawmaini; 17kwini lasu la pikidremedreme iya kai, ‘Kai kadrwanga ku makakelrete ku swadravane ku lrika tapikaiyane pudringai kai latalekeli, lai lri tumanaku?’ 18La ngiiya kikai kwini lasu, ‘Ala nau pia kai, lri malraku suburu kwini sakwakadrawsulu, si tupela pia kudra madradrau, la sekete kai lataleke si drumane ka lalawbubulu, 19lai lri ngiiyaku kai, sasisipiyanenga ka umawmase, kai pakaikaingasu singibila sanaka mathaariri ka lamanemane, makakelretesu kawlai arakai, ngiabababalai kisupisupilri, kanekane ungungulu, si ngulwadhane ngilribalribate ku vaisu!’ 20Ai, ku Twaumase lri iya kai iniane, ‘Kusu ka makulrungu ka umawmase, kaimaungu, lri malraku kwi niakesu; lu mia kwini, kwini ngipapasikaikaisu pudringadringai patuelre kwi tacekecekelane lai lrika aneananenga?’ ”
21Ku Yesu la turingaringau iya kai, “Kudra la ngiapapasikaikai pudringai ku tacekecekelane, ikai ki maca ki Twaumase kaika maesaesai mialri ka ngimiyaiya kikai.”
Swadralru ki Twaumase
(Matai 6.25-34)
22Ku Yesu la iya kai ki lasitu, “Lakamani, nau pelaela numiane, madha ngwalalai ki sapanianiakane ku akaneane, ku asilaimadhane ki kinawmasane si kidremedreme turamuru. 23Kai niake makuciacingalre turamuru ki akaneane; kai kinawmasane la mialri ka makuciacingalre turamuru ki laimai. 24Drela kwidra la talralreba: Kai walredrelredreke kai kiataletaleke, la kakadrwa ku drawsulu ku tasekeseketane, ku Twaumase la lapulaapwana liniane. Kunumi kai numi ka silrialribate turamuru ki adhadhame ku kucingalrane! 25Ikai numiane laka aneane ku wadulru ngukai ki thekelrane si drimana panianiake ku minakapialane#12.25 “si drimana panianiake ku minakapialane” ku wahunyake madu iya kai “arwa kaelrenge kaadrau ku piya ka leketane”.? 26Alaiyasi kunumi adravane ka miyaiya kai ka tikithane ka awngane la kainu maka pia, asingithanga kakalithi kudra ki drumane ka awngane? 27Drela ki bariangalai lu pangitumane kaadrau: Kai mawaungu, la kai tulaimaimai. Ai nau pelaela numiane, adravane ka miyaiya ki Sulumungu ka talialalai ku matidalamane ku lrigu ku tharirane, kudra laimaini kai maka kiaramawana kudra ki vaeva ka yaubulane ka bengelrai. 28Kai yaubulane ka bengelrai si ubulu mwataluvaivai lukamialrealre, lukakaiyane la kalraici, si kiputalabwane lama, ai ku Twaumase la piana kikai pangiragelane liniane, ku Twaumase kai lrika mababaai numiane ku laimai kamani? Kwi salrwane numi ala tikithane turamuru! 29Lakamani, kunumi madha kidremedremedreme lukamanemane ku akaneane numi, ku awngulane, si pasikai ki lamiyaiya kai kawpupungu ki kidremedreme. 30Kilakikai yai, kisilasilape kudra ki kaiyana masalru ka umawmase. Ku Tama numi ka yasubelebelenge wathingale patuelre ku murikaikai numi kilakikai. 31Kunumi paswala kipasilape ku angimiane ku puku ki Twaumase, lani baai numiane kikai patuelre.”
Matiakai ki tacekecekelane subelebelenge
(Matai 6.19-21)
32“Kunumi ka tabeekele ka laumawmase, madha mukuludru, asi lwiyane ku Tama numi kiararagai baai ku kunini numiane. 33Kilangadha patuelre kudra tacekecekelane numi, la malra kwini paisu paralubu kudra ki matiakukuru; ngipapasikaiya padulru kudra kai lri kalisi ka tapaiswane, la pudringai ku tacekecekelane pikai subelebelenge. Ikai kwini, ku tacekecekelane kai madu maka pakaelre arakai; asi lwiyane kai maka kwaupa ku tarakupawpa, laka kadrwa ku nalubalubainga ku lri pakaburau. 34Lu ikainu ku tacekecekelane numi, lri ikaai kwini ku kidremedreme numi.”
Masimeameace kipapawlringau ka sasiakawlu
35“Kunumi katangipapadulrwana tupudriadringai, lrithethe silakete si padalai ku tinaki, 36mia ki sasiakawlu lu mukalavalava ki tawki ku akelane twalai ki tangiakaneanane ki marudrarudrange. Ku tawki lu kela si bangebange ki lrawlrawdru, kwini lalasu la makakai pasikai iniane muelebe ku lrawlrawdru. 37Sakela kwini tawki, la drele kai ki lasasiakawlu la kasimeameace kipapawlringau kai lalasu, kai lalasu yakainga ku akaesadhane lini! Nau pelaela numiane, ku tawki lri silakete, si panene liniane si pakane ku aga, ngikakamani marasikai liniane. 38Adravane ngiabalai kai tawki pakela ki kabiceacelrakane ki maungu pakela ki malialiare ala kela, alaiyasi drele kai ki lasasiakawlu laka masimeameace kipapawlringau, kikai lalasu yakainga ku akaesadhane! 39Pulringava kikai: Kudra tamatama ki daane alaiyasi thingale luka amani lwigane ku akelane ki tarakupawpa, lri tara duulru kai pawdaane kwini ki tarakupawpa. 40Kunumi la mialri katangipapadulrwana, asi lwiyane ku Lalake ki Umawmase lukai numi pulringalringau lri kela.”
