Lucas 14
14
Jun xjal at mal ti'j b'anix tu'n Jesús
1At jun q'ij te ojlab'l okx Jesús wa'l tuj tja jun xjal nejenel kye fariseo, ex in che ke'yin txqantl fariseo ti'j alkye tu'n tb'inchante Jesús tuj q'ij te ojlab'l. 2Ex ultzun jun xjal twitz Jesús, at mal ti'j. 3Xitzun tqanin Jesús kye chik'b'al ti'j ley ex kye fariseo:
—¿Q'o'npelo tu'n ley tu'n tq'ananjtz jun xjal tuj q'ij te ojlab'l ex qa mi'n? Chi Jesús.
4Atzun kye minti' e q'ajt. Tzajtzun ttzyu'n Jesús aju xjal at mal ti'j ex b'anix tu'n, ex xi tma'n te tu'n taj tja. 5Xitzun tma'n Jesús kye fariseo:
—¿Alkye jun kyxole, qa ma ku'x tz'aq jun tk'wa'l#14.5 Tk'wa'l. At junjun ojtxi ttxuylal yol in kyma'n: Tbur. ex qa jun tchej tuj jun jul, mlaypelo jatz ti'n naj maskelo tuj q'ij te ojlab'l?
6Ex minti' b'ant ttzaq'wenjtz jlu kyu'n.
Qe xjal txko'n tuj mejeb'le'n
7Tej tke'yinte Jesús tza'n tten mas kyajb'il xjal tu'n kykub' qe' tuj jun q'uqb'il tb'anilxix, xi tma'n jun yol kye qeju otoq che txkonjtz:
8—Ok ttxkonjtza tu'n jun xjal tu'n t-xi'ya tuj mejeb'le'n, mi'n kub' qe'ya tuj ju q'uqb'il tb'anilxix, mya yajku otoq txkonjtz juntl mas ma' toklen twitza, 9ex oktzun tul ju otoq tzaj txkonte kyeye ok tma' teya kyja': Tik' laq'e'ya tuj q'uqb'il lu ex qekuya tuj juntl q'uqb'il. Kjawiltzun ch'ixwiya, ex kb'el qe'ya tuj mankb'il q'uqb'il. 10Ex ok ttxkonjtza, txi'ya ex qekuya tuj mankb'il q'uqb'il; oktzun tul aju kxel txkonte teya ok tma' teya kyja': Amiw, laq'etz ch'intla ntxlaje; ex ma'lo t-xilena kywitz qeju in che kub' qe' tuk'ila ti'j mes. 11Ex alkye jun xjal in jaw tniman tib', k'okel q'o'n te ch'in; ex alkye ma tz'ok tq'on tib' te ch'in, kjawil nimsa'n.
12Ex xi tma'n Jesús teju xinaq xi txkonte te:
—Qa ma tb'inchaya jun nintz wa'n, ex qa taja tu'n kyul xjal wa'l tuk'ila, mi'n che tzaj ttxko'na qe tamiwoya, qe termaniya, qe xjal at t-xilena kyuk'il ex qe tvesina q'inun; ex jakulo txi txko'ntla kyu'n tu'n twa'na kyuk'il, atzun t-xelju tzul q'o'n teya. 13Ok tkub' tik'sa'na jun ninq'ij, txkontza qe meb'a, qe xjal tzkaj kyten, qe kox, ex qe moẍ; 14at tzalajb'il teya ikju, ex mlay b'ant kyu'n tu'n ttzaj kyq'o'n t-xel teya, maxitzun ktzajel q'o'n t-xel teya okxi kyjatz anq'in qe xjal tz'aqlxix.
Aju techal ti'j jun nintz wa'n
Mateo 22.1-10
15At jun xjal q'uqltoq ti'j mes, tej tb'inte jlu xi tma'n te Jesús:
—At tzalajb'il te jun xjal kwa'l tuj tkawb'il Dios.
