Luka 15
15
Pathalrilriku ka amuli kawlrau ka kiu
(Matai 18.12-24)
1Yakai saka nikingivaalane, ku latarakikaziluzilu si tanganganga ka laumawmase wakela si kilalalra ku tabulrwane ki Yesu. 2Ku la swa Palrisai si tarabulrubulru ki Sisiu la kalisi iya kai, “Kikai umawmase ani tarumara ki manganga ka umawmase, si taelre liniane kalringulringulu!” 3Ngwalai kikai, ku Yesu la pelaela liniane ku vaeva ku pathalrilriku:
4“Alaiyasi ikai numiane ku tangea ku umawmase ku yakai ku idai ku kiu, la kawlrau ku vaeva, lri tumanaini? Kwini lasu lri tara sarare kwini ki 99 ka kiu pikai tapagwagwane, si katwase silape kwini ki amuli, pakeela ku takidringadhane. 5Sana kidringai, kwini lasu lri tara kiraraagai turamuru si malra angeale kwini ki kiu, 6si iluku putavanane, ala dawlu ki latalragilragini si pasiagiagisi, si iya kai liniane, ‘Bwala taelreaili kiraragai, kudra amuli ku kiuli kiadringainga naku!’ 7Thadaalrane, nau pelaela numiane, ku tangitatupelane ki pasalrisalriu ka umawmase, ku sakiaragai ki swa subelebelenge lrika silrialribate ku takiragadhane kudra ki yakainga ku 99 ka kai lri ngitatupelanga ka madringelrese ka umawmase!”
Maulrau ku paisu ka pathalrilriku
8“Alaiyasi ikai ku tangea ku ababai la pikai ku mangeale ka paisu, ala pakawlrau ku vaeva, lri tumanaini? Kwini alisu lri tara padalai ku tinaki, si swape ki daane salraelre, pudriadringai silape, pakeela ku takidringadhaneini. 9Lu kidringainga, lai lri dawlu ki lalialini si pasiagiagisi, si iya kai liniane, ‘Bwala taelreaili kiraragai, kudra pakawlrauli ku paisu kiadringainga naku!’ 10Thadalrane, lri pelaelaku numiane, ku sasiakawlu ki Twaumase lri mialri ngwalai kudra ki tangea ka pasalrisalriu ka umawmase ku tangitatupelaneini si kiraragai.”
Mathalrai ka Tatama ka pathalrilriku
11Ku Yesu la pacungulu kawriva, “Yakai kudra umawmase ku yakai ku tadrusa ku sawvalai ku lalake. 12Kwini agiagi la iya kai ki tamaini, ‘Ama, kaiasasane ala kudra naika akitudruulraneli ku tacekecekelane baadhaili.’ Kwini tatama la pawdrusa ku tacekecekelane si pavala kwini ki tadrusa ka lalake. 13La kai tarathainu ku vai, kwini agiagi la kilangai ku kitudrulruini ku tacekecekelane, si iluku kwini paisu, la katwasenga ki daane lini. Kwini lasu la katwase mwa kudra ki adaili turamuru ka cekele, si ikai kwini ngilralraingi pasawlrawlra ku tapanianianiakane. 14Kwini lasu saarakainga akaelre ku ngipapikaini, kwini talikai kwini la kipadradresenge ku pakialringau ku silravane, kwini lasu la matikuru si kakadrwanga ku manemaneini, 15la mwanga satalu kudra ki taingeane ka wacekecekele; kwini wacekecekele la sikawlu iniane pamwa kwidra ki talapulapwane ki bekeini, si lapulapu ki beke. 16Kwini lasu pasana kanekanenga kwini bekane ka lepelepe; ai, la kakadrwa ku umawmase ku wabaai iniane ku akaneane. 17Sakabilrilanenga, kwini lasu la pulringaunga, si iya kai, ‘Ikai ki ama kwini yakai ku takaalra ku tarakawaungu, kwini lalasu la makakelrekelrete ku akaneane, lai lri ikaiyaku kikai si kiarasilravane pacai? 18Ala nau ngidrakale, si siwlri mwa ki ama, si iya kai iniane: Ama, pasalrivaku ki Twaumase, la mialriaku pasalriu muswane. 19Kainaku lri maka sudalepenga ka lalake muswane; nau kamaninga ku tarakawaungu muswane!’ 20Sa iya kwini, kwini lasu la katwase mwa ki tamaini.
“Sa idaailiana ki daane lini, kwini tamaini la paimaimaimaanga iniane, si la sueete ku thalradhane, si katwase kidredresenge, la kebere ki lalakeini, la apaumauma iniane. 21Kwini lalake la iya kai, ‘Ama, pasalrivaku ki Twaumase, la mialriaku pasalriu muswane, kainaku swadalepenga ka lalakesu.’ 22Ai kwini tatama apadrekadrekase ki sasiakawlu iya kai, ‘Kirarimwa malra ku mathaithaariringa ku laimai si pasilaimai, la malra ku tara si pasitara iniane, la malra ku kece si pasikece iniane, 23la malra kudra yacengecenge ka lwange si culu, lata ngiakaneane makanaelre si kiraragai! 24Asi lwiyane kai lalakeli wapacai si la sielane, maulrau si la kikidringainga.’ La makitu kirararagainga makanaelre.
25“Saicengecenge kwidra, ku takataka ka lalake la ikai umawma kawaungu. Sa kelakela, si deethenga ki daane lini, la kilalra ku lingau ki wasenasenai si wadradradralrai. 26La dawlu kudra ki tangea ku sasiakawlu, si kivaga iniane watumatumane iya. 27Kwini sasiakawlu la tubalre iya kai, ‘Wakelanga ka agi, sadrele ka tamasu sa udringadringai kela, la culu ka lwange.’ 28Kwini takataka la kalisi turamuru, si kai mubangalre mudaane; ku tamaini la kela mulatadre si saasa iniane. 29Ai kwini lalake kiarimulringa iya kai ki tamaini, ‘Drela, kai tinarapiane ka caili, miaku kau sasiakawlu pasikaikai muswane kaungu, kainaku wabaebalreana ku taiyanesu, manemanenga ku baaisu nakwane? Adravane ka navaevanga ka tikiane ka kiu ku sapakapeaperavanesu nakwane ki talrailragili kadruana! 30Ai kikai lalakesu, wamalra ku tacekecekelanesu pasawlra pikai ki pairairange, la kikai siawlringa, la kirimusu pasikai iniane culu ku lwange!’ 31Ku tamaini la iya kai iniane, ‘Lalakeli, kai tataelreanesu nakwane apalralrawthu; kai sanaka manemaneli muswane patueelre. 32Ai kikai agi maru wapacainga si la sielane, ka namaulrau si la kikidringai, lu pasikaiyane iniane pangiakaneane kiraragai yai naika apiane madu.’ ”
Dewis Presennol:
Luka 15: NDV
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2017
All rights reserved
© 臺灣聖經公會版權所有，2017