Matiasudralru si kai matiasudralru ka sasiakawlu
(Matai 24.45-51)
41Ku Pitiru la iya kai, “Tamatama, kikai pathalrilriku papiasu naiane pelaela, papiasu ki mapapangalenga pelaela?”
42Ku Tamatama la iya kai: “Luka miyaiyakai, laka aneane ku asudralrwalrwane ku malrigili ka sasiakawlu? Amani kudra kiasudralru ki tawki kela marasikai ki tacekecekelane, si singikai ki zikange apavalavala ku taleke ki drumane ka lasasiakawlu kwini umawmase. 43Lu kelanga kudra tawki, la drele kai ki sasiakawlu ku takapatenganane si pangimia ki awnganeini; kikai sasiakawlu lri kaesailriinga turamuru! 44Nau pudriadriingai pelaela numiane, kwini tawki lri sikawlu iniane marasikai ki tacekecekelaneini patuelre. 45Ai, kikai sasiakawlu alaiyasi la kidremedreme kisaisange, ‘Alau lri kai sarakela ku tawki’, lakamani ku pwalrima lrumai ki drumane ka lasasiakawlu si lasasiakawlu ka ababai, si kanekane ungungulu kabusubusuku, 46ku tawki lai lri ikai kudra ki kaika tapulringalringavaneini ka vai, ikai ki kaika thingathingaleini ka zikange ala keela. Kudra tawki lri pakilringau kaelaelathe lrumai iniane#12.46 “lri pakilringau kaelaelathe lrumai iniane” ku wahunyake madu iya kai “lri malra sisau liniane pakatwase”., lai lri kipakaredele ki kaika asudralrwalrwane ka lasasiakawlu kipathavungu.
47“Ku sasiakawlu lu thingale ku pia kwini iya ki tawki, la kai padulru, la kai pia pangimia ku kidremedreme ki tawki; lu mia kwini, lri kipangicaeme kilrumai. 48Ala kwidra kai wathingale ku kidremedreme ki tawki ku sasiakawlu la pia ku lrika akilrumadhane ku awngane, kai lasu lrika pangiababalai ku akilrumadhane. Ku Twaumase lu pakakalra baai ki aneane, lrika makakaalra ku lrika amalrane iniane; luka makaakalra ku sudralruini ki aneane, ku murikaini iniane lrika madraadrau.”
Tangwaladhane si mawvagavagai
(Matai 10.34-36)
49“Ku takelaneli mwa kai kawmasane lri padaladhaku ku apwi, la sidramaku ku kwadaladalainga! 50Nai kipabanavaku ki akwalriane. Si sakaiyana ngimia kikai akipakwalrianeli, kiapakwalri kai kidremedremeli! 51Kunumi alau mailuku ku amakadawdalrwane mwa kai kawmasane madha iyaiya nakwane. Nau pelaela numiane, kainaku ka wakela iluku ku amakadawdalrwane, amanilringa ku amawvagavagadhane kamani. 52Twalai kaikameane, kudra talrima ku wacekecekele lri mawvagavagai, ku tatulru la lri kikalisi ki tadrusa, ku tadrusa la lri kiecebe ki tatulru. 53Kwi lalasu lri marivurivu: Ku tatama lai lri kikalisi ki lalake, ku lalake lai lri kiecebe ki tama; ku tiatina lalri kikalisi ki lalake ka ababai, ku lalake ka ababai lai lri kiecebe ki tina; ku takitharevane ka tina lri kikalisi ki kiathareve, ku kiathareve lai lri kiecebe ki takitharevane ka tina.”
Maka wadrele ku sasakaladhane ki zidai
(Matai 16.2-3)
54Ku Yesu la iya kai ki laumawmase, “Lu drele numi ki talriwgane ki vai la mutaluvaivai ku ememe, makakaai numi iya kai, ‘Lri udalenga’, ala ka patengane ngimia. 55Lu vaivaivalrigi singi tali lrawdru, la iya numi kai, ‘Lri kaculunga kai saseverane’, ala ka patengane ngimia. 56Kunumi ka langiakathaithaitharirane ka umawmase, malrigili numi drele ku tangimiamiane belenge, asi kai maka thingale drele ku tangimiamiane kai ki zidai?”
Makakadalrwa kudra ki mapapaecebesu
(Matai 5.25-26)
57“Anu kai maka ngikakamani thingale lukamanemane ku mamamwa kathariri? 58Alaiyasi ikai ku umawmase ku lri kukusu muswane, lri malra bilibili muswane mwa ki takisaibaibangane, pakaelrea ku pukusu, sa ikadalrananasu kikadalrwana iniane, amani lu kimalrasu patarumara pwa ki tarasaibaibange, ku tarasaibaibange lai malra muswane baai ki kisace, ku kisace lai emenge muswane putaememengane. 59Nau pelaela muswane, lu pakelasu kudra tapawkesaanesu baai ku sathavungane ka bibiilrilinga ka vaeva ka tangupia, lri kaisu maka kipulatadre twalai taememengane.”
Dewis Presennol:
Luka 12: NDV
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2017
All rights reserved
© 臺灣聖經公會版權所有，2017