16Xitzun tma'n Jesús te:
—At jun xjal o tb'incha jun nintz wa'n, ex e tzaj ttxko'n nimku xjal. 17Tej tpon or te wab'l, xi t-sama'n xjal jun tmajen q'malte kye qeju otoq che txkonjtz: Kytzaje, porke ma b'ant tten tkyaqil, chikuya, chi xjal. 18Ex kykyaqil tzaj kyma'n tiqu'n mlay che tzaj. O tma ju tnejel: Ma laq'et ch'in ntx'otx'e, ex il ti'j tu'n nxi'ye ke'yilte; chin kub'sale twitza mlay chinxe. 19Ex o tma juntl: Ma laq'et jwe' moj nwakẍe, ma chinxe aq'nal kyuk'il tu'ntzun tik' nwitze kyi'j qa b'a'n qe; chin kub'sale twitza mlay chinxe. 20Ex o tma juntl: Ma ẍin moje'ye, tu'ntzun jlu mlay chinxe. 21Tej tul meltz'aj ju majen, xi tma'n tkyaqil jlu te tpatrón. Tzajtzun tq'oj patrón, ex xi tma'n te tmajen: Juratx t-xi'ya kyuj plas ex kyuj cay tuj tnam, ex q'intza qe meb'a, qe xjal tzkaj kyten, qe kox, ex qe moẍ, chi xjal. 22Tejtzun tul meltz'aj majen, xi tma'n te tpatrón: Tat, ma b'ant wu'ne ik tza'n saj tma'na, ex atx lugar. 23Xitzun tma'n patrón te tmajen: Txi'ya kyuj b'e ex kyuj tal tq'ab' b'e ex q'onka il kyi'j xjal tu'n kytzaj, tu'n tnoj njaye. 24Ex kxel nma'ne kyeye, qe xjal e tzaj ntxko'ne nej, mi jun kxel nik'b'ente wab'j ma b'ant wu'ne, chi patrón.
Kyuw tu'n qok lpe' ti'j Jesús
Mateo 10.37-38
25Nimku xjal lepchqe'k ti'j Jesús; ex ajtz meltz'aj twitz kyuk'il xjal, ex xi tma'n kye:
26—Qa at jun xjal ma tz'ok lpe' wi'je, ex qa o'kx tok tk'u'j ti'j tman, ti'j ttxu', ti'j t-xu'jil, kyi'j qe tk'wa'l, kyi'j qe ttzik ex qe titz'in, ax ikx ti'j tchwinqlal, mlay tz'ok te nxnaq'tzb'ene. 27Ex alkye jun xjal mya q'i'n tcrus ex mya lepcho'k wi'je, mlay tz'ok te nxnaq'tzb'ene. 28Ex alkye jun kyxole, qa taj tu'n tb'ant jun ja tu'n, ¿mlaypelo kub' qe' ximal ti'j nej nik'pun knajel tu'n, qa akux aju pwaq tu'n tb'ant ja? 29Mya yajku mlay japun b'aj tu'n, ex otoq kub' qe' t-simyentil ja, tu'n jlu kykyaqil qeju in che ke'yin ti'j che okel ten tze'l ti'j, 30ex ok kyma': Ate xjal lu ok ten b'inchal tja ex ma kyaj tx'aqe' tu'n, che chilo. 31Ex alkye jun rey, qa ma txi' q'ojlel ti'j juntl rey, ¿mlaypelo kub' qe' ximal ti'j nej qa jaku xkye' ti'j winqin mil t-soldad juntl rey in tzaj q'ojlel ti'j, atzun te noq laj mil q'i'n tu'n? 32Ex qa mlay xkye' ti'j, na'nxtoq tul kanun juntl, che xel t-sama'n kab'e t-sanjel qanilte te juntl alkye taj tu'n t-xi q'ot te tu'ntzun twe' q'oj. 33Kyja'tzun, alkye jun kyxole qa minti' xkyaj tq'o'n tkyaqilju at te, mlay tz'ok te nxnaq'tzb'ene.
Aju atz'an otoq naj ta'w
Mateo 5.13; Marcos 9.50
34B'a'n te atz'an; ex qa ma naj ta'w, ¿tza'n tten tu'n toktl ta'w? 35Minti'tl tajb'en, mi te tx'otx', mi te t-samel tz'is, o'kx tu'n tex xo't. Alkye at t-ẍkyin, b'inx aju yol lu.
Právě zvoleno:
Lucas 14: MAMNO
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
