Luka 14
14
Ku Yesu pawadringai ki macaeme ka umawmase
1Saka Taisadrasadrane ka vai, ku Yesu wamwa ki daane ki tangea ka mabelenge ki swa Palrisai kane ku aga; la ikai ku la walelelepenge drele iniane. 2La icengeecenge ikai cucubungu iniane ku tangea ku macaecaeme pakilringau mubalrake ku kinawmasane, 3ku Yesu la kivaga kwini ki latarabulrubulru ki hulrice si swa Palrisai iya kai, “Kai hulriceta pinalrainganaini ikai ki Taisadrasadrane ka vai pawdringai ki macaeme?”
4La makitu icelrebe makanaelre kai avavagavaga. Ku Yesu la alra drakale kwini ki lasu, si pawdringai iniane, la pakatwase. 5Ala kamani ku iya kai ki laumawmase kwi lasu, “Ikai numiane aneane ku yakai ku lalake si ku yakai ku lwange la ikai ki Taisadrasadrane ka vai tuverevere mwa ki dralremedreme, si kai kisaswarau malra bilibili pubelenge?”
6Kikai lalasu ku takivagane ki Yesu la kai maka tubalre.
Ngiatatwalebe si tapiapiane lu marasikai ki badhabadha
7Ku Yesu kiararakete kudra ki labadhabadha ku wapilri ku madradrawnga ku taetalane ikai ki tangiakanekaneanane, la arakai ku pathalrilriku iya kai ki laumawmase, 8“Lu kidawlusu si kipaelre ki ngiakanekaneane ki marudrarudrange, madha nenene ikai ki niwsakenane ka taetale, amani lu ikai ku maiyalri kidawlu ku matikiusaesakene muswane ka badhabadha. 9Kudra amani ku wadawlu muswane pakipaelre ka tawki lri kela mwa muswane si iya kai, ‘Kai taetalesu panenea kai ki lasu!’ Lu mianga kwini, lri kiarubwanesu, si lai mwasu ki salrilrilriikudrunga ka taetale. 10Lu kidawlusu yai, nenea mwa ki salrilrilriikudrunga ka taetale, si lani kamaaninga ku tawki ku amia kai muswane, ‘Talragili, bwala nenea mwa ki niwsakenane ka taikaiyane.’ Lani ikai ku lrigusu icucubungu ki labadhabadha. 11Asi lwiyane ku Twaumase lri alra kudra ki ngiatatuabelenge ka umawmase si parwalebe, lai parwabelenge kudra ki ngiatatualebe ka umawmase.”
12Ku Yesu la iyana kai kwini ki wadawlu iniane ka tawki, “Lu tasubadhabadhasu patukudrali patukwaubu, madha dawdawlu ki latalrailragisu, si betakanesu, retesanesu, kudra ki lasapaiswane ka pasiagiagisisu, amani lu pangibilri muswane. 13Lu tasubadhabadhasu, dawla kudra ki matiakukuru, ku kai kiatulrepenge ku kinawmasane, ku mapiapilai, ku mukimukici ka umawmase; 14lu piasu kai, yakainga ku akaesadhanesu, asi lwiyane kwini laumawmase kadrwa ku puku lini pangibilri muswane. Ala kudra luka tasielane ki madringelrese ka umawmase, ku Twaumase lri ngikakamani pangibilri muswane.”
Pathalrilriku patharukai ki marudrarudrange
(Matai 22.1-10)
15Kudra kialringulu ku tangea sakilalra kikai vaga, la iya kai ki Yesu, “Ku lri dulru kilringulu ikai ki kuni ki Twaumase ala mwaesai turamuru!”
16Ku Yesu la iya kai iniane, “Yakai kudra umawmase ku pangiakaneane twadrau, si dawlu ki takaalra ki badhabadha. 17Sa daruru ku zikange ki angiakaneanane, kwi lasu la sikawlu ki lasasiakawlu pakatwase mwa ki nidawlane ka labadhabadha kawriva iya kai, ‘Bwala, maka padulrunga patuelre!’ 18Ai kwi lalasu pathagili tarungangeea makitu pukaiyane. Kwini aswalaalanga amia kai, ‘Tau langalangadhaku ku kadaengane, kai mwadringai lu kainaku mwa drele. Sabau, kainaku lri maka kela.’ 19Kudra tangea la iya kai, ‘Walangadhaku ku lwange taralrima ku sawvalai si ababai, lri tau katwasaku palalava. Sabau, kainaku lri maka kilringulu.’ 20La iya kai kudra tangeanga, ‘Tau karudrarudrangaku, kainaku lri dulru kipaelre.’ 21Kwini sasiakawlu la siwlri si pelaela ki tawki ku tangimiamiane. Kwini tawki la pakamalisi turamuru, si iya kai ki sasiakawlu, ‘Kirarimwa katwase, mwa ki lakadalranane ki cekele, si malra iluku ki lamatiakukuru, si lamapiapilai, si lamukimukici, si lamacaeme kalrunai ku drapale ku umawmase kela pudaane.’ 22La kai tarathainu, kwini sasiakawlu la kela si iya kai, ‘Tawki, ku tapadrekadrekasanesu pangiamianga naku, ai yakaiyana kai makaalra kai taetalane!’ 23Ku Tawki la iya kai ki sasiakawlu, ‘Lu mwa ki lamaadrau ka kadadalranane si langwatiki ka kadadalranane ki cekele, si bilibili ki umawmase pudaane, panene pasuete ki daaneli.’ 24Nau pelaela numiane, kudra nakiadawlu ku laumawmase lri kai dulrunga kane kikai pangiakaneaneli!”
Balrithane lu asitwane ki Yesu
(Matai 10.37-38)
25Yakai ku takaalra ku umawmase ku twapapapalra ki Yesu dadavace. Ku Yesu la ngibangulu si iya kai liniane: 26“Ku wakela kai nakwane ku umawmase ku takilibakane nakwane lu kai ka makadrwadrwa ki marudrawdrangeini, ki tawaneini, ki lalalakeini, ki labetakaneini ka sawvalai ka ababai, adravane iniane, kai lri maka dulru asitu nakwane. 27Ku kai mwabangalre angeale ku ziwzikaini si tupapalra nakwane, mialri kai lri maka asitu nakwane. 28Kunumi aneane ku lu lri tudaane ku abelenge ka daane, si kai paswalana nene apakisaisange, drele lu lri ikai ku sarakaiyane patulrepenge ki awngane? 29Amani, luiyasi tududainga, la kai maka pacegecege ku daane yai, ku wadrele ku laumawmase lri makitu mulralrakai iniane, 30si iya kai, ‘Kikai umawmase pathagili kaungu, ai kai maka wadulru tulrepenge!’ 31Alaiyasi ikai ku tangea ku talialalai la mailuku ku takudrai ku kwapingi, si lri mwa makakaruburu ki taingea ka mailuku ku ta 20,000 ku kwapingi yai, kwini lasu lri tara paswala neneana si ngikakisange ku pukuini, dredrele lu lri maka dulru kiecebe ki badhaini; 32alaiyasi kai lri dulru, kwini lasu sa yadailiana ku badha, lri pakatwase ku kiasikawlu si mwa kikawriva ku apangimiane makadawdalru. 33Mararaamau, kunumi adravane ka aneane, lu kai numi sarare sanaka manemanenga, kai numi lri maka asitu nakwane.”
Kadrwa ku luludane ka timu
(Matai 5.13; Maruku 9.50)
34“Kai timu sakwa kathaariri, ai lu ngwalrane ku tasangutimwane, lri dulrwanata peela pasangutimu? 35Adravane malrane paadae si paalrangeane kai lri sudalepe, acilrianenga sikakathane. Ku yakai ku calringa, makitu kilalra!”
Dewis Presennol:
Luka 14: NDV
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2017
All rights reserved
© 臺灣聖經公會版權所有，2017